Motho wa Asia Bohlabela Nageng ya Italy ya Bogologolo

Motho wa Asia Bohlabela Nageng ya Italy ya Bogologolo

GO TLILE bjang gore nywageng e 2 000 e fetilego motho wa Asia Bohlabela a feleletše a le Mmušong wa Roma ya bogologolo? Ye ke potšišo yeo baepi ba marope ba ilego ba ipotšiša yona ka morago ga gore ba utolle selo sa go makatša ka borwa bja Italy ka 2009.

Lefelo e be e le la mabitla a bogologolo a Roma kua Vagnari, e lego dikhilomithara tše 60 ka bodikela bja Bari. Ba ile ba hwetša marapo a batho ba 75. Diteko tšeo di ilego tša dirwa marapong ao di bontšhitše gore bontši bja batho bao ba be ba belegetšwe motseng wa kgaufsi. Lega go le bjalo, marapo a monna yo mongwe a ile a makatša banyakišiši. Ge go hlahlobja DNA ya disele tša gagwe, e ile ya bontšha gore bagologolo ba lešika la mmagwe ba be ba etšwa Asia Bohlabela.a Marapo a gagwe a bontšhitše gore ke a lekgolong la pele goba la bobedi la nywaga C.E. Pego ya mabapi le go hwetšwa ga marapo ao e re, “go bonagala e le la mathomo marapo a motho yo a nago le bagologolo kua Bohlabela bja Asia a ile a hwetšwa Mmušong wa Roma.” Ka gona, monna yo e be e le mang?

Pego yona yeo e re: “Mathomong motho a ka nagana gore motho yo a ka be a tswalana le kgwebo ya silika yeo e bego e atlegile magareng ga China le Roma.” Lega go le bjalo, go naganwa gore kgwebišano e bjalo e be e dirwa gare ga lelokelelo la bareki bao ba rekišago, ge e le gabotse go se na motho yo a sepelago leeto la dikhilomithara tše 8 000 magareng ga China le Italy.

Lefelo leo marapo a a hweditšwego go lona le re botša’ng? Mehleng ya bogologolo, Vagnari e be e le motsemagae—naga yeo e bego e bušwa ke mmušiši—moo bašomi ba bego ba tološa tšhipi gomme ba tšweletša dithaele tša letsopa. Bontši bja bašomi ba moo e be e le makgoba gomme go bonala le motho yo wa ka Bohlabela e be e le lekgoba. Ge e le gabotse, lebitla la gagwe e be e se la mohumi. Dithoto tša gagwe tšeo di šetšego, tšeo di bolokilwego le yena, e be e le feela pitša, gomme setopo se sengwe se be se bolokilwe godimo ga sa gagwe.

Ke ka baka la’ng kutollo ye e le yeo e tsošago kgahlego? Go phatlalala ga molaetša wa Bokriste lekgolong la pele la nywaga C.E. go be go ithekgile ka gore batho ba bogologolo ba be ba sepela go fihla kae. Beibele e bega gore ka morago ga Pentekoste ya 33 C.E., ditaba tše dibotse di ile tša išwa kgole le kgauswi ke batho bao ba bego ba etetše Jerusalema. (Ditiro 2:1-12, 37-41) Bonyenyane, marapo a a bontšha gore ka nako yeo batho ba bangwe ba be ba tloga Asia Bohlabela go ya seleteng sa Mediterranean.b

[Mengwalo ya tlase]

a Dinyakišišo tša DNA seleng ga di nee tsebišo mabapi le bagologolo ba tatagwe.

b E bile go na le bohlatse bja gore batho ba ka Bodikela ba be ba eya Asia Bohlabela. Bona sehlogo sa “Baromiwa ba be ba ka Fihla Kae ge ba E-ya ka Bohlabela?” ka tokollong ya Morokami wa January 1, 2009.

[Mmapa go letlakala 29]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

ROMA

Vagnari

Lewatle la Mediterranean

ASIA BOHLABELA

LEWATLE LA PACIFIC

[Seswantšho go letlakala 29]

Marapo a motho wa asia bohlabela a utollwa mabitleng a bogologolo a Roma

[Mothopo]