Nako ya go Dula re Phafogile

O KA dumela gore go dula o phafogile ge o le sekolong go bohlokwa. Ba bangwe ba swarwa ke boroko ge ba le ka klaseng, eupša gore o ithute, o swanetše go dula o phafogile. Mohlomongwe le wena o ya dibokeng moo o ithutago Beibele gona.

O nagana gore ke eng seo o ka se dirago go go thuša go dula o phafogile?—a Se sengwe seo o ka se dirago ke go robala ka pela bošego. Mohlomongwe go robala ganyenyane thapama go ka go thuša. Anke re boneng seo re ka ithutago sona go seo se ilego sa diragalela mofsa yo mongwe yoo a ilego a robala bošegong bjo bongwe nakong ya ge moapostola Paulo a nea polelo. Lebelela ka Beibeleng go Ditiro kgaolo 20, ditemana 7 go ya go 12, gomme o bone seo se ilego sa direga.

Paulo o be a etetše phuthego yeo e bego e le motseng wa boemakepe wa Teroa. Beibele e re Paulo o “be a tla sepela letšatšing le le latelago” ka sekepe. Ka gona o ile “a telefatša polelo ya gagwe go fihla bošegogare.” Re bala gore: “Lefasetereng go be go dutše lesogana le lengwe le le bitšwago Oitiko leo le ilego la ya ka boroko ge Paulo a dutše a bolela.” Go ile gwa direga’ng ka morago?—

Oitiko o ile a wa a tšwa ka lefasetere “go tšwa lebatong la boraro.” Paulo le ba bangwe ba ile ba kitimela tlase ka manamelo ka pela ka mo ba ka kgonago. Oitiko o be a le fase—a hwile! Na o ka akanya gore ka moka ga bona ba be ba nyamile gakaaka’ng?— Beibele e re Paulo o ile a kuka Oitiko gomme a mo gokarela. Go se go ye kae Paulo o ile a goeletša ka lethabo a re: ‘Le se ke la tshwenyega, o a phela!’ Modimo o be a tsošeditše Oitiko bophelong!

Ke’ng seo re ka ithutago sona ka Modimo go tšwa go seo se diragaletšego Oitiko?— Se sengwe ke gore Jehofa, Tatago rena wa legodimong, a ka tsošetša bahu bophelong, go akaretša le bana. Jehofa o a go kwešiša e bile o a go rata, ee, o go rata go feta le batswadi ba gago. Ge Jesu a be a le mo lefaseng, o ile a bontšha gore Tate o bjang ka go gokarela bana le go ba šegofatša. O ile a tsoša le bana, go akaretša le ngwanenyana wa nywaga e 12.

Go tseba gore Tatago wa legodimong o a go rata go dira gore o ikwe bjang?— Ee, go dira gore le rena re rate Jehofa e bile re nyake go kwa seo A se bolelago. Na o a tseba gore re ka bontšha bjang gore re a Mo rata?— Tsela e nngwe ke ka go bolela gore re a mo rata. Jesu o itše: “Ke rata Tate.” Eupša Jesu ga se a ka a bolela feela gore o rata Modimo. O ile a bontšha se ka seo a bego a se dira.

Jesu o ile a kwa Modimo. Jesu o itše: “Ka mehla ke dira dilo tše di mo kgahlago.” Ge e ba re dira se se swanago, gona gore re kgahle Jehofa le Morwa wa gagwe, Jesu, re tla leka go dira sohle seo re se kgonago gore re dule re phafogile ge go nyakega.