Na Bakriste ba Lekgolong la Pele la Nywaga ba be ba Tšea Karolo Dipolitiking?

▪ Pele a rotogela legodimong, Jesu o ile a nea barutiwa ba gagwe ditaelo tše di kwagalago tša kamoo ba swanetšego go phetha bodiredi bja bona, eupša ga se a ka a akaretša keletšo le ge e le efe ya tša dipolitiki. (Mateo 28:18-20) Ka baka leo, barutiwa ba gagwe ba ile ba tšwela pele ba diriša molao wa motheo woo Jesu a bego a ba neile wona pejana, o rego: “Neang Kesara tša Kesara eupša Modimo le mo nee tša Modimo.”—Mareka 12:17.

Molao woo wa motheo o ile wa thuša barutiwa ba Jesu bjang gore ba phele lefaseng eupša e se be karolo ya lona? Ba ile ba tseba bjang dilo tšeo e lego tša mmušo, goba Kesara, le tšeo e lego tša Modimo?

Moapostola Paulo o be a lebelela go tšea karolo dipolitiking e le go tshela mollwane. Puku ya Beyond Good Intentions—A Biblical View of Politics e re: “Paulo o be a ikemišeditše go tsoma tšhireletšo ya tša molao yeo e mo swanetšego a diriša tshwanelo ya gagwe ya go ba modudi wa Roma, eupša ga se a ka a tšea karolo dingangišanong tša mehleng yeo tša dipolitiki.”

Paulo o ile a nea Bakristegotee le yena tlhahlo efe? Puku yona yeo e oketša ka gore: “Mangwalo ao a a ngwaletšego badumedi ba lego metseng e megolo e bjalo ka Korinthe, Efeso gotee le Roma a be a sa bontšhe go kgahlegela dingangišano tša dipolitiki.” Puku yeo e bolela le gore Paulo “o ile a laela gore go ikokobeletšwe mmušo, eupša mangwalong a gagwe a mantši ga go moo a neago taelo ya gore kereke e be le tšhušumetšo mekgatlong ya batho bohle.”—Baroma 12:18; 13:1, 5-7.

Bakriste bao ba phetšego nywagasome ka morago ga lehu la Paulo ba ile ba tšwela pele ba beile mollwane woo magareng ga seo ba swanetšego go se nea Modimo le seo ba swanetšego go se nea mmušo. Ba ile ba tšwela pele ba hlompha mebušo ya dipolitiki eupša ba dutše ba phema go tšea karolo dipolitiking. Puku yeo ya Beyond Good Intentions e bolela ka badumedi bao gore: “Gaešita le ge ba be ba dumela gore ba swanetše go hlompha balaodi ba mebušo, Bakriste ba pele ba be ba sa dumele gore ba swanetše go tšea karolo ditabeng tša dipolitiki.”

Lega go le bjalo, dilo di ile tša fetoga mo e ka bago nywageng e 300 ka morago ga lehu la Kriste. Rathutatumelo Charles Villa-Vicencio o re: “Ge maemo a dipolitiki a be a fetoga ge go buša Constantine, go bonagala Bakriste ba bantši ba ile ba kgeregela ditirelong tša setšhaba le madireng gotee le go amogeleng maemo a itšego dipolitiking.” (Between Christ and Caesar) Mafelelo e bile afe? Mafelelong a lekgolo la bone la nywaga C.E., motswako woo wa bodumedi le dipolitiki o ile wa fetoga bodumedi bja Mmušo wa Roma.

Lehono, madumedi a mantši ao a ipolelago gore a latela Kriste a tšwela pele a kgothaletša ditho tša ona go tšea karolo dipolitiking. Lega go le bjalo, madumedi ao ga a ekiše Kriste, e bile ga a latele mohlala wa Bakriste ba lekgolong la pele la nywaga.