Ke Ile ka Kgahlwa ke Dikarabo tša Beibele tše di Kwagalago le tše di Nago le Tlhaologanyo

BOPHELO BJA KA BJA NAKONG E FETILEGO:

Ke belegetšwe Székesfehérvár, Hungary, e lego motse o nago le histori e humilego ya nywaga e fetago e 1 000. Ka manyami, ke sa gopola mehlala e sa kgahlišego yeo tshenyo ya ntwa ya bobedi ya lefase e e tlogetšego moo.

Ge ke sa le ngwana, ke ile ka godišwa ke rakgolo le makgolo. Ke ba gopola ka lerato—kudukudu makgolo Elisabeth. O ile a bjala ka go nna gore ke be le tumelo e matla go Modimo. Go tloga ge ke na le nywaga e meraro, mantšiboeng a mangwe le a mangwe ke be ke boaboeletša le yena seo ka dinako tše dingwe se bitšwago Thapelo ya Morena. Go dutše go le bjalo, ke ile ka kwešiša seo se bolelwago ke thapelo yeo go yela bofelong bja nywaga ya ka ya bo-20.

Rakgolo le makgolo ba be ba ntlhokomela ge ke sa le yo monyenyane ka gobane batswadi ba ka ba be ba šoma bošego le mosegare, ba holofetše gore ba tla boloka tšhelete e lekanego gore ba reke legae le lekaone. Lega go le bjalo, ka Mokibelo o mongwe le o mongwe wa bobedi, lapa ka moka le be le bokana bakeng sa go ja gotee. Ke be ke tšeela godimo dinako tšeo re bego re eba gotee.

Ka 1958, toro ya batswadi ba ka e ile ya phethagala; ba ile ba kgona go reka ntlo yeo boraro bja rena re bego re tla dula ka go yona. Mafelelong, ke ile ka dula le batswadi ba ka—ke be ke thabile kudu! Lega go le bjalo, ka morago ga dikgwedi tše tshelelago, lethabo leo le ile la fela gateetee. Tate o ile a bolawa ke kankere.

Ke be ke nyamile o šoro. Ke gopola ke rapela ka gore: “Modimo, ke go kgopetše gore o phološe tate. Ke a mo hloka. Ke ka baka la’ng o sa araba dithapelo tša ka?” Ke be ke tloga ke nyaka go tseba gore tate o kae. Ke be ke ipotšiša gore: ‘Na o ile legodimong? Goba na o kgaoditše go ba gona sa ruri?’ Ke be ke duma bana ba bangwe bao ba bego ba sa na le botate.

Ke tšere nywaga e mentši ke eya mabitleng mo e nyakilego goba letšatši le lengwe le le lengwe. Ke be ke kwatama lebitleng la tate gomme ke rapela ke re: “Hle, Modimo, ke nyaka go tseba gore tate o kae.” Ke ile ka ba ka rapelela thušo ya gore ke kwešiše morero wa bophelo.

Ge ke na le nywaga e 13, ke ile ka dira phetho ya go ithuta Sejeremane. Ke be ke nagana gore gare ga dikgatišo tše dintšintši le tše humilego tša Sejeremane, mohlomongwe ke be nka hwetša dikarabo tša dipotšišo tša ka. Ka 1967, ke ile ka thoma go ithuta motseng wa Jena, woo ka morago e ilego ya ba karolo ya seo pele e bego e le Jeremane Bohlabela. Ke be ke bala ka phišego dipuku tšeo di ngwadilwego ke boradifilosofi ba Majeremane, kudukudu tšeo di bolelago ka seo se bolelwago ke go ba gona ga motho. Gaešita le ge ke be ke hwetša dikgopolo tše itšego tše di kgahlišago, ga go na tšeo di bego di nkgotsofatša. Ke ile ka tšwela pele ke rapelela dikarabo.

KAMOO BEIBELE E FETOTŠEGO BOPHELO BJA KA:

Ka 1970, ke ile ka boela Hungary, moo ke ilego ka kopana le Rose yo e bego e tla ba mosadi wa ka. Ka nako yeo, Hungary e be e le ka tlase ga pušo ya Bokomanisi. Ka moragonyana ga ge re nyalane, nna le Rose re ile ra tšhabela Austria. Morero wa rena e be e le gore re feleletše re hudugetše kua Sydney, Australia, moo malome a bego a dula gona.

Go se go ye kae ke ile ka hwetša mošomo kua Austria. Ka letšatši le lengwe, mošomigotee le nna o ile a mpotša gore nka hwetša dikarabo tša dipotšišo tša ka ka moka ka Beibeleng. O ile a mpha dipuku tše mmalwa tšeo di bego di ahlaahla Beibele. Ke ile ka bala dipuku tšeo ka phišego e bile ke nyaka go ithuta mo go oketšegilego. Ka gona ke ile ka ngwalela Dihlatse tša Jehofa, e lego bagatiši ba dipuku tšeo gomme ka kgopela dikgatišo tše oketšegilego.

Letšatšing la ge nna le Rose re fetša ngwaga re nyalane, re ile ra etelwa ke Hlatse ya mofsa ya Moaustria. E be e tlile le dikgatišo tšeo ke bego ke di kgopetše gomme ya ithaopela go ithuta Beibele le nna, e lego seo ke ilego ka se dumela. Ka ge ke be ke fišegela go ithuta, re be re ithuta gabedi ka beke, gomme thuto e nngwe le e nngwe e tšea mo e ka bago diiri tše nne!

Ke be ke thabišwa ke seo Dihlatse di bego di nthuta sona go tšwa Beibeleng. Ge di be di mpontšha leina la Modimo e lego Jehofa ka Beibeleng ya ka ya Sehungary, ga se ka kgolwa. Nywageng e 27 ke tsena kereke, ke be ke sa ka ka kwa go bolelwa ka leina la Modimo le gatee. Ke ile ka kgahlwa ke dikarabo tša Beibele tše di kwagalago le tše di nago le tlhaologanyo bakeng sa dipotšišo tša ka. Ka mohlala, ke ile ka ithuta gore bahu ga ba tsebe selo gomme go bjalo ka ge e ka ba robetše boroko bjo bogolo. (Mmoledi 9:5, 10; Johane 11:11-15) Ke ile ka ba ka ithuta ka kholofetšo ya Beibele ya lefase le lefsa leo go lona “lehu le ka se [hlwego] le sa ba gona.” (Kutollo 21:3, 4) Ke holofela gore ke tla bona tate gape, ka gobane lefaseng leo le lefsa, “go tla ba le tsogo.”—Ditiro 24:15.

Rose o ile a ntlatša ka pelo ka moka go ithuteng Beibele. Re ile ra dira tšwelopele kapejana gomme ra fetša go ithuta kgatišo yeo ka dikgwedi tše pedi feela! Re be re eya dibokeng ka moka tša Dihlatse tšeo di swarelwago Holong ya Mmušo. Re be re kgahlwa kudu ke go bona Dihlatse tša Jehofa di na le lerato, go rata go thuša le botee.—Johane 13:34, 35.

Ka 1976, nna le Rose re ile ra dumelelwa go tsena Australia. Gateetee re ile ra hwetša Dihlatse tša Jehofa moo. Di tloga fase feela, Dihlatse tša moo di ile tša re dira gore re ikwe re le gae ga mahlaku. Ka 1978, le rena re ile ra ba Dihlatse.

KAMOO KE ILEGO KA HOLEGA KA GONA:

Mafelelong ke hweditše dikarabo tša dipotšišo tšeo di ntshwentšego ka nako e telele kudu. Ka go batamela Jehofa Modimo, e bile ke ikhweleditše Tate yo a phalago bohle yoo motho a ka naganago ka yena. (Jakobo 4:8) Le gona ke tšeela godimo kholofelo ya ka ya go tlo buša ke bona tate wa ka wa madi lefaseng le lefsa leo le tlago.—Johane 5:28, 29.

Ka 1989, nna le Rose re ile ra phetha ka go boela Hungary e le gore re kgone go botša bagwera le ba lapa ka ditumelo tša rena, gotee le ba bangwe bao re bego re ka kopana le bona. Re bile le tokelo ya go ruta batho ba makgolo Beibele. Ba fetago 70 ba bona ba re tladitše go hlankeleng Jehofa, go akaretša le mma wa ka yo a rategago.

Ke rapetše ka nywaga e 17 gore ke hwetše dikarabo tša dipotšišo tša ka. Go fetile nywaga e mengwe e 39 gomme ke sa rapela—ke gona bjale nka rego: “Tate wa ka yo a rategago wa legodimong, ke leboga ge o arabile dithapelo tša ka tša bjaneng.”