Neela Dipukwana Bakeng Sa Go Abelana Le Ba Bangwe Kholofelo Ya Gago Ya Mmušo

1 Ge re dutše re bona diporofeto tša Beibele di phethagala, re thabela kholofelo ya rena ya Mmušo, gomme re tutueletšega go e botša mang le mang yo a tlago go re theetša. (Luka 6:45; Ba-Roma 12:12) Go neela ga rena dipukwana bodireding bja tšhemo ka July ke tsela e nngwe yeo ka yona re ka abelanago le ba bangwe kholofelo ya rena ya Mmušo bjalo ka ge Jesu a laetše.—Mat. 24:14.

2 Ka ge re e-na le dipukwana tše dintšinyana tše botse le tšeo di rutago tšeo re ka kgethago go tšona, ke efe mo go tšona yeo e ka swanelago gabotse dinyakwa tša bao ba lego tšhemong ya rena le go tsoša kgahlego ya bona? Gore re diriše dipukwana tše gabotse kudu, re swanetše go tseba dikagare tša tšona. Tlhahlobo e latelago e kopana e tla re thuša tabeng ye.

3 Mmušo Woo o Tlago go Tliša Paradeise: Ge Jesu a be a le mo lefaseng, sehlogo sa boboledi bja gagwe e be e le Mmušo wa Modimo. Pukwana ye e bontšha gore Mmušo ke pušo ya kgonthe le kamoo o tlago go rarolla mathata ao a dirago gore bophelo bo imele kudu lehono.

4 Thabela Bophelo Lefaseng ka mo go sa Felego!: E hlalosa lebaka leo ka lona Modimo a dirilego motho le kamoo re ka hwetšago bophelo mo lefaseng ka mo go sa felego. Diswantšho tšeo di hlalosago taba le ditlhaloso tše kopana tše di ngwadilwego ka pukwaneng ye di kgahla bana le bao ba sa kgonego go bala gabotse. E ka dirišetšwa gape le go fetišetša dithuto tša motheo tša Beibele go bao ba sa kwego gabotse.

5 Leina la Modimo Leo le Tlago go ba Gona ka mo go sa Felego: Pukwana ye e ahla-ahla leina la Modimo go ya ka Mangwalo le ka histori, e bontšha lebaka leo ka lona go lego bohlokwa gore Bakriste ba tsebe leina leo le go le diriša borapeding bja bona.

6 ‘Bonang, Dilo ka Moka ke di Dira tše Mpsha’: Pukwana ye e bontšha paradeise gomme e godiša tebogo bakeng sa Beibele le Mmopi wa rena. Ka morago ga go ahla-ahla lebaka leo ka lona Modimo a dumelelago bobe, e lebiša tlhokomelo dithutong tše tharo tša motheo tša Beibele: topollo, tsogo le Mmušo. Pukwana ye gape e na le dipotšišo botlaseng bja matlakala, e lego seo se re nolofaletšago go swara thuto ya Beibele ka yona.

7 Na o Swanetše go Dumela Boraro Botee?: Batho mo gongwe ba ka re ba dumela Boraro botee, eupja tsela yeo ba bo kwešišago ka yona e sa swane. Pukwana ye e araba dipotšišo tše bjalo ka: Boraro botee ke’ng? Na Beibele e a bo ruta? Na Jesu Kriste ke Modimo ra-matla-ohle le karolo ya Boraro botee? Moya o mokgethwa ke’ng, gomme o šoma bjang?

8 Ka morago ga go kgetha dipukwana tšeo re ratago go di diriša bodireding bja ntlo le ntlo, goba ge re nea bohlatse bjo bo sa rulaganyetšwago, re swanetše go hlahloba dihlogo tšeo di lego letlakaleng la ka morago la tokollo ye ya Tirelo ya Rena ya Mmušo. Moo re tla hwetša ditšhišinyo tša go neela dipuku tša rena le go dira maeto a go boela ka nepo ya go tsoša kgahlego le go thoma thuto ya Beibele.

9 Mabakeng a mantši, e ka ba ge re nea bohlatse bjo bo rulaganyeditšwego goba bjo bo sa rulaganyetšwago, go nyakega e nngwe ya dipukwana tše bakeng sa go nea bohlatse bjo bobotse. Lega go le bjalo, re swanetše go itokišetša, re be le sesola se se lekanego sa dipukwana, re tsebe seo se lego ka gare ga tšona le go ba bohlale. Eka tšhegofatšo ya Jehofa bodireding bja rena bjo bo dirwago ka phišego e ka feleletša ka gore ba bantši-ntši ba thabe le rena kholofelong ya Mmušo!—Dit. 13:47, 48.