Letlolo La Dipotšišo

◼ Na ke mo go swanetšego go tšweletša dikopi tša dipuku tša Mokgatlo gape bakeng sa go di abela ba bangwe?

Nywageng ka moka, Mokgatlo o ile wa tšweletša dipuku tše di fapa-fapanego tšeo di ahla-ahlago mo e nyakilego go ba karolo e nngwe le e nngwe ya tsebo ya Beibele. Batho bao ba ithutilego therešo nywageng ya morago bjale ba ka nagana gore ba lahlegetšwe ke mehola ya dipuku tšeo di gatišitšwego nakong e fetilego gomme e le yeo e se sa hwetšagalago go Mokgatlo. Ba bangwe ba ile ba fihla bokgoleng bjo bogolo kudu bja go reka dipuku tša kgale gomme ba bangwe ba ile ba ikgatišetša gape dipuku tša Mokgatlo le go dira gore di hwetšagale ka ditsela tše di fapa-fapanego. Se se ile sa akaretša go gatišwa ga kgonthe ga dipuku gotee le go tšweletšwa lefsa ka computer. Mabakeng a mangwe, se se be se dirwa bakeng sa poelo ya tša ditšhelete.

“Molaki” e a botegago o lemoga dinyakwa tša rena tša moya gomme o dira ditokišetšo “ka lebaka la xôna.” (Mat. 24:45) Ge e ba go bile le go nyakega ga go tšweletšwa lefsa ga puku yeo e ilego ya gatišwa nakong e fetilego, Mokgatlo o be o dira dithulaganyo tša seo. Ka mohlala, di-bound volume tša The Watchtower tša go tloga ka 1960 go ya go 1985 di ile tša gatišwa gape gomme gwa dirwa gore di hwetšwe ke bohle. Lega go le bjalo, ge batho ba ikgethela go tšweletša gape le go aba dipuku tše bjalo, go ka tšwelela mathata a sa nyakegego.

Go bakwa mathata a magolo ge dipuku tše di tšweletšwa gape gomme di abja bakeng sa mohola wa tša ditšhelete. Letlolo la dipotšišo la Tirelo ya Rena ya Mmušo ya July 1977 le boletše gore: “Go kaone go se diriše ditswalano tša pušo ya Modimo ka boithati, e ka ba ka go tšweletša goba go rekiša dithoto lege e le dife goba ditirelo bakeng sa mohola wa tša papatšo Holong ya Mmušo, dithutong tša puku ya phuthego le dikopanong tša batho ba Jehofa. Se se tla re thuša go lebiša tlhokomelo e tletšego dikgahlegong tša moya yeo e di swanetšego le go bea modiro wa papatšo lefelong la wona le le swanetšego.” Ka gona, ke gabohlokwa gore re pheme go ba bao ba naganago kudu ka poelo ge go tliwa tabeng ya go gweba ka Lentšu la Modimo goba ditabeng tše di tswalanego le lona.