Go Lebeletšana Le Tlhohlo Ya Bodiredi Bja Ntlo Le Ntlo

1 Kgopolo ya go ya ka ntlo le ntlo, go etela batho bao ba sa ba tsebego ke tlhohlo ya kgonthe go ba bantši bao ba amogelago borapedi bjo bo sekilego. Eupja lerato la kgonthe la go rata Jehofa le thuša motho go lebeletšana le tlhohlo ye, gomme gaešita le bao ba nago le dihlong kudu ka tlhago ba ile ba tšwela pele go fihla ntlheng ya go ba baboledi ba nako e tletšego ba ditaba tše di lokilego.

2 Go molaleng go tšwa Beibeleng gore Bakriste ba pele ba ile ba abelana ditaba tše di lokilego tša Mmušo wa Modimo le ba bangwe ka go ya ka ntlo le ntlo. (Dit. 5:42; 20:20, 21) Bjalo ka Bakriste lekgolong le la bo-20 la nywaga, le rena re tšea karolo modirong wo. Lerato la rena la go rata Modimo le baagišani ba rena le re tutueletša go dira modiro wo gaešita lege re ka lebeletšana le go se rate, go selekega, lehloyo, goba kganetšo e lebanyago.

3 Seo go Lebeletšana le Tlhohlo go se Phethago: Nako le nako ge re etela, re katanela go bjala dipeu tše sego kae tša therešo, re tseba gore mafelelong mafelelo a golago a ka tšweletša dienywa tša Mmušo. (Mmo. 11:6) Maemo a mangwe le a mangwe a a fetoga. Go ka direga selo se sengwe seo se ka dirago mong wa ntlo gore a nagane ka seo o mongwe wa rena a se boletšego mojakong, gomme a ka ba yo a amogelago kudu nakong e tlago.

4 Bodiredi bja rena bja ntlo le ntlo bo nea bao ba sekametšego therešong le go lokeng sebaka sa go ithuta ka Jehofa le merero ya gagwe, bja ba tsenya tseleng e išago bophelong bjo bo sa felego. Bao ba phegelelago boithabišo bja lefase ka go rialo ba lemošwa ka lerato gore ba swanetše go fetoga e le gore ba amogelwe ke Jehofa. Bodireding bjo bo bile bo tsebatša le leina la Jehofa le go mo godiša, go sa šetšwe ge e ba beng ba dintlo ba theetša goba ba sa theetše.—Hesek. 3:11.

5 Go šoma bodireding go re thuša go mediša dienywa tša moya tše bjalo ka lerato le le se nago boithati, lethabo, khutšo le kgotlelelo. (Ba-Gal. 5:22) Go re thuša go ba bao ba ikokobeditšego le bao ba nago le kwelobohloko, ka ge bo akaretša go direla ba bangwe botse. Go dula re swaregile modirong wa Jehofa go re šireletša lefaseng.—1 Ba-Kor. 15:58.

6 Thušo Bakeng sa go Lebeletšana le Tlhohlo: Ba bafsa ba swanetše go ithuta kamoo ba ka tšeago karolo ka gona modirong wo o thabišago. Gantši ga ba ikholofele, ka gona ba ka nyamišwa ke go fo nagana gore ba ya ka ntlo le ntlo. Re ka boledišana le bona ka dikganetšo tše di tlwaelegilego le seo re ka se bolelago ge re araba. Re ka itlwaetša go diriša tše dingwe tša ditšhišinyo tše botse tše di lego ka pukung ya Go Boledišana mabapi le go arabela bao ba šitišago poledišano. Ke ka baka la’ng o sa ithapele go ba thuša go lokišeletša bodiredi bja tšhemo? Gape ba ka hwetša thušo e kgolo ka go ba gona ka mehla dibokeng tša tirelo ya tšhemo gomme ka morago ba šome le bagoeledi bao ba nago le phihlelo e ntši. Go šoma gotee le sehlopha e ka ba mo go matlafatšago kudu.

7 Ge re dutše re e-ya ka ntlo le ntlo, re na le tokelo ya go emela Modimo wa rena, Jehofa. Ke tlhompho efe e kgolwanyane yeo motho a ka bago le yona ka ntle le go ba modirišani wa Modimo e le ka kgonthe? (1 Ba-Kor. 3:9) Ge e ba re ithekga ka yena, moya wa gagwe o tla re thuša go lebeletšana le tlhohlo ya bodiredi bja ntlo le ntlo.—2 Ba-Kor. 3:5.