Letlolo La Dipotšišo

◼ Ke moaparo wa mohuta ofe wo o tla tšewago e le wo o swanetšego ge motho a e-ya kolobetšong?

Lege mekgwa ya go apara e fapa-fapana dikarolong tše di fapanego tša lefase, keletšo ya Beibele ya gore go aparwe “ka bothakga le ka tlhaologanyo” e dula e sa fetoge go Bakriste ka moka, go sa šetšwe moo ba dulago gona. (1 Tim. 2:9, PK) Molao wo wa motheo o swanetše go dirišwa ge go naganwa ka seo e lego moaparo wo o swanetšego bakeng sa kolobetšo.

Morokami wa June 1, 1985, letlakala 30, o nea keletšo ye bakeng sa motho yo a kolobetšwago: “Ruri bothakga bo swanetše go ba gona mohuteng wa seaparo sa go hlapa seo se dirišwago. Se se bohlokwa lehono ka ge baroki ba diaparo ba bonala ba rata go pepentšha botona le botshadi gomme batho e be bao ka mo go feletšego ba nyakilego go hlobolela. Lebaka le lengwe leo le swanetšwego go elwa hloko ke la gore diaparo tše dingwe tšeo di bonalago e le tša bothakga ge di omile ga di bjalo ge di thapile. Ga go na le o tee yeo a kolobetšwago yo a tlago go rata goba yo a bakago tšhitišo goba kgopišo tiragalong e bohlokwa e bjalo ka kolobetšo.—Ba-Filipi 1:10.”

Ka go dumelelana le keletšo ye, bao ba kolobetšwago ba tla rata go apara diaparo tša bothakga, ba gopola bohlokwa bja tiragalo. Ka go rialo, seaparo sa go rutha seo e lego se senyenyane goba seo se kgomarelago mmele ka mo go sa kgahlišego ge se thapile e tla ba moaparo wo o sa swanelego Mokriste gomme se swanetše go phengwa. Ka mo go swanago, e tla ba mo go sa swanelago gore motho a be le ponagalo ya bošaedi. Go oketša moo, e ka se be mo go swanetšego go apara dikhipha tšeo di nago le dipolelo tša lefase goba meano ya tša papatšo.

Ge bagolo bao ba abetšwego ba hlahloba dipotšišo tša kolobetšo le motho yo a yago kolobetšong, ye e tla ba nako e botse ya go ahla-ahla bohlokwa bja go apara diaparo tše di swanetšego. Ka tsela ye seriti sa tiragalo se tla bolokwa gomme ra tšwela pele re le bao ba fapanego le lefase.—Bapiša le Johane 15:19.