Ditekanyetšo Bakeng Sa Bobedi Modiredi Yo Mofsa Le Yo A Nago Le Phihlelo

1 Mopsalme Dafida o ile a botšiša gore: “Morêna, mo Ngwakong wa xaxo xo ka dula mang? Thabeng e kxêthwa ya xaxo xo ka axa mang?” Ka mantšu a sego kae ao a kgethilwego ka kelohloko, Dafida o ile a araba ka gore: “Ké yo a swerexo tsela ya bothakxa, a dira tša xo loka, a búa therešô.” (Ps. 15:1, 2) Ditekanyetšo tšeo ga se tša fetoga. Bohle bao ba tlago go rapela ka phuthegong ya Bokriste lehono ba swanetše go lahla mekgwa e gobogilego ya boitshwaro le botagwa. Gare ga batho ba Jehofa ga go na sebaka sa bao ba bakago diphapang, ba bogale goba bao ba se nago therešo. Go sa šetšwe gore ke badiredi ba bafsa goba bao ba nago le phihlelo, re swanetše go ba bao ba botegago go kgomareleng ditekanyetšo tše di phagamego tšeo di hlalositšwego Lentšung la Modimo.—Ba-Gal. 5:19-21.

2 Batho ba bantši ba bafsa ba kopanela le phuthego ya Jehofa. Ba bafsa le ba bagolo ka mo go swanago ba fetotše dikgopolo tša bona gore ba dumelelanye tsela ya bona ya go phela le ditekanyetšo tša Modimo. Mošemanyana o mongwe wa kua Amerika Borwa o gotše a sa hwetše tlhahlo ya batswadi gomme a thoma go ba le mathata a šoro a semelo. Nakong ya ge a e-na le nywaga e 18, o be a lemaletše dihlare-tagi gomme a šetše a feditše nako a le kgolegong ka baka la go utswa gore a thekge mokgwa woo. Ka thuto ya Beibele, o ile a kgaotša go gwerana le bagwera ba gagwe ba pele, a hwetša bagwera ba bafsa gare ga Dihlatse tša Jehofa gomme mafelelong a neela bophelo bja gagwe go Modimo.

3 Ka mo go swanago, re swanetše go ikemišetša go kgahliša Modimo boitshwarong bja rena ka moka, “xo lokeng le kxethexong ya makxonthe.” (Ba-Ef. 4:24) Re swanetše go “apola motho wa kgale le ditiro tša gagwe” gomme re “apare motho yo mofsa, yo a mpshafaditšwego ka tsebo e nepagetšego” ge e ba re tla dula ka phuthegong ya Modimo e phagamego.—Ba-Kol. 3:9, 10, NW.

4 Lentšu la Modimo, Tutuetšo e Matla: Semelo sa Jehofa go etša ge re se utolletšwe ka Beibele se ka kgoma tsela ya rena ya go nagana le ditiro tša rena ka tsela e nepagetšego. (Ba-Roma 12:2) Lentšu la Gagwe le na le matla a go fetoša menagano le go fetleka dipelo. (Ba-Heb. 4:12) Mangwalo ao a buduletšwego a re ruta gore thato ya Jehofa ke gore re phele bophelo bja boitshwaro bjo bo letlilego, re be le karolo e tletšego bodireding bja phatlalatša gomme re se ke ra hlokomologa diboka tša Bokriste.

5 Mabakeng a ao go lego thata go lebeletšana le ona, dikgateletšo tšeo di golago di ka tutueletša Mokriste go roba melao ya Modimo. Ge e ba thuto ya motho ka noši, thuto ya lapa, diboka tša phuthego goba bodiredi di hlokomologwa, gaešita le Mokriste yo a kilego a tia a ka aroga tumelong, mohlomongwe a wela boitshwarong bjo bo gobogilego. Ke ka baka leo Paulo a ngwaletšego Timotheo gore: “Itôtê O lôtê le thutô” le gore, “Akanya tše ke di bolêlaxo.”—1 Tim. 4:16; 2 Tim. 2:7.

6 Go sa šetšwe gore re sa tšwa go thoma go kopanela goba re bao ba gotšego tsebong ka baka la phihlelo ya nywaga e mentši, re swanetše go dula re nagana ka mo go tsepamego ka ditekanyetšo tša Modimo, re be bao ba leka-lekanego ka mo go feletšego bodireding gomme re boloke kholofelo ya rena e tiile gore bophelo bja rena bo phologe. (1 Pet. 1:13-16) Go hlahloba ditekanyetšo tša Modimo tša go loka letšatši le letšatši go bohlokwa kudu.

7 Ipeele pakane ya go ya bodireding bja tšhemo kgweding ye ya mafelelo ya ngwaga wa tirelo wa 1993. Ikemišetše go thuša ba bangwe go gola tumelong le go oketša tšweletšo bodireding bja tšhemo. (Ba-Roma 1:12) Dula o nagana ka ditaba tše di lokilego ka go ba le thuto ya motho ka noši, thuto ya lapa le go ba gona dibokeng ka mehla. (Ba-Fil. 4:8) Boiteko bjo o bo dirago go thabiša Modimo ka go phela ka ditekanyetšo tša gagwe bo ka se ke bja hlokomologwa.—Ba-Kol. 3:23, 24.