Pego e Botse ya April!

1 Re thabela tlhora e mpsha ya bagoeledi ba 55 727 ka April. Go oketša moo, re bile le tlhora e mpsha ya dithuto tša Beibele tše 62 060. Le šomile ka matla gomme re a le reta bakeng sa se. Hle tšwelang pele le bea mohlala wa phišego tšhemong.

2 Na re ka bea pakane ya tlhora e mpsha ka August? Se se ka fihlelelwa bjang? Ge e ba mogoeledi o mongwe le o mongwe a e-ba le karolo e tletšego bodireding ka August gomme a tliša pego ya gagwe kapejana mafelelong a kgwedi, gona re dumela gore re ka fihlelela tlhora e nngwe e mpsha. Moswari o mongwe le o mongwe wa thuto ya puku mo gongwe a ka rata go ba le sesola se senyenyane sa difomo tša pego (S-4) lefelong leo sehlopha sa gagwe sa thuto se kopanelago go lona gore a di nee sehlopha sa gagwe. O swanetše go gopotša bagoeledi gore ba tsenye dipego tša bona ka lepokising la dipego leo le swailwego “Dipego tša Tirelo ya Tšhemo” Holong ya Mmušo.

3 Go thwe’ng ka barutwana ba Beibele bao ba tšwelago pele? Na go na le ba bangwe ba bona bao ba swanelegelago go re tlatša bodireding ka August? Go swanetše go ba le koketšego ya kapejana ya bagoeledi ba bafsa kgweding E NNGWE LE E NNGWE, gare ga dithuto tše di fetago 62 000 tša Beibele tšeo di swarwago. Ke ka baka la’ng le sa latele ditšhišinyo tše dibotse tšeo di neilwego pampiring ya ka gare ya Tirelo ya Rena ya Mmušo ya May 1993, bakeng sa go thuša batho ba ka mo go oketšegilego gore ba tšwele pele?

4 Eka ka moka ga rena re ka dira boiteko bja go nea bohlatse ka mo go tletšego tšhemong yeo re e abetšwego. Gopolang gore ka mehla le swanetše go ba le “mo gontši mo le go dirago modirong wa Morena, le tseba gore modiro wa lena ga se wa lefeela Moreneng.”—1 Ba-Kor. 15:58, NW.