Go Thuša ba Bangwe go Lemoga Bohlokwa bja Puku ya Go Tsoma ga Batho Modimo
1 “Lentšu la Modimo ké le le phelaxo, ké le matla.” (Ba-Heb. 4:12) Ka ge dipuku tša rena tšeo di theilwego Beibeleng di thuša batho go holwa ke matla a Lentšu la Modimo, re di dirišetša go fehla kgahlego Beibeleng ge re nea bohlatse ka mokgwa wo o sa rulaganywago goba ge re e-ya ka ntlo le ntlo.
2 Mpho ya dipuku ya January ke puku ya Go Tsoma ga Batho Modimo ka moneelo wa R4,50. Re be re dutše re diriša puku ye ga e sa le go tloga ka 1991 gomme re tlwaelane le dikagare tša yona tše dibotse kudu. Lega go le bjalo, e tla ba gabohlokwa go lokišetša mokgwa wa gago wa go nea molaetša wa Mmušo e le gore o tsene ntlheng e lebanego ka pukung. Se se ka dirwa bjang?
3 Mokgwa wa go Lokišetša: Ge o thoma, kgetha tlhaloso ka pukung ya Go Tsoma ga Batho Modimo yeo mo gongwe e tlago go kgahliša batho ba dipelo tše di botegago ba lego tšhemong ya geno. Se se latelago, nagana ka tiragalo ye e sa tšwago go direga goba taba yeo e kgahlago batho ka kakaretšo yeo o ka kgonago go e ahla-ahla ka boripana le mong wa ntlo pele ga ge o ka lebiša tlhokomelo ya gagwe tlhalosong ye e gatišitšwego yeo o e kgethilego. Mohlomongwe go na le temana yeo e bontšhitšwego goba e tsopotšwego yeo o ka e balago Beibeleng goba wa e bala ka go lebanya pukung, go thekga ditlhaloso tša gago. Leka go mo tlogelela potšišo goba kgopolo yeo o ka kgonago go e diriša e le motheo bakeng sa leeto la go boela.
4 Sepediša Go Tsoma ga Batho Modimo: Mo gongwe o ka kgona go thoma poledišano ka go lebiša tlhokomelo ntlheng yeo e bontšhitšwego ditabeng yeo e ka bago e gatelela go itsenya ga bodumedi ditabeng tša lefase goba mo gongwe e bontšha tutuetšo ya bodumedi maphelong a batho.
Ke moka botšiša potšišo e swanago le ye:
◼ “O nagana gore Modimo o lebelela bjang mekgatlo ya bodumedi yeo e tutuetšago ditaba tša lefase lehono? [Dumelela karabo.] Na o tla makatšwa ke go tseba gore dithuto tša motheo tša madumedi a ka moka di tloga di swana le gore di fapane e le ka kgonthe le dithuto tša Beibele?” Ge e ba mong wa ntlo a rata go theetša, mmontšhe lelokelelo la dikagare gomme o hlalose ka boripana gore go sa šetšwe ge e ba motho e le wa bodumedi goba e se yena, bophelo bja gagwe bo kgongwa ke ditutuetšo tše matla tša bodumedi. Hlalosa gore a ka holwa ke go ithuta lebaka leo ka lona go tsoma ga batho Modimo go išitšego mahlakoreng a mantši gakaakaa le ao a arogilego mokgweng wa go ithuta kamoo go ka hlaolwago bodumedi bjo bo nepagetšego ka gona.
5 Ge re dutše re le bodireding bja rena, yo mongwe mo gongwe a ka itlhaola e le setho sa sehlopha se segolo sa bodumedi. Re ka dumela ntlha ye ka botho gomme, mohlomongwe ra re: “Ke mo go kgahlišago go gahlana le batho ba madumedi a fapanego. Go tsoma ga batho Modimo go išitše mahlakoreng a sa swanego. [Ge e ba go swanetše mo ntlheng ye, go ka ahla-ahlwa Ditiro 17:26, 27.] Na ga o dumele gore batho gantši ba latela bodumedi bja batswadi ba bona, go e na le go itsomela Modimo bona ka noši? Ka mantšu a mangwe, ba belegetšwe bodumeding bjo itšego. Se ke seo se bolelwago kgaolong ya pele ya puku ye ya Go Tsoma ga Batho Modimo. [Mmontšhe letlakala 8, serapa 12.] Go ithuta mo go oketšegilego ka madumedi a mangwe ke mo go sedimošago le mo go rutago. Puku ye e hlalosa setlogo, ditiro le dithuto tša madumedi a magolo a lefase.”
6 Ka dinako tše dingwe e ka ba mo go swanetšego kudu go sepediša dimakasine goba pampišana. Re na le mabaka ohle a gore re be mafolofolo le go fišega ka go kgothaletša ba bangwe go bala puku ye e le gore ba ka hlamelwa go bona matla a Lentšu la Modimo maphelong a bona ka go arabela tlhahlong ya lona.