Diboka Tša Tirelo Tša March

Beke e Thomago ka March 7

Kopelo 200

10 mets: Ditsebišo tša phuthego le Ditsebišo tše di kgethilwego go tšwa go Tirelo ya Rena ya Mmušo.

20 mets: “Koketšego Yeo e Tšwelago Pele e Oketša go Nyakega ga Diholo tša Mmušo”​—⁠Karolo 1. Kakaretšo ka dipotšišo le dikarabo ya dirapa 1-⁠10 tša pampiri ya ka gare. Gatelela mabaka ao ka ona bagolo ba swanetšego go ikopanya le Komiti ya tša Meago ya Tikologo di sa tloga fase ge go naganwa ka modiro wa go aga Holo ya Mmušo.

15 mets: “Sepedišang Puku ya Dipotšišo tša Bafsa.” Poledišano le batheetši. Dira gore bagoeledi bao ba itokišeditšego gabotse ba bontšhe dithero tše di lego go dirapa 2 le 3. Gape, bontšha ka boripana kamoo mogoeledi a laleletšago mong wa ntlo yo a thabelago Segopotšong le polelong e kgethegilego ya phatlalatša. Ka morago ga pontšho e nngwe le e nngwe, dira gore batheetši ba hlalose seo ba ithutilego sona pontšhong. Kgothaletša bohle go tšea karolo go sepedišeng puku ya Dipotšišo tša Bafsa kgweding ye.

Kopelo 225 le thapelo ya go phetha.

Beke e Thomago ka March 14

Kopelo 205

10 mets: Ditsebišo tša phuthego. Ditaba tša Pušo ya Modimo. Lebiša tlhokomelo dintlheng tše itšego tše di lego dimakasineng tša morago bjale tšeo di ka dirišwago bodireding bja tšhemo bekeng ye.

15 mets: “Na o ka Oketša go Tumiša ga Gago Jehofa ka April?” Kakaretšo ka dipotšišo le dikarabo. Hwetša ditlhaloso tše di tšwago go bao ba ilego ba dira bobulamadibogo bja go thuša nakong e fetilego. Dira gore ba hlalose kamoo ba ilego ba beakanya ditaba tša bona ka gona gore ba ikhole ka tokelo ye. Kgothaletša bohle bao ba rerago go dira bobulamadibogo bja go thuša ka April gore ba tsenye dikgopelo tša bona kapejana ka mo go kgonegago.

20 mets: “Ba Direng Gore ba Ikwe ba Amogelegile Segopotšong.” Kakaretšo ka dipotšišo le dikarabo. Ka morago ga serapa 3, e-⁠ba le pontšho e kopana ya mohlanka wa bodiredi a amogela motho yo mofsa Segopotšong. Balebeledi ba okamelago ba swanetše go hlahloba lelokelelo la dintlha tše di lokeleditšwego ka go Tirelo ya Rena ya Mmušo ya March 1993, letlakala 7, bakeng sa go kgonthišetša gore dithulaganyo ka moka tša Segopotšo di dirilwe.

Kopelo 150 le thapelo ya go phetha.

Beke e Thomago ka March 21

Kopelo 143

10 mets: Ditsebišo tša phuthego, go akaretša le pego ya tša ditšhelete le ditebogo tša meneelo. Ahla-ahla lepokisi leo le nago le sehlogo se se rego “Dijo ka Nako e Swanetšego.” Kgothaletša bohle gore ba laleletše batho bao ba thabelago polelong e kgethegilego yeo e tlago go newa ka April 10.

15 mets: “Ba Thušeng go Gata Mogato ka go Dumelelana le Molaetša wa Mmušo.” Polelo. E-⁠ba le dipontšho tšeo di lokišeditšwego gabotse tša dithero tše di lego go dirapa 2 le 3.

20 mets: “Koketšego Yeo e Tšwelago Pele e Oketša go Nyakega ga Diholo tša Mmušo”​—⁠Karolo 2. Polelo ya phišego ka mogolo mabapi le dirapa 11-21 tša pampiri ya ka gare. Gatelela go nyakega ga baithapi ba oketšegilego, gomme o dire gore difomo tša Kingdom Hall Volunteer Worker Questionnaire di be gona sebokeng. Hlalosa megato e lesome yeo e tšewago go hwetša Holo ya Mmušo. Ge nako e dumela, akaretša diphihlelo tše di swanetšego tšeo di lego mabapi le mediro ya nakong e fetilego ya go agwa ga Holo ya Mmušo lefelong la geno. Mongwaledi o swanetše gore ka kgopelo a boloke kopi ya pampiri ye ya ka gare ka difaeleng tša phuthego ka tlase ga “Holo ya Mmušo.”

Kopelo 121 le thapelo ya go phetha.

Beke e Thomago ka March 28

Kopelo 112

15 mets: Ditsebišo tša phuthego. Ahla-ahla gomme o bontšhe ditsela tše di swanetšego tša go nea bohlatse tšhemong ya gabo lena ka mpho ya April. Anega diphihlelo tše di bontšhago kamoo bagoeledi ba bangwe ba hweditšego ka gona dipeeletšo maetong a go boela. Hlalosa dithulaganyo tša Letšatši le le kgethegilego la Dimakasine ka April 9. Na motho yo mongwe le yo mongwe o ikemišeditše le go itokišeletša go dirišetša letšatši le le tletšego go abeng dimakasine? Bagolo le bahlanka ba bodiredi ba tla rata go etelela pele ka mafolofolo go se le go thuša yo mongwe le yo mongwe ka phuthegong gore a be le karolo. Aga phišego bakeng sa polelo e kgethegilego ya phatlalatša ka April 10. Kgothaletša yo mongwe le yo mongwe ka phuthegong le batho ba thabelago gore ba be gona. Ye ke tiragalo e nngwe e kgethegilego yeo e tlago go direga ka April. Polelo ye e tla neelwa lefaseng ka moka diphuthegong tše fetago 70 000. Sehlogo ke se se rego “Bodumedi bja Therešo bo Kgotsofatša Dinyakwa tša Lekoko la Batho.”

15 mets: “Kgomarelang Boipolelo bja Phatlalatša bja Kholofelo ya Lena le sa Tekeme.” Kakaretšo ka dipotšišo le dikarabo ka moswari wa Thuto ya Morokami. Hwetša ditlhaloso tše di tšwago go bao ba fentšego poifo ya go nea ditlhaloso dibokeng. Gatelela go nyakega ga go lokišetša e sa le pele. Kgothaletša phuthego go lokišetša bakeng sa go ba le karolo ka mo go tletšego thutong ya phuthego ya Morokami bekeng e nngwe le e nngwe.

15 mets: Go Kgomarela Boema-gare bja Bokriste. Polelo ka mogolo yo a nago le phihlelo ya lengwalo la June 17, 1993, mabapi le boemo bja rena bja go se tšee lehlakore. Ka April, go tla swarwa dikgetho tša kakaretšo Afrika Borwa. Na banababo rena ba tla tseba kamoo ba ka lebeletšanago ka gona le teko ye e mpsha ya potego ya bona? Maikwelo a tša dipolitiki a tla be a phagame. Se se tla ba bjalo kudu-kudu tšhemong ya ba baso moo batho ba sego ba tlwaelana le go bouta le moo go ka dirišwago kgapeletšo go dira gore banababo rena ba boute. Re nyaka go phema tlhaselo ya mohuta lege e le ofe. Re swanetše go dira eng? Kgweding ka moka ya April, go akaretša le ka April 27 moo go kgonegago, re swanetše go ba le karolo e tletšego modirong wa boboledi. Ka boitshwaro bja rena le modiro wa boboledi bja phatlalatša, batho bao ba lego tikologong ya rena ba tla lemoga boemo bja rena bjo tiilego bja go se tšee lehlakore. Bagolo ka mo go kgethegilego ba swanetše go ba bao ba nago le tsebišo ka botlalo e le gore ba ka kgona go thuša le go nea tlhahlo. Kgothaletša bohle gore ba itlwaelanye le tsebišo yeo e lego ka pukung ya Go Boledišana ka tlase ga “Boema-gare.”

Kopelo 15 le thapelo ya go phetha.