E-bang Badiri—E Sego Bakwi Feela
1 Bakriste ba therešo lehono ba ela hloko temošo ya Beibele ya go ba badiri ba lentšu, e sego bakwi feela. (Jak. 1:22) Se se ba aroganya kudu le bao le ge ba ipolela gore ke Bakriste, ba neelago Modimo tirelo ya molomo feela. (Jes. 29:13) Jesu o boletše ka mo go kwalago gore ke feela bao ba dirago thato ya Modimo ba ba tlago go phološwa.—Mat. 7:21.
2 Borapedi bjo bo se nago mediro ya go boifa Modimo ga bo na morero. (Jak. 2:26) Ka gona re swanetše go ipotšiša gore, ‘Mediro ya-ka e hlatsela bjang gore tumelo ya-ka ke ya kgonthe? Ke’ng se se bontšhago gore ka kgonthe ke phela ka go dumelelana le seo ke se dumelago? Nka ekiša bjang Jesu ka mo go tletšego kudu?’ Dikarabo tše di botegago tša dipotšišo tše di tla re thuša go bona tšwelopele yeo re e dirilego goba yeo e sa dutšego e nyaka go dirwa mabapi le go dira thato ya Modimo.
3 Ka ge re le balatedi ba Jesu, re swanetše go ba le boikemišetšo bjo bo swanago bjo bohlokwa bophelong go etša bjo bo bontšhitšwego ke mopsalme ka gore: “Re itumiša ka Modimo ka mehla yohle, gomme re leboga leina la gago ka go sa felego.” (Ps. 44:9, PK) Bokriste ke tsela ya bophelo yeo e iponagatšago letšatši le lengwe le le lengwe le selong se sengwe le se sengwe se re se dirago. A kgotsofalo e kaakang yeo re e hwetšago ge re dutše re bontšha medirong ya rena ka moka kganyogo e tšwago pelong ya go reta Jehofa!—Ba-Fil. 1:11.
4 Go Tumiša Jehofa go Akaretša se se Fetago go Phela Bophelo bjo bo Letlilego: Ge e ba boitshwaro bjo bobotse e be e le sohle se Modimo a bego a se nyaka, re be re ka fo lebiša tlhokomelo go hlwekišeng semelo sa rena. Lega go le bjalo, borapedi bja rena bo akaretša gape le go tsebatša mabothakga a Jehofa gohle le go bolela leina la gagwe phatlalatša!—Ba-Heb. 13:15; 1 Pet. 2:9.
5 Go bolela ditaba tše di lokilego phatlalatša ke o mongwe wa mediro e bohlokwa kudu yeo re e dirago. Jesu o ile a ineela modirong wo ka ge a be a tseba gore o be o bolela bophelo bjo bo sa felego go bao ba bego ba tla theetša. (Joh. 17:3) Lehono ‘modiro wa lentšu’ e sa le o bohlokwa; ke tsela e nnoši yeo ka yona batho ba ka phološwago. (Dit. 6:4, PK; Ba-Roma 10:13) Ka go lemoga mehola e fetišišago, re kgona go kwešiša lebaka leo ka lona Paulo a re lemošitšego ka go “bolela lentšu” le go ‘le phegelela ka go akgofa.’—2 Tim. 4:2, NW.
6 Re swanetše go diriša maphelo a rena ka tekanyo e kaaka’ng go tumišeng Jehofa? Mopsalme o itše go be go le monaganong wa gagwe letšatši ka moka. Na ga re ikwe ka tsela yeo? Ee, e bile re tla tšea go kopana go gongwe le go gongwe le motho yo mongwe e le sebaka se se lego gona sa go bolela ka leina la Jehofa. Re tla tsoma dibaka tše di swanetšego bakeng sa go lebiša poledišano ya rena ditabeng tša moya. E bile re tla katanela go tšea karolo ka mehla medirong ya tirelo ya tšhemo yeo e rulagantšwego ke phuthego. Bao maemo a bona a dumelago ba ka naganišiša kudu ka tirelo ya bobulamadibogo, ka gobane se se re thuša go bea modiro wa boboledi boemong bja pele bophelong bja rena letšatši le lengwe le le lengwe. Lentšu la Modimo le re kgonthišetša gore ka go ba badiri ba phegelelago ba thato ya Modimo, re tla thaba.—Jak. 1:25.