Neela Tirelo E Kgethwa Mosegare Le Bošego
1 Tokelo e kgethegilego e fetišeditšwe go rena. Ke ya go ba dihlatse tša Jehofa. Re karolo ya mokgatlo wa lefase ka bophara wa baebangedi ba ba dirišwago ke Jehofa go phetha modiro o mogolo wa go tsebatša Mmušo wo o rulagantšwego go feta le ge e le neng! (Mar. 13:10) Ka baka la go akgofa ga mehla ya rena, na re tšea karolo modirong wo ka mo go tletšego kudu ka mo go kgonegago?
2 Ga re tsebe gore ke ba bakae bao mafelelong ba tlago go arabela boboleding bja rena. Jehofa o re kgonthišetša gore e tla ba “lešaba le lexolo,” e lego bohle bao ba hlaolwago ka “go mo neela [ga bona] tirelo e kgethwa mosegare le bošego.” (Kut. 7:9, 15, bapiša le NW.) Dihlatse tše di fetago dimilione tše hlano tšeo di šetšego di swaregile tirelong ya Modimo ga se feela batheetši ba thabelago goba bao ba bago gona dibokeng feela. Ke badiri ba ba tsebatšago ditaba tše di lokilego lefaseng ka bophara!
3 Letšatši le lengwe le le lengwe go na le dibaka tša go reta Jehofa, e ka ba tirelong ya tšhemo goba ka mo go sa rulaganyetšwago. Nagana ka bohlatse bjo bogolo bjo bo ka newago ge e ba yo mongwe le yo mongwe wa rena a gata mogato wa pele wa go abelana therešo le motho o tee feela letšatši le lengwe le le lengwe. Tebogo ya rena ya go leboga Jehofa e swanetše go re tutueletša go bolela ka yena ka phišego.—Ps. 92:1, 2.
4 Thušang ba Bangwe go Neela Tirelo e Kgethwa: Jehofa o tšwela pele go re šegofatša ka koketšego. (Hag. 2:7) Ngwageng o fetilego wa tirelo go ile gwa swarwa palogare ya dithuto tša legae tša Beibele tše 65 170 kgwedi e nngwe le e nngwe dinageng tše šomago ka tlase ga lekala la Afrika Borwa. Pakane ya rena ya go ithuta le batho ba ke go ba thuša go ba barutiwa ba Jesu. (Mat. 28:19, 20) Ba bantši ba bona ba šetše ba dirile tšwelopele e botse ka go ba gona ka mehla dibokeng. Ba thomile go bolela le ba ba tlwaelanego le bona ka “matete a Modimo” ao ba ithutilego ona. (Dit. 2:11) Na gona bjale ba ka laletšwa go tšea karolo bodireding bja phatlalatša?
5 Ka April re swanetše go dira boiteko bjo bo kgethegilego bja go laletša ba bafsa bao ba swanelegago go re tlatša tirelong ya tšhemo. Na morutwana wa gago o bontšhitše kganyogo ya go dira se? Ge e ba go le bjalo, na o fihlelela dinyakwa tša Mangwalo? (Bona puku ya Bodiredi bja Rena, matlakala 97-9.) Ge morutwana a kganyoga go tšea karolo tirelong ya tšhemo, bolela dikgopolo tša gagwe le molebeledi yo a okamelago yo a tlago go rulaganyetša bagolo ba babedi go hlahloba taba. Ge e ba morutwana a swanelega go ka amogelwa e le mogoeledi yo a sa kolobetšwago, mo laletše gore a sepele le wena tšhemong. Balebeledi ba tirelo le baswari ba thuto ya puku ba swanetše go ela hloko ka mo go kgethegilego go thuša bao ba ka swanelegago bakeng sa go thoma boboledi ka April.
6 Batswadi mo gongwe ba ka naganišiša ge e ba bana ba bona ba swanelega go ba bagoeledi ba sa kolobetšwago. (Ps. 148:12, 13) Ge e ba ngwana wa lena a kganyoga go iponagatša tirelong ya Mmušo e bile a e-na le mekgwa e mebotse, le ka batamela yo mongwe wa bagolo yo a lego komiting ya tirelo bakeng sa go ahla-ahla boemo. Ka morago ga go kopana le wena le ngwana wa gago, bagolo ba babedi ba tla dira phetho ya ge e ba a swanelega go ka balwa e le mogoeledi. Go na le lebaka le le kgethegilego la go thaba ge bana ba re tlatša go reteng Modimo!
7 Ke Jehofa feela yo a swanelwago ke tirelo ya rena e kgethwa. (Luka 4:8) Eka yo mongwe le yo mongwe wa rena a ka diriša tokelo ya rena e kgahlišago bakeng sa go mo reta “kudu.”—Ps. 109:30; 113:3.