Ekišang Tumelo Ya Bona
1 Moapostola Paulo o hlalositše tumelo e le “kholofêlô ye e tiilexo ya xo holofêla tše di letetšwexo; ké xo bôta tše di sa bonwexo ka mahlô.” O okeditše ka gore “xo kxahla Modimo xa xo kxônexe xe xo se tumêlô.” (Ba-Heb. 11:1, 6) Paulo o re kgothaleditše gore re be le tumelo, re atelwe ke yona gomme re e phegelele.—2 Ba-Kor. 4:13; Ba-Kol. 2:7; 2 Tim. 2:22.
2 Go na le mehlala e mentši e kgethegilego ya tumelo yeo e bolelwago ka Beibeleng. Paulo go Ba-Hebere kgaolo 11, o nea lelokelelo le letelele la dihlatse tšeo di bontšhitšego tumelo e sa šišinyegego. Lelokelelong le go akaretšwa le Abele yo e bilego wa pele wa go bolaelwa tumelo ya gagwe. Noage o lokeletšwa ka ge ka tumelo ya gagwe a ile a bontšha poifo ya go boifa Modimo yeo e bego e nyakega bakeng sa go phološa lapa la gagwe. Aborahama o retwa ka baka la tumelo ya gagwe le go kwa ga gagwe. Moše o retwa ka ge ka tumelo ya gagwe a ile a tšwela pele a tiile bjalo ka ge eka o bona Yo a sa bonwego. Lelokelelo la mehlala e be e le le letelele kudu moo Paulo a ilego a bolela gore o be a tla hlaelelwa ke nako ge e ba a be a ka tšwela pele a e anega ka moka ga yona. Re leboga gakaakang gore re ka matlafatša tumelo ya rena ka go hlahloba “tsela [ya bona] e kxêthwa ya borapedi”!—2 Pet. 3:11.
3 Lekgolong la pele la nywaga, Jesu o ile a rotoša potšišo e rego: “Morwa-motho mohla a tlaxo a Le re ó tlo hwetša lefaseng xò sa na le tumêlô?” (Luka 18:8) Ka gona, na re na le mehlala e lego gona ya tumelo gare ga rena lehono? Na re bona banna le basadi, ba banyenyane gotee le ba bagolo, bao ba bonagatšago tumelo e sa šišinyegego go Jehofa go etša ge go be go le bjalo ka batho ba Modimo ba mehleng ya Beibele?
4 Mehlala ya Mehleng Yeno ya Tumelo: Mehlala e kgethegilego ya tumelo e swanetše go hwetšwa go rena ka moka! Tumelo ya balebeledi bao ba eteletšego pele gare ga rena e swanetše go ekišwa. (Ba-Heb. 13:7) Eupša ba ga se bona feela ba e lego mehlala ya tumelo. Phuthegong e nngwe le e nngwe go na le batho ba botegago bao ba nago le pego e telele ya tirelo ya potego go Jehofa, yeo gantši e dirwago ka tlase ga maemo a thata kudu.
5 Re swanetše go reta dikgaetšedi tša rena tše botegago tšeo ka nywaga e mentši di ilego tša kgotlelela kganetšo e tšwago go banna bao ba ganetšago. Batswadi bao ba se nago balekane ba ile ba swanelwa ke go lebeletšana le tlhohlo ya go godiša bana ba nnoši. Go na le bahlologadi ba godilego gare ga rena bao le ka mohla ba sa kago ba hlokega medirong ya phuthego gaešita le ge ba se na lapa la go ba thuša. (Bapiša le Luka 2:37.) Re kgahlišwa ke tumelo ya bao ba kgotlelelago mathata a magolo a tša maphelo. Ba bantši ba tšwela pele go hlankela ka potego gaešita le ge ba e-na le ditekanyetšo tšeo di ba thibelago gore ba ka abelwa ditokelo tše oketšegilego tša tirelo. Go na le Dihlatse tša bafsa tše di bontšhitšego tumelo ka sebete go sa šetšwe kganetšo sekolong. Boineelo bja rena go Modimo bo matlafatšwa ke ge re bona babulamadibogo ba botegago bao ba kgotlelelago ba lebane le mathata ao a sa hlalosegego ngwaga le ngwaga. Go fo swana le Paulo, re tla hlaelelwa ke nako ge e ba re ka leka go anega diphihlelo ka moka tše di hwetšwago tirelong ya Mmušo le ditiro tša tumelo tšeo di dirilwego ke bana ba babo rena le dikgaetšedi!
6 Mehlala ye ya batho ba botegago e re nea khomotšo le kgothatšo. (1 Ba-Thes. 3:7, 8) Re dira gabotse ge e le mabapi le go ekiša tumelo ya bona ka gobane “Morêna . . . ó kxahlwa ke ba ba diraxo therešô.”—Die. 12:22.