Go Se Kgaotše Go Tsebatšeng Ditaba Tše Di Lokilego
1 Bakriste ba pele ba ile ba tšeela bodiredi bja bona godimo kudu. Luka o begile gore: “Ba ile ba tšwela pele ba ruta ka ntle le go kgaotša letšatši le lengwe le le lengwe tempeleng le ka ntlo le ntlo, gomme ba bolela ditaba tše di lokilego ka Kriste, Jesu.” (Dit. 5:42, NW) Go be go se na selo seo se bego se ka ba thibela, gaešita le yona tlaišo! (Dit. 8:4) Ba ile ba bolela le ba bangwe ka therešo letšatši le lengwe le le lengwe.
2 Go thwe’ng ka rena? Ipotšiše: ‘Na ke lemoga go akgofa ga mehla? Na ke na le tshekamelo ya go tšwela pele ke tsebatša ditaba tše di lokilego ka ntle le go kgaotša?’
3 Mehlala ya Mehleng Yeno ya go Dira Boboledi ka Ntle le go Kgaotša: Kgaetšedi yo mongwe yo e bego e le mohlaselwa wa polio, o be a beilwe ka gare ga sethuša-go-hema. O be a sa kgone go ya Holong ya Mmušo goba go ba gona kopanong. Eupša o be a swaregile o šoro ka go tsebatša ditaba tše di lokilego. Nywageng ya gagwe e 37 a dutše kamoo, o ile a kgona go thuša batho ba 17 go ithuta therešo! O kgonne bjang go dira seo? Gaešita le ge a be a sa kgone go ya ka ntlo le ntlo, letšatši le lengwe le le lengwe o ile a hwetša tsela ya go nea bohlatse ka tsela e sa rulaganyetšwago go bao ba bego ba kopana le yena.
4 Banababo rena ba Bosnia ba ile ba swanelwa ke go lebeletšana le ntwa le bohloki. Lega go le bjalo, ba tšwela pele ba bolela go ba bangwe ka mehla. Kua Sarajevo bagoeledi ba be ba dira palo-gare ya diiri tše 20 kgwedi e nngwe le e nngwe ba bolela le ba bangwe ka ditaba tše di lokilego, gomme ba swara palo-gare ya dithuto tše pedi tša Beibele yo mongwe le yo mongwe. Go sa šetšwe maemo a bona a šoro, ba dira boboledi gotee le go ruta ka ntle le go kgaotša.
5 Ba banyenyane le bona ba bontšha phišego ya go fišegela bodiredi. Lapa la Dihlatse kua Rwanda le ile la bewa ka phapošing moo mašole a bego a itokišeletša go le bolaya. Lapa le ile la kgopela tumelelo ya go rapela pele. Yona e ile ya newa, gomme morwedi yo monyenyane, Deborah o ile a rapela ka go hlaboša a re: “Jehofa, bekeng ye nna le tate re sepedišitše dimakasine tše hlano. Re tla boela bjang bathong ba bakeng sa go ba ruta therešo gomme ra ba thuša gore ba hwetše bophelo?” Ka baka la tumelo ya gagwe e tiilego le lerato la go rata bodiredi, lapa ka moka le ile la šireletšega.
6 Lehono go na le go nyakega ga go phafogela dibaka tša go nea bohlatse go ba bangwe le go tsoma bao “ba sekametšego go lokeng bakeng sa bophelo bjo bo sa felego.” (Dit. 13:48, NW) Ka go dumelelana le maemo a lefelong leo, bagolo ba phuthego ba dira dithulaganyo bakeng sa go nea bohlatse ka dihlopha ka dinako tše di swanetšego, e ka ba mesong, mathapama goba mantšiboa. Dihlogo tše di lego ka go Tirelo ya Rena ya Mmušo le dikarolo Dibokeng tša Tirelo, dikopano tša tikologo le dikopano tša selete di nea ditšhišinyo tše di lego nakong le kgothatšo ya go kgothaletša go tšea karolo dibopegong tše di fapa-fapanego tša go nea bohlatse ka Mmušo. Go okeletša go se, balebeledi ba tikologo le ba selete ba tlwaetša bagoeledi go nea bohlatse setarateng, ba bontšha kamoo go ka šongwago ka gona tšhemo ya kgwebo, gomme ba bontšha ditsela tše dingwe tša go nea bohlatse kae le kae moo batho ba ka hwetšwago gona. Se ka moka se gatelela go se kgaotše go tsebatšeng ditaba tše di lokilego!
7 Baapostola ba Jesu ba ile ba bolela ka sebete gore: “Rena xa re kxône xo lesa xo bolêla tše re di bonexo le tše re di kwilexo.” Ba ile ba phegelela bjang go sa šetšwe mapheko ka moka? Ba ile ba kgopela Jehofa gore a ba thuše, e lego seo a ilego a se dira, gomme “ka moka ba [ile ba] tlala Môya o mokxêthwa, ba bolêla Lentšu la Modimo ka mafolofolo.” (Dit. 4:20, 29, 31) Ga se yo mongwe le yo mongwe yo a ka šegofatšwago ka diphihlelo tše di kgethegilego bodireding, eupša ge e ba ruri re kganyoga go tsebatša ditaba tše di lokilego ka ntle le go kgaotša le ge e ba re dira boiteko bja go dira bjalo gaešita le motheong wa letšatši le letšatši, Jehofa o tla re thuša.