Tseba Banabeno
1 Beibele e hlalosa mogwera wa kgonthe e le motho yo a kgomarelago kudu go feta ngwaneno, yo lerato la gagwe le potego ya gagwe ya go se kwanantšhe e lego tše di sa fetogego, gomme a thuša mogwera wa gagwe nakong ya ditlalelo. (Die. 17:17; 18:24) Re ka se ke ra hloka bagwera ba ba bjalo ka phuthegong ge e ba re dira boiteko bja gore re tsebane le go ratana.—Joh. 13:35.
2 Dibaka tše di botse tša go tlwaelana le banababo rena di hwetšagala pele le ka morago ga diboka. Ke ka baka la’ng o sa fihle e sa le ka pela gomme o šale go se nene ka morago e le gore o tle o thabele bogwera bjo borutho le bjo bo nago le bophelo? Batamela banabeno ba fapa-fapanego gore o boledišane le bona, go akaretša ba ba godilego ba nago le phihlelo goba ba bafsa bao ba nago le dihlong.
3 Thoma Dipoledišano: Dira se se fetago go fo dumediša banabeno o feta. O ka thoma poledišano ka go abelana le ba bangwe phihlelo ya bodiredi bja tšhemo, taba e kgahlišago makasineng wa morago-rago, goba taba yeo e lego mabapi le seboka seo se sa tšwago go phethwa. O ka ithuta go gontši kudu ka banabeno ka go ba motheetši yo mobotse le go ba kgothaletša go bolela ka diphihlelo tša bona le dilo tšeo ba ithutago tšona. Go fo botšiša mabapi le kamoo motho a tsebilego Jehofa ka gona go ka utolla go gontši. Ba bangwe ba bile le diphihlelo tšeo di matlafatšago tumelo maphelong a bona, mola ba bangwe gona bjale ba kgotlelela maemo ao go ka bago thata go ba bantši go nagana ka ona. Go lemoga se go tla re thuša, go ba bao ba naganelago ba bangwe le go ba bao ba arabelago go dinyakwa tša ba bangwe re le bagwera ba kgonthe.
4 Gweranang: Ka morago ga lehu la morwedi wa gagwe, kgaetšedi o ile a hwetša go le thata go opela dikopelo tša Mmušo tšeo di bego di bolela ka tsogo. O a gopola: “Ka nako e nngwe kgaetšedi yo a bego a dutše ka lehlakoreng le lengwe la mokgoba o ile a mpona ke lla. O ile a tla, a nkgokarela gomme a opela le nna kopelo ka moka. Ke ile ka ikwa ke tletše lerato le legolo la go rata banabešo le dikgaetšedi e bile ke thabile kudu gore re ile ra ya dibokeng, ke lemoga gore gona moo Holong ya Mmušo ke moo thušo ya rena e lego gona.” Re swanetše go gwerana le banababo rena ka go ba nea khomotšo ge e nyakega le kgothatšo ka dinako tšohle.—Ba-Heb. 10:24, 25.
5 Ge lefase le la kgale e dutše e e-ba le le gatelelago kudu, anke re ikemišetšeng go tseba banababo rena gakaone. Go kgothatšana ka potego mo go tla ipontšha e le tšhegofatšo go bohle.—Ba-Roma 1:11, 12.