Go ba Boteeng le Jehofa le Morwa wa Gagwe ka Lethabo
Tiragalo e Bohlokwa-hlokwa Ngwageng e tla Binwa ka March 28
1 Ka go bina Sejo sa Morena sa Mantšiboa ka morago ga ge letšatši le sobetše ka March 28, 2002, re bontšha go ba ga rena boteeng bja lethabo le Jehofa Modimo le Jesu Kriste. Tiragalong yeo e kgethegilego, mašaledi a Bakriste ba tloditšwego a tla thabela ‘kabelo’ e kgethegilego yeo a nago le yona gotee le baja-bohwa ba bangwe ba Mmušo le Tate le Morwa wa gagwe. (1 Joh. 1:3, bapiša le NW; Ba-Ef. 1:11, 12.) Dimilione tša “dinku tše dingwê” di tla naganišiša ka tokelo ya tšona e kgahlišago ya go ba boteeng le Jehofa le Morwa wa gagwe e le ba pelo-tee le monagano o tee le bona go phetheng modiro wa Modimo!—Joh. 10:16.
2 Go Šoma Gotee Tswalanong ya Kgaufsi: Jehofa le Jesu ka mehla e bile ba nago le botee bja lethabo. Ba ile ba thabela bogwera bja kgaufsi ka nywaga e mentši kudu pele motho a ka bopša. (Mika 5:1) Ka baka leo go ile gwa ba le tswalano e tseneletšego ya maikwelo a borutho magareng ga bona ka bobedi. Bjalo ka bohlale bjo bo mothofaditšwego, Morwa yo wa leitšibolo a le boemong bja gagwe bja pele e e-ba motho o be a ka re: “Ké xe . . . kè mo [Jehofa] kxahla mehla yohle, kè bapala [“ke thabile,” NW] pele xa xaxwe ka mehla.” (Die. 8:30) Go diriša nako e telele ka mo go sa balegego a le kgaufsi-ufsi le Mothopo wa lerato go ile gwa kgoma Morwa wa Modimo ka mo go tseneletšego!—1 Joh. 4:8.
3 A gopotše ka go nyaka ga batho topollo, Jehofa o ile a kgetha Morwa wa gagwe yo a tswetšwego a nnoši, yoo a bego a kgahlwa ke batho ka mo go kgethegilego gore a nee sehlabelo sa topollo, seo se neago kholofelo e nnoši yeo re nago le yona. (Die. 8:31) Go etša ge Jehofa le Morwa wa gagwe e le batee go phethagatšeng morero o tee, re tšwela pele re le boteeng le bona le go ba boteeng seng sa rena tlemong ya lerato le le tiilego, re dira thato ya Modimo ka lethabo.
4 Go Bontšha Tebogo ya Rena e Tšwago Pelong: Ka go ba gona Segopotšong le ka go theetša ka šedi le ka tlhompho, re ka bontšha tebogo ya rena ya kgonthe ya go leboga lerato la Jehofa le sehlabelo sa Morwa wa gagwe bakeng sa rena. Go tla gatelelwa mohlala o lerato wa Jesu, potego ya gagwe go iša lehung ge a nea topollo le pušo ya gagwe bjalo ka Kgoši ya Mmušo o hlomilwego wa Modimo, gotee le ditšhegofatšo tšeo Mmušo o tlago go di tlišetša batho. Re tla gopotšwa gape ka go nyakega ga go bontšha tumelo ya rena ka mo go tšwelago pele, re šoma ka phišego ka go dumelelana le thato ya Jehofa bjalo ka “bathuši [“badirišani,” NW] modirong wa therešô.”—3 Joh. 8; Jak. 2:17.
5 Go Thuša ba Bangwe Gore ba Kopanele le Rena: Sehlopha sa bagolo se swanetše go dira maiteko a kgethegilego a go kgothatša Dihlatse ka moka tšeo di tapilego tše di lego tšhemong yeo, go ba gona Segopotšong sa lehu la Kriste. (Mat. 18:12, 13) Dira lelokelelo la bao ba swanetšego go etelwa e le gore go se be le yo a lebalwago le gore ka moka ba laletšwe ka go lebanya.
6 Na o tseba ba bangwe bao ba ka bago gona Segopotšong? Gata mogato wa pele wa go aga tebogo ya bona bakeng sa tiragalo ye. Ba laletše ka borutho, gomme o ba dire gore ba ikwe ba amogelegile. Anke re direng sohle seo se lego matleng a rena go laletša barutwana ba rena ka moka ba Beibele le batho ba bangwe bao ba thabelago, gotee le ditho tša malapa le bao re ba tlwaetšego, gore ba be gona tiragalong ye ya bohlokwa-hlokwa mo ngwageng. Mehola ya topollo e dula e hwetšagala bakeng sa bohle bao ba ithutago “tsebo e phadišago ya Kriste Jesu.” (Ba-Fil. 3:8, PK) Bao ba bontšhago tumelo sehlabelong sa Kriste ba ka ba le kholofelo e tiilego ya bophelo bjo bo sa felego.—Joh. 3:16.
7 Le ka mohla o se ke wa tšeela fase tutuetšo yeo Segopotšo se ka bago le yona bathong ba botegago. Nywaga e mebedi e fetilego nageng ya sehlakahlaka ya Papua New Guinea, batho ba 11 ba thabelago ba ile ba sepela diiri tše 17 ka seketswana mawatleng a bilogago e le gore ba ka ba gona tiragalong yeo. Ka baka la’ng? Ba itše: “Re be re nyaka go bina Segopotšo sa Kriste le barapedi-gotee le rena ba Jehofa; ka gona leeto le be le tloga le swanetše.” Nagana ka phišego yeo e ilego ya bontšhwa ke bao ba thabelago le tebogo ya bona ya go leboga go ba boteeng le Jehofa, Morwa wa gagwe le borwarre bja Bokriste!
8 Ithapele go ithuta Beibele le bohle ba ba thabelago. Ba kgothaletše go ba gona ka mehla dibokeng tša phuthego le go abelana le ba bangwe therešo yeo ba ithutago yona. Ba thuše go “sepela seetšeng” le go ‘diriša therešo’ ka go šomiša melao ya motheo ya Beibele maphelong a bona. (1 Joh. 1:6, 7, PK) Ba thuše go ba le tswalano ya kgaufsi le Jehofa le go tšwela pele ba gola go lebogeng ga bona tokelo ya go dira thato ya gagwe ba le boteeng.
9 A tokelo e botse gakaakang ya go ba boteeng ka lethabo “moyeng o tee, ka pelo e tee, [re] hlabanela tumelo ya Ebangedi ga mmogo”! (Ba-Fil. 1:27, 28, PK) Anke re lebeleleng pele bakeng sa bogwera bja rena bjo bo kgahlišago re le gotee Segopotšong ka March 28, re leboga kudu le go feta Jehofa le Morwa wa gagwe!—Luka 22:19.