Sekolo sa Bodiredi sa Pušo ya Modimo sa 2004
1 Jehofa o hlama batho ba tlwaelegilego go phethagatša modiro o bohlokwa wa lefase ka bophara. Tsela e nngwe yeo ka yona a dirago se ke ka tlwaetšo yeo e newago beke le beke Sekolong sa Bodiredi sa Pušo ya Modimo. Na o tšea karolo ka botlalo go ya kamoo maemo a gago a go dumelelago ka gona? Ka January, go tla dirwa dipeakanyo tše mmalwa ka maikemišetšo a go thuša barutwana go holwa kudu ke ditokišetšo tše.
2 Go Šiedišana ka go ba Moeletši wa Mothuši: Bana babo rena bao ba neago dipolelo tša tayo le dintlha tše dikgolo tša Beibele ba thabela kudu dikeletšo tšeo di newago ke moeletši yo e lego mothuši. Moo go nago le bagolo ba lekanego bao ba swanelegago, go ka šiedišanwa ka kabelo ya go ba moeletši yo e lego mothuši ngwaga le ngwaga. Ka tsela ye, morwalo wa modiro o ka arolelanwa; eupša sa bohlokwa kudu ke gore bagolo le bahlanka ba bodiredi bao ba swanelegago ba tla holwa ke phihlelo ka kakaretšo ya diboledi tše di fapa-fapanego tše nago le bokgoni gotee le barutiši.
3 Go Rulaganya Poeletšo ya Molomo: Ge e ba phuthego ya gabo lena e e-na le kopano ya tikologo ka beke ya poeletšo ya molomo, gona poeletšo (le lenaneo ka moka la beke) e swanetše go šuthišetšwa bekeng e latelago gomme lenaneo la beke e latelago le swanetše go swarwa bekeng ya pele ga kopano ya tikologo. Lega go le bjalo, ga go bohlokwa go fetoša mananeo a feletšego a dibeke tše pedi ge poeletšo ya molomo e thulana le ketelo ya molebeledi wa tikologo. Go e na le moo, kopelo, polelo ya seka sa polelo le dintlha tše dikgolo tša Beibele di swanetše go newa bjalo ka ge di rulagantšwe. Polelo ya tayo (yeo e newago ka morago ga polelo ya seka sa polelo) e swanetše go tšewa lenaneong la beke e latelago. Dintlha tše dikgolo tša Beibele di tla latelwa ke Seboka sa Tirelo sa metsotso e 30 seo se ka fetošwago e le gore go ka ba le dikarolo tše tharo tša metsotso e 10 goba dikarolo tše pedi tša metsotso e 15. (Ditsebišo tša mathomo ga se tša swanela go dirwa.) Seboka sa Tirelo se tla latelwa ke kopelo le lenaneo la metsotso e 30 ka molebeledi wa tikologo. Sekolo sa Bodiredi sa Pušo ya Modimo sa beke e latelago se tla tšwela pele ka polelo ya seka sa polelo le dintlha tše dikgolo tša Beibele go ya kamoo se rulagantšwego ka gona gomme sa latelwa ke poeletšo ya molomo.
4 Diriša sebaka se sengwe le se sengwe gabotse bakeng sa go gola moyeng. Ge o dutše o holega thutong ya gago ya Sekolo sa Bodiredi sa Pušo ya Modimo, o kgothatša phuthego ya geno, o tšea karolo go phethagatšweng ga boporofeta bja Beibele gomme o iša tumišo go Mothomi wa molaetša o mobotse wo re swanetšego go o tsebatša.—Jes. 32:3, 4; Kut. 9:19.