Poletšo Ya Sekolo Sa Bodiredi Sa Pušo Ya Modimo

Poletšo Ya Sekolo Sa Bodiredi Sa Pušo Ya Modimo

Dipotšišo tše di latelago di tla ahla-ahlwa ka molomo Sekolong sa Bodiredi sa Pušo ya Modimo bekeng e thomago ka April 25, 2005. Molebeledi wa sekolo o tla swara poeletšo ya metsotso e 30 yeo e theilwego tabeng yeo e akareditšwego dikabelong tša dibeke tša March 7 go ya go April 25, 2005. [Tlhokomedišo: Moo go se nago ditšhupetšo ka morago ga potšišo, o tla swanelwa ke go itirela nyakišišo gore o hwetše dikarabo.—Bona puku ya Sekolo sa Bodiredi, matl. 36-7.]

DIKA TŠA POLELO

1. Ke ka tsela efe re ka dirišago taba ya rena e abetšwego ka mo go holago, le gona ke ka baka la’ng se se le bohlokwa? [2, be-SE letl. 234 dir. 1-3, mapokisi] Re diriša taba ya rena e abetšwego ka mo go holago ka go lokišetša polelo ya rena re ithekgile ka sehlogo, mangwalo le dintlha tše kgolo. Ge re dira se, re bontšha tebogo bakeng sa lenaneo la moya la go fepa leo le lokišeditšwego ke sehlopa sa molaki yo a botegago le yo bohlale. (Mat. 24:45)

2. Ke taba e kaaka’ng e abetšwego yeo re swanetšego go leka go e akaretša polelong? [2, be-SE letl. 234 ser. 4–letl. 235 ser. 1] Re swanetše go akaretša feela yeo re ka kgonago go e diriša ka mokgwa o atlegilego ka nako yeo re e neilwego, re tsepamiše kgopolo dikarolong tšeo di tlago go re thuša go fihlelela pakane ya polelo. Ga se ra swanela go gafa mokgwa o mobotse wa go ruta le go godiša dintlha tše bohlokwa ka baka la go nyaka go akaretša tsebišo e ntši.

3. Ke bjang re ka dirišago dipotšišo bakeng sa go kgothaletša poledišano bodireding bja tšhemo? (Dit. 8:30) [3, be-SE letl. 236 dir. 2-5] Dihlatse tše dintši di kgothaletša batho go bolela ka go kgetha taba yeo batho ba tikologong yeo ba kgomegilego ka yona le ka go botšiša gore, “Na o kile wa ipotšiša . . . . ?” goba “O nagana’ng . . . . ?” Ge ba newa sebaka sa go bolela dipono tša bona, batho ba bantši ba tla ikemišetša kudu go re theetša.

4. Re ka diriša dipotšišo bjang bakeng sa go thuša barutwana ba Beibele go diriša ‘matla a bona a go nagana’? (Ba-Roma 12:1, bapiša le NW.) [5, be-SE letl. 238 ser. 1] Ge re ahla-ahla dikgopolo tša motheo, re ka diriša dipotšišo tša tlaleletšo bakeng sa go thuša morutwana gore a se fo boeletša dikarabo tšeo di gatišitšwego. Re ka botšiša: “Seo re se ahla-ahlago se tswalana bjang le ntlha e nngwe yeo re ithutilego yona? Ke ka baka la’ng e le bohlokwa? E swanetše go kgoma maphelo a rena bjang?” Ka go botšiša dipotšišo go e na le go fo bolela ditumelo tša rena, re thuša barutwana ba rena go diriša ‘matla a bona a go nagana.’

5. Dipotšišo tšeo di rotošitšwego go Ba-Roma 8:31, 32 le Jesaya 14:27 di na le mafelelo afe? [7, be-SE letl. 239 dir. 1-2] Mangwalong ka bobedi, bangwadi ba Beibele bao ba buduletšwego ba be ba diriša dipotšišo bakeng sa go bolela ditumelo tša bona. Dipotšišo tše di lego ditemaneng tše di bontšha gore dikgopolo tše di boletšwego mo di ka se ganetšwe. Re ka diriša dipotšišo tše bjalo bakeng sa go gatelela dintlha go seo re se bolelago.

KABELO NO. 1

6. Ge re le modirong wa go dira barutwana, ke ka tsela efe re ‘theago Kriste e le motheo’? (1 Ba-Kor. 3:11) [1, be-SE letl. 278 dir. 1-2] Go ‘thea Kriste e le motheo,’ re swanetše go thuša batho go dumela sehlabelong sa Jesu sa topollo e le motheo wa phološo. Barutwana ba swanetše go rutwa go lebelela Jesu e le mohlala wa bona le go tšea Diebangedi e le mohlala wo ba swanetšego go o latela kgaufsi. (1 Pet. 2:21) Re swanetše go kgothaletša bao re ba rutago gore ba ipotšiše dipotšišo tše ge ba lebeletšane le go dira diphetho: ‘Jesu o be a tla dira’ng boemong bjo? Na tsela ya-ka ya go dira dilo e tla bontšha tebogo e swanetšego ya go leboga seo a ntiretšego sona?’(Joh. 14:15, 21)

7. Ka ge Jehofa a neile Morwa wa gagwe matla ohle a taolo ka 1914, re ba re bolela’ng ge re rapela re re, “Mmušô wa xaxo a o tlê”? (Mat. 6:9, 10, mongwalo o sekamego ke wa rena.) [2, be-SE letl. 279 ser. 4] Ge re rapela re re, “Mmušô wa xaxo a o tlê,” ke ka kgopolo ya gore Mmušo wa Modimo o bušago o tla gata mogato ka tsela ya makgaola-kgang gore o phethagatše diporofeto tše bjalo ka Daniele 2:44 le Kutollo 21:2-4. Re laetšwe go phatlalatša ditšhegofatšo tšeo Mmušo wa Modimo wo o bušago o tlago go di tliša kgaufsinyane. (Mat. 24:14)

8. Ke ka baka la’ng Bakriste bohle ba swanetše go ba le kgahlego tabeng ya go kgona go bala, le gona Jesu o ile a bea mohlala bjang tabeng ye? [5, w03-SE 3/15 letl. 10 ser. 5; letl. 12 ser. 2] Ka ge Modimo a neile Lentšu la gagwe le le ngwadilwego, o letetše gore barapedi ba gagwe ba tsebe go bala ka mo go ka kgonegago. Go bala Beibele le dithušo tša go ithuta Beibele ka kwešišo go dira gore go be bonolo go diriša keletšo ya yona le go ‘ratha lentšu la therešo re sa kgopamiše.’ (2 Tim. 2:15) Jesu o be a kgona go bala le go ngwala, ka gobane gaešita le ge a be a na le nywaga e 12, o ile a kgona go swara poledišano e kwagalago le banna bao ba rutegilego kua tempeleng. (Luka 2:46, 47)

9. Mehlala ya Josia le Jesu e ka thuša bafsa bjang go dira tšwelopele moyeng? [6, w03-SE 4/1 letl. 8 dir. 3-4; letl. 10 ser. 3] Kgoši Josia yo monyenyane o ile a laela gore a balelwe Lentšu la Modimo. Seo a ilego a sekwa se ile sa mo kgoma pelo gomme sa mo tutueletša go hlankela Jehofa le go dira mo go oketšegilego go godišeng borapedi bja therešo. (2 Kor. 34:14-21, 33) Go dira thato ya Jehofa e be e se feela pakane go Jesu, eupša e be e le thomo yeo e swanetšego go phethwa. O ile a thabišwa le go kgotsofatšwa ke go dira thato ya Modimo. (Joh. 4:34) Bafsa ba swanetše go ba le tutuetšo e botse yeo e tlišwago ke go tseba Mmopi bakeng sa gore ba dire tšwelopele moyeng.

10. Ke ka baka la’ng re ka bota Modimo? (Die. 3:5, 6) [7, w03-SE 11/1 letl. 4 dir. 6-7] Re ka bota Jehofa Modimo ka gobane ke yo mokgethwa gomme le ka mohla a ka se be yo a sa botegego goba yo šoro. (Jes. 6:3) Go feta moo, lerato la Modimo le tutuetša dilo tšohle tšeo a di dirago. (1 Joh. 4:8). Ka godimo ga moo, o re kwešiša gakaone go feta kamoo batho bohle ba re kwešišago ka gona. (Ps. 139:1, 6)

MMALO WA BEIBELE WA BEKE LE BEKE

11. Ke ka baka la’ng Hanna a ile a rapela gore Jehofa ‘a nee Kgoši matla’ mola go be go se na kgoši yeo e lego motho e bušago Isiraele? (1 Sam. 2:10) Taba ya gore ba-Isiraele ba be ba tla ba le kgoši yeo e lego motho e ile ya bolelwa e sa le pele Molaong wa Moše. (Doit. 17:14-18) Boporofeteng bja gagwe ge a be a le diphateng tša lehu, Jakobo o ile a re: “Molamó wa boxoši [leswao la taolo ya bogoši] ó ka se tloxé xo Juda.” (Gen. 49:10) Go oketša moo, ge Jehofa a bolela ka Sara—makgolokhukhu wa ba-Isiraele—o ile a re: “Xo yêna xo tlo tšwa maxoši a dithšaba.” (Gen. 17:16) Ka gona, Hanna o be a rapela ka kgoši ya nakong e tlago. [1, w05-SE 3/15 “Lentšu la Jehofa le a Phela—Dintlha tše Kgolo go tšwa Pukung ya Samuele wa Pele”]

12. Re ka ithuta’ng tabeng ya gore ba-Isiraele ba ile ba fenywa go sa šetšwe gore areka ya kgwerano e be e le gare ga bona? (1 Sam. 4:3, 4, 10, PK) Go holofela gore diswantšho di na le matla a fetago a batho go feleletša ka masetla-pelo. Gaešita le selo se sekgethwa bjalo ka “areka ya kgwerano ya Jehofa” se ile sa palelwa ke go ba pheko ya tšhireletšo. Re swanetše go ‘phafogela medimo e šele.’ (1 Joh. 5:21) [1, w05-SE 3/15 “Lentšu la Jehofa le a Phela—Dintlha tše Kgolo go tšwa Pukung ya Samuele wa Pele”; w02-SE 7/1 matl. 6-8]

13. Ke ka baka la’ng 1 Koronika 2:13-15 e re Dafida ke morwa wa bošupa wa Isai, mola 1 Samuele 16:10, 11 e bontšha gore e be e le wa boseswai? Mangwalo a bolela gore Isai ‘o be a na le barwa ba seswai.’ (1 Sam. 17:12) Go bonagala yo mongwe wa barwa ba gagwe a se a ka a phela lebaka le letelele ka mo go lekanego go ka nyala gomme a be le bana. Ka ge a be a se na bana, o be a ka se be le karolo bohweng bja moloko goba go bolelelwa dipegong tša lelokelelo la lešika la lapa la Isai. [5, w02-SE 9/15 letl. 31]

14. Saulo o ile a ferehlwa ke “môya o mobe,” ke moya ofe woo? (1 Sam. 16:14) Moya o mobe woo o bego o hlokiša Saulo khutšo ya monagano, e be e le tshekamelo e mpe ya monagano wa gagwe le pelo—e lego kganyogo ya gagwe ya ka gare ya go nyaka go dira se se fošagetšego. Ge Jehofa a tloša moya wa gagwe o mokgethwa, Saulo o ile a se sa hlwa a šireletšwa ke wona gomme a laolwa ke moya o mobe. Ka ge Modimo a be a dumeletše moya woo go tšeela moya wa gagwe legato, moya wo o mobe o bitšwa ‘moya o mobe o tšwago go Jehofa.’ [5, w05-SE 3/15 “Lentšu la Jehofa le a Phela—Dintlha tše Kgolo go tšwa Pukung ya Samuele wa Pele”

15. Na mantšu ao a boleletšwego pele ke yo go bego go dumelwa gore ke Samuele ka sedupe kua Endoro a be e nepagetše? (1 Sam. 28:16-19) Aowa. Saulo o ile a gobatšwa o šoro ntweng ya go lwa le Ba-Filisita, eupša o hwile ka go ipolaya. (1 Sam. 31:1-4) Le gona, ka go fapana le go bolelela pele moo go bego go bontšha gore barwa ba Saulo ka moka ba be ba tla hwa le yena, morwa wa gagwe Isibosethe o ile a phologa. [8, w88-SE 1/15 letl. 3 dir. 3-4]