Na re Swanetše go Phetha Dikeno tša Rena?

BANYALANI ba bangwe bao ba thabilego ba lebeletšane le bothata bjo bo kwešago bohloko. Nywageng e fetilego, nakong ya ge ba be ba nweletše bothateng bja lapa bjo bo sa thabišego, ba ile ba dira keno ya gore ba tla nea Modimo karolo ya lesome ya moputso wa bona ge a be a ka ba hlakodiša mathateng a bona. Gona bjale ba tšofetše gomme ba robja ke mathata ao ba bego ba sa a letela a tša ditšhelete, ba ipotšiša gore, “Na re gapeletšega go phetha keno ye?”

Bothata bjo ba lego go bjona bo gatelela keletšo ya monna yo bohlale malebana le go kitimela go bolela: “Go kaone ge o sa ene, go fetiša ge o ena, o sa phethe. Se lese molomo wa gago wa diriša mmele wa gago go senya, gomme o se ke wa bolela pele ga morongwa wa Modimo wa re: Ke phošo fela.”​—⁠Mmoledi 5:​4, 5, PK.

Go Fahlela ka Mabaka a Fokolago ga go Nyakege

Ešita lege dikeno tšeo di sa rego selo le dikholofetšo tšeo di sa botegego e le dilo tše di tlwaetšwego lekokong la batho la lehono leo le tlogeletšego dilo, re ka se ke ra letela gore Modimo a amogele mabaka a go itlhamelwa; gaešita le bo-rakgwebo ba tseba seo kudu. Sehlogo se se lego ka makasineng wa kgwebo wa Industry Week se se rego “Potego Kgwebong: Na ke Bothata?” se lla ka gore: “Ga re sa hlwa re holofela gore batho ba tla bolela therešo, gore ba tla dira se se lokilego go e na le go laolwa ke boithati, le gore ba tla phetha dikholofetšo tša bona.” Lege go e-⁠na le bofora bjo bo diregago gabonolo, bjalo ka gore “tšheke e rometšwe ka poso,” bo ka diegiša nako ge go dirišanwa le baseki ba dikoloto bao e lego batho, fela barongwa ba ka se tsoge ba forilwe.

Se ga se bolele gore Modimo o diriša barongwa gore ba gapeletše go phethwa ga dikeno ka tsela yeo ka yona moadimiši wa moradia wa ditšhelete yo a nyakago dipoelo tše phagamego, a ka dirišago dikebekwa gore ba amoge ka kgang ditefelo tšeo di nago le tswalo go bahlaselwa bao ba se nago mahlatse. Go e na le moo, Modimo ka lerato o dira barongwa ba gagwe “meoya ya bodiredi [bjo bo agago], e romelwago tirelong ka baka la ba ba tlogo rua polokego.” (Ba-Hebere 1:​14, PK) Ka baka leo, barongwa ba ka tšea karolo go arabjeng ga dithapelo tša rena tše di tšwago pelong, e bile ba a e tšea.

Lega go le bjalo, ge e ba re tšwela pele go dira dikholofetšo tša lefeela dithapelong tša rena, na e ka ba mo go botse go letela ditšhegofatšo tša Modimo? Monna yo bohlale o re: “Gobane e ka ba’ng ge Modimo a ka galefela polelo ya gago, [bonyenyane go fihla tekanyong e itšego] a senya modiro wa diatla tša gago?”​—⁠Mmoledi 5:⁠5b, PK.

Ka gona, ga se go boifa morongwa yo a lefeletšago mo go swanetšego go re hlohleletša gore re phethe dikeno tša rena go e na le go iphahlelela ka mabaka. Go e na le moo, re swanetše go lebelela tswalano ya rena le Modimo e le e bohlokwa gomme ka potego re kganyoge gore Modimo a re thuše go seo re se dirago. Go bjalo ka ge banyalani bao go boletšwego ka bona ka mo godimo ba boletše gabotse ka gore: “Re nyaka go ba le letswalo le le hlwekilego pele ga Modimo le go dira dilo go ya ka thato ya gagwe.”

Boloka Letswalo le le Botse

Gore re be le letswalo le lebotse mabapi le go phetha dikeno tša rena, re swanetše go ipotegela. Ka mohlala: A re re motho o mongwe o be a go kolota tšhelete e ntši kudu eupja ka baka la mathata a itšego a ikhwetša a sa kgone go go bušetša yona. Ke’ng seo o bego o ka se thabela kudu​—⁠na ke ge a be a ka se itshwenye ka go dira se sengwe ka molato ka gore a re o ka se kgone go lefša goba ge bonyenyane a ka dira tokišetšo ya go go lefa ganyenyane-ganyenyane, ka go lefa tekanyo e itšego ya tšhelete ka mehla ge a be a kgona?

Ka lona lebaka leo, a re re mo gongwe keno yeo e dirwago ka lephakuphaku ya gore motho o tla gafela nako ya gagwe e tletšego goba matlotlo a mangwe medirong e swanetšego ya Bokriste go fo tloga go sa kgonege go e phetha. Na ga se ra swanela go ikwa re gapeletšega go ya bokgoleng bjo bo kgonegago bja go phetha keno ya rena ge maemo a nakong yeo a re dumelela? Paulo o ngwadile gore, ‘ge thato e botse e le gona, e tlo thabelwa’ go sa šetšwe gore re na le mo gontši mo re ka go neago goba mo gonyenyane fela. (2 Ba-Korinthe 8:​12) Eupja go thwe’ng ka dikeno tšeo motho a di dirilego pele a hwetša tsebo e nepagetšego ya therešo ya Beibele?

Dikeno tše di Fošagetšego Goba Tšeo e Sego tša Mangwalo

Ge re lemoga gore keno ye re e dirilego ke yeo e sa hlwekago goba yeo e gobogilego, re swanetše go e lahla bjalo ka ge eka ke ge re lahla legala la go fiša! (2 Ba-Korinthe 6:​16-⁠18) Mehlala ya dikeno tše di šilafetšego še:

◻ Dikeno tšeo di direlwago medimo ya maaka goba medimogadi, e bjalo ka “mohumaxadi-wa-lexodimo” wa Babele.​—⁠Jeremia 44:​23, 25.

◻ Dikeno tše e sego tša molao, tše swanago le keno ya banna ba 40 ya gore ba be ba ka se je le lerathana la dijo go fihlela ge ba bolaya moapostola Paulo.​—⁠Ditiro 23:​13, 14.

◻ Dikeno tša bohlanogi tšeo di latelago “dithutô tša meôya e mebe . . . ba xo bolêla maaká . . . , ba iletša motho xo tšea mosadi, ba ila dijô tše Modimo a di bopetšexo xo amoxêlwa ka xo leboxa ke badumedi ba ba lemoxilexo therešô.”​—⁠1 Timotheo 4:​1-⁠3.

Ka gona, go molaleng gore re ka bolela dikeno tša nakong e fetilego e le tša lefeela. Eupja ge e le dikeno tšeo di bego di se na selo seo se thulanago le Mangwalo, ke ka baka la’ng re nyaka ditsela tša go intšha go tšona? Na tsebo e nepagetšego yeo re nago le yona gona bjale ga e a swanela go re dira gore re bontšhe tlhompho e kgolwanyane go feta le ge e le neng dikenong tša rena tša nakong e fetilego?

Naganišiša ka Dikeno tša Gago tša Nako e Fetilego le tša Nako e Tlago

Gape se se bontšha gore re swanetše go naganišiša pele re ka dira dikeno lege e le dife tša nakong e tlago borapeding bja rena. Dikeno ga se tša swanela go dirišwa feela e le go tutueletša motho go dira goba go se dire selo se itšego, bjalo ka go oketša nako ya gago yeo o e dirišago borapeding bja Bokriste goba go široga go ja kudu. Le gona, Jesu ga se a ka a gana dikeno ka moka, bjalo ka ge ka mohlala, ge dikeno di nyakwa kgorong ya tsheko ya molao. Eupja go molaleng gore o ile a hloma mollwane mabapi le dikeno tšeo e sego tša tlhaologanyo, ka gobane o eleditše gore: “Le xôna Le kwele xe xo boditšwe ba boxolo-xolo xwa thwe: O se kê wa êna maaká; ’me o phêthê tše O di enetšexo Modimo. Xe e le Nna ke botša lena ke re: Le se kê la bá la êna.” (Mateo 5:​33, 34) Ke ka baka la’ng a ile a tšea boemo bjo? Na dikeno di be di fetogile tšeo di sa swanelago go feta ka mo di bego di le ka gona pele ga moo?

Dikeno tšeo di bego di dirwa ke batho bao ba botegago ba mehleng ya bogologolo gantši di be di ithekgile ka maemo. Ge ba be ba rapela ka potego ba be ba holofetša Jehofa gore, ‘Ge o ka nthuša go tšwa bothateng bjo, ke tla go direla sekete le sekete.’ Eupja Jesu o itše: “Tšohle tše Le tl’o xo di kxopêla xo Tate ka Leina la-ka ó tlo Le fa.” E le go se kgothaletše batho ba botegago ba mehleng ya gagwe go dira dikeno tšeo di ithekgilego ka maemo, Jesu o ba kgothaditše ka gore: “Xo fihla byale Le be Le sešo la kxopêla selô ka Leina la-ka. Kxopêlang, xomme Le tlo tšea.”​—⁠Johane 16:​23, 24.

Kholofelo ye e theilwego leineng, goba boemong bja Jesu e swanetše gape e homotše motho le ge e le mang yo a sa dutšego a ikwa a na le molato ka gobane​—⁠le ge a ka leka⁠—​a ka se kgone go phetha seo a se holofeditšego Modimo ‘ka molomo a se a nagane.’ (Lefitiko 5:​4-⁠6, NW) Ka gona le ge re sa tšeele fase dikeno tša rena tša nakong e fetilego, ga se gore re ka se kgone feela go rapela leineng la Jesu eupja re ka lopa Modimo gore a diriše sehlabelo sa topollo sa Jesu dibeng tša rena le go kgopela tebalelo ka leina la Jesu. Ka go rialo re ka kgona go amogela “tumelo e phethegilego, re fokilwe dipelo go tlošetšwa letswalo le lebe.”​—⁠Ba-Hebere 10:​21, 22, PK.

Priests taking vows at Montmartre