Tshwarelo ya Modimo ke e Feletšego Gakaaka’ng?

“Ke nagana gore le ka mohla Modimo a ka se ke a ntshwarela dibe tša-ka. A ka se ke a nthata ka baka la seo ke se dirilego.”​—⁠Gloria.

GLORIA o be a se na bothata bja go botša ba bangwe gore Jehofa o tla ba swarela dibe tša bona.a Eupja ge a be a nagana ka diphošo tša gagwe ka noši, Gloria o be a ikwa a ahlotšwe. Tshwarelo ya Jehofa go be go bonala go le thata go e hwetša.

Go lemoga mogato goba tsela e fošagetšego ya bophelo go ka ferekanya letswalo. Dafida o ngwadile ka morago ga ge a dirile sebe gore, “Ke be ke lapišitšwe ke go lla letšatši ka moka. Matla a-ka a be a fedile.” (Psalme 32:​3, 4, Today’s English Version; bapiša le Psalme 51:⁠3.) Ka lethabo, Jehofa o thabela go lebalela phošo. O “ikemišeditše go swarela.”​—⁠Psalme 86:​5, NW; Hesekiele 33:⁠11.

Lega go le bjalo, Jehofa o bona pelo. Tshwarelo ya gagwe ga se ya thewa feela polelong. (Ekisodo 34:7; 1 Samuele 16:⁠7) Modiradibe o swanetše go dumela phošo ya gagwe phatlalatša, a bontšhe go itshola ga kgonthe gomme a hloye tsela ya gagwe e mpe e le selo se se hlaswegago le se se sa rategego. (Psalme 32:5; Ba-Roma 12:9; 2 Ba-Korinthe 7:11) Ke ka nako yeo feela moo mofoši a ka lebalelwago gomme a hwetša “dinako tša tapologo” go Jehofa.​—⁠Ditiro 3:​19, NW.

Eupja gaešita le ka morago ga go sokologa, ba bangwe ba sa dutše ba ikwa ba ahlotšwe. Na ba swanetše go rwala maikwelo a molato ka go sa felego? Go ka hwetšwa khomotšo efe ka Beibeleng bakeng sa bao ba sokologilego dibeng tša bona le go di tlogela eupja e le bao ba sa dutšego ba ikwa ba tlaišega pelong?​—⁠Psalme 94:⁠19.

Go Imolla Morwalo

Dafida ge a be a nyamišitšwe ke diphošo tša gagwe, o ile a rapela Jehofa ka gore: “O mpônê bobôtlana le bohlaki, O ntebalêlê dibe tša-ka tšohle.” (Psalme 25:18) Mo Dafida o ile a kgopela gore Jehofa a dire se se fetišago go swarela. O kgopetše gore Jehofa a mo ‘lebalele’ dibe tša gagwe, gore a di imolle goba a di rwale, a di tloše. Sebe se na le mafelelo a šoro kudu, gomme ga go pelaelo gore go Dafida se se be se akaretša morwalo wa letswalo le molato.

Ngwageng o mongwe le o mongwe ba-Isiraele go bonala ba be ba gopotšwa gore Jehofa o be a ka tloša dibe tša setšhaba. Ka Letšatši la Poelano moperisita yo mogolo o be a bea diatla tša gagwe hlogong ya pudi, a bolela dibe tša setšhaba go yona ke moka a romela pudi kgole lešokeng. Mang le mang yo a lego gona o be a ka bona ka leihlo la monagano go tlošwa ga dibe tša setšhaba.​—⁠Lefitiko 16:​20-22.

Ka gona batho bao ba sokologilego dibeng tša bona ba ka homotšega. Ditiragalo tša Letšatšing la Poelano di be di swantšhetša tokišetšo e kgolo ka go fetišiša ya go tloša sebe​—⁠sehlabelo sa Jesu Kriste sa topollo. Jesaya o ngwadile ka tsela ya boporofeta ka Jesu gore: “A rwala dibe tša ba bantši.” (Jesaya 53:12) Ka gona, dibe tša nakong e fetilego ga se tša swanela go imela letswalo. Eupja na Jehofa o tla gopola dibe tše ka morago?

Go Phumola Molato

Thapelong ya gagwe ya mohlala, Jesu o itše: “Re lebalêlê [“swarele,” NW] melato ya rena.” (Mateo 6:12) Lentšu la Segerika le le fetoletšwego mo e le “swarele” ke sebopego sa lediri leo le bolelago “tlogela.” Ka gona, go swarela sebe go swantšhwa le go tlogela goba go phumola molato.​—⁠Bapiša le Mateo 18:​23-35.

Petro o hlalositše se ka mo go nabilego ge a be a re: “Ké xôna ithsoleng-xê, Le sokoloxê, xore Le phomolwê dibe tša lena.” (Ditiro 3:19) “Phomolwê” le bolela go fediša, goba go tloša. Le bolela go hlakolwa ga pego yeo e ngwadilwego, go phumola letlapa.​—⁠Bapiša le Ba-Kolose 2:​13, 14.

Ka gona, bao ba sokologilego ga se ba swanela go boifa gore Modimo o tla nyaka tefo ya molato wo a o phumotšego. O re: “Ke se hlwê ke xopola dibe tša xaxo.” (Jesaya 43:25; Ba-Roma 4:​7, 8) Se se bolela’ng go modiradibe yo a sokologilego?

Go Tloša Sepatso

Jehofa o boletše ka moporofeta Jesaya gore: “Le xe dibe tša lena di hubetše bo-ka madi, di tlo šweufala wa leswêla; le xe di hubetše wa letsoku, di tlo etša bôya bya dinku.”​—⁠Jesaya 1:⁠18.

Maiteko a go tloša sepatso se se nweletšego seaparong gantši ke a lefeela. Go e na le moo sepatso se a fokotšega eupja se sa dutše se bonala. Ke mo go homotšago gakaakang gore Jehofa a ka tloša dibe tšeo di hwibitšego wa letsoku goba crimson gomme a di dira gore e be tše tšhweu bjalo ka leswela.​—⁠Bapiša le Psalme 51:⁠7.

Ka gona, modiradibe yo a sokologilego ga se a swanela go nagana gore o dula a e-na le leswao bophelong bja gagwe ka moka. Jehofa ga a fo fokotša diphošo, a dira motho yo a sokologilego gore a phele a e-na le dihlong tše di sa felego.​—⁠Bapiša le Ditiro 22:⁠16.

Thekgo ya ba Bangwe

Gaešita lege Jehofa a imolla morwalo, a phumola molato le go tloša sepatso sa sebe, motho yo a sokologilego o sa dutše a ka ikwa a nyamišwa ke maikwelo a molato ka dinako tše dingwe. Paulo o ngwadile mabapi mofoši yo a sokologilego ka phuthegong ya Korinthe yo a bego a swaretšwe ke Modimo eupja a ka ba a ile a “metšwa ke nyamô xe e mo xolêla [“go ba yo a nyamilego kudu moo a ineelago ka mo go feletšego,” TEV].”​—⁠2 Ba-Korinthe 2:⁠7.

Motho yo o be a ka thušwa bjang? Paulo o tšwela pele ka gore: “Ke le kgothaletša gore le tiiše lerato la lena go yena.” (2 Ba-Korinthe 2:⁠8, NW) Lentšu leo Paulo a le dirišitšego la ‘tiiša’ ke lentšu la molao leo le bolelago “go kgonthišetša.” Ee, batho bao ba sokologilego bao Jehofa a ba swaretšego le bona ba swanetše go kgonthišetša goba go tiiša kamogelo ya Bakriste-gotee le bona.

Ka mo go kwešišegago, se se ka tšea nako. Motho yo a sokologilego o swanetše go tloša kgobošo ya sebe sa gagwe gomme a age pego e kgodišago ya go loka. O swanetše go kgotlelela maikwelo a motho lege e le ofe yo a kgomilwego ka noši ke diphošo tša gagwe tša nakong e fetilego a sa fele pelo. Ge go le bjalo, a ka kgodišega ka tshwarelo e feletšego ya Jehofa go etša ge Dafida a ile a swarelwa: “’Karoxô tša rena ó di tloša mo xo rena a di iša kxolê, kxolê bo-ka Bohlabêla bò le kxolê le Bodikêla.”​—⁠Psalme 103:⁠12.

Return of the Prodigal Son by Rembrandt: Scala/Art Resource, N.Y.

[Mengwalo ya tlase]