Pono ya Beibele

Bohlotlolo—Na bo Swanetše go Lebalelwa Goba ga se bja Swanela go Lebalelwa?

‘LE LEBALELE yo a nago le taba le lena, gore le Tata-weno wa magodimong a le lebalele dikarogo tša lena.’ (Mareka 11:​25) Mantšu ao a Jesu a rotoša dipotšišo tše di hlohlago ge lenyalo le teka-tekišwa ke bohlotlolo: Na Mokriste yo a se nago molato o swanetše go lebalela molekane wa gagwe gomme a boloke lenyalo le šireletšegile?a Ge e ba a phetha ka go hlala, na o bea tswalano ya gagwe le Modimo kotsing? Anke re boneng kamoo Beibele e thušago ka gona go araba dipotšišo tše.

Na o Swanetše go Lebalela ka Mehla?

Na mantšu a Jesu a rego, ‘le lebalele yo a nago le taba le lena,’ a bolela gore e be maemong ka moka​—⁠go akaretša le ge molekane a dira bohlotlolo⁠—​Mokriste o tlamegile go lebalela? Polelo ya Jesu e swanetše go kwešišwa ge go dutše go naganwa ka ditlhaloso tše dingwe tšeo a di neilego mabapi le go lebalela.

Ka mohlala, re ithuta molao wa motheo o bohlokwa o lego mabapi le go lebalela go tšwa mantšung a Jesu ao a ngwadilwego go Luka 17:​3, 4: “Xe ngwan’eno à Xo senyetša, mo sôlê; xomme xe a sokoloxa O mo lebalêlê. Le xe a ka Xo senyetša xa-šupa ka letšatši, ’me a boêla xo wene xa-šupa, a re: Ke sokoloxile! O mo lebalêlê.” (Mongwalo o sekamego ke wa rena.) Ruri, mabakeng ao e lego sebe se segolo, yo a senyeditšwego o kgothaletšwa gore a leke go lebalela ge e ba go e-⁠na le go itshola mo go tšwago pelong. Jehofa ka noši o lebelela ditaba ka tsela ye; gore re hwetše tebalelo ya Modimo, re swanetše go itshola ka go tšwa pelong.​—⁠Luka 3:⁠3; Ditiro 2:​38; 8:⁠22.

Lega go le bjalo, se se bontšha gape gore ge e ba molekane yo a dirilego bohlotlolo a sa itshole, a gana go dumela molato wa sebe sa gagwe, ke mo go kwešišegago gore molekane yo a se nago molato a ka kgetha go se mo lebalele.​—⁠Bapiša le 1 Johane 1:​8, 9.

Go Lebalela​—⁠Go Thwe’ng ka Ditla-morago?

Lega go le bjalo, go thwe’ng ge e ba yo a dirilego bohlotlolo a itshola? Ge go e-⁠na le go itshola, go na le motheo bakeng sa go lebalela. Eupša na go lebalela go bolela gore mofoši o lokologile go ditla-morago ka moka tša tsela ya gagwe e fošagetšego? Nagana ka mehlala e mengwe ya tebalelo ya Jehofa.

Nakong ya ge ba-Isiraele ba be ba theetša dihlodi tše lesome tšeo di ilego tša nea pego e mpe mabapi le naga ya Kanana gomme ba rabela, Moše o ile a lopa Jehofa ka gore: “Hle a k’o lebalêlê sethšaba sé dibe tša sôna.” Jehofa o fetotše ka gore: “Ke ba lebaletše byalo ka xe O bolêla.” Na se se be se bolela gore bafoši ba be ba lokologile go ditla-morago le ge e le dife tša ditiro tša bona? Jehofa o tšwetše pele ka gore: ‘Gobane banna [ka moka] . . . ba ba gannego go kwa Lentšu la-ka, ba ka se ke ba ba ba bona naga ye ke e enetšego botat’abo.’ (Numeri 14:​19-23) Jehofa o ile a phethagatša seo a se boletšego; moloko woo wa kgale​—⁠ka ntle le Jošua le Kalebe⁠—​ga se wa ka wa bona Naga ya Kholofetšo.​—⁠Numeri 26:​64, 65.

Ka mo go swanago, nakong ya ge moporofeta Nathane a be a sola Kgoši Dafida ka baka la sebe se a se dirilego le Batseba, Dafida yo a itsholago o ile a bolela gore: “Ke senyetše Morêna!” Ka morago Nathane o ile a botša Dafida gore: “Xôna Morêna ó Xo lebalêla sebe sa xaxo.” (2 Samuele 12:​13) Lega go le bjalo, gaešita le ge Jehofa a be a lebaletše Dafida, Dafida o ile a tlaišwa ke ditla-morago tša sebe sa gagwe bophelo bja gagwe ka moka.​—⁠2 Samuele 12:​9-14; bona gape le 2 Samuele, kgaolo 24.

Mehlala ye ya tebalelo ya Modimo e gatelela thuto e bohlokwa: Re ka se ke ra dira sebe gomme ra hloka kotlo. (Ba-Galatia 6:​7, 8) Modira-dibe yo a itsholago le ge a ka hwetša tebalelo, ga se gore o efogile ditla-morago tša tsela ya gagwe e fošagetšego. Na se se bolela gore molekane yo a se nago molato a ka lebalela yo a dirilego bohlotlolo​—⁠bonyenyane ka kgopolo ya go tloša sekgopi se bohloko⁠—​lega go le bjalo a phetha ka go mo hlala?

Tebalelo le Tlhalo

Nakong ya bodiredi bja gagwe, Jesu o ile a bolela ka tlhalo mabakeng a mararo. (Mateo 5:​32; 19:​3-⁠9; Luka 16:​18) Ka mo go kgahlišago, ga go na le ka lekga le tee dipoledišanong tše moo Jesu a ilego a bolela ka go lebalela. Ka mohlala, bjalo ka ge go hwetšwa go Mateo 19:⁠9, o itše: “Motho e a hlalaxo mosadi wa xaxwe, xe e se ka ’baka la bootswa, ’me a tšea e mongwê, ó dira bootswa.” Ka go bolela gore “xe e se ka ’baka la bootswa,” Jesu o be a bolela gore boitshwaro bjo bo gobogilego bja botona le botshadi bo be bo tla nea molekane yo a se nago molato tshwanelo, goba ‘lebaka’ la Mangwalo la go hlala. Ka gona, Jesu o be a sa bolele gore yo a se nago molato o swanetše go hlala. Lega go le bjalo, o file kgopolo e kwalago ya gore a ka dira bjalo.

Lenyalo ke tlemo yeo e tlemaganyago batho ba babedi gotee. (Ba-Roma 7:⁠2) Eupša ge yo mongwe wa bona a sa botege, tlemo e ka kgaolwa. Maemong a bjalo molekane yo a se nago molato ge e le gabotse o lebana le diphetho tše pedi. Ya pele, na o swanetše go lebalela? Bjalo ka ge re bone, taba ya bohlokwa mo ke ge e ba yo a dirilego bohlotlolo a itshola ka go tšwa pelong goba go se bjalo. Ge go e-⁠na le go itshola, ge nako e dutše e e-⁠ya molekane yo a se nago molato a ka lebalela​—⁠bonyenyane ka kgopolo ya go tloša sekgopi.

Phetho ya bobedi ke ya gore, na o swanetše go phegelela tlhalo? Ke ka baka la’ng potšišo ye e swanetše go rotoga ge e ba a mo lebaletše?b Go thwe’ng ge e ba a e-⁠na le dipelaelo tše di kwalago mabapi le go šireletšega ga gagwe gotee le bana ba gagwe, kudu-kudu ge e ba monna wa gagwe a kile a ba swara gampe nakong e fetilego? Goba go thwe’ng ge e ba a e-⁠na le dipoifo tša go fetelwa ke bolwetši bjo bo fetetšwago ka kopano ya botona le botshadi? Goba go thwe’ng ge e ba a nagana ka mo go tseneletšego gore ka baka la go mo eka ga gagwe, a ka se sa hlwa a sa mmota tswalanong ya bona ya monna le mosadi? Maemong a bjalo ke mo go kwešišegago kudu gore molekane yo a se nago molato a ka lebalela molekane wa gagwe yo a fošitšego (ka kgopolo ya go tloša sekgopi) gomme ka mo go swanago a phetha ka go mo hlala ka gobane a se sa rata go tšwela pele a dula le yena. Go tloša sekgopi go ka mo thuša gore a tšwele pele ka bophelo bja gagwe. Go ka mo thuša gape go dira gore ditirišano le ge e le dife tšeo go ka nyakegago gore a be le tšona nakong ya ka pele le yo a dirilego bohlotlolo di dule e le tša segwera.

Go sa šetšwe gore go hlala molekane yo a sa botegego ke phetho ya motho ka noši, ke yeo molekane yo a se nago molato a swanetšego go e dira ka morago ga go ela ka kelohloko le ka thapelo mabaka ka moka ao a akaretšwago. (Psalme 55:​22) Ba bangwe ga ba na tshwanelo ya go leka go laela goba go gapeletša molekane yo a se nago molato gore a dire phetho le ge e le efe. (Bapiša le Ba-Galatia 6:⁠5.) Gopola, Jesu ga se a bolela seo molekane yo a se nago molato a swanetšego go se dira. Ka gona, go molaleng gore Jehofa ga a nyamišwe ke bao ba kgethago go hlala ka mabaka a swanetšego a Mangwalo.

[Mengwalo ya tlase]

[Picture Credit Line on page 10]

Life