Pono ya Beibele

Na Madumedi ka Moka ke Ditsela tše di sa Swanego Tšeo di Išago go Modimo?

MONGWADI Marcus Borg o boletše gore: “Ke hwetša e tloga e le mo go sa dumelegego gore Modimo wa legohle ka moka o kgethile gore a tsebje ka moetlo wa bodumedi botee.” Mothopi wa Sefoka sa Khutšo sa Nobel Desmond Tutu o itše: “Ga go bodumedi bjo bo ka bolelago gore bo na le therešo ka moka ya mabapi le sephiri” sa tumelo. Kgopolo e tumilego kudu ya Hindu ke “Jotto moth, totto poth,” yeo ge e hlaloswa ka mo go nepagetšego e bolelago gore madumedi ka moka ke feela ditsela tšeo di sa swanego tšeo di nago le pakane e tee. Ma-Buddha ka mo go swanago a na le pono e swanago. Ka kgonthe, batho ba dimilione ba dumela gore madumedi ka moka ke ditsela tše di sa swanego tšeo di išago go Modimo.

Radihistori Geoffrey Parrinder o itše: “Ka dinako tše dingwe go tle go thwe madumedi ka moka a na le pakane e tee, goba ke ditsela tše di lekanago tšeo di išago therešong, goba gaešita le gore ka moka ga ona a ruta dithuto tše di swanago.” Dithuto, ditirelo le medimo ya madumedi di swana e le ka kgonthe. Madumedi a mantši a bolela ka lerato gomme a ruta gore go bolaya, go utswa le go bolela maaka go fošagetše. Dihlopheng tše dintši tša madumedi, ba bangwe ba dira maiteko a kgonthe bakeng sa go thuša ba bangwe. Ka gona, ge e ba motho a botega ditumelong tša gagwe gomme a leka go phela bophelo bjo bobotse, na go na le taba gore o bodumeding bofe? Goba na madumedi ka moka ke feela ditsela tše di sa swanego tšeo di išago go Modimo?

Potego e Nnoši—Na e Lekane?

Ela hloko taba ya monna wa mo-Juda wa lekgolong la pele la nywaga yo a bego a bitšwa Saulo, yo a ilego a tla a ba moapostola wa Mokriste Paulo. E be e le molatedi yo a fišegago kudu wa Bojuda, gomme se se ile sa mo dira gore a leke go fediša borapedi bja balatedi ba Kriste e lego borapedi bjo a bego a nagana gore ga se bja swanela. (Ditiro 8:1-3; 9:1, 2) Eupša ka kgaugelo ya Modimo Saulo o ile a lemoga gore bona batho ba bodumedi bjo bo swanago le bja gagwe ba ka ba ba fišegela Modimo, eupša lega go le bjalo ka baka la go hloka kgonthe ya taba, ba ka ba ba fošitše. (Ba-Roma 10:2) Ge Saulo a be a ithuta ka mo go oketšegilego ka thato ya Modimo le mediro ya gagwe, o ile a fetoga gomme a thoma go rapela gotee le bona bale a bego a ba tlaiša—balatedi ba Jesu Kriste.—1 Timotheo 1:12-16.

Na Beibele e bolela gore go na le ditumelo tše makgolo tšeo re ka kgethago go tšona le gore e nngwe le e nngwe yeo motho a e kgethago Modimo o tla e amogela? Moapostola Paulo o ile a amogela ditaelo go Jesu Kriste yo a tsošitšwego tšeo di ilego tša bolela se se fapanego kudu. Jesu o ile a mo roma go batho ba ditšhaba bakeng sa go “ba budulola mahlô, [go] ba xomiša ba tšwa lefsifsing ba tla seetšeng, ba tšwa matleng a Sathane ba tla xo Modimo.” (Ditiro 26:17, 18) Ka kgonthe kgetho ya rena ya bodumedi e na le taba. Bontši bja batho bao Paulo a ilego a romelwa go bona ba be ba šetše ba e-na le bodumedi. Eupša ba be ba le “lefsifsing.” Ka kgonthe, ge nkabe madumedi ka moka e be e fo ba ditsela tše di sa swanego tšeo di išago bophelong bjo bo sa felego le go amogelwa ke Modimo, go be go ka se nyakege gore Jesu a tlwaetše balatedi ba gagwe bakeng sa modiro wa go dira barutiwa woo a ba laetšego gore ba o dire.—Mateo 28:19, 20.

Thutong ya gagwe e tumilego ya Thabeng Jesu o itše: “Tsênang ka kxôrô e pitlaxanexo; xobane kxôrô e išaxo tahlexong ké pêtlêkê, le tsela ye e yaxo xôna e phatlaletše; ’me ba ba tsênaxo ka yôna ké ba bantši. Xobane kxôrô e išaxo bophelong e pitlaxane; le tsela ye e yaxo xôna ké e thsêsê; ’me ba ba e bônaxo xa ba nene.” (Mateo 7:13, 14) Beibele e bolela ka mo go kwalago gore “tumêlô ké e tee.” (Ba-Efeso 4:5) Ke mo go kwagalago gore ba bantši bao ba lego tseleng e “pêtlêkê” ba na le bodumedi. Eupša ga ba na ‘tumelo e tee.’ Ka ge go na le sebopego se tee feela sa borapedi bja therešo, bao ba kganyogago go hwetša tumelo yeo ya therešo ba tla swanelwa ke go e tsoma.

Go Tsoma Modimo wa Therešo

Go tloga mathomong a histori ya motho, Modimo o ile a botša batho seo a nyakago gore ba se dire. (Genesi 1:28; 2:15-17; 4:3-5) Lehono dinyakwa tša gagwe di hlalositšwe ka mo go kwagalago ka Beibeleng. Se se dira gore go kgonege go rena go kgethologanya magareng ga borapedi bjo bo amogelegago le borapedi bjo bo sa amogelegego. (Mateo 15:3-9) Batho ba bangwe ba hweditše bodumedi bja bona go tšwa go batswadi ba bona, mola ba bangwe ba fo latela bontši setšhabeng. Go ba bantši, bodumedi e fo ba taba ya nako yeo ba belegwego ka yona le lefelo leo ba belegetšwego go lona. Lega go le bjalo, na o swanetše go dira kgetho ya gago ya bodumedi selo sa go itiragalela feela goba go dumelela ba bangwe gore ba go direle phetho?

Kgetho ya gago ya bodumedi e swanetše go ba yeo e sedimošeditšwego yeo e theilwego go hlahlobeng Mangwalo ka kelohloko. Lekgolong la pele la nywaga batho ba bangwe bao ba rutegilego ba ile ba dira se se fetago go fo amogela mantšu a moapostola Paulo ka ntle le go naganišiša. Ba ile “ba hlwa bà bala mangwalô ka mehla bà nyaka mo a kwanaxo le tšeo ba bexo ba di kwa.” (Ditiro 17:11; 1 Johane 4:1) Ke ka baka la’ng le wena o sa dire se se swanago?

Beibele e hlalosa Modimo wa legohle e le yo a nyakago batho bao ba tla mo rapelago ka therešo. Go etša ge go begilwe go Johane 4:23, 24, Jesu o hlalositše gore: “Fêla, xo tla lebaka, le byale ké lôna, leo barapedi ba makxonthe ba tl’o xo rapêla Tate ka Môya le ka therešô. Le xôna Tate ó nyaka ba ba Mo rapêlaxo ka mokxwa woo. Modimo ké Môya; xomme ba ba Mo rapêlaxo ba tlo Mo rapêla ka môya le ka xo rereša.” Ke feela “borapedi byo Modimo Tata-wešo a bônaxo bò se na thšila le senyalô,” bjo bo amogelegago go yena. (Jakobo 1:27) Modimo o šegofaditše go tsoma ga ba dimilione go hwetša tsela e tshesane yeo e išago bophelong. A ka se nee bao ba sa šetšego bophelo bjo bo sa felego, eupša go e na le moo o tla bo nea bao ba dirago boiteko bja kgonthe bja go hwetša tsela e tshesane yeo a e hlomilego gomme ba e latela.—Maleaki 3:18.