Pono ya Beibele
Re Swanetše go Diriša Bjang Tokologo ya Rena ya Boikgethelo?
MODIMO o ile a nea batho ba babedi ba pele, Adama le Efa, bokgoni bja go itirela diphetho. O ile a bea Adama gore e be mohlokomedi wa tšhemo ya Edene. Mediro ya Adama e be e akaretša go rea diphoofolo maina. (Genesi 2:15, 19) Sa bohlokwa kudu, Adama le Efa ba be ba ka dira phetho ya ge e ba ba tla kwa Modimo goba go se mo kwe.—Genesi 2:17, 18.
Ga e sa le go tloga ka nako yeo, batho ba ile ba dira diphetho tše dimilione tše dikete—tše dintši tša tšona e bile tše bohlale, tše dingwe e bile tše fošagetšego gomme tše dingwe gape e bile tše mpe ka mo go feletšego. Tše dingwe tša dikgetho tše sego bohlale tša batho di bile le mafelelo a senyago. Lega go le bjalo, Modimo le ka mohla ga se a ka a tsena-tsenana le tshwanelo ya rena ya go ka ikgethela. Bjalo ka Tate yo lerato, Modimo o re nea thušo tabeng ya go dira diphetho tše di lokilego ka Beibeleng. E bile o re lemoša mabapi le ditla-morago tša go dira dikgetho tše di fošagetšego. Beibele e bolela gore re tla buna seo re se bjalago.—Ba-Galatia 6:7.
Go Dira Diphetho Ditabeng tša Motho ka Noši
Ditabeng tše dingwe, Modimo o hlalosa thato ya gagwe ka mo go kwagalago ka go re nea tlhahlo e lebanyago. Lega go le bjalo, ditabeng tše dintši, Beibele ga e bee melao bakeng sa gore e laole ditaba ka moka tša rena tša motho ka noši. Go e na le moo, e nea tlhahlo e nabilego yeo e dumelelago batho gore ba latele seo bona ka noši ba se kgethago le seo ba se kganyogago. Ka mohlala, ela hloko seo e se bolelago mabapi le boitapološo.
Mangwalo a bitša Jehofa gore ke “Modimo yo a thabilego.” (1 Timotheo 1:11, NW) Lentšu la gagwe le bolela ka ‘nako ya go sega’ le ‘nako ya go bina.’ (Mmoledi 3:1, 4) Beibele e re botša gore Kgoši Dafida o ile a bapala mmino bakeng sa go hola batho ba bangwe. (1 Samuele 16:16-18, 23) Jesu o ile a ya monyanyeng wa lenyalo, gomme o ile a tsenya letsogo monyanyeng ka go fetoša meetse gore e be beine.—Johane 2:1-10.
Lega go le bjalo, Beibele e eletša ka go lebanya gore: “Yo a sepelelanago le ba bohlale, o tlo hlalefa; eupša yo e lego mogwera wa ditlatla, o tlo tshereana.” (Diema 13:20, PK) “Metlaê e sa lokaxo” le ditiro tše di gobogilego di kgopiša Modimo gomme di ka senya tswalano ya rena le yena. (Ba-Efeso 5:3-5) Ge e ba bjala e le ga-mantšha-o-tlogele gomme bo sa lekanyetšwe ka mo go swanetšego dipokanong tša segwera, seo se ka feleletša ka mathata a magolo. (Diema 23:29-35; Jesaya 5:11, 12) Jehofa Modimo gape o hloile bošoro.—Psalme 11:5; Diema 3:31.
Ditemana tše tša Beibele di re thuša gore re lebelele boitapološo go ya ka pono ya Modimo. Tabeng ya go dira dikgetho, Bakriste ba ela Beibele hloko. Ke therešo gore ka moka ga rena re tla lebeletšana le ditla-morago tše dibotse goba tše mpe tša dikgetho tša rena ka noši.—Ba-Galatia 6:7-10.
Ka mo go swanago, Bakriste ba kgothaletšwa go dira diphetho tše bohlale tšeo di dumelelanago le melao ya motheo ya Beibele ditabeng tše bjalo ka diaparo, lenyalo, botswadi le ditirišano tša tša kgwebo. Tše di akaretša ditaba tšeo di sa bolelwago ka go lebanya ka Mangwalong, eupša melao ya motheo yeo e hwetšwago ka go wona e ba thuša go dira diphetho tšeo di theilwego letswalong. (Ba-Roma 2:14, 15) Tekanyetšo e latelago e swanetše go dirišwa diphethong ka moka tša motho ka noši tšeo di dirwago ke Bakriste: “Ké xôna xe Le e-ja, xe Le e-nwa, tšohle tše Le di diraxo Le di dirê xore Modimo a rêtwê ka tšôna.”—1 Ba-Korinthe 10:31.
Tabeng ye, gape re swanetše go ela hloko molao wa motheo wa gore ba ‘hlokomele ditaba tša bona.’ (1 Ba-Thesalonika 4:11) Bakriste gantši ba lebeletšana le dikgetho tše dintši tšeo di sa thulanego le thato ya Modimo. Lega go le bjalo, kgetho ya Mokriste yo mongwe e ka fapana le dikgetho tša ba bangwe. Modimo o be a ka se ke a thabišwa ke go bona bahlanka ba gagwe ba ahlolana. (Jakobo 4:11, 12) Beibele e eletša ka bohlale gore: ‘Anke go se be le yo a hlokofatšwago ka go ba mpheane ditabeng tša batho ba bangwe.’—1 Petro 4:15, bapiša le NW.
Go Dira Phetho ya go Hlankela Modimo
Beibele e gatelela mehola ya go kwa Modimo. Lega go le bjalo, Modimo ga a gapeletše batho gore ba mo rapele. Go e na le moo, o laletša dibopiwa tša gagwe tšeo e lego batho gore e be barapedi ba gagwe. Ka mohlala, Beibele e re: “Tlang re rapêlê, re inamê, re khunamê pele xa Morêna e a re dirilexo.”—Psalme 95:6.
Taletšo e bjalo e ile ya newa ba-Isiraele ba bogologolo. Nywageng e fetago 3 500 e fetilego, setšhaba sa Isiraele se be se eme pele ga Thaba ya Sinai gomme Modimo o ile a tsebiša batho bao ba dimilione tshepedišo ya bodumedi bja therešo yeo e bego e ngwadilwe ka Molaong wa Moše. Bjale ba be ba e-na le kgetho yeo ba bego ba swanetše go e dira: Na ba be ba tla hlankela Modimo goba go se mo hlankele? Ba ile ba arabela bjang? Ba ile ba bolela ka lentšu le tee ba re: “Ka moka tše Morêna a di boletšexo re tlo di dira, re tlo fêla rè laiwa ke tšôna.” (Ekisodo 24:7, mongwalo o sekamego ke wa rena.) Phetho ya go hlankela Jehofa e be e le ya bona ka noši.
Lekgolong la pele la nywaga, Jesu o ile a thoma modiro wa go bolela ka ditaba tše dibotse tša Mmušo wa Modimo. (Mateo 4:17; 24:14) Ga se a ka a gapeletša motho le ge e le ofe go tsenela modiro wo. Go e na le moo, o ile a laletša ba bangwe ka botho, a re: “Ntatêlê.” (Mareka 2:14; 10:21) Ba bantši ba ile ba amogela taletšo ya gagwe gomme ba thoma go dira boboledi le yena. (Luka 10:1-9) Ka morago ga lebakanyana, ba bangwe ba ile ba kgetha go tlogela Jesu. Judase o ile a kgetha go mo eka. (Johane 6:66; Ditiro 1:25) Ka morago, ka tlase ga tlhahlo ya baapostola, batho ba bangwe ba bantši ba ile ba fetoga barutiwa, e sego ka go gapeletšwa ba šupilwe ka lerumo eupša e le ka go rata ga bona. Ba be ba “sekametše ka mo go swanetšego” gomme “ba fetoga badumedi.” (Ditiro 13:48; 17:34, NW) Le lehono, Bakriste ba therešo ba kwa Lentšu la Modimo ka go rata gomme ba latela dithuto tša Jesu.
Go molaleng gore Modimo o rata gore re diriše bokgoni bja rena bja go dira dikgetho. O bile o nea tlhahlo ka Beibeleng yeo e re thušago go dira diphetho tše bohlale. (Psalme 25:12) Ge re lebeletšane le go dira diphetho tša motho ka noši, Mokriste yo mongwe le yo mongwe o swanetše go hlahlobišiša melao ya motheo yeo e neilwego ke Modimo. Ke ka tsela yeo feela moo re ka neago Modimo ‘tirelo e kgethwa ka matla a rena a go nagana.’—Ba-Roma 12:1.