Tšhelete

Na tšhelete ke modu wa bobe ka moka?

“Lerato la tšhelete ke modu wa mehuta ka moka ya dilo tše di gobatšago.” —1 Timotheo 6:10.

SEO BATHO BA BANGWE BA SE BOLELAGO

Tšhelete ke modu wa bobe ka moka.

SEO BEIBELE E SE BOLELAGO

“Lerato la tšhelete”—e sego tšhelete ka boyona—le baka “dilo tše di gobatšago.” Ka Beibeleng, Kgoši e humilego e lego Solomone e hlalositše mehuta e meraro ya dilo tše di gobatšago tšeo gantši di diragalelago batho bao ba ratago tšhelete. Go tshwenyega: “Mohumi ga a robale ka baka la boati bja dilo tšeo a nago le tšona.” (Mmoledi 5:12) Go se kgotsofale: “Morati wa silifera a ka se kgotsofatšwe ke silifera, le yo mongwe le yo mongwe yo a ratago lehumo a ka se kgotsofatšwe ke tšeo di mmoelago.” (Mmoledi 5:10) Go lekega go tshela molao: “Yo a akgofelago go hwetša mahumo o tla ba le molato.”—Diema 28:20.

Morero wa tšhelete ke ofe?

“Tšhelete e [a] šireletša.”—Mmoledi 7:12.

SEO BATHO BA BANGWE BA SE BOLELAGO

Tšhelete e dira gore o bolokege le gore o thabe.

SEO BEIBELE E SE BOLELAGO

Nonwane ya gore tšhelete e dira gore motho a thabe le gore a bolokege e tswalana le “matla a forago a mahumo.” (Mareka 4:19) Lega go le bjalo, “tšhelete yona e kgona go dira tšohle.” (Mmoledi 10:19) Ka mohlala, tšhelete e ka reka dilo tšeo o di nyakago gore o phele—tše bjalo ka dijo le dihlare.—2 Bathesalonika 3:12.

Gape tšhelete e go thuša gore o hlokomele ba lapa la gago. Ge e le gabotse, Beibele e re: “Ge e ba motho a sa babalele bao e lego ba gabo, kudukudu ditho tša lapa la gagwe, o latotše tumelo.”—1 Timotheo 5:8.

O ka diriša bjang tšhelete ka bohlale?

‘Thoma ka go dula fase gomme o bale ditshenyegelo.’ —Luka 14:28.

SEO BEIBELE E SE BOLELAGO

Diriša tšhelete ka tsela yeo e amogelwago ke Modimo. (Luka 16:9) Ke ga bohlale go diriša tšhelete ka tsela yeo e bontšhago boikarabelo le ka go botega. (Baheberu 13:18) Go re o pheme go imelwa ke go phela ka sekoloto, “tsela ya [gago] ya bophelo a e se be ya go rata tšhelete.”—Baheberu 13:5.

Le ge Beibele e sa ganetše sekoloto, e lemoša ka gore: “Moadimi ke mohlanka wa moadimiši.” (Diema 22:7) Phema go reka ka gobane o duma selo, ka ge “mang le mang yo a akgofago o wela bohloking.” (Diema 21:5) Go e na le moo, ‘boloka se sengwe ka thoko kamoo o kgonago’ gomme o boloke tšhelete bakeng sa dilo tšeo di lego bohlokwa go wena.—1 Bakorinthe 16:2.

Beibele e re kgothaletša gore re ‘tlwaele go fa.’ (Luka 6:38) Batho bao ba nyakago go kgahliša Modimo ba na le lebaka leo le kwagalago la go ba le seatla seo se bulegilego, ka gobane “Modimo o rata monei yo a neago ka go hlalala.” (2 Bakorinthe 9:7) Ka gona, “le se ke la lebala go dira botse le go abelana le ba bangwe dilo tšeo le nago le tšona, gobane Modimo o kgahlišwa ke dihlabelo tše bjalo.”—Baheberu 13:16.