Modimo o re Holofetša Gore Lefase la Rena le tla Dula le le Gona

Sehlopha sa banyakišiši ba go tšwa dinageng tša go fapafapana se ile sa bolela mantšu a, ge se be se bolela ka go fetoga ga maemo a leratadima. Ge e ba o dumela gore Mmopi o na le taba le batho, gona mantšu a a banyakišiši a tla dira gore o nagane ka ditsela tše dintšhi tšeo di bontšhago gore Modimo o bopile lefase la rena ka tsela yeo e dirago gore le kgone go itokiša ka tlhago ge le senywa.

Le ge Modimo a le bopile ka tsela yeo, le ka se kgone go itokiša ka mo go feletšego ka ge batho ba šetše ba le sentše kudu. Ke ka baka la eng re ka tshepa gore Modimo o tlo lokiša lefase la rena?

Bona mangwalo ao a lego ka lepokising ao a re kgonthišetšago gore lefase la rena le ka se senywe ka mo go feletšego e bile le tla dula le le gona.

• Lefase la rena le bopilwe ka tsela yeo e dirago gore le dule le le gona. “Mathomong Modimo o bopile magodimo le lefase.”—Genesi 1:1

• Lefase le ke la Modimo. “Lefase ke la Jehofaa le tšeo di tletšego go lona.”—Psalme 24:1.

• Modimo o bopile lefase la rena gore le dule le le gona. “O theile lefase godimo ga metheo ya lona; le ka se tsoge le thekesetše go iša mehleng ya neng le neng le ka mo go sa felego.”—Psalme 104:5.

• Modimo o re tshepiša gore dilo tšeo di phelago di tla dula di le gona mo lefaseng. “Yena Modimo wa therešo, Mohlami wa lefase le Modiri wa lona, . . . yo a sa le bopelago lefeela, yo a le hlametšego go dulwa ke batho.”—Jesaya 45:18.

• Modimo o tshepiša gore batho ba tla phela mo lefaseng go ya go ile. “Baloki bona e tla ba beng ba lefase, ba tla dula mo go lona ka mo go sa felego.”—Psalme 37:29.

Modimo o bopile lefase gore batho ba thabele bophelo go lona ntle le go le senya. Beibele e boletše e sa le pele gore Jehofa o tla fediša batho bao ba senyago lefase la gagwe le go le diriša gampe. —Kutollo 11:18

Beibele e re tshepiša gore Modimo o tla dira gore lefase la rena e be paradeise e botse, le gore le be maemong a mabotse, e bile o tla bula seatla sa gagwe gore a kgotsofatše “kganyogo ya sephedi se sengwe le se sengwe.”—Psalme 145:16.