Noga ya Koporo

NA NOGA yeo e tateditšwego koteng mo seswantšhong ke ya kgonthe? Aowa. Ke noga yeo e dirilwego ka koporo. Jehofa o ile a botša Moshe gore a e fege koteng e le gore batho ba e lebelele gomme ba phele. Eupša dinoga tše dingwe tšeo di lego mo fase ke tša kgonthe. Di be di loma batho gomme di dira gore ba babje. Na o a tseba gore ke ka baka la’ng?

Ke ka gobane Baisiraele ba be ba boletše gampe ka Modimo le ka Moshe. Ba ile ba ngongorega ba re: ‘Le re’ng le re ntšhitše Egipita gore re tlo hwela mo lešokeng? Mo ga go na dijo goba meetse. E bile re lapišitšwe ke go ja manna a.’

Eupša manna e be e le dijo tše dibose. Jehofa o be a ba neile ona ka mohlolo. Le gona o be a ile a ba nea meetse ka mohlolo. Eupša setšhaba se be se sa leboge tsela yeo Modimo a bego a se hlokomela ka yona. Ka gona Jehofa o ile a romela dinoga tše tšeo di nago le mpholo gore a otle Baisiraele. Dinoga tše di ile tša ba loma gomme ba bantši ba bona ba hwa.

Mafelelong setšhaba se ile sa tla go Moshe gomme sa re: ‘Re dirile sebe, ka gobane re boletše gampe ka wena le ka Jehofa. Bjale re rapelele go Jehofa gore a tloše dinoga tše.’

Ka gona Moshe o ile a rapelela setšhaba. Jehofa a mmotša gore a dire noga ye ya koporo. A re a e fege koteng, le gore motho le ge e le ofe yo a lomilwego ke noga a e lebelele. Moshe a dira seo Modimo a se boletšego. Ka gona batho bao ba bego ba lomilwe ba ile ba lebelela noga yeo ya koporo gomme ba fola.

Go na le seo re ithutago sona tabeng ye. Ka tsela e itšego, ka moka ga rena re boemong bjo bo swanago le bja Baisiraele bao ba bego ba lomilwe ke dinoga. Ka moka ga rena re a hwa. Lebelela gohle mo o dulago, o tla bona gore batho ba a tšofala, ba a babja e bile ba a hwa. Se ke ka gobane monna wa pele le mosadi wa pele e lego Adama le Efa, ba ile ba furalela Jehofa gomme ka moka ga rena re bana ba bona. Eupša Jehofa o butše tsela e le gore re tle re phele ka mo go sa felego.

Jehofa o ile a romela Morwa wa gagwe e lego Jesu Kriste mo lefaseng. Jesu o ile a fegwa koteng ka ge batho ba bantši ba be ba nagana gore ke yo mobe. Eupša Jehofa o re neile Jesu gore a re phološe. Ge e ba re ithuta go yena e bile re mo latela, gona re tla hwetša bophelo bjo bo sa felego. Eupša ka moragonyana re tla ithuta ka mo go oketšegilego ka taba ye.