Mmušo Woo o Tlago go Tliša Paradeise

Ge Jesu a be a le mo lefaseng, o boditše balatedi ba gagwe go rapelela Mmušo wa Modimo: “Mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong.” (Mateo 6:9, 10) Le gona o boletše ka mehla ka “ebangedi ya mmušô.” (Mateo 4:23) Ge e le gabotse, o boletše go gontši ka Mmušo go feta kamoo a dirilego ka gona ka dilo tše dingwe ka moka. Ka baka la’ng? Ka gobane Mmušo ke sedirišwa seo Modimo a tlago go se diriša go rarolla mathata ao a dirago gore bophelo bo be thata gakaakaa lehono. Modimo ka Mmušo o tla fediša kapejana dintwa, tlala, bolwetši le bokebekwa, gomme o tla tliša botee le khutšo.

Na o be o ka rata go phela lefaseng le le bjalo? Ge e ba go le bjalo, gona o swanetše go bala pukwana ye. O tla ithuta ka go yona gore Mmušo ke pušo, eupja pušo e kaone go feta pušo lege e le efe yeo e kilego ya buša batho. Le gona o tla bona tsela e kgahlišago yeo ka yona Modimo a ilego a hlalosetša gasele bahlanka ba gagwe merero ya gagwe malebana le Mmušo. Go oketša se, o tla bona kamoo Mmušo o ka go thušago ka gona gaešita le lehono.

Ge e le gabotse, o ka ba molata wa Mmušo wa Modimo gona mo nakong ye. Eupja pele ga ge o ka kgetha go dira se, ruri o swanetše go tseba go gontši ka wona. Ka gona, re go kgothaletša gore o hlahlobišiše pukwana ye. Sohle seo e tlago go go botša sona ka Mmušo se tšerwe Beibeleng.

Sa pele, anke re boneng lebaka leo ka lona re nyakago Mmušo wa Modimo gakaakaa.

Mathomong a histori ya motho, Modimo o dirile motho e le yo a phethagetšego gomme a mmea paradeiseng. Nakong yeo go be go sa nyakege Mmušo.

Lega go le bjalo, Adama le Efa, e lego batswadi ba rena ba pele ba ile ba theetša Sathane, morongwa wa lerabele. O ba boditše maaka ka Modimo gomme a ba dira gore le bona ba rabele go Modimo. Ka gona, ba ile ba swanelwa ke gore ba hwe ka gobane “moputsô wa sebe ké lehu.”—Ba-Roma 6:23.

Motho yo a sego a phethega le wa sebe a ka se ke a ba le bana ba ba phethagetšego. Ka gona, bana ba Adama ka moka ba ile ba belegwa ba se ba phethega, ba na le sebe e bile ba e-hwa.—Ba-Roma 5:12.

Ga e sa le go tloga nakong yeo, batho ba ile ba nyaka Mmušo wa Modimo gore o ba thuše go tšwa thogong ya sebe le lehu. Mmušo le gona o tla hlatswa leina la Modimo maakeng ao Sathane a a boletšego ka lona.

Jehofa Modimo o holofeditše gore “peu” e kgethegilego (goba ngwana) e be e tla belegwa gore e phološe batho sebeng. (Genesi 3:15) “Peu” ye e be e tla ba Kgoši ya Mmušo wa Modimo.

Yeo e be e tla ba mang?

Mo e ka bago ka nywaga e 2 000 ka morago ga gore Adama a dire sebe, go ile gwa ba le monna yo a bego a botega kudu yo a bitšwago Aborahama. Jehofa o ile a botša Aborahama gore a tloge motseng wa gabo gomme a dule mešašeng nageng ya Palesitina.

Aborahama o ile a dira tšohle tšeo Jehofa a mmoditšego gore a di dire go akaretša selo setee se thata kudu. Jehofa o ile a mmotša gore a dire sehlabelo ka morwa wa gagwe Isaka aletareng.

Jehofa o be a sa nyake sehlabelo sa motho e le ka kgonthe. Eupja o be a rata go tseba kamoo Aborahama a bego a mo rata ka gona. Aborahama o be a šetše a le kgaufsi le go bolaya Isaka ge Jehofa a mo thibela.

Ka baka la tumelo e kgolo ya Aborahama, Jehofa o ile a holofetša go nea ditlogolo tša gagwe naga ya Palesitina gomme a bolela gore Peu e holofeditšwego e be e tla tla ka moloko wa gagwe, le ka woo wa morwa wa gagwe Isaka.—Genesi 22:17, 18; 26:4, 5.

Isaka o be a na le barwa ba mafahla, e lego Esau le Jakobo. Jehofa o ile a bolela gore Peu e holofeditšwego e be e tla tla ka Jakobo.—Genesi 28:13-15.

Jakobo yo Jehofa a bego a bile a mo reile leina la Isiraele, o be a e-na le barwa ba 12 bao ka moka ga bona mafelelong ba ilego ba ba le bana. Ka gona, bana ba Aborahama ba ile ba thoma go oketšega.—Genesi 46:8-27.

Ge go be go e-na le tlala e šoro lefelong leo, Jakobo le lapa la gagwe ba ile ba khudugela Egipita ka go laletšwa ke Farao, mmuši wa Egipita.—Genesi 45:16-20.

Kua Egipita go ile gwa utollwa gore Peu e holofeditšwego e be e tla ba setlogolwana sa morwa wa Jakobo, e lego Juda.—Genesi 49:10.

Mafelelong Jakobo o ile a hwa, gomme ditlogolo tša gagwe di ile tša oketšega go fihlela ge ba swana le setšhaba. Ka gona, ba-Egipita ba ile ba ba boifa gomme ba ba dira bahlanka.—Ekisodo 1:7-14.

Mafelelong Jehofa o ile a roma Moše monna yo a bego a botega kudu gore a ye go botša Farao wa nako yeo gore a hunolle bana ba Isiraele.—Ekisodo 6:10, 11.

Farao o ile a gana, gomme Jehofa a tlišetša ba-Egipita dikotlo tše lesome. Ka kotlo ya mafelelo, o ile a roma morongwa wa lehu gore a bolaye barwa ka moka ba maitšibulo ba Egipita.—Ekisodo, dikgaolo 7 go ya go 12.

Modimo o ile a botša ba-Isiraele gore ge e ba ba ka bolaya kwana gore e be dijo tša bona tša go lalela gomme ba tlotša madi a mangwe a yona dijakwaneng tša bona tša mojako, gona morongwa wa lehu o be a tla feta nywako ya bona. Ka gona, maitšibulo a ba-Isiraele a be a tla phologa.—Ekisodo 12:1-35.

Ka baka la se, ruri Farao o ile a laela ba-Isiraele gore ba tloge Egipita. Eupja o ile a fetoša mogopolo wa gagwe gomme a ba rakediša gore a ba buše.

Jehofa o ile a bulela ba-Isiraele tsela ya go phologa go feta Lewatleng le Lehubedu. Ge Farao le madira a gagwe ba leka go ba latela, ba ile ba kgangwa ke meetse.—Ekisodo 15:5-21.

Jehofa o ile a fihliša bana ba Isiraele thabeng yeo e bitšwago Sinai lešokeng. Moo o ile a ba nea Molao wa gagwe gomme a bolela gore ge e ba ba ka o theetša, ba tla ba mmušo wa baperisita le setšhaba se sekgethwa. Ka gona, ge nako e dutše e sepela ba-Isiraele ba ile ba ba le sebaka sa go ba karolo e bohlokwa ya Mmušo wa Modimo.—Ekisodo 19:6; 24:3-8.

Ka morago ga ge ba-Isiraele ba bile Thabeng ya Sinai mo e ka bago ka ngwaga, Jehofa o ile a ba eta pele go ya Palesitina, e lego naga yeo a bego a e holofeditše Aborahama tatago bona.

Modimo ka morago kua Palesitina o ile a dumelela ba-Isiraele gore ba bušwe ke dikgoši. Ka gona, Modimo o ile a ba le mmušo mo lefaseng.

Kgoši ya bobedi ya Isiraele e be e le Dafida, e lego setlogolwana sa Juda. Dafida o ile a fenya manaba a Isiraele ka moka gomme a dira Jerusalema motse wa mošate wa setšhaba.

Ditiragalo tša pušong ya Dafida di bontšha gore ge Jehofa a thekga kgoši, ruri ga go na kgoši ya lefaseng yeo e ka e fenyago.

Jehofa o boletše gore Peu ye e holofeditšwego e be e tla ba e mongwe wa ditlogolwana tša Dafida.—1 Koronika 17:7, 11, 14.

Salomo, e lego morwa wa Dafida o ile a buša ka morago ga gagwe. E be e le kgoši e bohlale gomme Isiraele e ile ya atlega ka tlase ga pušo ya gagwe.

Salomo gape o ile a aga tempele e botse ya Jehofa kua Jerusalema. Maemo ka tlase ga pušo ya Salomo Isiraeleng a re bontšha tše dingwe tša ditšhegofatšo tšeo Mmušo wa Modimo wo o tlago o tlago go di tlišetša batho.—1 Dikxoši 4:24, 25.

Lega go le bjalo, dikgoši tše dintši tša ka morago ga Salomo e be e le tšeo di sa botegego kudu.

Eupja ge ditlogolwana tša Dafida di be di sa dutše di buša Jerusalema, Jehofa o ile a diriša moporofeta wa gagwe Jesaya go bolela ka Morwa wa ka moso wa Dafida yo a bego a tla buša lefase ka moka ka go botega. Yo e be e tla ba Peu e holofeditšwego.—Jesaya 9:5, 6.

Moporofeta Jesaya o ile a bolela e sa le pele ka pušo ya Gagwe e le yeo e lego ya letago kudu go feta ya Salomo.—Jesaya, dikgaolo 11 le 65.

Bahlanka ba Modimo go feta lege e le neng pele, ba ile ba ipotšiša ka yo e bego e tla ba Peu ye.

Lega go le bjalo, pele ga ge Peu e ka tla, dikgoši tša Isiraele e ile ya ba tše mpe mo e lego gore ka 607 Pele ga Mehla ya Rena Jehofa o ile a lesa setšhaba gore se fenywe ke ba-Babele, gomme batho ba bantši ba ile ba thopja ba išwa Babele. Eupja Modimo ga se a ka a lebala kholofetšo ya gagwe. Peu e be e sa dutše e tla tšwelela ka moloko wa Dafida.—Hesekiele 21:30-32.

Seo se diregilego go Isiraele se bontšhitše gore gaešita lege kgoši ya motho e bohlale le e botegago e ka tliša mehola, ruri mehola ye ke yeo e lekaneditšwego. Banna ba botegago ba a hwa gomme bahlatlami ba bona mo gongwe e ka ba bao ba sa botegego. Tharollo e bile efe? Peu e holofeditšwego.

Peu ka morago ga nywaga e dikete e ile ya feleletša ka go tšwelela. E be e le mang?

Morongwa yo a tšwago go Modimo o ile a nea ngwanenyana wa mo-Isiraele yo a bego a se a nyalwa yo a bitšwago Maria karabo. O mmoditše gore o be a tla ba le morwa yo leina la gagwe e bego e tla ba Jesu. Seo se boletšwego ke morongwa se se:

“Yêna-eo e tlo ba e moxolo, ó tlo bitšwa Morwa wa Yo-xodimo-dimo; ’me [Jehofa] ó tlo mo nea sedulô sa Dafida tat’axwe. Ó tlo buša.”—Luka 1:32, 33.

Ka gona, Jesu o be a tla ba Peu e holofeditšwego gomme a feleletše ka go ba Kgoši ya Mmušo wa Modimo. Eupja ke ka baka la’ng Jesu a be a arogile go banna ba botegago bao ba phetšego pele ga gagwe?

Jesu o ile a belegwa ka mohlolo. Mmagwe e be e le kgarebe, gomme o be a se na tate wa motho. Jesu o be a phetše e sa le pele legodimong gomme moya o mokgethwa wa Modimo goba matla a dirago a ile a tloša bophelo bja Jesu legodimong gomme a bo tliša popelong ya Maria. Ka gona, ga se a ka a abela sebe sa Adama. Jesu bophelong bja gagwe ka moka ga se a ka a dira sebe.—1 Petro 2:22.

Jesu o ile a kolobetšwa ge a be a na le nywaga e 30.

O boditše batho ka Mmušo wa Modimo gomme a feleletša ka go itšweletša e le Kgoši ya Mmušo woo.—Mateo 4:23; 21:4-11.

O dirile gape mehlolo e mentši.

O ile a fodiša balwetši.—Mateo 9:35.

O ile a fepa ka mohlolo ba swerwego ke tlala.—Mateo 14:14-22.

O ile a ba a tsoša le bahu.—Johane 11:38-44.

Mehlolo ye e bontšha mohuta wa dilo tšeo Jesu a tlago go di direla batho ka ge e le Kgoši ya Mmušo wa Modimo.

Na o gopola kamoo Kgoši Dafida a ilego a dira Jerusalema motse wa mošate wa mmušo wa gagwe ka gona? Jesu o hlalositše gore Mmušo wa Modimo o be o ka se be mo lefaseng, eupja gore o tla ba legodimong. (Johane 18:36) Ke ka baka leo Mmušo o bitšwago “Jerusalêma wa lexodimong.”—Ba-Hebere 12:22, 28.

Jesu o ile a bolela melao yeo bao ba bego ba tla ba balata ba Mmušo ba bego ba swanetše go e theetša. Melao ye e ka Beibeleng. Melao e bohlokwa kudu e be e le ya gore batho ba rate Modimo gomme ba ratane.—Mateo 22:37-39.

Jesu le gona o ile a utolla gore o be a ka se be noši ge a buša Mmušong wa gagwe. Go be go tla ba le batho bao ba kgethelwago go ya legodimong gomme ba buše moo le yena. (Luka 12:32; Johane 14:3) Go be go tla ba le batho ba bakae moo? Kutollo 14:1 e a araba: 144 000.

Ge e ba e le ba 144 000 fela bao ba yago legodimong go ya go buša le Jesu, gona batho ka moka ba tla ba le kholofelo efe?

Beibele e re: “Baloki e ba beng ba naxa, ba dula mo xo yôna ka mehla le ka mehla.”—Psalme 37:29.

Bao ba tlago go phela lefaseng ka mo go sa felego ba bitšwa “dinku tše dingwê.”—Johane 10:16.

Ka gona, go na le dikholofelo tše pedi. Go na le ba 144 000 bao ba laletšwago ke Jehofa Modimo gore ba ye legodimong go ya go buša le Jesu Kriste. Eupja ba bangwe ba dimilione ba na le kholofelo ya kgonthe ya go phela mo lefaseng ka mo go sa felego e le balata ba Mmušo wa gagwe.—Kutollo 5:10.

Sathane o ile a hloya Jesu gomme a mo ganetša. Ka morago ga ge Jesu a boletše ka nywaga e meraro le seripa, Sathane o ile a dira gore a swarwe gomme a bolawe ka go kokotelwa koteng. Ke ka baka la’ng Modimo a ile a dumelela se?

Gopola, ka ge re e-tšwa go Adama, ruri ka moka re dira sebe gomme re swanetšwe ke go hwa.—Ba-Roma 6:23.

Le gona gopola gore ka baka la tsela ya mohlolo ye Jesu a belegilwego ka yona, o be a phethegile gomme a sa swanelwa ke go hwa. Lega go le bjalo, Modimo o ile a dumelela Sathane gore a ‘lome Jesu serethe,’ e lego go mmolaya. Eupja Modimo o ile a mo tsošetša bophelong gape e le moya o sa hwego. Ka ge a be a sa dutše a e-na le tshwanelo bophelong bjo bo phethagetšego bja motho, ruri o be a ka diriša bjo go lopolla rena batho sebeng.—Genesi 3:15; Ba-Roma 5:12, 21; Mateo 20:28.

Beibele go re thuša gore re kwešiše ka botlalo seo se bolelwago ke sehlabelo sa Jesu, e bolela ka sona ka mehlala ya boporofeta.

Ka mohlala, na o sa gopola kamoo Jehofa a ilego a botša Aborahama ka gona gore a dire morwa wa gagwe sehlabelo, e le go leka lerato la gagwe?

Se e be e le mohlala wa boporofeta wa sehlabelo sa Jesu. Se bontšhitše kamoo lerato la Jehofa la go rata batho e bego e le le legolo ka gona mo a ilego a ba a dumelela gore Morwa wa gagwe Jesu a re hwele e le gore re tle re hwetše bophelo.—Johane 3:16.

Na o sa gopola tsela yeo ka yona Jehofa a ilego a namolela ba-Isiraele Egipita, gomme a phološa maitšibulo a bona ka go dira gore morongwa wa lehu a ba fete?—Ekisodo 12:12, 13.

Se e be e le mohlala wa boporofeta. Go swana lege madi a kwana a be a bolela bophelo go maitšibulo a ba-Isiraele, ruri le madi a tšholotšwego a Jesu a bolela bophelo go bao ba mo dumelago. Go swana lege ditiragalo tša bošego bjoo di ile tša bolela khunologo go ba-Isiraele, ruri le lehu la Jesu le nea batho khunologo ya go tšwa sebeng le lehung.

Ke ka baka leo Jesu a bitšwago “Kwana ya Modimo e rwelexo sebe sa lefase.”—Johane 1:29.

Lega go le bjalo, ge Jesu a be a le lefaseng o ile a ba a kgobokanya barutiwa gomme a ba tlwaetša go bolela ditaba tše di lokilego tša Mmušo, gaešita le ka morago ga lehu la gagwe.—Mateo 10:5; Luka 10:1.

Ba e be e le batho ba pele bao ba kgethilwego ke Modimo gore ba buše le Jesu Mmušong wa gagwe.—Luka 12:32.

Na o sa gopola gore Modimo o be a holofeditše ba-Juda gore ge e ba ba theetša Molao, ruri ba be ba tla ba “mmušo wa boperisita”? Ba ile ba ba le sebaka sa go ba karolo ya Mmušo wa Modimo gomme ba dire e le baperisita ba legodimo ge ba be ba ka amogela Jesu. Eupja ba bantši ba bona ba ile ba gana Jesu.

Ka gona, go tloga nakong yeo, ba-Juda ba be ba se sa hlwa ba le setšhaba se se kgethilwego sa Modimo; Palesitina e be e sa hlwe e le Lefase la Kholofetšo.—Mateo 21:43; 23:37, 38.

Jehofa go tloga mehleng ya Jesu go fihla mehleng ya rena, o be a dutše a kgobokanya batho ba bao ba tlago go buša legodimong le Jesu. Go sa dutše go e-na le ba dikete tše sego kae ba bona bao ba sa phelago mo lefaseng lehono. Re ba bitša gore ke mašaledi a tloditšwego.—Kutollo 12:17.

Ee, o thoma go bona seo Mmušo wa Modimo o lego sona. Ke pušo yeo e lego legodimong, Kgoši ya yona ke Jesu Kriste gomme e tladitšwe ke batho ba 144 000 bao ba tšwago lefaseng. E tla buša batho bao ba botegago mo lefaseng gomme e tla ba le matla a go tliša khutšo lefaseng.

Jesu ka morago ga lehu la gagwe, o ile a tsošwa gomme a ya legodimong. Moo o ile a emela Modimo gore a bolele nako ya go thoma ga gagwe go buša e le Kgoši ya Mmušo wa Modimo. (Psalme 110:1) Seo se be se tla ba neng?

Ka dinako tše dingwe Jehofa o ile a romela batho ditoro gore a ba botše dilo tšeo di lego mabapi le Mmušo wa gagwe.

Mehleng ya Daniele, Jehofa o ile a romela toro e bjalo go Nebukadinetsara, e lego kgoši ya Babele. E be e le ya sehlare se segolo.—Daniele 4:10-37.

Sehlare se ile sa rengwa gomme kutu ya tlengwa ka nywaga e šupago.

Sehlare se be se emela Nebukadinetsara. Go swana lege kutu e ile ya tlengwa ka nywaga e šupago, ruri Nebukadinetsara le yena o ile a lahlegelwa ke tlhaologanyo ya gagwe ka nywaga e šupago. Mafelelong tlhaologanyo ya gagwe e botse e ile ya boa.

Tše ka moka e be e le mohlala wa boporofeta. Nebukadinetsara o be a swantšhetša bogoši bja Jehofa bja lefase ka moka. Mathomong, bjo bo ile bja dirwa ka ditlogolwana tša Kgoši Dafida kua Jerusalema. Ge Babele e be e fenya Jerusalema ka 607 Pele ga Mehla ya Rena, moloko woo wa dikgoši o ile wa šitišwa. Go be go ka se hlwe go e-ba le kgoši e nngwe molokong wa Dafida go fihlela ge “xo tlo bá xwa tla e a swanetšwexo ke wôna.” (Hesekiele 21:32) Yo e be e le Jesu Kriste.

E be e tla ba nako e kaakang go tloga go 607 Pele ga Mehla ya Rena go fihlela ge Jesu a thoma go buša? E be e tla ba nywaga e šupago ya boporofeta. Yeo ke nywaga e 2 520. (Kutollo 12:6, 14) Nywaga e 2 520 go tloga go 607 Pele ga Mehla ya Rena e re tliša go 1914 Mehleng ya Rena.

Ka gona, Jesu o thomile go buša magodimong ka 1914. Seo se ile sa bolela’ng?

Beibele e re botša ka pono yeo e bonwego ke moapostola Johane.

O bone mosadi legodimong a belega ngwana wa lesogana.—Kutollo 12:1-12.

Mosadi o be a swantšhetša phuthego ya Modimo ya legodimong, yeo e dirilwego ka barongwa ka moka ba bahlanka ba Modimo legodimong. Ngwana wa lesogana o swantšhetša Mmušo wa Modimo. O ile wa “belegwa” ka 1914.

Go ile gwa latela’ng? Sa pele seo Jesu a ilego a se dira ka ge e le Kgoši, e bile go lahla Sathane gotee le barongwa bao ba ilego ba rabela le yena, go tšwa legodimong go tla lefaseng.—Kutollo 12:9.

Beibele e re botša seo se ilego sa bolelwa: “Thabang-xê, lena Maxodimo, le ba ba axilexo xôna. Ba madi-mabe ké lena ba Le axilexo lefaseng le lewatleng, xobane Diabolo ó theoxetše xo lena à tuka boxale ka kudu; ó tseba xe a sa šaletšwe ke lebakanyana fêla.”—Kutollo 12:12.

Ka gona, ge Jesu a be a thoma go buša legodimong, manaba a gagwe a ile a ipha matla kudu lefaseng. Bjale ka ge Beibele e boletše e sa le pele, ruri o ile a thoma go buša magareng ga manaba a gagwe.—Psalme 110:1, 2.

Se se be se tla bolela’ng go batho?

Jesu o re boditše: dintwa, ditlala, malwetši le ditšhišinyego tša lefase.—Mateo 24:7, 8; Luka 21:10, 11.

Re bone dilo tše di direga ga e sa le go tloga ka 1914, e lego lebaka le lengwe la lebaka leo re tsebago ka lona gore Mmušo o thomile go buša ka nako yeo.

Puku ya Kutollo e re botša gore batho e tla ba “basenya-lefase.” (Kutollo 11:18) Seo le sona re se bone, kudu-kudu ga e sa le go tloga ka 1914.

Moapostola Paulo o okeditše ka gore batho e tlo ba “ba xo ithata, ba mexabaru, . . . ba xo se kwe batswadi, . . . babata-sekxoro, e tlo ba dihwirihwiri, le ba ba sa tsebexo xo ithswara.”—2 Timotheo 3:1-5.

O šetše o tseba lebaka leo ka lona bophelo bo lego thata gakaakaa lehono. Sathane o be a dutše a iphile matla kudu. Eupja Mmušo wa Modimo le wona o be o dutše o iphile matla kudu.

Kapejana ka morago ga 1914, ruri mašaledi a bao ba holofelago go buša legodimong le Jesu a ile a thoma go bolela ditaba tše di lokilego tša gore Mmušo o hlomilwe. Modiro wo mo nakong ye o tletše lefaseng ka moka, bjalo ka ge Jesu a boletše gore go tla ba bjalo.—Mateo 24:14.

Morero wa modiro wo wa go bolela ke ofe?

Sa pele, ke go botša batho ka Mmušo wa Modimo.

Sa bobedi, ke go thuša batho go kgetha ge e ba ba rata go ba balata ba Mmušo.

Jesu o boletše gore mehleng ya rena batho ka moka ba tla aroganywa ka go ba batho bao ba swanago le dinku le bao ba swanago le dipudi.—Mateo 25:31-46.

“Dinku” e tla ba bao ba ratago yena le banababo. “Dipudi” e tla ba bao ba sa ba ratego.

“Dinku” di tla hwetša bophelo bjo bo sa felego gomme “dipudi” di ka se bo hwetše.

Modiro wo wa go aroganya o dirwa ka go bolelwa ga ditaba tše di lokilego tša Mmušo.

Boporofeta bjo bo tlilego ka moporofeta Jesaya ke bjo.

“Bofelong bya mabaka thaba ya Ntlo ya [Jehofa] e tlo ba e thekxilwe xodimo xa dithaba, è beilwe xodimo xa meboto; ’me dithšaba tšohle di tlo thšoloxêla mo xo yôna.”—Jesaya 2:2.

Batho mo nakong ye ba lebeletšane le ‘bofelo bja mabaka.’

“Ntlo” ya Jehofa ya borapedi e “beilwe” ka godimo ga bodumedi bja maaka.

“Merafo-rafo e tlo ya xôna è re: A re yeng, re rotoxêlê thabeng ya [Jehofa], Ngwakong wa Modimo wa Jakobo, a re rutê ’tsela tš’axwe.”—Jesaya 2:3.

Ka gona, ba bantši bao ba tšwago ditšhabeng ka moka ba tla go rapela Jehofa gomme ba laletša ba bangwe gore ba be gotee le bona. Ba ithuta kamoo ba ka itshwarago ka gona ka tsela yeo Jehofa a e ratago.

“Ké mo ba tl’o xo tšea dithšoša ba rula mexomá ka tšôna, ba tšea marumô ba rula maxwêtla ka ôna. Xo ka se bê le sethšaba se se tl’o xo tšwêla se sengwê lerumô; batho ba tlo lesa xo ithuta xo hlabana.”—Jesaya 2:4.

Bao ba rapelago Jehofa ke batee gomme ba na le khutšo.

Se se tšweleditšwego ke modiro wo wa Mmušo wa Modimo, ke ge mo nakong ye go e-na le batho ba dimilione tše dintši lefaseng ka bophara bao e lego balata ba Mmušo.

Ba kgobokanyetšwa go mašaledi, e lego mašaledi a bao kholofelo ya bona e lego go ya legodimong le go ya go buša le Kriste.

Ba amogela dijo tša moya ka phuthego ya Modimo.—Mateo 24:45-47.

Ke barwarre ba ditšhaba ka moka ba Bakriste bao ba ratanago e le ka kgonthe.—Johane 13:35.

Ba thabela khutšo ya mogopolo, e lego kholofelo ya bokamoso.—Ba-Filipi 4:7.

Kapejana, ditaba tše di lokilego di tla ba di boletšwe. “Dinku” di tla ba di kgobokantšhitšwe. Ka gona, Mmušo o tla dira’ng?

Na o sa gopola gore Kgoši ye e botegago Dafida o ile a fenya manaba ka moka a batho ba Modimo? Ee, Kgoši Jesu o tla dira se se swanago.

Kgoši Nebukadinetsara o kile a lora toro ya seswantšho se segolo kudu seo se bego se swantšhetša mebušo ka moka ya lefase go tloga mehleng ya gagwe go fihla mehleng ya rena.

Ka morago, o ile a bona lefsika leo le kgomogago thabeng gomme la pšhatlaganya seswantšho. Lefsika le be le emela Mmušo wa Modimo.

Se se bolela go senywa ga tshepedišo ya dilo ya mehleng yeno e mpe.—Daniele 2:44.

Mo go na le tše dingwe tša dilo tšeo Mmušo o tlago go di fediša.

Bodumedi bja maaka bo ka se hlwe bo sa bonala go swana le tšhilo yeo e lahletšwego ka lewatleng.—Kutollo 18:21.

Ke ka baka leo bohle bao ba ratago Modimo ba kgothaletšwago go tšwa go bodumedi bja maaka GONA BJALE.—Kutollo 18:4.

Se se latelago, Kgoši Jesu o tla ‘otla ditšhaba gomme a di diše ka molamo wa tshipi.’—Kutollo 19:15.

Ka baka leo, gaešita lege Dihlatse tša Jehofa di lefa makgetho a tšona gomme ba hlompha melao ya naga, ruri ga ba akaretšwe dipolitiking.

Mafelelong Sathane ka noši e lego “nôxa-kxolo,” o tla lahlelwa sekoting.—Kutollo 20:2, 3.

Ke feela “dinku,” e lego bao ba ikokobetšago go Jesu, ka ge e le Kgoši, bao ba tlago go phologa masetla-pelo a.—Mateo 25:31-34, 41, 46.

Moapostola Johane o bone pono ya “dinku” tšeo di phologago masetla-pelo.

“Ka buša ka ba le pônô, ka bôna lešaba le lexolo la batho ba xo sexo motho e a kxônaxo xo ba bala, ba dithšaba ka moka, le meloko ka moka, le merafô ka moka, le maleme ka moka; ka bôna bà eme pele xa sedulô sa boxoši sa Kwana, bà apere ’kobô tše dithšweu, bà swere mahlare a molala ka diatla tša bôná.”—Kutollo 7:9.

“Lešaba le lexolo” le dirilwe ka bohle bao ba amogelago go bolelwa ga ditaba tše di lokilego.

Ba ‘tšwa tlaišegong e kgolo.’—Kutollo 7:14.

“Mahlare a molala” a bontšha gore ba amogela Jesu e le Kgoši ya bona.

Go apara ga bona “’kobô tše dithšweu” go swantšhetša gore ba na le tumelo sehlabelong sa Jesu.

“Kwana” ke Jesu Kriste.

Ba thabela ditšhegofatšo dife? Na o sa gopola lethabo leo le bego le le Isiraeleng nakong ya ge Kgoši e botegago Salomo a be a buša? Se se neile mohlala o monyenyane wa lethabo la lefaseng ka tlase ga Kgoši Jesu.

Go tla ba le khutšo ya kgonthe go batho le magareng ga batho le diphoofolo go swana le ge Jesaya a boletše e sa le pele.—Psalme 46:9; Jesaya 11:6-9.

Go swana lege Jesu a ile a fodiša bao ba bego ba babja ge a be a sa le mo lefaseng, ruri o tla fodiša malwetši bathong ka moka.—Jesaya 33:24.

Go swana lege a ile a fepa mašaba, ruri o tla fediša tlala bathong ka moka.—Psalme 72:16.

Go swana lege a ile a tsoša bahu, ruri o tla tsoša bao ba hwilego bao ba se ba kago ba ba le sebaka se se tletšego sa go ikokobetša Mmušong wa Modimo.—Johane 5:28, 29.

O tla bušetša batho ka lenelo phethegong yeo e timeditšwego ke Adama.

Na bjoo ga se bokamoso bjo bo kgahlišago kudu? Na o tla rata go bo bona? Ge e ba go le bjalo, gona katanela go ikokobeletša Mmušo wa Modimo gomme o be o mongwe wa “dinku.”

Ithute Beibele gomme o tsebe Jehofa Modimo le Jesu Kriste.—Johane 17:3.

Gwerana le ba bangwe bao le bona e lego balata ba Mmušo.—Ba-Hebere 10:25.

Ithute melao ya Mmušo gomme o e hlomphe.—Jesaya 2:3, 4.

Neela bophelo bja gago gore o direle Jehofa gomme o kolobetšwe.—Mateo 28:19, 20.

Phema dilo tše mpe tšeo di swanago le go utswa, go bolela maaka, boitshwaro bjo bobe le botagwa tšeo di sa kgahlišego Jehofa Modimo.—1 Ba-Korinthe 6:9-11.

E-ba le karolo ya go bolela ditaba tše di lokilego tša Mmušo.—Mateo 24:14.

Ka gona, ka thušo ya Modimo o tla bona Paradeise yeo Adama a e timeleditšego ditlogolwana tša gagwe e tsošološwa, gomme o tla bona kholofetšo ye e phethagatšwa: “Ka kwa lentšu le lexolo lè e-tšwa lexodimong lè re: Šoo ngwakô wa Modimo mo xare xa batho; ó tlo axa le bôná, ya ba sethšaba sa xaxwe. ’Me Yêna mong Modimo ó tlo ba le bôná è le Modimo wa bôná. ’Me Yêna Modimo ó tlo phumola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile.”—Kutollo 21:3, 4.

[Chart on page 20]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

607 B.C.E. 1914 C.E.

B.C.E. | C.E.

500 1 000 1 500 2 000 2 520

[Pictures on page 11]

Aborahama

Isaka

Jakobo

Juda

Dafida

[Seswantšho go letlakala 14]

144 000

[Pictures on page 16]

Adama

Jesu