Kgaolo 5

Kgang Yeo e go Akaretšago

1. Ke ka baka la’ng batho ba hweditše go le thata go kwešiša lebaka leo Modimo a dumeletšego bobe ka lona gare ga batho?

GO SA šetšwe kganyogo e tlwaetšwego ya go kganyoga khutšo le polokego, ruri histori ya motho e kgamathetše ka madi le bobe. Ka ge Beibele e bontšha gore Modimo o šišingwa dilo tše di bjalo, ruri ke ka baka la’ng a se a thibela maemo a e sa le pele? Ruri, e ka se ke ya ba ka baka la ge a sa hlokomele. Beibele gotee le mediro e mebotse ya lefase ya Modimo di nea bohlatse bjo bontši bja lerato la gagwe le go kgongwa ga gagwe ke batho. (1 Johane 4:8) Sa bohlokwa kudu, theto ya leina leo e lego la Modimo e a akaretšwa, ka ge maemo a a baketše batho gore ba mo goboše. Ka gona, ke lebaka lefe leo le bego le ka ba gona leo le mo dirilego gore a kgotlelele ka nywaga e dikete-kete ya leema-ema le bošoro?

2. (a) Ke kae Beibeleng moo re hwetšago lebaka leo ka lona Modimo a dumeletšego maemo a mabe ka nako e telele gakaakaa? (b) Ke’ng seo se bontšhago kgakala gore taba ya Beibele ka Adama le Efa ke therešo ya histori?

² Karabo e hwetšwa pukung ya mathomo ya Beibele, moo e bolelago ka Adama le Efa. Taba ye ga se taba feela ya go swantšhetša. Ke therešo ya histori. Beibele e nea taba e tletšego le e ngwadilwego ya leloko le le thomago lekgolong la pele la nywaga la Mehla e Tlwaetšwego go balela morago go fihla go batho ba pele. (Luka 3:23-38; Genesi 5:1-32; 11:10-32) Adama le Efa ka ge e le bo-rakgolokhukhu ba rena ba pele, ruri ba bile le tutuetšo ya kgonthe godimo ga rena. Seo Beibele e re botšago sona ka bona se re thuša go kwešiša maemo ao a kgomago maphelo a rena lehono.

3. Ke ditokišetšo tša mohuta ofe tšeo Modimo a ilego a di direla batho mathomong?

³ Beibele e utolla gore ditokišetšo ka moka tša Modimo go banyalani ba pele ba batho e be e le tše di botse kudu. Ba be ba e-na le dilo ka moka bakeng sa bophelo bjo bobotse, legae le le swanago le serapa kua Edene, dijo tša mehuta-huta, modiro o kgotsofatšago, go ba le kholofelo ya go bona ge lapa la bona le gola gomme le tlala lefase gotee le tšhegofatšo ya Mmopi wa bona. (Genesi 1:28, 29; 2:8, 9, 15) Ke mang yo a bego a ka ba le lebaka la go nyaka tše dintši?

4. (a) Ke ka ditsela dife batho tlholong ya bona ba bego ba fapane le dibopiwa tše dingwe tša lefase? (b) Ke ka mokgwa ofe ba ilego ba lokišeletšwa tlhahlo e nyakegago?

⁴ Pego e buduletšwego e lego go Genesi e utolla gore batho ba be ba le boemong bjo bo bego bo kgotsofatša lefaseng. Ka go se swane le diphoofolo, ba be ba e-na le pelo e nago le boitshwaro gomme ba lokologile. Ke ka baka leo ba bego ba hlamilwe ka matla a go nagana le go ahlola. Modimo o ile a tsenya ka go monna le mosadi letswalo le le bego le tla ba hlahla gore bona ka ge e le batho ba ba phethagetšego, ba tlwaele go dira dilo tše botse. (Ba-Roma 2:15) Ka ntle ga tše ka moka, Modimo o ile a ba botša lebaka leo ka lona ba bego ba phela, seo ba bego ba tla se dira le yo a ba neilego dilo ka moka tše kgahlišago kudu tšeo di bego di ba dikologile. (Genesi 1:28-30) Ka gona, re ka hlalosa bjang lebaka leo ka lona maemo a mabe a lego gona lehono?

5. (a) Ke taelo efe e bonolo yeo Modimo a ilego a e beela batho ba babedi ba pele, ka baka la’ng? (b) Ke ka baka la’ng ditebelelo tša bona tša bophelo tša nako e tlago di be di akaretšwa ka tshwanelo?

⁵ Pego ya Mangwalo e bontšha gore go ile gwa rotoga kgang e kgomago o mongwe le o mongwe wa rena lehono. E bakilwe ke maemo ao a ilego a direga gatee-tee ka morago ga go bopja ga batho ba pele ba babedi. Modimo o ile a nea monna le mosadi sebaka sa go bontšha tebogo ya lerato go Mmopi wa bona ka go kwa taelo. Taelo e be e se selo seo se bego se bolela gore ba na le mekgwa e mebe yeo e bego e swanetšwe ke go tlošwa. Go e na le moo, e be e akareditše selo seo ka noši e bego e le se se tlwaetšwego le sa tshwanelo, e lego go ja dijo. Modimo o boditše motho gore: “Dihlare ka moka tša thšemo yé O ka di ja. Fêla, sehlare sa xo tseba botse le bobe sôna O se kê wa se ja; ka xobane mohla ò tl’o xo se ja O tlo hwa lehu.” (Genesi 2:16, 17) Taelo ye e be e sa time batho ba pele ba babedi selo lege e le sefe se se bego se nyakega bophelong. Ba be ba ka ja dihlare tše dingwe ka moka tša tšhemo. Ee, ditebelelo tša bona ka bophelo bja nako e tlago di be di akareditšwe e le ka kgonthe gomme e le ka tshwanelo. Ka baka la’ng? Ka gobane Motho yo a bego a nyakile gore a kwiwe e be e le yena Mothopo le Mothekgi wa bophelo bja motho.

6. (a) Batswadi ba rena ba pele nkabe ba ile ba phela ka mo go sa felego ge e ba ba be ba dirile ka go dumelelana le therešo efe ya motheo mabapi le pušo? (b) Ke ka baka la’ng ba be ba ka ikwa ba kgoromeletšwa go kwa Modimo?

⁶ Morero wa Modimo e be e se gore batho ba hwe. Adama le Efa ba be ba se ba ka ba botšwa ka lehu, ka ntle ga ge ba be ba ka ba ba sa kwego. Batswadi ba rena ba pele ba be ba na le tebelelo pele ga bona ya go phela ka mo go sa felego legaeng la bona la khutšo le le le swanago le phaka. Ke’ng yeo e bego e nyakega go bona gore ba kgomarele se? Ba be ba swanetše go lemoga gore lefase leo ba bego ba phela go lona ke la Motho yo a le dirilego, le gore Modimo ka ge e le Mmopi o na le tshwanelo ya go buša tlholo ya gagwe. (Psalme 24:1, 10) Ruri Yena yo a bego a neile motho dilo ka moka tšeo a bego a di nyaka go akaretša bophelo ka bo bjona, o be a nyaka gore taelo efe le efe yeo a bego a ba laela yona ba e kwe. Lega go le bjalo, o be a sa rate gore go kwa moo go gapeletšwe. Go e na le moo, go be go swanetše go tšwa dipelong tšeo di ratago tšeo di tutuetšwago ke lerato. (1 Johane 5:3) Eupja batswadi ba rena ba pele ba ile ba palelwa ke go bontšha lerato le bjalo. Se se diragetše bjang?

Mathomo a go Ganwa ga Pušo ya Modimo

7. (a) Go ya ka Beibele, ke kae moo go ganetša pušo ya Modimo go thomilego gona? (b) Ke ka baka la’ng e le ga tlhaloganyo go dumela gore go na le mmušo wa moya?

⁷ Beibele e bontšha gore go ganwa ga pušo ya Modimo ga se gwa thoma lefaseng, eupja go thomile mmušong wo o sa bonagalego mahlong a motho. Na rena ka go swana le batho ba bantši re swanetše go belaela go ba gona ga mmušo woo ka gobane re sa kgone go o bona? Ee, matla-kgogedi le phefo ga di bonale. Eupja matla a tšona a a bonwa. Ee, le wona matla a mmušo wo o sa bonagalego a ka hlokomelwa. Gaešita lege ‘Modimo e le moya,’ fela mediro ya gagwe ya tlholo e ka bonwa mo gohle ka ge e re dikologile. Ge e ba re mo dumela, gona re tlamegile go dumela mmušong wa moya. (Johane 4:24; Ba-Roma 1:20) Eupja na go na le motho yo a dulago mmušong woo?

8. Barongwa ke batho ba mohuta ofe?

⁸ Go ya ka Beibele, batho ba dimilione ba moya bao e lego barongwa ba bopilwe pele ga motho. (Jobo 38:4, 7; Psalme 103:20; Daniele 7:10) Ba ka moka ba bopilwe ba phethagetše gomme ba se na ditshekamelo tša sebe. Ka gona, ka go swana le motho yo a ilego a bopja ka morago ke Modimo, ba be ba lokologile. Ba be ba ka kgetha tsela ya go botega goba go se botege go Modimo.

9, 10. (a) Go kgonega bjang gore sebopiwa se se phethagetšego sa moya se ikwe se nyaka go dira bobe? (b) Ka gona, o mongwe wa barongwa o fetogile bjang Sathane?

⁹ Eupja potšišo yeo e botšišitšwego ke batho ba bantši ke ye: Ka ge e be e le dibopiwa tše di phethagetšego, ruri o mongwe wa bona o be a ka ikwa bjang a rata go dira bobe? Ee, ke gakae maphelong a rena moo maemo ao a re lebanyago le dilo tše dintši tšeo re ka di kgonago, tšeo tše dingwe tša tšona e ka bago tše botse gomme tše dingwe ya ba tše mpe? Go ba le bohlale bja go tseba dilo tše mpe ga go re dire gore re be ba babe gatee-tee, na go re dira bjalo? Potšišo ya kgonthe ke ye: Ke tseleng efe yeo re tlago go kgomaretša megopolo ya rena le dipelo tša rena? Ge e ba re ka kgomarela dikgopolong tše mpe, gona tšeo di tla re dira gore re hlagolele kganyogo e mpe dipelong tša rena. Kganyogo yeo e tla feleletša ka go re diriša mekgwa e mebe. Mekgwa yeo e senyago e ile ya hlaloswa ke mongwadi wa Beibele Jakobo ka gore: “Mang le mang e a lekwaxo, ó xokwa à xôxwa ke tumô ya xaxwe. ’Me tumô xe e amere, e tswala sebe; sebe sôna xe se phethexile, se tswala lehu.”—Jakobo 1:14, 15.

¹⁰ Mangwalo a utolla gore se se ile sa direga go o mongwe wa barwa ba Modimo ba moya. O ile a gokwa ke dikganyogo tša gagwe ka noši. A bona seo se bego se ka kgonega bathong bao ba bego ba bopilwe ke Modimo. Na ba be ba ka ikokobeletša yena go e na le go ikokobetša go Modimo? Ruri o ile a thoma go duma go ngwathelwa borapedi bjo bo bego bo newa Modimo. (Luka 4:5-8) Ka go dumelelana le kganyogo ya gagwe, ruri o ile a ba moganetši wa Modimo. Ka baka la se o bolelwa ka Beibeleng e le Sathane, e lego seo se bolelago gore Moganetši.—Jobo 1:6.

11. Ke motheo ofe o kwalago wo o lego gona wa go dumela gore ruri Sathane o gona?

¹¹ Lekgolong le la nywaga la bo-20 la dilo tše di bonagalago, ruri go dumela mothong o bjalo wa moya e le Sathane ga se gwa tlwaelwa. Eupja na go tlwaelwa ga selo ke mo go thušago e le ka kgonthe go tseba therešo? Gare ga batho bao ba ithutago malwetši, go kile gwa se tlwaelwe go dumela gore ditwatši tšeo di sa bonwego ke tšona tšeo di swanetšwego go elwa hloko. Eupja mo nakong ye tutuetšo ya tšona e tsebja ka gohle. Ruri go se tlwaelwe ga selo ga go bolele gore se swanetšwe go hlokomologwa. Jesu Kriste ka noši o tšwa mmušong wa moya gomme o be a ka bolela ka matla ka bophelo bja gona moo. Ruri o šupile Sathane e le motho wa moya o mobe. (Johane 8:23; Luka 13:16; 22:31) Ke feela ka go ela hloko go ba gona ga lenaba le la moya mo go kgonegago go kwešiša kamoo maemo a bjalo a mabe a thomilego ka gona mo lefaseng le.

12. Sathane o boledišane bjang le mosadi Efa, gomme ke ka baka la’ng e bile ka mokgwa woo?

¹² Pego e buduletšwego e lego go Genesi kgaolo 3 e hlalosa kamoo Sathane a thomilego go kgotsofatša dikganyogo tša gagwe tše fošagetšego. Tšhemong ya Edene o ile a bolela le mosadi Efa ka mokgwa wa go uta yeo a lego yena e le ka kgonthe. O dirišitše phoofolo yeo e bego e tlwaetšwe go bonwa ke batho ba babedi, e lego noga. Ka go e diriša e le ka kgonthe ka seo re ka se bitšago sedirišwa sa kgakantšho, o ile a dira gore go bonagale ekare mantšu a gagwe a tšwa sebopiweng se. Mokgwa wa sona wa go hlalefa ka tlhago o ile wa swanela gabotse boikemišetšo bjo Sathane a bego a rata go bo dira.—Genesi 3:1; Kutollo 12:9.

13. Sathane o ile a botša Efa eng, gomme ka boikemišetšo bofe bjo bo bego bo le kgakala?

¹³ Sathane go e na le go botša mosadi ka go lebana gore a mo lebelele a le bjalo ka mmuši wa gagwe, ruri o ile a thoma ka go gopola go mediša pelaelo mogopolong wa gagwe ka go mmotšiša gore: “Afá Modimo ó boletše a re: Dihlare tšohle tša thšemo yé Le se kê la di ja?” Ge e le gabotse o be a re: ‘Go swabiša kudu ka ge Modimo a boletše gore le se ke la ja dihlare ka moka tša tšhemo.’ Ka se o be a bolela gore Modimo ge e le gabotse o be a ba ganetša selo se sebotse. Efa o ile a araba ka go tsopola thibelo ya Modimo yeo e bego e akaretša sehlare ka setee feela gotee le go bolela gore kotlo ya go se kwe e be e tla ba lehu. Sathane gona moo a leka go nyenyefatša tlhompho ya gagwe ya go hlompha molao wa Modimo a re: “Le ka se kê la hwa lehu. Xe e le Modimo, yêna ó tseba xore mohla Lè se jaxo mahlô a lena a tlo buduloxa la ba byalo ka Modimo, la tseba botse le bobe.” (Genesi 3:1-5) O ka be o ile wa dira’ng ge nkabe o be o lebane le boemo bjo bo bjalo?

14. (a) Ke ka baka la’ng Efa a ile a wela diatleng tša Sathane? (b) Adama o ile a dira’ng?

¹⁴ Efa o ile a dumelela gore a gogwe ke kganyogo ya boithati. O ile a ja seo Modimo a bego a se ileditše. Ka morago monna wa gagwe le yena a ja ka go kgothatšwa ke yena. O ile a kgetha go kgomarela mosadi wa gagwe go e na le go kgomarela Mmopi wa gagwe. (Genesi 3:6; 1 Timotheo 2:14) Mafelelo e bile afe?

15. Ka gona, ke’ng yeo e bakago bokebekwa le bošoro gotee le bolwetši le lehu tšeo di swailego go ba gona ga motho?

¹⁵ Lapa ka moka la motho le ile la lahlelwa sebeng le boemong bja go se phethege. Adama le Efa ba se sa fetišetša baneng ba bona phethego yeo ba bego ba kile ba ba le yona. Go swana lege dilo tšeo di dirilwego ka selo seo se nago le bosodi ka moka di tla ba le bosodi bjona bjoo, ka gona bana ba bona ka moka ba tswaletšwe sebeng gomme ba abetše mokgwa wa go ba le boithati. (Genesi 8:21) Mokgwa wo wo ilego wa se ke wa elwa hloko o išitše bobeng bjo bo tlošitšego khutšo le polokego bathong. Ke sona sebe se sa leabela seo se feleleditšego ka bolwetši le lehu.—Ba-Roma 5:12.

Kgang e Ngangilwego

16, 17. (a) Gore re tle re kwešiše lebaka leo Modimo a kgotleletšego boemo bjo ka nako e telele gakaakaa, ruri ke’ng seo re swanetšego go se lemoga? (b) Kgang yeo e ilego ya ngangwa ke efe e le ka kgonthe?

¹⁶ Ka baka la ditherešo tše, ruri kgopolo ya rena e boela morago potšišong ya lebaka leo ka lona Modimo a kgotleletšego boemo bjo gomme a bo dumeletše gore bo tšwele pele go fihla bogolong bjo bo lego ka bjona. Ke ka baka la kgang e kgolo yeo e ilego ya ngangwa le mafelelo a yona godimo ga legohle ka moka. Seo se bjalo bjang?

¹⁷ Sathane ka go nganga kgang ya gore molao wa Modimo go Adama le Efa o be o se wa ba lokela le ka go ganetša seo Modimo a bego a boletše gore se tla tlišwa ke go se kwe, ruri o be a belaela pušo ya Modimo. Aowa, o be a sa belaele therešo ya gore Modimo ke mmuši. Go e na le moo, kgang yeo Sathane a e ngangilego e be e ithekgile ka taba ya go ba le tshwanelo ga pušo ya Jehofa, bogoši bja Gagwe le go loka ga ditsela tša Gagwe. Sathane ka bofora o boletše gore batho ba tla itirela bokaone ka go ipuša gomme ba itirele diphetho tšeo e lego tša bona, go e na le go ikokobetša tlhahlong ya Modimo. (Genesi 3:4, 5) Ge e le gabotse, ka go dira bjalo ruri ba be ba tla ba ba latela lenaba la Modimo.

18. (a) Ke kgang efe e nngwe yeo e bego e akaretšwa, gomme se se bontšhwa kae ka Beibeleng? (b) Kgang ye e re akaretša bjang?

¹⁸ Kgang e nngwe e be e akaretšwa. Ka ge dibopiwa tše tša Modimo di ile tša mo furalela kua Edene, gona tše dingwe di be di tla dira’ng? Sathane ka morago mehleng ya Jobo, o ile a bolela kgakala gore bao ba direlago Jehofa ba mo direla feela ka baka la boithati e sego ka gobane ba rata Modimo le pušo ya gagwe, gomme e le ka gobane Modimo a ba nea dilo ka moka. Sathane a bolela gore ga go le o tee yo a ka thekgago bogoši bja Jehofa ka go botega ge feela a le bothateng. Ka gona, potego ya dibopiwa ka moka tše di hlalefilego tša legodimong le lefaseng e ile ya belaelwa. Ka gona, kgang e a go akaretša.—Jobo 1:8-12; 2:4, 5.

19, 20. Ke sebaka sefe seo Jehofa a ilego a se nea dibopiwa tša gagwe tša barongwa le tša batho, ka go se senye marabele kapejana?

¹⁹ Jehofa o be a tla dira’ng ge a be a lebane le go ganetšwa mo go bjalo? O be a ka senya Sathane le Adama le Efa gabonolo. Se se be se ka bontšha matla a bogoši bja Jehofa. Eupja na se be se tla araba dipotšišo tšeo mo nakong ye di botšišwago ke dibopiwa ka moka tša Modimo tšeo di hlokometšego ditaba tše? Khutšo ya neng le neng le polokego ya legohle di be di nyaka gore dipotšišo tše di arabje ka botlalo gomme e be moka. Ntle le moo, gona potego ya tlholo ka moka ya Modimo e hlalefilego e be e ka belaelwa. Ge e ba ba be ba mo rata, gona ba be ba tla rata go araba pelaelo yeo ya maaka ka noši. Jehofa o ile a ba nea sebaka sa go dira sona seo. Le gona, ka go dumelela Adama le Efa gore ba be le bana (gaešita le ge ba be ba se ba phethega), ruri Modimo o be a tla thibela go hwelela ga lapa la motho, e lego lapa leo le akareditšego rena ka moka bao re phelago lehono. Se se be se tla nea ditlogolwana tše sebaka sa go ikgethela ge e ba di tla kwa pušo ya Modimo. Kgetho yeo ke yona ye mo nakong ye e lebanego le wena!

²⁰ Ka gona, Jehofa go e na le gore a phethe kotlo ya lehu gatee-tee, o ile a dumelela marabele a gore a be gona ka nakonyana. Adama le Efa ba ile ba rakwa Edene e le gore ba tle ba hwe pele ga ge nywaga e sekete e ka fela. (Genesi 5:5; bapiša le Genesi 2:17 le 2 Petro 3:8.) Sathane le yena o be a tla senywa ka nako e beilwego a le bjale ka ge eke ke noga e pšhatlilwego hlogo.—Genesi 3:15; Ba-Roma 16:20.

Seo go Feta ga Nako go se Utolotšego

21, 22. (a) Ke’ng seo Sathane le batho ba se dirilego nakong yeo ba e dumeletšwego ke Modimo ge e le ka taba ya pušo? (b) Histori ya motho e bontšha’ng mabapi le mmušo woo o lekago go hlokomologa Modimo?

²¹ Go feleleditše ka eng tabeng ya go ganetšwa ga go ba le tshwanelo ga bogoši bja Modimo? Na motho o ikhotše ka go leka go sepediša ditaba tša gagwe ka noši? Batho ba dumeletšwe gore ba leke mmušo o mongwe le o mongwe wo ba o gopotšego. Jehofa o ile a se ke a thibela maiteko a motho ka pela pele ga ge go ka bonwa mafelelo a tletšego. Gaešita le ka lekgolo la nywaga le le fetilego e be e tla ba kapejana kudu. Motho o be a sa thoma go tsena “mehleng ya thekinolotši,” gomme o be a sa thoma go bolela dipolelo tše dikgolo mabapi le seo a bego a tla se tšweletša.

²² Eupja na go nyakega lekgolo le lengwe la nywaga e le gore go tle go bonwe seo se bego se tla tlišwa ke tsela ya motho ya go ipuša ka ntle go Modimo? Gaešita le ka banna ba ba etago pele ba bilego mmušong le thutamahlaleng ba dumela gore lefase le lebane le kotsi e kgolo ya tshenyego. Modimo ruri a ka se ke a dumelela gore tshenyo e feleletšego e be gona e le gore a tle a hlatse go palelwa ka mo go feletšego ga pušo ya motho ya go ikemela. Ka baka la bohlatse bja nywaga e dikete tše tshelelago ya go hlatsela seo se diregago ge mmušo o hlokomologa Modimo, gona go ka se ke gwa bolelwa le gatee gore nako e be e se ya lekana ya go phethagatša pušo ya motho. Ditherešo di bontšha gore ga go na mmušo wo o ikemetšego ka ntle le Modimo wo o ka tlišago khutšo ya kgonthe le polokego bathong ka moka.

23. Ke’ng yeo e lego kgaufsi le go direga yeo e tlago go bulela pušo ya go loka ya lefase tsela ka Morwa wa Modimo?

²³ Ka ge re tla bona ka morago, ruri Jehofa Modimo ke kgale kudu a swaile ka mo go phethagetšego moloko o itšego wo o tlago go mmona a hlatswa legohle borabele ka moka bjo bo dirwago malebana le pušo ya gagwe. Batho ba babe ga se bona feela bao ba tlago go senywa eupja Sathane le batemona ba gagwe le bona ba tla thibelelwa go etša ge ekare ba sekoting, gomme ba ka se ke ba kgona go tutuetša ditaba tša batho goba tša barongwa. Se e tla ba go bulela pušo ya go loka tsela lefaseng, gomme e bulwa ke mmušo wa Morwa wa Modimo. Mmušo wo nakong ya nywaga e sekete o tla dirolla tshenyo ka moka yeo e tlišitšwego ke pušo ya motho ya boithati ya nywaga e dikete. O tla tsošološetša lefase le botseng bja paradeise gomme o bušetše batho ba ba kwago phethegong yeo e ilego ya thabelwa Edene.—Kutollo 20:1, 2; 21:1-5; 1 Ba-Korinthe 15:25, 26.

24. (a) Ke ka baka la’ng Sathane le batemona ba gagwe ba tla hunollwa bofelong bja nywaga e sekete? (b) Mafelelo e tla ba afe?

²⁴ Beibele e bolela gore bofelong bja pušo yeo ya nywaga e sekete, Sathane le batemona ba gagwe ba tla lokollwa thibelelong ya bona ka nakonyana e nyenyane. Ka baka la’ng? Gore batho ka moka bao ba tlago go ba ba phela nakong yeo ba hwetše sebaka sa go bontšha go botegela ga bona pušo ya bogoši ya Jehofa. Batho ba bantši e tla ba e le bao ba tsošitšwego. Se e tla ba sebaka sa pele go ba bantši ba bona sa go bontšha go rata ga bona Modimo ge ba lekwa. Kgang e tla swana le yela ya go ngangwa kua Edene e lego ya ge e ba ba tla kgomarela bogoši bja Jehofa ka go mo kwa ka go botega. Jehofa o rata gore babušwa ba gagwe e be feela batho bao ba nago le lerato leo le šikinyago go botega mo go bjalo. Batho bao ba ratago go ema le lenaba la Modimo le batemona ba gagwe maitekong ka moka ao ba ba a dirago go gakiša gape khutšo ya legohle la Modimo, ba tla lokologa go ikgethela seo. Eupja ka go gana pušo ya Modimo, ba tla swanelwa ke tshenyego. Mo nakong ye e tla tla kapejana go etša ge ekare ke ka mollo o tšwago legodimong. Marabele ka moka a moya le a batho a tla fedišetšwa sa ruri.—Kutollo 20:7-10.

25, 26. Go swara ga Jehofa ditaba go hotše bjang e le ka kgonthe o mongwe le o mongwe wa rena?

²⁵ Ke therešo gore batho ka nywaga e dikete-kete ba bile le mathata a mantši. Eupja se se bakilwe ke kgetho ya batswadi ba rena ba pele e sego ya Modimo. Modimo o kgotleletše kgobošo gomme o kgotleletše dilo tše di mo šišimišago ka nako ye ka moka. Eupja Modimo yo go yena ‘nywaga e sekete e kego ke letšatši le tee,’ o kgona go ba le kgopolo e nabilego ya ditaba, gomme se se hola dibopiwa tša gagwe. Go bjalo ka ge moapostola yo a buduletšwego a ngwadile gore: “Morêna xa a diexiše tše a di boletšexo a re di tlo tla, bo-ka ba bangwê xe ba re ké xo diexiša; sa xaxwe ké xo se Le fêlêle pelo, xobane xa a rate xe xo na le ba ba lahlêxaxo; ó rata xe bohle ba ka fihlêla thsokoloxô.” (2 Petro 3:8, 9) Ge nkabe e se ka baka la go kgotlelela ga Modimo le go se fele pelo ga gagwe, ruri go ka be go se na le o tee wa rena yo a bego a ka ba le sebaka sa go phologa.

²⁶ Lega go le bjalo, ga se ra swanela go phetha ka go bolela gore tshwanelo ya Modimo e bile feela e hlokago mohola nakong ya nywaga e dikete tše tshelelago e fetilego. Aowa, o be a sa kgotlelele feela bobe, a dumelela nako ya gagwe gomme a sa gate mogato. Bjale ka ge re tla bona, ruri ditherešo di bontšha se se fapanego le seo.

[Seswantšho go letlakala 51]

Sathane o ile a nganga kgang ya gore batho ka moka ba ka se botege ge ba lekwa gomme ba tla ipuša ka ntle go Modimo