Dithuto ka Mangwalo a Buduletšwego le Setlogo sa Wona

Thuto ya bo-8 Mehola ya “New World Translation”

Go ahla-ahlwa ga leleme la yona la mehleng yeno, go dumelelana ga yona, go dirišwa ka tshwanelo ga madiri a yona le go bolelela ga yona ka matla Lentšu le le buduletšwego la Modimo.

1. (a) New World Translation e phošolla mokgwa ofe, gomme bjang? (b) Ke ka baka la’ng Jehovah e dirišwa ka Seisemane go e na le Yahweh goba sebopego se sengwe sa leina le?

NYWAGENG ya morago bjale go gatišitšwe diphetolelo tše dintši tša Beibele tša mehleng yeno, tšeo di hotšego kudu barati ba Lentšu la Modimo gore ba kwešiše gatee-tee dipuku tša mathomo. Lega go le bjalo, diphetolelo tše dintši di fedišitše go dirišwa ga leina la Modimo pegong e kgethwa. Ka lehlakoreng le lengwe, New World Translation e godiša le go hlompha leina le le swanetšego la Modimo Yo Godimo-dimo ka go le bušetša gape mafelong a lona a swanetšego ka mangwalong. Leina bjale le tšwelela mafelong a 6973 karolong ya Mangwalo a Sehebere gotee le mafelong a 237 karolong ya Mangwalo a Segerika gomme ka moka ga wona ke palo-moka ya mafelo a 7210. Leina Yahweh gantši le ratwa ke diithuti tša Sehebere, eupja mmiletšo o kgonthišeditšwego ga o sa hwetšagala mo nakong ye. Ka gona, sebopego sa Selatine sa Jehovah se tšwela pele go dirišwa ka baka la ge se dirišitšwe ka makgolo a mantši a nywaga gomme ke phetolelo e amogelwago kudu ya Seisemane ya Tetragrammaton goba leina la Sehebere la ditlhaka tše nne יהוה. R. H. Pfeiffer e lego seithuti sa Sehebere o itše: “Selo lege e le sefe seo se ka bolelwago ka setlogo sa lona se se belaelwago, ruri lentšu ‘Jehovah’ le swanetše go dula e le phetolelo e swanetšego ya Seisemane ya Yahweh.” a

2. (a) Na go na le mehlala bakeng sa go bušetšwa ga leina la Modimo Mangwalong a Bakriste a Segerika? (b) Ke pelaelo efe yeo e tlošitšwego?

² New World Translation ga se phetolelo ya mathomo ya go bušetša leina la Modimo madulong a lona Mangwalong a Bakriste a Segerika. Bafetoledi ba bantši go tloga mo e ka bago lekgolong la nywaga la bo-14 go ya pele ba ile ba kwa ba gapeletšega go bušetša leina la Modimo mangwalong, kudu-kudu mafelong ao bangwadi ba Mangwalo a Bakriste a Segerika ba tsopotšego ditemana tša Mangwalo a Sehebere tšeo di nago le leina la Modimo. Diphetolelo tše dintši tša maleme a mehleng yeno tšeo di ngwadilwego ke baromiwa tšeo di akaretšago tša Afrika, Asia, Amerika le diphetolelo tša dihlakahlaka tša Pacific tša Mangwalo a Segerika di diriša leina la Jehofa ka go hunologa, go etša ge go dira diphetolelo tše dingwe tša maleme a Sekgowa. Kae le kae moo leina la Modimo le dirišwago gona, ga go sa hlwa go belaelwa ge e le ka “morena” yo go bolelwago ka yena. Ke Morena wa legodimo le lefase, e lego Jehofa yo leina la gagwe le kgethagatšwago ka go bolokwa e le leo go se nago le le swanago le lona le leo le arogilego ka go New World Translation of the Holy Scriptures.b

3. Ke ka go diriša eng moo New World Translation e thušago ka go tšweletša matla, botse le kgopolo ya mangwalo a mathomo?

³ New World Translation e oketša gape tabeng ya go kgethagatšwa ga leina la Jehofa ka go tšweletša Mangwalo a gagwe a buduletšwego ka leleme le le kwalago le le le kwešišegago, leo le dirago gore seo se bolelwago e be seo se kwalago kudu mogopolong wa mmadi. E diriša leleme le bonolo la mehleng yeno, gomme ke yeo e dumelelanago go ya bokgoleng bjo bo kgonegago diphetolelong tša yona, e tšweletša ka mo go nepagetšego tiro goba boemo bjo bo bolelwago madiring a Sehebere le a Segerika gomme e bontšha phapano magareng ga bontši le botee ge e diriša lešala “you” le nakong ya ge e diriša sebopego sa taelo sa lediri moo taba yeo e dikologilego e sa bonagatšego se gabotse. New World Translation ka ditsela tše le tše dingwe e tšweletša ka bontši kudu kamoo e ka kgonago ka gona ka leleme la mehleng yeno matla, botse le go kwala ga mangwalo a mathomo.

E NGWADILWE KA LELEME LA MEHLENG YENO

4. (a) Ke morero ofe o mogolo wo mofetoledi o mongwe wa pele wa Beibele a ilego a o bolela? (b) Ke’ng seo se ilego sa nyakega ge nako e dutše e e-ya?

⁴ Diphetolelo tša Beibele tša kgale di na le mantšu a mantši ao a se sa hlwago a dirišwa ao e lego a lekgolo la nywaga la bo-16 le la bo-17. Mantšu ao gaešita lege a sa kwešišwe mo nakong ye, fela a be a kwešišwa nakong yeo. Ka mohlala, monna o mongwe yo a bilego le letsogo kudu tabeng ya go a tsenya ka Beibeleng ya Seisemane e bile William Tyndale, yo a begwago a botša o mongwe wa baganetši ba gagwe ba bodumedi gore: ‘Ge e ba Modimo a ka mpabalela, gona pele ga nywaga e mentši ke tla dira gore mošemanyana yo a swarago mogoma a tsebe Mangwalo kudu go feta kamoo o a tsebago ka gona.’ Phetolelo ya Tyndale ya Mangwalo a Segerika e be e le bonolo kudu moo mošemanyana yo a swarago mogoma a bego a e kwešiša mehleng ya gagwe. Lega go le bjalo, mantšu a mantši ao a ilego a a diriša ke ao mo nakong ye a se sa dirišwago, ka gona ‘mošemanyana yo a swarago mogoma’ a ka se ke a hlwa a sa kwešiša seo se bolelwago ke mantšu a mantši a King James le a diphetolelo tše dingwe tša kgale tša Beibele. Ka gona go ile gwa nyakega gore go tlošwe mantšu a sa kwalego a leleme la kgale gomme go ngwalwe Beibele ka leleme le le tlwaetšwego la motho fela yo a tlwaelegilego.

5. Beibele e swanetše go tšwelela ka leleme lefe, gomme ka baka la’ng?

⁵ E be e le leleme la batho fela ba tlwaelegilego leo le ilego la dirišwa ge go ngwala Mangwalo a buduletšwego. Baapostola le Bakriste ba bangwe ba pele ga se ba ka ba diriša Segerika sa kgale sa bo-ra-difilosofi bao ba swanago le Plato. Ba dirišitše Segerika seo se bego se dirišwa ka mehla, ke gore Koine goba Segerika se se tlwaelegilego. Ka gona, Mangwalo a Segerika ka go swana le Mangwalo a Sehebere a pele ga wona, a be a ngwadilwe ka leleme leo le bego le tsebja ke batho bohle. Ka gona ke gabohlokwa kudu gore diphetolelo tša Mangwalo a mathomo le tšona di swanetše go ngwalwa ka leleme leo le tsebjago ke batho bohle, e le gore di tle di kwešišwe gabonolo. Ke ka lona lebaka le ge New World Translation e sa diriše leleme la kgale la makgolo a nywaga a mararo goba a mane a fetilego, eupja e diriša leleme le le kwalago la mehleng yeno e le gore babadi ba tle ba tsebe e le ka kgonthe seo se bolelwago ke Beibele.

6. Bontšha mohola wa go diriša mantšu a gona bjale legatong la mantšu ao a se sa hlwago a dirišwa.

⁶ Go bontšha kamoo leleme la Seisemane go tloga lekgolong la nywaga la bo-17 go ya lekgolong la nywaga la bo-20 le fetogilego ka gona, hle ela hloko dipapišo tše di latelago tšeo di tšwago go King James Version le go New World Translation. “Suffered” ka go King James Version e-ba “allowed” ka go New World Translation (Gen. 31:7), “was bolled” e-ba “had flower buds” (Ek. 9:31), “spoilers” e-ba “pillagers” (Baa. 2:14), “ear his ground” e-ba “do his plowing” (1 Sam. 8:12), “when thou prayest” e-ba “when you pray” (Mat. 6:6), “sick of the palsy” e-ba “paralytic” (Mar. 2:3), “quickeneth” e-ba “makes . . . alive” (Ba-Roma 4:17), “shambles” e-ba “meat market” (1 Ba-Kor. 10:25), “letteth” e-ba “acting as a restraint” (2 Ba-Thes. 2:7), bjalo bjalo. Mohola wa New World Translation wa go diriša mantšu a gona bjale legatong la mantšu ao a se sa hlwago a dirišwa, ke wo o ka lemogwago gabotse go se.

GO DIRIŠWA GA DIPHETOLELO TŠA MANTŠU KA GO DUMELELANA

7. New World Translation e dumelelana bjang go fetoleleng ga yona mantšu?

⁷ New World Translation e dira boiteko bjohle bja gore e be yeo e dumelelanago go fetoleleng ga yona mantšu. Go dirišitšwe lentšu le tee la Seisemane bakeng sa lentšu le itšego la Sehebere goba Segerika, gomme le le dirišitšwe e le leo le dumelelanago ge fela seema goba taba yeo e dikologilego e dumela ka go nea kwešišo e tletšego ya Seisemane. Ka mohlala, lentšu la Sehebere la neʹphesh le fetolelwa ka go dumelelana e le “soul.” Lentšu leo le swanago le lona la Segerika la psy·kheʹ, le fetolelwa e le “soul” kae le kae moo le tšwelelago gona.

8. (a) Nea mehlala ya di-homograph. (b) Tše di ile tša swarwa bjang ge go fetolelwa?

⁸ Bothata bo tšweletše mafelong a mangwe ka go fetolelwa ga di-homograph. Tše ke mantšu ao a lego lelemeng la mathomo ao a ngwalwago ka mokgwa o swanago, eupja e le ao a bolelago dilo tše di sa swanego. Ka gona, bothata ke go diriša lentšu leo le nago le tlhaloso e nepagetšego ge o fetolela. Go na le di-homograph tše di bjalo ka “Polish” le “polish,” “lead” (etelela dinku pele) le “lead” (morodi) Seisemaneng tšeo di ngwalwago ka mokgwa o swanago, eupja e le mantšu ao a sa swanego e le ka kgonthe. Mohlala ka o tee wa Beibele ke rav ya Sehebere yeo e emelago mantšu ao a sa swanego e le ka kgonthe, gomme mantšu a ka baka leo a fetolelwa ka go se swane ka go New World Translation. Rav gantši e bolela “bontši,” go etša go Ekisodo 5:5 (NW). Lega go le bjalo, lentšu rav leo le dirišitšwego diretong go etša go “Rabašake” (Sehebere, Rav-sha·qehʹ) go 2 Dikxoši 18:17 (NW), le bolela “kgolo” go etša ge le fetolelwa e le “mokgomana wa gagwe o mogolo” go Daniele 1:3. (NW) (Bona gape le Jeremia 39:3, NW, mongwalo wa ka tlase.) Lentšu rav le le swanago ka sebopego le bolela “ba-nganga-bora,” e lego leo le fetoletšwego ka tsela yeo go Jeremia 50:29. Ditsebi tša mantšu tše bjalo ka L. Koehler le W. Baumgartner di amogetšwe e le methopo ya thekgo ke bafetoledi ge ba aroganya mantšu a a ngwalwago ka mokgwa o swanago.

9. Mohlatholodi o mongwe wa Sehebere le Segerika o ile a reta bjang New World Translation?

⁹ Ge e le ka sebopego se sa go dumelelana, hle ela hloko seo motlhatholodi wa Sehebere le Segerika Alexander Thomson a se bolelago tlhahlobong ya gagwe ya New World Translation of the Christian Greek Scriptures: “Phetolelo ruri ke modiro wa diithuti tše di nago le bokgoni le tše bohlale, tšeo di katanetšego kudu go tšweletša bogolo bja seo se bolelwago ke lengwalo la Segerika go ya kamoo leleme la Seisemane le bego le ka kgona go se bolela ka gona. Phetolelo e ikemišeditše go kgomarela tlhaloso e tee ya Seisemane bakeng sa lentšu le lengwe le le lengwe le legolo la Segerika le go ba yeo e latelago lentšu ka lentšu kamoo go ka kgonegago ka gona. . . . Lentšu leo gantši le fetolelwago e le ‘lokafatša’ le fetolelwa gantši ka mo go nepagetšego e le ‘go bolelwa o lokile’ . . . Lentšu bakeng sa Sefapano le fetolelwa e le ‘kota ya tlhokofatšo,’ yeo e lego kaonefatšo e nngwe. . . . Luka 23:43 e fetoletšwe gabotse e le ‘Ruri ke a go botša lehono, O tla ba le nna Paradeiseng.’ Se ke go kaonefatšwa mo gogolo kudu go phala tlhathollo ya diphetolelong tše dingwe.” Mohlahlobi yena yo o bolela se mabapi le phetolelo ya Mangwalo a Sehebere: “New World Translation ke yeo e swanetšwego ke go hwetšwa. Ke yeo e phelago le yeo e tšweletšago dilo ka tsela ya kgonthe ya bophelo gomme e dira gore mmadi a nagane le go ithuta. Yona ga se puku ya Baseka-seki ba Phagamego, eupja ke ya diithuti tšeo di hlomphago Modimo le Lentšu la Gagwe.”—The Differentiator, April 1952, matlakala 52-7 le June 1954, letlakala 136.

10. Bontšha kamoo go dumelelana ga New World Translation go thekgago ka gona therešo ya Beibele.

¹⁰ Go dumelelana ga New World Translation go fentše dipoledišano tše dintši tša botsebi tša Beibele tšhemong. Ka mohlala, mokgatlo wa batho bao ba belaelago dithuto tša bodumedi wo o lego New York o ile wa kgopela Mokgatlo wa Watch Tower nywageng e fetilego gore o romele diboledi tša wona tše pedi go tla go bolela le sehlopha sa wona ka ditaba tša Beibele, e lego kgopelo yeo e ilego ya amogelwa. Banna ba ba ba rutegilego ba be ba kgomaretše molao wa Selatine, e lego falsum in uno falsum in toto, yeo e bolelago gore taba ye e hlatselwago e le ya maaka ka ntlha e tee ke yeo e lego ya maaka ka moka ga yona. Monna o mongwe nakong ya poledišano o ile a hlohla Dihlatse tša Jehofa ka taba ya go botega ga Beibele. O ile a kgopela gore Genesi 1:3 e balelwe batheetši, gomme seo se ile sa dirwa, ya balwa go New World Translation: “Gomme Modimo a tšwela pele gore: ‘Seetša a se be gona.’ Ke moka seetša sa ba gona.” O ile a kgopela gape ka kgodišego gore go balwe Genesi 1:14, gomme ye le yona e ile ya balwa go New World Translation: “Gomme Modimo a tšwela pele gore: ‘Diediši a di be gona sebakeng sa magodimo.’” O ile a re “Ema, o bala’ng? Beibele ya-ka e re Modimo o dirile seetša letšatšing la pele le gona a ba a se dira gape letšatšing la bone, gomme se ga se dumelelane.” Gaešita lege a be a ipolela gore o tseba Sehebere, fela o ile a swanelwa ke go bontšhwa gore lentšu la Sehebere leo le fetoletšwego “seetša” temaneng ya 3 ke ʼohr, mola lentšu le le lego temaneng ya 14 e le le le fapanego, e lego ma·ʼohrʹ, yeo e bolelago seediši goba mothopo wa seetša. Serutegi se ile sa dula fase se fentšwe.c Go dumelelana mo go botegago ga New World Translation go ile gwa fenya gomme gwa thekga Beibele e le yeo e botegago le e holago.

GO FETOLELWA GA MADIRI KA KELOHLOKO

11. Ke sebopego sefe se matla sa Mangwalo a mathomo seo se lotilwego ka go New World Translation? Bjang?

¹¹ New World Translation e nea tlhokomelo e kgethegilego tabeng ya go nea kgopolo ya sebopego sa madiri a Segerika le a Sehebere. New World Translation ka go dira bjalo, e katanela go šireletša go kgahliša mo go kgethegilego, bonolo, matla le mokgwa wa go bolela wa mangwalo a leleme la mathomo. Ka gona, go ile gwa nyakega gore go dirišwe madiri ao a thušago Seisemaneng gore go tšweletšwe ka kelohloko boemo bja kgonthe bja ditiro. Ka baka la matla a madiri a wona, Mangwalo a mathomo ke ao e lego a matla le go ba ao a hlalosago kudu tiro.

12. (a) Tsela e nngwe ke efe yeo ka yona Sehebere se fapanego le maleme a ka Bodikela? (b) Hlalosa maemo a mabedi a lediri la Sehebere.

¹² Lediri la Sehebere ga le na “mabaka” ka tsela yeo lentšu “lebaka” le dirišwago ka yona malemeng a mantši a ka Bodikela. Ka Seisemane madiri a lebelelwa kudu go ya ka lebaka goba nako: lefetile, lebjale le letlago. Ka lehlakoreng le lengwe, lediri la Sehebere ge e le gabotse le bolela feela boemo bja tiro, ke gore tiro e lebelelwa e le yeo e feleletšego (boemo bjo bo phethegilego) goba yeo e se ya felelelago (boemo bjo bo se bja phethegago). Maemo a a lediri la Sehebere a ka dirišwa go bontšha ditiro tša nakong ye e fetilego goba tša nakong ye e tlago, taba e dikologilego e le yona e bontšhago nako. Ka mohlala, boemo bja lediri bjo bo phethegilego goba bjo bo feleletšego ka tlwaelo bo emela ditiro tša nako ye e fetilego, eupja bo bile bo dirišwa go bolela ka selo se se tlago go direga nakong ye e tlago se le bjalo ka seo e ka rego se šetše se diragetše gomme se fetile, e le go bontšha go ba ga kgonthe ga sona ga nakong ye e tlago goba tlemo ya gore se tla direga.

13. Ke ka baka la’ng go hlokomela ka tshwanelo boemo bja lediri la Sehebere e le gabohlokwa tabeng ya go hwetša kwešišo ye e nepagetšego ya Genesi 2:2, 3?

¹³ Go tšweletša ka mo go nepagetšego boemo bja lediri la Sehebere ka Seisemane ke gabohlokwa kudu; go sego bjalo, seo se bolelwago ke lona se ka kgopamišwa gomme kgopolo yeo e fapanego e le ka kgonthe e ka tšweletšwa. Mohlala wa se, ela hloko go bolelwa ga madiri go Genesi 2:2, 3. Diphetolelong tše dintši, ge go bolelwa ka go khutša ga Modimo letšatšing la bošupa go dirišwa dipolelo tše bjalo ka “a khutša,” “a tlogela,” “o ile a tlogela,” “a napa a khutša,” “Modimo a khutša” le “o ile a khutša.” Motho ge a bala dipolelo tše o tla fetša ka gore go khutša ga Modimo letšatšing la bošupa go ile gwa felelela nakong ye e fetilego. Eupja ela hloko kamoo New World Translation e tšweletšago ka gona kgopolo ya madiri ao a dirišitšwego ditemaneng tše go Genesi 2:2, 3: “Gomme Modimo ka letšatši la bošupa a fetša modiro wa gagwe woo a o dirilego, gomme a tšwela pele go khutša ka letšatši la bošupa modirong wa gagwe ka moka woo a o dirilego. Gomme Modimo a tšwela pele go šegofatša letšatši la bošupa le go le dira le lekgethwa, ka gobane ka lona o be a dutše a khuditše modirong wa gagwe ka moka woo Modimo a o hlotšego ka morero wa go o dira.” Polelo e lego temaneng ya 2 ye e rego “a tšwela pele go khutša,” ke lediri leo le lego boemong bjo bo se bja phethegago ka Sehebere gomme le bontšha kgopolo ya tiro ye e se ya felelago goba ye e tšwelago pele. Go fetolelwa ga “a tšwela pele go khutša” go dumelelana le seo se bolelwago go Ba-Hebere 4:4-7. Ka lehlakoreng le lengwe, lediri leo le lego go Genesi 2:3 le ka boemo bjo bo phethegilego, eupja gore le tle le dumelelane le temana ya 2 le Ba-Hebere 4:4-7, le fetolelwa e le “o be a dutše a khuditše.”

14. New World Translation e ikemišeditše go dira’ng ge e le ka madiri a Sehebere, e le gore e tle e pheme pono e fošagetšego ka tatelano ya waw?

¹⁴ Lebaka le lengwe la mabaka a diphošo tše di dirilwego ge go fetolelwa dibopego tša madiri a Sehebere, ke kgopolo ya popopolelo yeo lehono e bitšwago tatelano ya waw. Waw (ו) ke lekopanyi la Sehebere leo gabotse-botse le bolelago “gomme.” Le ka mohla ga le eme le nnoši, eupja ka mehla le kgokaganywa le lentšu le lengwe, gantši le lediri la Sehebere e le gore le tle le dire lentšu le tee le lona. Go be go dutše go bolelwa gomme go sa bolelwa ke ba bangwe gore tswalano ye e na le matla a go fetolela lediri go tloga boemong bjo bongwe go ya go bjo bongwe, ke gore go tloga boemong bja go se phethege go ya go bja go phethega (go etša ge go dirilwe diphetolelong tše dintši go akaretša tša mehleng yeno go Genesi 2:2, 3) goba go tloga boemong bja go phethega go ya go bja go se phethege. Sebopego se le sona se hlaloswa ka lentšu “go feto-fetoga ga waw.” Go dirišwa mo mo go fošagetšego ga sebopego sa lediri go bakile kgakanego e kgolo le go baka go fetolelwa mo go fošagetšego ga lengwalo la Sehebere. New World Translation ga e lebelele tlhaka waw e na le matla lege e le afe a go fetola boemo bja lediri. Go e na le moo, go dirilwe boiteko bja gore go tšweletšwe matla a swanetšego le a kgethollago a lediri la Sehebere, gomme ya ba go kgomarela ka mo go nepagetšego seo se bolelwago ke madiri a mathomo.d

15. (a) Madiri a Segerika a fetoletšwe ka tlhokomelo efe? (b) Bontšha mohola wa go tšweletša ka mo go nepagetšego kgopolo e tšwelago pele.

¹⁵ Tlhokomelo e swanago e bontšhitšwe tabeng ya ge go fetolelwa madiri a Segerika. Mabaka a madiri a Segerika a bontšha e sego feela nako ya tiro goba boemo, eupja a bontšha le ka mohuta wa tiro, ge e ba e le ya nakonyana, e le yeo e sa tšwago go thoma, yeo e tšwelago pele, yeo e boeletšwago goba yeo e feditšwego. Go ela hloko dikgopolo tše bjalo dibopegong tša madiri ka Segerika go dira gore go be le phetolelo ye e nepagetšego yeo e bontšhago matla a tiro yeo e hlaloswago. Ka mohlala, go nea moko wa kgopolo yeo e tšwelago pele moo se se diregago lediring la Segerika ga go tšweletše feela seo e lego sa kgonthe ka boemo, eupja go bile go dira gore temošo le keletšo e be tše matla kudu. Ka mohlala, go hloka tumelo mo go tšwelago pele ga Bafarisei le Basadutsei go bontšhwa molaleng ke mantšu a Jesu: “Moloko o mobe le wa bootswa o tšwela pele go tsoma pontšho.” Go nyakega ga tiro e tšwelago pele dilong tše di nepagetšego go bontšhwa gabotse ke mantšu a Jesu: “Tšwelang pele le rata manaba a lena.” “Tšwelang pele le tsoma mmušo pele.” “Tšwelang pele le kgopela, gomme le tla newa; tšwelang pele le tsoma, gomme le tla hwetša; tšwelang pele le kokota, gomme le tla bulelwa.”—Mat. 16:4; 5:44; 6:33; 7:7.

16. Go bolela ga Johane ka “sebe” go 1 Johane 2:1 go tšweletšwa bjang ka mo go nepagetšego, ka go ela hloko lebaka la tiro ya nakwana la Segerika?

¹⁶ Segerika se na le lebaka leo le se la tlwaelwago leo le bitšwago aorist, yeo e bolelago tiro yeo e lego ya nakwana. Madiri ao a lego ka tiro ya nakwana a ka dirišwa ka ditsela tše di fapa-fapanego ka go ya ka taba yeo e a dikologilego. Tsela e nngwe yeo a dirišwago ka yona ke go bontšha tiro e tee ya mohuta o itšego, gaešita lege e le yeo e sa tswalanego le nako lege e le efe e kgethegilego. Mohlala o bjalo o hwetšwa go 1 Johane 2:1 moo diphetolelo tše dintši di dirišago lediri bakeng sa “sebe” e le gore di tle di dumelele tsela e tšwelago pele ya sebe, mola New World Translation yona e balega ka gore “go dira sebe,” ke gore tiro e tee ya sebe. Se se tšweletša tlhaloso e nepagetšego ya gore ge e ba Mokriste a ka dira tiro ya sebe, gona o na le Jesu Kriste yo a dirago e le mmoleledi goba mothuši go Tate wa legodimong. Ka gona 1 Johane 2:1 ga e ganetše ka tsela lege e le efe, eupja e bapiša feela ka go bontšha phapano le kahlolo ya ‘go itlwaetša sebe’ yeo e hwetšwago go 1 Johane 3:6-8 le 5:18.e

17. Ke’ng se sengwe seo lebaka le le se la phethegago la Segerika le ka se bolelago ka ntle le go bontšha ga lona tiro e tšwelago pele? Bontšha.

¹⁷ Lebaka le le sa phethegago ka Segerika le ka bontšha e sego feela tiro yeo e tšwelago pele, eupja le ka bolela gape le tiro yeo e lekilwego eupja e se ya phethwa. Ela hloko kamoo Ba-Hebere 11:17 e balegago ka gona go King James Version: “Ka tumelo Aborahama mola a lekwa, o ile a neela Isaka: gomme yena yo a amogetšego dikholofetšo o ile a neela morwa wa gagwe yo a tswetšwego a nnoši.” Lediri “neela” le fapana ka sebopego mabakeng a a mabedi ao le tšwelelago ka wona ka Segerika. Go tšwelela ga lona ga pele go ka lebaka le le phethegilego (feletšego), mola go tšwelela ga lona ga bobedi go le ka sebopego se se se sa phethegago (lefetile leo le tšwelago pele). New World Translation ka go ela hloko mabaka a sa swanego, e fetolela temana ka gore: “Aborahama ge a be a lekwa o nyakile a neela Isaka, o ile a . . . leka go neela morwa wa gagwe yo a tswetšwego a nnoši.” Ka gona, kgopolo e feletšego ya lediri la mathomo e kgomaretšwe, mola lebaka le le se la phethegago la lediri la bobedi le bontšha gore tiro e be e rerilwe goba e ile ya lekwa, eupja ya se ke ya dirwa e le ka kgonthe.—Gen. 22:9-14.

18. Ke’ng seo se tšweleditšwego ke go hlokomela ka tshwanelo go šoma ga dikarolo tše dingwe tša polelo? Nea mohlala.

¹⁸ Go ela hloko mošomo wa dikarolo tše dingwe tša polelo tše di bjalo ka dibopegong tša maina, go dirile gore go fedišwe dikganetšano tšeo go bego go bonala eka di gona. Ka mohlala, go Ditiro 9:7, diphetolelo tše dintši ge di bolela phihlelo e makatšago ya Saulo ge a be a e-ya Damaseko, di bolela gore bagwera ba gagwe bao ba bego ba sepela le yena ba ‘kwele lentšu,’ eupja ba se ke ba bona motho. Diphetolelo tšona tše go Ditiro 22:9 moo Paulo a anegago yona tiragalo ye, di balega ka gore gaešita lege ba bone seetša, fela ‘ga se ba kwa lentšu.’ Lega go le bjalo, tšhupetšong ya pele lentšu la Segerika bakeng sa “lentšu” le ka sebopego sa lerui, eupja mohlaleng wa bobedi le ka sebopego sa sedirwa go etša ge le le bjalo go Ditiro 9:4. Ke ka baka la’ng go e-na le phapano? Ga go le e tee ya dipolelo tše yeo e tšweleditšwego diphetolelong tše di lego ka mo godimo tše fetoletšwego ka Seisemane, eupja Segerika ka go fetola ga sona sebopego sa leina se bontšha selo se sengwe seo se fapanego. Banna ba kwele “lentšu” e le ka kgonthe, eupja ga se ba le kwa ka tsela yeo Paulo a le kwelego ka yona, ke gore go kwa mantšu le go a kwešiša. Ka gona, New World Translation ka go ela hloko go dirišwa ga sebopego sa lerui go Ditiro 9:7, e balega ka gore banna bao ba bego ba e-na le yena ba “kwele modumo wa lentšu e le ka kgonthe, eupja ba be ba sa bone motho lege e le ofe.”

“YOU” YA BONTŠI E A BONTŠHWA

19, 20. (a) New World Translation e dirile’ng ge e le ka dibopego tše dingwe tše dikgethwa tša go bitša, gomme ka baka la’ng? (b) Bontšha kamoo “you” ya botee e ka kgethollwago ka gona go ya bontši.

¹⁹ Dibopego tše dingwe tša Seisemane sa kgale tša botee bja mmoledišwa, e lego “thee,” “thou” le “thy” di tlogetšwe di le bjalo diphetolelong tše dingwe tša mehleng yeno mafelong ao go ona go bolelwago le Modimo. Lega go le bjalo, malemeng ao Beibele e bego e ngwadilwe ka wona go be go se na sebopego se se kgethegilego sa lešala leo le emelago motho le le bego le dirišwa ge go bolelwa ka Modimo, eupja sebopego se swanago se be se dirišwa ge motho a be a bolela le wa gabo. New World Translation ka gona e lahlile mantšu a a dirišwago e le a makgethwa gomme ya diriša mafelong ka moka “you” ye e tlwaetšwego ge go boledišanwa. Mantšu a ngwalwa ka moka ga wona ka ditlhaka-kgolo tše dinyenyane, e le gore go tle go kgethollwe “you” ya bontši ya mmoledišwa le madiri ao bontši bja wona bo sa tšwelelego kapejana Seisemaneng. Gantši ke mo go holago go mmadi go tseba ge e ba temana ya Lengwalo yeo e neilwego e bolela ka “you” yeo e šupago motho o tee goba e bolela ka “YOU” yeo e šupago sehlopha sa batho, e lego phuthego.

²⁰ Ka mohlala, Paulo go Ba-Roma 11:13, (NW) o bolela le batho ba bantši: “Bjale ke bolela le lena [YOU] le lego batho ba ditšhaba.” Eupja temaneng ya 17 Segerika se fetogela go “you” ya botee gomme go dirišwa ga yona go tlišwa mothong o tee: “Lega go le bjalo, ge e ba makala a mangwe a ile a ripja, gomme wena [you] . . . o ile wa hlomeletšwa. . . ”

NEW WORLD TRANSLATION KA MALEME A MANGWE

21. (a) Go kgonegile bjang gore baagi ba lefase ba bantši-ntši ba thabele mehola ya New World Translation? (b) Ke palo-moka efe ya dikopi tša New World Translation yeo e ilego ya gatišwa ke Mokgatlo wa Watch Tower ka 1989?

²¹ Go ile gwa tsebišwa ka 1961 gore Mokgatlo wa Watch Tower o tšwela pele go fetolela New World Translation ka maleme a mangwe a tshelelago ao a dirišwago ka bophara e lego se-Dutch, Sefora, Sejeremane, Setaliana, Sepotokisi le Sepaniši. Modiro wo wa bofetoledi o ile wa gafelwa bafetoledi ba nago le bokgoni le bao ba ineetšego, gomme ka moka ga bona ba dira ba le gotee ntlong-kgolo ya Mokgatlo wa Watch Tower Brooklyn, New York. Ba dirile e le komiti e kgolo ya ditšhaba-tšhaba yeo e dirago tlase ga tlhahlo e swanetšego. Ke ka July 1963 Kopanong ya “Ditaba tše di Lokilego tša Neng le Neng” ya Dihlatse tša Jehofa kua Milwaukee, Wisconsin, U.S.A., moo dithakangwaga tša modiro wo wa bofetoledi di ilego tša hwetšwa ge New World Translation of the Christian Greek Scriptures e be e lokollwa ka nako e tee ka maleme ao a boletšwego ka mo godimo a tshelelago. Baagi ba lefase bao ba bego ba bolela maleme a mangwe ka ntle le Seisemane bjale ba be ba ka thoma go thabela mehola ya phetolelo ye ya mehleng yeno. Modiro wa go fetolela go tloga nakong yeo o ile wa tšwela pele moo ka 1989 New World Translation of the Holy Scriptures e ilego ya tšwelela ka maleme a 11 gomme dikopi tše di fetago 56 000 000 di ile tša gatišwa.f

GO LEBOGA SEDIRIŠWA SE MATLA

22, 23. Ke ka ditsela dife tše dikgolo mo phetolelo ye ya Mangwalo a buduletšwego e holago Mokriste?

²² New World Translation ruri ke sedirišwa se matla bakeng sa go bontšha gore ‘Mangwalo ka moka a buduletšwe ke Modimo gomme a a hola.’ Dintlheng tšeo di hlalositšwego thutong ye, re ka lemoga gore e nepagetše le go botega le gore e ka nea lethabo la kgonthe go bao ba ratago go kwa Modimo a bolela le motho ka mo go kgahlišago ka leleme la mehleng yeno leo le dirišwago. Leleme la New World Translation ke leo le tutuetšago moyeng gomme le dira gore mmadi a amogele kapejana dipolelo tša Mangwalo a mathomo a buduletšwego. Ga re sa hlwa re swanela go bala ditemana gantši-ntši, e le gore re tle re kwešiše mafoko ao a sa kwalego gabotse. E bolela ka matla le ka go kwala go tloga ge re e bala la mathomo.

²³ New World Translation of the Holy Scriptures ke phetolelo e botegago ya Lentšu la Modimo, yona “tšhoša ya moya.” Ka ge e le bjalo, ruri ke sebetša se matla kudu ntweng ya moya ya Bakriste, e lego thušo tabeng ya ‘go phekgola ka matla dithuto tša maaka tšeo di khukhunetšago le dikgopolo tšeo di ganetšanago le tsebo ya Modimo.’ E re thuša gakaakang go bolela ka kwešišo dilo tše di holago le tše di agago, e lego dilo tša letago tšeo di tswalanago le Mmušo wa Modimo wa go loka—ee, “dilo tše dibotse tša Modimo”!—Ba-Ef. 6:17; 2 Ba-Kor. 10:4, 5; Dit. 2:11.

[Mengwalo ya ka tlase]