Kgaolo 110

Bodiredi Tempeleng bo a Fetšwa

JESU o tšwelela la mafelelo tempeleng. Ge e le gabotse, o fetša bodiredi bja gagwe bja phatlalatša lefaseng, ge e se ditiragalo tša go sekišwa le go bolawa ga gagwe tšeo di tlago go direga matšatšing a mararo a tlago. Bjale o tšwela pele ka go kgalema ga gagwe ba-mangwalo le Bafarisei.

O bolela ka makga a mangwe a mararo gore: “Le ba madi-mabe lena ba-mangwalô le bafarisei, lena baikaketši.” O thoma ka go bolela madi-mabe go bona ka baka la ge ba hlatswa ‘sego le mogopo ka ntle, mola ka gare di tletše bohodu le bojato.’ Ka gona, o a ba eletša: “[Thomang] ka xo hlatswa sexô le moxopo ka xare, ké mo di tl’o xo hlatswêxa le ka ntlê.”

Ka morago o bolela madi-mabe go ba-mangwalo le Bafarisei ka baka la go bola ga ka gare mo ba lekago go go bipa ka borapedi bja ka ntle. O re: “Le swana le mabitla a a takilwexo ka phêpa, a a bôxêxaxo ka ntlê, mola ka xare à tletše marapô a bahu le makxapa fêla.”

Mafelelong, boikaketši bja bona bo bontšhwa ka go rata ga bona go agelela mabitla a baporofeta le go a kgabiša e le go gogela tlhokomelo medirong ya bona ya botho. Lega go le bjalo, go etša ge Jesu a ba pepentšha, ke “bana ba babolai ba baporofeta!” Ee, mang le mang yo a lekago go pepentšha boikaketši bja bona o kotsing!

Jesu ge a tšwela pele, o bolela mantšu a gagwe a matla a kahlolo. O re: “Hee lena dinôxa, matswinyana a marabê, kahlolô ya xo tlo Le iša moleteng wa mollô [“Gehenna,” NW] Le tlo e phônyôkxa bya’ng?” Gehenna ke moedi wo o bego o dirišwa e le letlala la Jerusalema. Jesu o bolela gore ba-mangwalo le Bafarisei ka go phegelela tsela ya bona e kgopo, ba tla senywa ka mo go sa felego.

Mabapi le bao a ba romago e le baemedi ba gagwe, Jesu o re: “Ba bangwê ba boná Le tlo ba bolaya la ba bapola . . . ba bangwê Le tlo ba ôtla diphuthexong, la ba hlômara la hlakanya metse. Ya tlo ba xôna xo Le rolêla madi a baloki bohle a a thšollotšwexo lefaseng, a tla xo lena xo tloxa ka madi a Abele moloki xo iša mading a Sakaria morwa wa Barakia [yo a bitšwago Joyada go Dikoronika tša Bobedi] yo Le mmolailexo xare xa Ntlo-kxêthwa le aletare. Ruri ke a Le botša, ka moka tšeo di tlo rolêlwa moloko wó.”

Ka ge Sakaria a ile a sola baetapele ba Isiraele, “bôná ba mo lakana, ba mo thuma ka mafsika à le mo lapeng la Ngwakô wa Morêna, ba dira byalo bà romilwe ke kxoši.” Eupja bjalo ka ge Jesu a bolela, Isiraele e tla lefa ka baka la madi a bjalo ka moka a baloki ao a tšholotšwego. Ba lefa nywageng e 37 ka morago ka 70 C.E., nakong ya ge madira a Roma a senya Jerusalema gomme ba-Juda ba fetago milione ba bolawa.

Ge Jesu a nagana ka boemo bjo bjo bo boifišago, o a nyama. O bolela gape gore: “Hee Jerusalêma! Hee Jerusalêma! Wene O bolayaxo baporofeta, O thumaxo ka mafsika ba ba romilwexo xo wene! Ké xa-kae kè ratile xo phuthêla bana ba xaxo bo-ka kxoxo xe e phuthêla bana ba yôna ka tlase xa diphêxo tša yona; xomme Le xanne. Le tlo di bôna; ngwakô wa lena o tlo Le tloxêlêlwa è le lešope.”

Ka morago Jesu o oketša ka gore: “Xo tloxa byalo Le ka se hlwê Lè mpôna xo fihla xe Le tlo re: Xo rêtwê e a tlaxo ka Leina la Morêna.” Letšatši leo le tla tla nakong ya go ba gona ga Kriste ge a tsena Mmušong wa gagwe wa legodimo gomme batho ba mmona ka mahlo a tumelo.

Jesu bjale o ya lefelong leo go lona a ka bonago dipolokelo tša mahumo ka tempeleng le mašaba a lahlela tšhelete ka go tšona. Bahumi ba lahlela ditšhelete tše dintši. Eupja ka morago mohlologadi wa modiitšana o a tsena gomme o lahlela ditšheletšana tše pedi tša matla a manyenyane kudu.

Jesu ge a bitša barutiwa ba gagwe, o re: “Ruri, ke a Le botša, mosadi eo wa mohlôlôxadi wa modiitšana ó thšetše xa-xolo xo fetiša bohle ba ba thšetšexo fá polokelong.” Ba swanetše go ba ba makatšwa ke kamoo se se ka bago bjalo ka gona. Jesu o a hlalosa: “Bao bohle ba nthšitše xo tše di ba tlaletšexo; xe e le yêna ó nthšitše bohumanexing bya xaxwe, a thšêla tšohle tše a bexo a na natšô’, è le tšohle tše a bexo a tlo phela ka tšôna.” Jesu ka morago ga go bolela ditaba tše, o tloga tempeleng la mafelelo.

O mongwe wa barutiwa ba gagwe ka go makatšwa ke bogolo le botse bja tempele o re: “Moruti, O k’O bônê mabyê a makaakaa á, le moaxêlô wa ôna.” Ee, mafsika a bolelwa e le a botelele bjo bo fetago dimithara tše 11, bophara bjo bo fetago dimithara tše 5 le bogodimo bjo bo fetago dimithara tše 3!

Jesu o a araba: “A [le] a e bôna meaxô yé e mekaakaa? Xa xo lefsika fá le le tl’o xo leswa lè le xodimo xa le lengwê le s’a šuthišwa.”

Ka morago ga go bolela ditaba tše, Jesu le baapostola ba gagwe ba tshela Moedi wa Kidirone gomme ba namela thaba ya Mehlware. Ba kgona go bona tempele e botse kudu ba le moo. Mateo 23:​25–24:⁠3; Mareka 12:​41–13:⁠3; Luka 21:​1-⁠6; 2 Koronika 24:​20-⁠22.

▪ Jesu o dira’ng nakong ya ketelo ya gagwe ya mafelelo tempeleng?

▪ Boikaketši bja ba-mangwalo le Bafarisei bo bontšhwa bjang?

▪ Ke’ng se se bolelwago ke ‘kahlolo ya moleteng wa mollo’?

▪ Ke ka baka la’ng Jesu a bolela gore mohlologadi o ntšhitše mo gontši go feta bahumi?