Kgaolo 114

Selalelo sa Segopotšo

KA MORAGO ga ge Jesu a hlapišitše baapostola ba gagwe maoto, o tsopola lengwalo la Psalme 41:⁠9, o re: “E a bexo a e-⁠ja boxôbê le Nna ó ntsošeditše serêthe sa xaxwe.” Bjale o huduega moyeng gomme o re: “E mongwê wa lena ó tlo nkêka.”

Baapostola ba thoma go nyama gomme ba botšiša Jesu ka o tee ka o tee gore: “A e ka ba nna?” Judase Isikariothe le yena o a botšiša. Johane yo a robetšego kgaufsi le Jesu tafoleng o ithekga kgareng ya Jesu gomme o a botšiša: “Morêna, ké mang?”

Jesu o araba ka gore: “Ké e mongwê wa lena ba lesome le metšô e mebedi; ké yo a tl’o xo ina le Nna morufsing. Xe e le Morwa-motho, Yêna ó ikêla ka mo mangwalô a mmoletšexo; fêla, yo madi-mabe ké motho eo a mo êkaxo. Xo ka be xo le kaone xe a ka be a sa ka a tswalwa.” Ka morago ga moo Sathane o tsena gape go Judase ka go diriša gabotse sekgoba seo se lego pelong ya gagwe yeo e fetogilego e kgopo. Ka morago bošegong bjoo, Jesu o bitša Judase ka mo go swanetšego ka gore ke “morwa-molahlexi.”

Jesu bjale o botša Judase gore: “Se O se diraxo, akxofiša xo se dira.” Ga go le o tee wa baapostola ba bangwe yo a kwešišago seo Jesu a se bolelago. Ba bangwe ba nagana gore ka ge Judase a swara sekhwama sa tšhelete, Jesu o mmotša gore, ‘Reka tše re di nyakago bakeng sa monyanya,’ goba gore a ye go nea badiitšana se sengwe.

Ka morago ga ge Judase a tlogile, Jesu o thoma monyanya o mofsa ka mo go feletšego goba segopotšo gotee le baapostola ba gagwe ba botegago. O tšea senkgwa, a rapela thapelo ya go leboga, a se ngwathaganya gomme o ba nea sona, o re: “Tšeang Le jê.” O a hlalosa: “Ké mmele wa-ka o newaxo ka ’baka la lena. Dirang byalo xore e bê xo nkxopola.”

Ge o mongwe le o mongwe a jele senkgwa, Jesu o tšea senwelo sa beine, seo go lego molaleng gore ke senwelo sa bone seo se dirišwago tirelong ya Paseka. Le sona o se rapelela thapelo ya go leboga, o se fetišetša go bona, o re ba nwe, gomme o re: “Senwêlô sé ké kxwêranô e mphsa mading a-⁠ka a a tšhollwaxo ka ’baka la lena.”

Ka gona, se ge e le gabotse ke segopotšo sa lehu la Jesu. Bjalo ka ge Jesu a bolela, se swanetše go boeletšwa ngwaga le ngwaga ka Nisani 14, e le go mo gopola. Se tla gopotša bao ba se binago seo Jesu gotee le Tatagwe wa legodimong ba se dirilego bakeng sa go phološa batho kahlolong ya lehu. Bakeng sa ba-Juda bao ba bago balatedi ba Jesu monyanya o tla tšea legato la Paseka.

Kgwerano e mpsha yeo e dirwago, e šomago ka madi a tšholotšwego a Jesu, e emela kgwerano ya kgale ya Molao. Mmoelanyi wa yona magareng ga dihlopha tše pedi ke Jesu Kriste​—⁠ka lehlakoreng le lengwe ke Jehofa Modimo gomme ka go le lengwe ke Bakriste ba tswetšwego ka moya ba 144 000. Ka ntle le go nea tebalelo ya dibe, kgwerano e dira gore go bopja ga setšhaba sa legodimo sa dikgoši le baperisita go kgonege. Mateo 26:​21-29; Mareka 14:​18-25; Luka 22:​19-23; Johane 13:​18-30; 17:​12; 1 Ba-Korinthe 5:⁠7.

▪ Ke boporofeta bofe bja Beibele bjoo Jesu a bo tsopolago mabapi le mogwera wa gagwe gomme o bo diriša ka tsela efe?

▪ Ke ka baka la’ng baapostola ba nyama o šoro, gomme o mongwe le o mongwe o botšiša’ng?

▪ Jesu o botša Judase gore a dire eng, eupja baapostola ba bangwe ba hlatholla ditaelo tše bjang?

▪ Ke monyanya ofe woo Jesu a o thomago ka morago ga ge Judase a tlogile gomme morero wa wona ke ofe?

▪ Dihlopha tše pedi tšeo di lego kgweranong e mpsha ke tša bomang, gomme ke eng seo kgwerano e se phethago?