Meoya ga se ya ka ya Phela le go Hwa mo Lefaseng
Meoya e gona! Lefelong le le sa bonagalego la moya, go na le meoya ya go loka le e mebe. Na ye ke batho bao ba phetšego le go hwa lefaseng?
Aowa, ga se bona. Ge motho a e-hwa, ga a fetele lefaseng la moya, go etša ge ba bantši ba nagana bjalo. Re tseba bjang se? Ka gobane Beibele e rialo. Beibele ke puku ya therešo yeo e tšwago go Modimo wa therešo, yoo leina la gagwe e lego Jehofa. Jehofa o bopile batho; o tseba seo se diregago go bona ge ba e-hwa.—Psalme 68:4; 2 Timotheo 3:16.
Adama o tšwele leroleng, o boetše leroleng
Beibele e bolela gore Modimo o bopile Adama, motho wa pele, “[ka] lerole la mmu.” (Genesi 2:7) Modimo o ile a mmea Paradeiseng, tšhemong ya Edene. Ge nkabe Adama a ile a kwa molao wa Jehofa, nkabe a se a hwa; nkabe a sa dutše a phela lefaseng lehono. Eupja ge Adama a be a roba molao wa Modimo ka boomo, Modimo o itše go yena: “O nthšitšwe mmung; O lerole; ’me sa xaxo [e tla ba] xo boêla leroleng.”—Genesi 3:19.
Se se bolela’ng? Adama o be a le kae pele Jehofa a mmopa ka lerole? O be a se felo. E be e se moya wo o sego wa belegwa legodimong. O be a se gona. Ka gona ge Jehofa a be a bolela gore Adama o be a tla “boêla leroleng,” o be a bolela gore Adama o be a tla hwa. Ga se a ka a fetela lefelong la moya. Lehung, Adama gape o ile a se be le bophelo, a se sa ba gona. Lehu ke go se be gona ga bophelo.
Eupja go thwe’ng ka ba bangwe bao ba hwilego? Na le bona ga ba sa le gona? Beibele e a araba:
“Tšohle [batho le diphoofolo] di leba felô xotee; tšohle di tšwa leroleng; ’me tšohle di boêla leroleng.”—Mmoledi 3:20.
“Xo bahu xa xo se se tsebyaxo.”—Mmoledi 9:5.
“Leratô la bôná, lehlôyô la bôná, lehufa la bôná, di fedile kxalê.”—Mmoledi 9:6.
“Kwa bo-dula-bahu mo O yaxo xôna, xa xo na modirô, . . . xa xo tsebô le bohlale.”—Mmoledi 9:10.
“[Motho] ó boêla mmung wa xaxwe; mohla woo ké mo xo fêlaxo maanô a motho.”—Psalme 146:4.
Ke feela ba ba phelago bao ba ka dirago dilo tše
Na o hwetša go le thata go amogela mangwalo a? Ge e ba go le bjalo, nagana ka se: Malapeng a mantši, monna o gola tšhelete ya go fepa ba lapa la gagwe. Ge a e-hwa, gantši lapa la gagwe le ba le mathata. Ka dinako tše dingwe mosadi wa gagwe le bana ba hloka gaešita le tšhelete e lekanego go ka reka dijo. Mohlomongwe manaba a monna a tla ba swara gampe. Bjale ipotšiše: ‘Ge e ba monna a phela lefaseng la moya, ke ka baka la’ng a sa tšwele pele a fepa lapa la gagwe? Ke ka baka la’ng a sa šireletše lapa la gagwe go batho ba kgopo?’ Ke ka gobane mangwalo a nepile. Monna yoo ga a sa phela, ga a kgone go dira selo.—Psalme 115:17.
Bahu ga ba kgone go thuša ba bolawago ke tlala goba go šireletša bao ba swarwago gampe
Na se se bolela gore bahu le ka mohla ba ka se ke ba boela bophelong gape? Aowa, ga go bjalo. Re tla bolela ka tsogo ka morago. Eupja seo se bolela gore batho ba ba hwilego ga ba tsebe se o se dirago. Ba ka se kgone go go bona, go go kwa, goba go bolela le wena. Ga se wa swanela go ba boifa. Ba ka se kgone go go thuša e bile ba ka se kgone go go gobatša.—Mmoledi 9:4; Jesaya 26:14.