Malapa a Motswadi o Tee a ka Atlega!

1-3. Ke’ng seo se ilego sa lebiša koketšegong ya palo ya malapa a motswadi o tee, gomme bao ba akaretšwago ba kgomega bjang?

MALAPA a motswadi o tee a ile a bitšwa “mohuta wa lapa wo o golago ka lebelo kudu” kua United States. Boemo ke bjo bo swanago dinageng tše dingwe tše dintši. Palo e kgolo kudu ya ditlhalo, go tlogelwa, dikarogano le go belegwa ga bana mo e sego ga molao di bile le ditla-morago tše di nabilego kudu go dimilione tša batswadi le bana.

² Mma yo mongwe yo a se nago molekane o ngwadile gore: “Ke mohlologadi wa nywaga e 28 yo a nago le bana ba babedi. Ke gateletšegile kudu ka gobane ga ke nyake go godiša bana ba-ka ba se na tate. Go bonagala eka ga go na le motho o tee yo a nago le taba le nna. Bana ba-ka ba mpona ke lla gantši gomme se se a ba kgoma.” Ka ntle le go lwantšhana le maikwelo a bjalo ka bogale, go ipona molato le bodutu, batswadi ba bantši ba ba se nago balekane ba lebana le tlhohlo ya go šoma ka ntle ga legae gotee le go dira mediro ya ka gae. Yo mongwe o itše: “Go ba motswadi yo a se nago molekane go swana le go ba mototompetši. Ka morago ga dikgwedi tše tshelelago tša go itlwaetša, mafelelong o ile wa kgona go totompetša dikgwele tše nne sammaletee. Eupša gatee ge o šetše o kgona go dira seo, motho yo mongwe o go fošetša kgwele e mpsha!”

³ Bana ka malapeng a motswadi o tee gantši ba na le mathata a bona ka noši. Mo gongwe ba ka swanelwa ke go lwantšhana le maikwelo a tseneletšego ka baka la go tloga ga kapejana ga motswadi goba lehu la gagwe. Go bafsa ba bantši go se be gona ga motswadi go bonagala go e-na le mafelelo a a sa kgahlišego ka mo go tseneletšego.

4. Re tseba bjang gore Jehofa o kgomega ka malapa a motswadi o tee?

⁴ Malapa a motswadi o tee a be a le gona mehleng ya Beibele. Mangwalo a bolela leboelela ka “sešuana” le “mohlôlôxadi.” (Ekisodo 22:21; Doiteronomio 24:19-21; Jobo 31:16-22) Jehofa Modimo e be e se yo a sa šetšego tlalelo ya bona. Mopsalme o ile a bitša Modimo “tata-xo-dišuana, le moahloledi wa bahloloxadi.” (Psalme 68:5) Ka kgonthe, Jehofa o kgomega ka tsela e swanago ka malapa a motswadi o tee lehono! Ka kgonthe Lentšu la gagwe le nea melao ya motheo yeo e ka ba thušago go atlega.

GO KGONA MEDIRO YA KA MEHLA YA LAPA

5. Ke bothata bofe bjo batswadi bao ba se nago balekane ba swanelwago ke go lebeletšana le bjona mathomong?

⁵ Nagana ka modiro wa go hlokomela legae. Mosadi yo mongwe yo a hladilwego o dumela ka gore: “Go na le dinako tše dintši tšeo ka tšona o dumago ge nkabe o be o e-na le monna kgaufsi, go etša nakong ya ge koloi ya gago e thoma go dira mašata gomme o sa tsebe moo a tšwago gona.” Banna bao ba sa tšwago go hlalwa goba go hwelwa ke balekane le bona ka mo go swanago ba ka gakantšhwa ke bontši bja mediro ya lapa yeo bjale ba swanetšego go e dira. Go bana, go hlakahlakana ga legae go tlaleletša maikwelong a go hloka boitseparelo le go se šireletšege.

6, 7. (a) Ke mohlala ofe o mobotse wo o ilego wa bewa ke “mosadi wa sethakxa” wa Diema? (b) Go ba mafolofolo ka boikarabelo bja ka gae go thuša bjang ka magaeng a motswadi o tee?

⁶ Ke’ng seo se ka thušago? Ela hloko mohlala wo o beilwego ke “mosadi wa sethakxa” yo a hlalositšwego go Diema 31:10-31. Bogolo bja dilo tšeo a di phethago bo a makatša—go reka, go rekiša, go roka, go apea, go beeletša karolo ya naga, go lema, le go hlokomela kgwebo e nyenyane. Sephiri sa gagwe e be e le sefe? O be a le mafolofolo, a šoma go fihla mantšiboa gomme a tsoga e sa le mesong gore a thome mediro ya gagwe. Le gona o be a e-na le thulaganyo e botse, a aba mediro e mengwe gomme a diriša diatla tša gagwe ka noši go hlokomela ba bangwe. Ga go makatše ge a ile a ikhweletša theto!

⁷ Ge e ba o le motswadi yo a se nago molekane, e-ba yo a šetšago ka boikarabelo bja gago bja legae. Hwetša kgotsofalo modirong o bjalo, ka gobane se se dira go gontši go tlaleletša lethabong la bana ba gago. Lega go le bjalo, peakanyo e swanetšego le thulaganyo di a nyakega. Beibele e re: “Megopolo ya seroto e iša lešegong.” (Diema 21:5, PK) Tate yo mongwe yo a se nago molekane o ile a dumela ka gore: “Ga ke atiše go nagana ka dijo go fihlela ge ke swerwe ke tlala.” Eupša dijo tše di naganetšwego e sa le pele di atiša go ba tšeo di nago le phepo kudu le go ba tšeo di ipiletšago go feta tšeo di dirilwego ka bjako. Mo gongwe o ka ba wa swanelwa ke go ithuta go diriša diatla tša gago ka ditsela tše mpsha. Ka go ikgokaganya le bagwera bao ba nago le tsebo, dipuku tša dikeletšo le ditsebi tšeo di nago le thušo, bo-mma ba bangwe bao ba se nago balekane ba ile ba kgona go dira modiro wa go penta, go šoma ka dipompi le ditokišo tše bonolo tša dikoloi.

8. Bana ba batswadi bao ba se nago balekane ba ka thuša bjang ka gae?

⁸ Na ke toka go kgopela bana gore ba thuše? Mma yo mongwe yo a se nago molekane o ile a fa mabaka ka gore: “O nyaka go thiba sekgoba sa go se be gona ga motswadi yo mongwe ka go nolofaletša bana dilo.” Seo mo gongwe e ka ba se se kwešišegago eupša mohlomongwe e se ka mehla e lego se se holago go ngwana. Bafsa bao ba boifago Modimo ba mehleng ya Beibele ba be ba abelwa mešongwana e swanetšego. (Genesi 37:2; Sefela sa Difela 1:6) Ka gona, gaešita le ge o ela hloko gore o se imetše bana ba gago, o tla be o le bohlale ge o ba abela mediro ya go etša go hlokomela dibjana le go boloka phapoši ya bona e hlwekile. Ke ka baka la’ng le sa dire mešongwana e mengwe gotee? Seo e ka ba se se thabišago kudu.

TLHOHLO YA GO HWETŠA TŠA BOIPHEDIŠO

9. Ke ka baka la’ng bo-mma ba ba se nago balekane gantši ba lebana le mathata a tša ditšhelete?

⁹ Batswadi ba bantši ba ba se nago balekane ba hwetša go le thata go fihlelela dinyakwa tša bona tša tša ditšhelete, gomme bo-mma ba bafsa bao ba sego ba nyalwa gantši ba na le nako e thata ka mo go kgethegilego.a Dinageng tšeo go tšona thušo ya setšhaba e hwetšagalago, e ka ba bohlale go bona gore ba e diriše, bonyenyane go fihla ge ba kgona go hwetša mošomo. Beibele e dumelela Bakriste go diriša ditokišetšo tše bjalo ge go nyakega. (Ba-Roma 13:1, 6) Basadi ba bahlologadi le bao ba hladilwego ba lebana le ditlhohlo tše di swanago. Ba bantši, ba gapeletšega go tsena mošomong gape ka morago ga nywaga e mentši ya go hlokomela legae, gantši ba ka hwetša feela modiro wo o lefago tšhelete e nyenyane. Ba bangwe ba kgona go kaonefatša boemo bja bona ka go tsenela mananeo a tlwaetšo ya modiro goba dithuto tša sekolo tša nako e kopana.

10. Mma yo a se nago molekane a ka hlalosetša bjang bana ba gagwe lebaka leo ka lona a swanetšego go hwetša modiro wa boiphedišo?

¹⁰ O se ke wa makala ge e ba bana ba gago ba sa thabe ge o tsoma mošomo, le gona o se ke wa ikwa o le molato. Go e na le moo, ba hlalosetše lebaka leo ka lona o swanetšego go šoma, gomme o ba thuše go kwešiša gore Jehofa o nyaka gore o ba fepe. (1 Timotheo 5:8) Ge nako e dutše e e-ya bana ba bantši ba a tlwaela. Lega go le bjalo, leka go diriša nako e ntši le bona go ya kamoo thulaganyo ya gago ya leema-ema e dumelago. Tlhokomelo e bjalo e lerato e bile e ka thuša go fokotša kgateletšo ya mathata le ge e le afe a tša ditšhelete ao lapa le ka bago le ona.—Diema 15:16, 17.

KE MANG YO A HLOKOMELAGO MANG?

11, 12. Ke mellwane efe yeo batswadi ba ba se nago balekane ba swanetšego go e boloka, gomme ba ka dira seo bjang?

¹¹ Ke tlhago go batswadi bao ba se nago balekane gore ba be kgaufsi ka mo go kgethegilego le bana ba bona, eupša tlhokomelo e swanetše go bontšhwa e le gore mellwane yeo e beilwego ke Modimo magareng ga batswadi le bana e se senyege. Ka mohlala, mathata a magolo a ka rotoga ge e ba mma yo a se nago molekane a letela gore morwa wa gagwe a tšee boikarabelo bja monna wa lapa goba a swara morwedi wa gagwe e le yo a ntšhetšago sa mafahleng a gagwe go yena, gomme a imetša ngwanenyana ka mathata a motho ka noši. Go dira bjalo ga se mo go swanetšego, ke mo go gateletšago gomme mohlomongwe ke mo go gakantšhago go ngwana.

¹² Kgonthišetša bana ba gago gore wena bjalo ka motswadi o tla ba hlokomela—e sego se se fapanego. (Bapiša le 2 Ba-Korinthe 12:14.) Ka dinako tše dingwe o ka nyaka keletšo goba thekgo. E tsome go bagolo ba Bakriste goba mohlomongwe go basadi ba ba godilego ba Bakriste, e sego go bana ba gago ba banyenyane.—Tito 2:3.

GO KGOMARELA TAYO

13. Ke bothata bofe mabapi le tayo bjo mma yo a se nago molekane a ka lebanago le bjona?

¹³ Monna mo gongwe a ka se be le bothata bjo bogolo tabeng ya go lebelelwa ka mo go tseneletšego e le molai, eupša mosadi a ka ba le mathata tabeng ye. Mma yo mongwe yo a se nago molekane o re: “Barwa ba-ka ba na le mebele ya banna le mantšu a banna. Ka dinako tše dingwe go thata gore ke se kwagale ke sa kgodišege goba ke fokola ge ke bapišwa le bona.” Go feta moo, mo gongwe o ka ba o sa dutše o kwešitšwe bohloko ke lehu la molekane yo a rategago, goba mohlomongwe o ka ba o ikwa o le molato goba o galefišwa ke go phumega ga lenyalo. Ge e ba ka bobedi le filwe tshwanelo ya molao ya go hlokomela bana, mo gongwe o ka ba o boifa gore ngwana wa gago o rata go ba le yo e kilego ya ba molekane wa gago. Maemo a bjalo a ka dira gore go be thata go nea tayo e leka-lekanego.

14. Batswadi ba ba se nago balekane ba ka kgomarela bjang pono e leka-lekanego ka tayo?

¹⁴ Beibele e bolela gore “mošemana-moipuši o leša mm’axwe dihlong.” (Diema 29:15) O na le thekgo ya Jehofa Modimo go direng melao ya lapa le go kgonthišetšeng go latelwa ga yona, ka gona o se ke wa ineela maikwelong a molato, go šegameng goba poifong. (Diema 1:8) Le ka mohla o se ke wa kwanantšha melao ya motheo ya Beibele. (Diema 13:24) Leka go ba yo a nago le teka-tekano, yo a tsepamego le yo a tiilego. Ge nako e dutše e e-ya, bontši bja bana bo tla arabela. Lega go le bjalo, o tla rata go naganela maikwelo a bana ba gago. Tate yo mongwe yo a se nago molekane o re: “Tayo ya-ka e swanetše go nolofatšwa ka kwešišo ka baka la go ferekanywa ke go lahlegelwa ke mmago bona. Ke boledišana le bona ka sebaka se sengwe le se sengwe. Re ba le ‘dinako tša go ntšhetšana sa mafahleng’ ge re lokišetša dijo tša mantšiboa. Ke ka nako yeo moo ba tlogago ba mpotša sa mafahleng a bona.”

15. Ke’ng seo motswadi yo a hladilwego a swanetšego go se phema ge a bolela ka yo e kilego ya ba molekane wa gagwe?

¹⁵ Ge e ba o hladilwe, ga go na botse bjo bo phethwago ke go hlompholla yo e kilego ya ba molekane wa gago. Go kgakgana ga batswadi go bohloko baneng gomme mafelelong go tla fokodiša tlhompho ya bona ya go le hlompha ka bobedi bja lena. Ka gona, phema go bolela mantšu a hlabago a bjalo ka gore: “O fo swana le tatago!” Go sa šetšwe bohloko le ge e le bofe bjo yo e kilego ya ba molekane wa gago a ka bago a ile a go bakela bjona, e sa dutše e le motswadi wa ngwana wa gago, yo a nyakago lerato, tlhokomelo le tayo ya batswadi ka bobedi.b

16. Ke dithulaganyo dife tša moya tšeo e swanetšego go ba karolo ya ka mehla ya tayo legaeng la motswadi o tee?

¹⁶ Bjalo ka ge go ahla-ahlilwe dikgaolong tše di fetilego, tayo e akaretša tlwaetšo le thuto, e sego feela kotlo. Mathata a mantši a ka efogwa ka lenaneo le lebotse la tlwaetšo ya moya. (Ba-Filipi 3:16) Go ba gona ka mehla dibokeng tša Bokriste go bohlokwa. (Ba-Hebere 10:24, 25) Go bjalo le ka go ba le thuto ya lapa ya Beibele ya beke le beke. Ke therešo gore ga go bonolo go boloka thuto e bjalo e tšwela pele. Mma yo mongwe yo a botegago o re: “Ka morago ga modiro wa letšatši, ruri o tloga o nyaka go ikhutša. Eupša ke itokiša monaganong gore ke ithute le morwedi wa-ka, ke tseba gore ke selo se se swanetšego go dirwa. Ruri o tloga a thabela thuto ya rena ya lapa!”

17. Ke’ng seo re ka ithutago sona kgodišong e botse ya Timotheo modirišani wa Paulo?

¹⁷ Timotheo modirišani wa moapostola Paulo go molaleng gore o ile a newa tlwaetšo ya gagwe ya melao ya motheo ya Beibele ke mmagwe le makgolo’agwe—eupša ga go bonale e bile tatagwe. Lega go le bjalo, Timotheo o ile a ba Mokriste yo a tšweleletšego gakaakang! (Ditiro 16:1, 2; 2 Timotheo 1:5; 3:14, 15) Le wena ka mo go swanago o ka holofela ditla-morago tše dibotse ge o dutše o katanela go godiša bana ba gago “ka tayo le tlhahlo ya monagano ya Jehofa.”—Ba-Efeso 6:4, NW.

GO FENYA NTWA MALEBANA LE BODUTU

18, 19. (a) Bodutu bo ka iponagatša bjang go motswadi yo a se nago molekane? (b) Ke keletšo efe yeo e newago bakeng sa go thuša go laola dikganyogo tša nama?

¹⁸ Motswadi yo mongwe yo a se nago molekane o ile a fegelwa ka gore: “Ge ke e-tla gae gomme ke bona maboto ao a mane, gomme kudu-kudu ka morago ga ge bana ba ile malaong, bodutu ruri bo a nkaparela.” Ee, bodutu gantši ke bothata bjo bogolo kudu bjo motswadi yo a se nago molekane a lebeletšanago le bjona. Ke tlhago go hlologelwa bogwera bjo borutho le ditswalano tša lenyalo. Eupša na motho o swanetše go leka go rarolla bothata bjo ka tsela le ge e le efe? Mehleng ya moapostola Paulo bahlologadi ba bangwe ba bafsa ba ile ba dumelela “dikganyogo tša bona tša botona le botshadi [di] tla magareng ga bona le Kriste.” (1 Timotheo 5:11, 12, NW) Go dumelela dikganyogo tša nama di khupetša dikgahlego tša moya e tla ba mo go gobatšago.—1 Timotheo 5:6.

¹⁹ Monna wa Mokriste o itše: “Dikganyogo tša kopano ya botona le botshadi ke tše matla kudu, eupša o ka di laola. Ge e ba kgopolo e e-tla monaganong wa gago, ga se wa swanela go dula go yona. O swanetše go e tloša. Gape ke mo go thušago go nagana ka ngwana wa gago.” Lentšu la Modimo le eletša ka gore: ‘Bolayang ditho tša mmele wa lena ge e le ka kganyogo ya botona le botshadi.’ (Ba-Kolose 3:5, NW) Ge e ba o be o leka go bolaya kganyogo ya gago ya dijo, na o be o tla bala dimakasine tšeo di bontšhago diswantšho tša dijo tše bose, goba na o be o tla gwerana le batho bao ka mehla ba bolelago ka dijo? Le gatee! Se se swanago ke therešo ka dikganyogo tša nama.

20. (a) Ke kotsi efe yeo e iphihlilego bakeng sa ba ba fereyanago le bao ba sa dumelego? (b) Batho bao ba se nago balekane bobedi lekgolong la pele la nywaga gotee le lehono ba ile ba lwantšha bjang bodutu?

²⁰ Bakriste ba bangwe ba ile ba tsenela lefereyo le ba ba sa dumelego. (1 Ba-Korinthe 7:39) Na seo se ile sa rarolla bothata bja bona? Aowa. Mosadi yo a hladilwego wa Mokriste o ile a lemoša ka gore: “Go na le selo se tee seo e lego se sebe go feta go se be le molekane. Ke go nyalwa ke motho yo a sa swanelago!” Bahlologadi ba lekgolong la pele la nywaga ba Bakriste ga go na pelaelo gore ba ile ba fela ba welwa ke bodutu, eupša ba bohlale ba ile ba dula ba swaregile ‘ka go amogela baeng le go hlatswa bakgethwa maoto le go thuša batlaišegi.’ (1 Timotheo 5:10) Lehono Bakriste ba botegago bao ba ilego ba leta ka nywaga e mentši gore ba hwetše molekane yo a boifago Modimo le bona ka mo go swanago ba ile ba dula ba swaregile. Mohlologadi wa Mokriste wa nywaga e 68 o ile a thoma go etela bahlologadi ba bangwe nako le nako ge a be a e-kwa bodutu. O itše: “Ke hwetša gore ka go dira diketelo tše, ka go sepedišana le modiro wa-ka wa ntlo le go hlokomela boemo bja-ka bja moya ga ke na nako ya go lewa ke bodutu.” Go ruta ba bangwe ka Mmušo wa Modimo ke modiro o mobotse o holago ka mo go kgethegilego.—Mateo 28:19, 20.

21. Thapelo le bogwera bjo bobotse di ka thuša go fenya bodutu ka tsela efe?

²¹ Ke therešo gore ga go na phodišo ya mohlolo ya bodutu. Eupša bo ka kgotlelelwa ka matla a tšwago go Jehofa. Matla a bjalo a tla ge Mokriste a “tiiša dithapêlô le kxopêlô bošexo le mosexare.” (1 Timotheo 5:5) Ditopo ke dikgopelo tše di tšwago pelong, ee, go kgopela thušo, mohlomongwe ka mekgoši e matla le megokgo. (Bapiša le Ba-Hebere 5:7.) Go tšhollela Jehofa pelo ya gago “bošexo le mosexare” go ka thuša e le ka kgonthe. Go feta moo, bogwera bjo bo agago bo ka dira go gontši go tlatša sekgoba sa bodutu. Ka bogwera bjo bobotse, motho a ka ‘hwetša lentšu’ le lebotse la kgothatšo leo le hlaloswago go Diema 12:25.

22. Ke go ela hloko dilo dife mo go tlago go thuša ge maikwelo a bodutu a tšwelela nako le nako?

²² Ge e ba maikwelo a bodutu a fela a tšwelela nako le nako—ka ge go bonala a tla tšwelela—gopola gore ga go na motho yo a nago le maemo a phethagetšego bophelong. Ka kgonthe, “mokgatlo ka moka wa barwarre ba gago” o tlaišega ka tsela e itšego. (1 Petro 5:9, NW) Phema go dula o nagana ka tša nakong e fetilego. (Mmoledi 7:10) Hlahlobišiša mehola yeo o e thabelago. Godimo ga tšohle, ikemišetše go kgomarela potego ya gago le go thabiša pelo ya Jehofa.—Diema 27:11.

KAMOO BA BANGWE BA KA THUŠAGO KA GONA

23. Ke boikarabelo bofe bjo Bakriste-gotee ba nago le bjona ka batswadi ba ba se nago balekane ka phuthegong?

²³ Thekgo le thušo tša Bakriste-gotee di bohlokwa kudu. Jakobo 1:27 e re: “Borapedi byo Modimo Tata-wešo a bônaxo bò se na thšila le senyalô, ké xo hlôla dišuana le bahlôlôxadi mahlokong a bôná.” Ee, Bakriste ba tlamega go thuša malapa a motswadi o tee. Ditsela tše dingwe tše di holago tšeo se se ka dirwago ka tšona ke dife?

24. Malapa a motswadi o tee ao a diilago a ka thušwa ka ditsela dife?

²⁴ Thušo ya dilo tše di bonagalago e ka newa. Beibele e re: “Xe motho a ruile tša bophelô bya lefase, ’me a bôna ngwan’abo à hlôka, a tla a mo tswalêlêla pelo ya xaxwe, xo yêna leratô la Modimo le ka dula bya’ng?” (1 Johane 3:17) Lentšu la Segerika sa mathomo bakeng sa “bôna” ga le bolele go fo gadima ka sewelo, eupša le bolela go tsepelela ka boikemišetšo. Se se bontšha gore Mokriste yo botho mo gongwe a ka thoma ka go tlwaelana le maemo a lapa le dinyakwa. Mohlomongwe ba nyaka tšhelete. Ba bangwe mo gongwe ba ka nyaka thušo ka ditokišo tša mo go senyegilego ka ntlong. Goba mo gongwe ba ka fo thabela go laleletšwa dijong goba pokanong ya bogwera.

25. Bakriste-gotee ba ka bontšha bjang kwelobohloko go batswadi ba ba se nago balekane?

²⁵ Go oketša moo, 1 Petro 3:8 e re: “Bang ba kxopolô e tee ka moka xa lena, Le kwêlanê bohloko, Le ratanê le bana ba bô-lêna, Le bê ba bonôlô le ba botho.” Motswadi yo mongwe yo a se nago molekane wa bana ba tshelelago o itše: “Go bile thata gomme ka dinako tše dingwe ke ikwa ke gateletšegile. Lega go le bjalo, gatee ka morago ga nako e itšego yo mongwe wa banababo rena goba dikgaetšedi o fela a re go nna: ‘Joan, o dira modiro o mobotse. E tla ba o holago.’ Go fo tseba gore ba bangwe ba nagana ka wena le gore ba a hlokomela ke mo go thušago kudu.” Basadi ba ba godilego ba Bakriste e ka ba bao ba atlegago ka mo go kgethegilego go thušeng basadi ba bafsa bao e lego batswadi ba ba se nago balekane, ba ba theetša ge ba e-na le mathata ao go ka bago thata go bona go a ahla-ahla le monna.

26. Banna ba ba godilego ba Bakriste ba ka thuša bjang bana ba ba se nago bo-tatago bona?

²⁶ Banna ba Bakriste ba ka thuša ka ditsela tše dingwe. Jobo monna wa moloki o itše: “Ke be ke hlakodiša . . . mošemane yo a se nago tate le motho le ge le ofe yo a bego a se na mothuši.” (Jobo 29:12, NW) Banna ba bangwe ba Bakriste ka mo go swanago lehono ba bontšha kgahlego e swanetšego go bana ba se nago tate gomme ba bontšha ‘lerato la kgonthe le le tšwago pelong-tshekegi,’ ba se na maikemišetšo a utegilego. (1 Timotheo 1:5) Ka ntle le go hlokomologa malapa a bona, mo gongwe nako le nako ba ka rulaganya go šoma le bana ba bjalo bodireding bja Bokriste gomme ba ka ba ba ba laleletša go kopanela le bona thutong ya lapa goba boitapološong. Botho bjo bjalo bo ka hlakodiša ngwana yo a se nago tate tseleng ya go aroga.

27. Ke thekgo efe yeo batswadi ba ba se nago balekane ba ka kgonthišegago ka yona?

²⁷ Go ba gona, mafelelong batswadi ba ba se nago balekane ba swanetše go ‘rwala morwalo wo e lego wa bona’ wa boikarabelo. (Ba-Galatia 6:5) Lega go le bjalo, ba ka hwetša lerato la banababo bona le dikgaetšedi ba Bakriste le la Jehofa Modimo ka noši. Beibele e re ka yena: “[Ke] mmabaledi wa thšuana le mosadi wa mohlôlôxadi.” (Psalme 146:9) Ka thekgo ya Gagwe e lerato, malapa a motswadi o tee a ka atlega!