Thuto 7

Go Batamela Modimo ka Thapelo

Ke ka baka la’ng go le bohlokwa go rapela ka mehla? (1)

Ke mang yo re swanetšego go mo rapela, gomme bjang? (2, 3)

Ditaba tše swanetšego bakeng sa thapelo ke dife? (4)

O swanetše go rapela neng? (5, 6)

Na Modimo o theetša dithapelo ka moka? (7)

1. Thapelo ke go bolela le Modimo ka boikokobetšo. O swanetše go rapela Modimo ka mehla. Ka go rialo o tla kwa o mmatametše go etša ge o dira go mogwera yo a rategago. Jehofa ke yo mogolo le yo matla kudu, fela o theetša dithapelo tša rena! Na o rapela Modimo ka mehla?—Psalme 65:2; 1 Ba-Thesalonika 5:17.

2. Thapelo ke karolo ya borapedi bja rena. Ka go rialo, re swanetše go rapela Modimo a nnoši, Jehofa. Ge Jesu a be a le lefaseng o ile a rapela Tatagwe ka mehla, e sego motho yo mongwe. Re swanetše go dira se se swanago. (Mateo 4:10; 6:9) Lega go le bjalo, dithapelo tša rena ka moka di swanetše go dirwa leineng la Jesu. Se se bontšha gore re hlompha boemo bja Jesu le gore re dumela sehlabelong sa gagwe sa topollo.—Johane 14:6; 1 Johane 2:1, 2.

3. Ge re rapela re swanetše go bolela le Modimo go tšwa dipelong tša rena. Ga se ra swanela go bolela dithapelo tša rena ka hlogo goba ra di bala go tšwa pukung ya dithapelo. (Mateo 6:7, 8) Re ka rapela re le boemong le ge e le bofe bjo bo hlomphegago ka nako le ge e le efe le lefelong le ge e le lefe. Modimo a ka kwa gaešita le dithapelo tša setu tšeo di dirwago ka dipelong tša rena. (1 Samuele 1:12, 13) Ke mo gobotse go hwetša lefelo leo le se nago lešata le lego kgole le batho ba bangwe gore re dire dithapelo tša rena tša motho ka noši.—Mareka 1:35.

4. Ke ditaba dife tšeo o ka rapelago ka tšona? Selo se sengwe le se sengwe seo se ka kgomago tswalano ya gago le yena. (Ba-Filipi 4:6, 7) Thapelo ya mohlala e bontšha gore re swanetše go rapela ka leina la Jehofa le morero wa gagwe. Gape re ka kgopela gore re newe dinyakwa tša rena tša dilo tše di bonagalago, ra kgopelela gore dibe tša rena di lebalelwe le thušo ya gore re fenye teko. (Mateo 6:9-13) Dithapelo tša rena ga se tša swanela go ba tša boithati. Re swanetše go rapelela feela dilo tšeo di dumelelanago le thato ya Modimo.—1 Johane 5:14.

5. O ka rapela neng le neng ge pelo ya gago e go tutueletša go leboga le go reta Modimo. (1 Koronika 29:10-13) O swanetše go rapela ge o e-na le mathata gomme tumelo ya gago e lekwa. (Psalme 55:22; 120:1) Ke mo go swanetšego go rapela pele o e-ja dijo tša gago. (Mateo 14:19) Jehofa o re laletša go rapela “ka mabaka ohle.”—Ba-Efeso 6:18.

6. Re swanetše go rapela ka mo go kgethegilego ge e ba re dirile sebe se segolo. Dinakong tše bjalo re swanetše go kgopela kgaugelo le tebalelo ya Jehofa. Ge e ba re ipolela dibe tša rena go yena gomme re dira sohle seo se lego matleng a rena gore re se ke ra di boeletša, Modimo “o ikemišeditše go re swarela.”—Psalme 86:5, NW; Diema 28:13.

7. Jehofa o theetša feela dithapelo tša batho ba ba lokilego. Gore dithapelo tša gago di kwewe ke Modimo, o swanetše go leka ka gohle go phela ka melao ya gagwe. (Diema 15:29; 28:9) O swanetše go ikokobetša ge o rapela. (Luka 18:9-14) O swanetše go dumelelana le seo o se rapelelago. Ka go rialo o tla hlatsela gore o na le tumelo le gore o tloga o ikemišeditše ka seo o se bolelago. Ke ka tsela ye feela mo Jehofa a tlago go araba dithapelo tša gago.—Ba-Hebere 11:6.