Thuto 1

Modimo o go Laletša Gore o be Mogwera wa Gagwe

Modimo o nyaka gore o be mogwera wa gagwe. Na o kile wa nagana gore o ka ba mogwera wa Motho yo a phagamego kudu legohleng? Aborahama, yo a ilego a phela kgale-kgale, o be a bitšwa mogwera wa Modimo. (Jakobo 2:23, PK) Ba bangwe bao go bolelwago ka bona ka Beibeleng le bona ba ile ba thabela bogwera le Modimo gomme ba ile ba šegofatšwa kudu. Lehono, batho go tšwa dikarolong ka moka tša lefase ke bagwera ba Modimo. Le wena o ka ba mogwera wa Modimo.

Go ba mogwera wa Modimo go phala go ba mogwera wa motho le ge e le mang. Modimo le ka mohla ga a ke a nyamiša bagwera ba gagwe ba botegago ka go se kwanantšhe. (Psalme 18:25, NW) Go ba mogwera wa Modimo go phala go ba le mahumo. Ge motho yo a humilego a e-hwa, tšhelete ya gagwe e ya go ba bangwe. Lega go le bjalo, bao ba nago le bogwera le Modimo ba na le lehumo leo le ka se tšewego ke motho.—Mateo 6:19.

Batho ba bangwe ba ka leka go go thibela go ithuta ka Modimo. Gaešita le ba bangwe ba bagwera ba gago goba ba leloko ba ka dira se. (Mateo 10:36, 37) Ge e ba ba bangwe ba go sega goba ba go tšhošetša, ipotšiše gore, ‘Ke mang yo ke nyakago go mo kgahliša—na ke batho goba ke Modimo?’ Nagana ka se: Ge e ba motho yo mongwe a be a ka go botša gore o kgaotše go ja, na o be o tla mo theetša? Ga go bjalo le gatee! O nyaka dijo gore o phele. Eupša Modimo a ka go dira gore o phele ka mo go sa felego! Ka gona le ka mohla o se ke wa dumelela motho le ge e le ofe a go thibela go ithuta kamoo o ka bago mogwera wa Modimo ka gona.—Johane 17:3.