Tlhahlo Bakeng sa Balebeledi ba Sekolo

KA PHUTHEGONG e nngwe le e nngwe, go kgethwa mogolo gore e be molebeledi wa Sekolo sa Bodiredi sa Pušo ya Modimo. Ge e ba o gafetšwe boikarabelo bjoo, phišego ya gago ka sekolo le kgahlego ya motho ka noši ka tšwelopele ya morutwana yo mongwe le yo mongwe e ka ba mabaka a bohlokwa mabapi le seo sekolo se se fihlelelago lefelong la gabo lena.

Karolo ya bohlokwa ya kabelo ya gago ke go swara Sekolo sa Bodiredi sa Pušo ya Modimo beke le beke phuthegong ya geno. Gopola gore go tlaleletša go barutwana bao ba nago le dikabelo ka nako le ge e le efe e itšego, go na le ba bangwe bao ba lego sebokeng seo. Swara sekolo ka tsela yeo phuthego ka moka e hwetšago dikgopotšo tše di tutuetšago le tše di šomago tšeo di tswalanago le bonyenyane e nngwe ya dipakane tša sekolo tšeo go boletšwego ka tšona go matlakala 5 go ya go 8 a puku ye ya go ithuta.

E-ba le kgahlego ka barutwana ka moka go sa šetšwe ge e ba ba abetšwe dikabelo tša go bala, tša go nea dithero ka mokgwa wa pontšho goba tša go nea dipolelo. Ba thuše go lebelela seo ba se dirago e se feela kabelo eupša bjalo ka sebaka sa go dira tšwelopele tirelong ya bona go Jehofa. Go ba gona, boiteko bjo ba bo dirago ke selo sa bohlokwa tšwelopeleng ya bona. Eupša gape go bohlokwa gore o bontšhe kgahlego e botho, o ba thuše go kwešiša bohlokwa bja dintlha tša keletšo le go hlalosa kamoo ba swanetšego go diriša keletšo e bjalo ka gona. E le gore o fihlelele seo, theetša polelo e nngwe le e nngwe ka kelohloko e le gore o kgone go nea ditlhaloso tše bohlokwa.

Kgonthišega gore o thoma le go fetša sekolo ka nako. Bea mohlala o mobotse ka go lekanyetša ditlhaloso tša gago nakong yeo di e abetšwego. Ge e ba polelo ya morutwana e feta nako ya yona, wena goba mothuši wa gago le swanetše go nea seka sa temošo. Morutwana o swanetše go feleletša lefoko la gagwe gomme a tloge sethaleng. Ge e ba karolo e nngwe ya lenaneo e feta nako ya yona, fokotša ditlhaloso tša gago ke moka o ahla-ahle taba yeo le ngwanabo rena ka morago ga seboka.

Ge o le gona, o swanetše go swara sekolo. Ge e ba ka dinako tše dingwe o sa kgone go ba gona, mogolo yo mongwe yo a kgethilwego nakong e fetilego ke sehlopha sa bagolo o swanetše go swara sekolo. Ge e ba o nyaka thušo ka go rulaganya mananeo, go ngwala le go aba dipampišana tša dikabelo goba go rulaganya bao ba ka ithapago lenaneong, mohlanka wa bodiredi yo a abetšwego ke sehlopha sa bagolo a ka go thuša ka dilo tše.

Go Ngwadiša Barutwana. Kgothaletša bagoeledi ka moka go ngwadiša sekolong. Ba bangwe bao ba kopanelago le phuthego ka mafolofolo ba ka ngwadiša ge e ba ba dumelelana le dithuto tša Beibele gomme maphelo a bona a dumelelana le melao ya motheo ya Bokriste. Ge motho a bontšha kganyogo ya go ngwadiša, mo rete ka borutho. Ge e ba motho yoo a se a hlwa a e-ba mogoeledi, wena bjalo ka molebeledi wa sekolo o swanetše go ahla-ahla le yena dinyakwa tša go ngwadiša sekolong, go kgethwa gore o dire bjalo motho yo a swarago thuto ya Beibele le yena a le gona (goba go e na le motswadi yo e lego modumedi). Dinyakwa tše di swana le tša motho yo a nyakago go ba mogoeledi yo a sa kolobetšwago. Di hwetšwa go matlakala 97 go ya go 99 a puku ya Go Rulaganyetšwa go Dira Bodiredi bja Rena. Boloka lenaneo leo le lego nakong la bohle bao ba ngwadišitšego sekolong.

Go Diriša Fomo ya Keletšo. Fomo ya keletšo ya morutwana yo mongwe le yo mongwe e ka gare ga kopi ya gagwe ka noši ya puku ya go ithuta, go matlakala 79 go ya go 81. Bjalo ka ge go bontšhitšwe ka maswao a mebala, ntlha le ge e le efe ya keletšo go tloga go 1 go ya go 17 e ka dirišwa ge morutwana a neilwe kabelo ya go bala. Bakeng sa dithero tše di newago ka mokgwa wa pontšho, go ka dirišwa ntlha le ge e le efe ya keletšo ka ntle le dintlha 7, 52 le 53. Keletšo bakeng sa dipolelo e akaretša dintlha ka moka ka ntle le dintlha 7, 18 le 30.

Ge ntlha ya keletšo e abetšwe, molebeledi wa sekolo o swanetše go bona gore o ngwala ka phentshele ka tlase ga “Letšatši Leo e Abetšwego ka Lona” sekgobeng seo se neilwego kgaufsi le ntlha yeo fomong ya keletšo ka pukung ya morutwana. Ka morago ga ge morutwana a phethile kabelo ya gagwe, mmotšiše ka thoko ge e ba a dirile (di)tlwaetšo yeo e bontšhitšwego mafelelong a tsheka-tsheko ya ntlha ya keletšo. Ge e ba go le bjalo, o swanetše go swaya leswao la go bontšha gore e dirilwe lepokising leo le lego fomong. Ge e ba o kgothaletša gore a tšwele pele a šomela ntlheng e swanago ya keletšo, ga go na selo se oketšegilego seo o swanetšego go se ngwala fomong ya keletšo; e-fo tlogela o sa ngwala selo sekgobeng sa “Letšatši Leo e Phethilwego ka Lona.” Seo se swanetše go swawa feela ge a loketše go ka tšwela pele ntlheng e nngwe. Go oketša moo, go letlakala 82 la puku ya morutwana, ka go le letshadi la thulaganyo yeo e dirišitšwego, go swanetše gore go ngwalwe letšatši-kgwedi ka morago ga go newa ga polelo e nngwe le e nngwe ya morutwana. Go na le sekgoba fomong ya keletšo le lelokelelong la dithulaganyo bakeng sa go dumelela e nngwe le e nngwe ya tšona go dirišwa gabedi. Barutwana ba swanetše go swara dipuku tša bona nakong ya lenaneo.

Abela morutwana ntlha e tee feela ya keletšo ya polelo nako le nako. Gantši go kaone go abela dintlha tša keletšo ka tatelano yeo di lokeleditšwego ka yona. Lega go le bjalo, ge e ba barutwana ba bangwe ba bontšha bokgoni bjo bo lemogegago kudu, o ka ba kgothaletša go ithuta le go diriša dithuto tše itšego ka bobona. Ke moka o ka ba thuša dintlheng tšeo o dumelago gore di tla tlaleletša kudu tšwelopeleng ya bona bjalo ka diboledi le barutiši ba atlegago.

Gaešita le ge morutwana a e-na le nywaga e mentši a ngwadišitšwe sekolong, a ka holwa kudu ke go ithuta le go diriša thuto e nngwe le e nngwe. Bakeng sa go thuša barutwana ka dinyakwa tše itšego, o ka kgetha dika tše itšego tša polelo gore ba šomele go tšona go e na le go fo ba abela tšona kamoo di lokeleditšwego ka gona.

Go Nea Keletšo. Ge o nea keletšo diriša mehlala le melao ya motheo ya Beibele ka botlalo. Barutwana ba swanetše go kgona go lemoga gore keletšo yeo e newago le mokgwa woo e newago ka wona di laolwa ke melao ya motheo e phagamego ya Lentšu la Modimo.

Dula o gopola gore o ‘modirišani’ le bana beno le dikgaetšedi. (2 Ba-Kor. 1:24) Ka go swana le bona, o swanetše go tšwela pele o katanela go dira kaonefatšo bjalo ka seboledi le morutiši. Wena ka noši ithute puku ya Holwa ke Thuto ya Sekolo sa Bodiredi sa Pušo ya Modimo, diriša keletšo ya yona gomme o beele ba bangwe mohlala o mobotse wa gore ba dire se se swanago.

Ge o dutše o dira bjalo, go dire pakane ya gago go thuša barutwana go ba dibadi tše dibotse, diboledi tšeo di nago le bokgoni le barutiši ba atlegago. Gore o fihlelele seo, katanela go nea thušo le ge e le efe yeo e nyakegago e le gore barutwana ba kwešiše seo dika tše di fapa-fapanego tša polelo di lego sona, lebaka leo ka lona di lego bohlokwa le kamoo ba ka di hlagolelago ka gona. Puku ye ya go ithuta e hlamilwe ka mokgwa woo o tlago go go thuša go dira bjalo. Lega go le bjalo, gantši go nyakega mo gontši go wena go feta go fo bala mantšu ao a lego ka pukung. Ahla-ahla kgopolo yeo a e fetišago le kamoo e ka dirišwago ka gona.

Ge e ba morutwana a dirile gabotse ntlheng e itšego, mo rete. Hlalosa ka boripana seo se dirilego gore e be e atlegago goba lebaka leo ka lona seo a se dirilego e lego sa bohlokwa. Ge e ba a ka holwa ke go lebiša tlhokomelo ka mo go oketšegilego tabeng e itšego, kgonthišetša gore o kwešiša lebaka la go dira bjalo. Ahla-ahla kamoo a ka dirago seo ka gona. E-ba yo a lebanyago gomme ka nako e swanago o be yo botho.

Lemoga gore go ba bantši, go emelela le go yo nea polelo pele ga sehlopha go thata kudu. Ge e ba motho a ikwa gore ga se a šoma gabotse, a ka ipotšiša ge e ba a swanetše go tšwela pele a leka. Ekiša Jesu yo a sa kago a thokgela ruri “lehlaka le le thinyexilexo” goba go timela ruri “lebônênyana le le kunyêlêlaxo.” (Mat. 12:20) Naganela boemo bja maikwelo bja morutwana. Ge o nea keletšo, hlahlwa ke taba ya ge e ba morutwana e sa le yo mofsa goba e le mogoeledi yo a nago le phihlelo. Theto e borutho le ya kgonthe e ka matlafatša batho gore ba tšwele pele ba dira sohle seo ba ka se kgonago.

Swara morutwana yo mongwe le yo mongwe ka seriti. Ba-Roma 12:10 e re botša gore: “Le rakanê pele ka xo xodišana.” A keletšo e swanetšego gakaakang bakeng sa moeletši Sekolong sa Bodiredi sa Pušo ya Modimo! Ge e ba morutwana e le yo mogolo go wena, diriša tlhahlo yeo e neilwego go 1 Timotheo 5:1, 2, ka kelohloko. Lega go le bjalo, go sa šetšwe nywaga ya motho, ge keletšo yeo e akaretšago go dira diphetogo mokgweng wa gagwe wa go dira dilo e newa ka mokgwa o botho, gantši e amogelwa ka ntle le tika-tiko.—Die. 25:11.

Ge o nea keletšo, gatelela go morutwana morero wa tlwaetšo yeo. Morero woo ga se feela go šoma gabotse ka mo go lekanego gore motho a retwe le go botšwa gore a tšwele pele ntlheng e latelago ya keletšo. Pakane ga se go ba seboledi le morutiši yo a tlago go godišwa ke ba bangwe. (Die. 25:27) Kganyogo ya rena ke go diriša mpho ya rena ya polelo go tumiša Jehofa le go thuša ba bangwe go mo tseba le go mo rata. Tlwaetšo ya rena ke ya go re hlamela go hlokomela ka mo go atlegilego modiro wo o boletšwego go Mateo 24:14 le 28:19, 20. Bana babo rena bao ba swanelegago ge nako e dutše e e-ya ba ka laletšwa go tšea karolo go hlokomeleng “mohlape” e le diboledi le barutiši ba phatlalatša.—1 Pet. 5:2, 3.

Šišinya gore barutwana ba bale moo go ahla-ahlwago ntlha ya bona e latelago ya keletšo ka pukung ya go ithuta, matšatši a sego kae ka morago ga ge ba e abetšwe. Ba kgothaletše go diriša seo ba ithutago sona ge ba lokišetša dikarolo tša bona bakeng sa sekolo, poledišanong ya letšatši le letšatši, ge ba nea ditlhaloso dibokeng le tirelong ya tšhemo.

Go Dira Dikabelo. Se ka mo go tlwaelegilego se swanetše go dirwa bonyenyane dibeke tše tharo e sa le pele. Dikabelo tšeo ka moka di swanetše go ngwalwa ge e ba go kgonega.

Dikarolo tšeo di akaretšago go ruta phuthego di swanetše go abelwa bagolo, kudu-kudu bao ba tlago go swara dikarolo tše bjalo ka mo go atlegago, le bahlanka ba bodiredi bao e lego barutiši ba babotse.

Ge o kgetha gore ke dipolelo dife tša barutwana tšeo o swanetšego go di abela bana babo rena le tšeo o swanetšego go di abela dikgaetšedi, latela ditaelo tšeo di neilwego lenaneong la sekolo. Ge e ba bana babo rena e le ba sego kae eupša dikgaetšedi e le tše dintši tšeo di neago dipolelo tša barutwana, ela hloko go nea bana babo rena sebaka se se lekanego sa go nea dipolelo tše dingwe ka ntle le tša go bala.

Naganela maemo a motho ka o tee ka o tee ge o dira dikabelo. Na ke mo go nyakegago go abela mogolo yo a itšego goba mohlanka wa bodiredi gore a nee polelo sekolong bošegong bjoo ka bjona a nago le kabelo Sebokeng sa Tirelo goba bekeng yeo a nago le polelo ya phatlalatša ka phuthegong? Na ke mo go nyakegago go abela kgaetšedi yo a itšego go nea polelo bošegong bjoo ka bjona yo mongwe wa bana ba gagwe ba banyenyane a nago le kabelo, yoo kgaetšedi mo gongwe a ka swanelwago ke go mo thuša? Kudu-kudu tabeng ya ngwana goba morutwana wa Beibele yo a sa hlwago a kolobetšwa, na taba ke e swanetšego? Hlahloba bakeng sa go kgonthišetša gore kabelo e swanela ntlha ya keletšo yeo morutwana a šomelago go yona.

Go dikabelo tšeo di newago dikgaetšedi, morutwana gantši o tla kgetha thulaganyo ya gagwe ka go dumelelana le ditaelo tše di lego go matlakala 78 le 82. Go swanetše go abelwa mothuši o tee, eupša go ka dirišwa mothuši yo mongwe gape. Ge e ba morutwana a kgopela mothuši yo a tlago go swanela ka mo go kgethegilego go diragatša thulaganyo e itšego, o swanetše go naganela kgopelo yeo.

Diklase tša Tlaleletšo. Ge e ba go e-na le barutwana ba fetago 50 bao ba ngwadišitšego, o ka nyaka go naganela go diriša mafelo a oketšegilego bakeng sa dikarolo tšeo di newago ke barutwana. Go ya ka dinyakwa tša lefelong leo, tokišetšo ye e ka dirišetšwa dipolelo ka moka tša barutwana goba dipolelo tše pedi feela tša mafelelo.

Klase e nngwe le e nngwe ya tlaleletšo e swanetše go ba le moeletši yo a swanelegago, go kgethwa gore e be mogolo. Moo go nyakegago, mohlanka wa bodiredi yo a swanelegago gabotse a ka dira boemong bjoo. Sehlopha sa bagolo se swanetše go nea tumelelo bakeng sa baeletši ba. Molebeledi wa sekolo o swanetše go dirišana kgaufsi le baeletši bao, e le gore barutwana ba ka nea tlhokomelo e oketšegilego go sa šetšwe gore polelo ya bona e latelago e tla newa sekolong sefe.

Klase e Kgethegilego ya go Bala. Ge e ba sehlopha sa bagolo se phetha gore bontši bja batho ka phuthegong ba nyaka tlhahlo ya motheo ya go bala ka leleme leo le dirišwago phuthegong, o ka dira dithulaganyo bakeng sa se ka go dumelelana le Sekolo sa Bodiredi sa Pušo ya Modimo. Tlhahlo ye e ka akaretša bokgoni bja motheo bja go bala le go ngwala, goba morero wa yona e ka ba go kaonefatša go bala.

Diklase tše bjalo ga go nyakege gore di swarwe ka nako e tee le yeo dipolelo tša barutwana Sekolong sa Bodiredi sa Pušo ya Modimo di newago ka yona. E le gore di nee thušo e lekanego, go ka nyakega nako e oketšegilego go feta yeo e bego e ka kgonega nakong ya sekolo. Bagolo ba phuthegong ba ka dira phetho mabapi le seo e lego se se nyakegago le nako yeo tlhahlo e bjalo e swanetšego go newa ka yona. Go ithekgilwe ka dinyakwa, go ka dirwa ditokišetšo bakeng sa go rutwa ga sehlopha goba tlhahlo ya motho ka o tee ka o tee.

Go nyakega morutiši yo a swanelegago. Go kgethwa gore kabelo e newe ngwanabo rena yoo e lego mmadi yo mobotse le yoo a tlwaelanego le leleme gabotse. Ge e ba go se na ngwanabo rena yo a swanelegago, bagolo ba ka kgopela kgaetšedi yo a swanelegago le yo a beago mohlala bakeng sa go thuša. O swanetše go rwala hlogong ge a ruta klase.—1 Ba-Kor. 11:3-10; 1 Tim. 2:11, 12.

Pukwana ya Apply Yourself to Reading and Writing e hwetšagala ka maleme a mantši. E hlametšwe go ruta bokgoni bja motheo bja go bala le go ngwala. Methopo e mengwe ya tlhahlo le yona e ka dirišwa, go ithekgilwe ka tekanyo ya go kgona go bala ya bao ba ngwadišitšego. Ge barutwana ba dirile tšwelopele ka mo go lekanego, ba swanetše go kgothaletšwa go ba le karolo lenaneong la ka mehla la Sekolo sa Bodiredi sa Pušo ya Modimo.

Bjalo ka molebeledi wa Sekolo sa Bodiredi sa Pušo ya Modimo, o ka dira mo gontši go hola phuthego. Lokišetša gabotse, gomme ka go dumelelana le keletšo e lego go Ba-Roma 12:6-8, swara kabelo ya gago e le boikarabelo bja bohlokwa bjo bo tšwago go Modimo.