Kgaolo ya Seswai
‘Go lwa le Meoya e Kgopo’
1. Ke ka baka la’ng re swanetše go ela hloko modiro wa meoya e kgopo?
BATHO ba bantši ba kwera kgopolo ya gore go na le meoya e kgopo. Eupša ga se taba e segišago. Go sa šetšwe ge e ba batho ba dumela goba go se bjalo, meoya e kgopo e gona gomme e leka go gatelela yo mongwe le yo mongwe. Barapedi ba Jehofa ga ba beelwa ka thoko tabeng ye. Ge e le gabotse ke bona e ba nyakago kudu. Moapostola Paulo o re lemoša ka taba ye ka gore: “Xobane thlabanô ya rena xa se ya xo lwa le madi le nama; re lwa le mebušô le ba matla le balaola-mafase ba lefsifsi; re lwa le meôya ya bobe e lexo sebakeng sa xodimo.” (Ba-Efeso 6:12) Mehleng ya rena, kgateletšo yeo e bakwago ke meoya e kgopo e fihleletše tlhora ya yona e sa kago ya bonwa ka gobane Sathane o rakilwe legodimong gomme o tuka bogale, ka ge a tseba gore nako ya gagwe ke e kopana.—Kutollo 12:12.
2. Go ka kgonega bjang gore re fenye ntweng ya go lwa le meoya e phagametšego motho?
2 Na go a kgonega go fenya ntweng ya go lwa le meoya yeo e phagametšego motho? Ee, se se kgonega feela ka go ithekga ka mo go feletšego ka Jehofa. Re swanetše go mo theetša le go kwa Lentšu la gagwe. Ka go dira bjalo, re ka phema tshenyego e kgolo ya mmele, ya boitshwaro le ya maikwelo yeo e welago bao ba lego ka tlase ga taolo ya Sathane.—Jakobo 4:7.
Balaodi ba Lefase ba Lego Sebakeng sa Godimo
3. Ke bomang bao Sathane a ba ganetšago o šoro, gona bjang?
3 Jehofa o re hlalosetša ka mo go kwagalago maemo a lefase ka ge a a bona a le boemong bja gagwe bjo bo phagamego magodimong. O ile a nea moapostola Johane pono yeo go yona Sathane a bontšhitšwego e le “nôxa e kxolo e khubedu.” O be a ikemišeditše gore ge go kgonega a metše Mmušo wa Modimo wa Mesia kapejana ge o se no tswalwa kua legodimong ka 1914. Sathane o itše go palelwa ke go dira se a thibolla lefula la kganetšo e šoro malebana le baemedi ba lefaseng ba Mmušo woo. (Kutollo 12:3, 4, 13, 17) Sathane o be a tla lwa bjang ntwa ye? Ka baemedi ba gagwe bao e lego batho.
4. Mothopo wa matla a mebušo ya batho ke mang, gomme re tseba bjang seo?
4 Se se latelago, Johane o ile a bontšhwa sebata seo se nago le dihlogo tše šupago le dinaka tše lesome, e lego sebata seo se nago le matla “a xo buša meloko le merafô le maleme le dithšaba tšohle.” Sebata seo se emela tshepedišo ka moka ya dipolitiki tša lefase ka bophara. Johane o ile a tsebišwa gore “nôxa [Sathane Diabolo] ya se fa matla a yôna, le sedulô sa boxoši bya yôna, le boxoši byo boxolo.” (Kutollo 13:1, 2, 7) Ee, Sathane ke mothopo wa matla le taolo tša mebušo ya batho. Ka gona, go etša ge moapostola Paulo a ngwadile, “balaola-mafase” ba kgonthe ke “meôya ya bobe e lexo sebakeng sa xodimo,” yeo e laolago mebušo ya batho. Bohle bao ba ratago go rapela Jehofa ba swanetše go kwešiša ka mo go tletšego se se bolelwago ke seo.—Luka 4:5, 6.
5. Babuši ba dipolitiki ba rapelwa kae mo nakong ye?
5 Gaešita le ge babuši ba bantši ba dipolitiki ba iphora ka gore ke badumedi, ga go le setšhaba setee seo se ikokobeletšago pušo ya Jehofa goba ya Kgoši ya gagwe e beilwego Jesu Kriste. Ka moka ga bona ba lwela o šoro go kgomarela maemong a bona. Go etša ge pego ya Kutollo e bontšha, lehono “meôya ya masathane” e rapa babuši ba lefase go ya “ntweng ya mohla-moxolo wa Modimo Ra-matla-ohle” ka Haramagedone.—Kutollo 16:13, 14, 16; 19:17-19.
6. Ke ka baka la’ng go nyakega šedi e le gore re pheme go radiwa gore re thekge tshepedišo ya Sathane?
6 Letšatši le lengwe le le lengwe, maphelo a batho a kgongwa ke dikgohlano tšeo di lego mabapi le tša dipolitiki, tša leago, tša boiphedišo le tša bodumedi tšeo di aroganyago lapa la batho ka bogare. Dikgohlanong tše, ke mo go tlwaelegilego gore batho ba tšee lehlakore—ka mantšu goba ka ditsela tše dingwe—le ditšhaba, merafo, dihlopha tša maleme goba dihlopha tša leago tšeo ba lego ditho tša tšona. Gaešita le ge batho ba sa akaretšwe ka go lebanya dikgohlanong tše dingwe, gantši ba ikhwetša ba thekga lehlakore le lengwe ka godimo ga le lengwe. Eupša go sa šetšwe gore ke mang goba ke eng seo ba se latelago, ke mang yo ba mo neago thekgo e le ka kgonthe? Beibele e bolela ka go lebanya gore: “Lefase ka moka le rapaletše bobeng.” (1 Johane 5:19) Ka gona, motho a ka phema bjang go arošwa le batho ka moka? Ke feela ka go thekga ka mo go tletšego Mmušo wa Modimo le ka go kgomarela boema-gare bjo bo feletšego ge e le mabapi le dikgohlano tša lefase.—Johane 17:15, 16.
Maano a Bohwirihwiri a yo Mobe
7. Mahlajana a Sathane a ile a bonagatšwa bjang go dirišeng ga gagwe bodumedi bja maaka?
7 Dinakong ka moka tša histori, Sathane o ile a diriša go tlaiša ka mantšu le go tlaiša mmeleng bakeng sa go fapoša batho borapeding bja therešo. O ile a diriša gape le mekgwa e utegilego kudu—ditiro tša boradia le tša bohwirihwiri. Ka mahlajana, o beile karolo e kgolo ya batho lefsifsing ka bodumedi bja maaka, a ba dira gore ba nagane gore ba hlankela Modimo. Ka baka la go hlaelelwa ke tsebo e nepagetšego ya Modimo le lerato la go rata therešo, ba ka gogelwa ke ditirelo tša bodumedi tša sephiri le tše tšeago maikwelo goba ba kgahlišwa ke mediro e matla. (2 Ba-Thesalonika 2:9, 10) Eupša re lemošwa gore gaešita le ka gare ga bao ba kilego ba ba borapeding bja therešo ‘ba bangwe ba tlo hlanoga, ba ya le meoya ya go fora batho, ba ya le dithuto tša meoya e mebe.’ (1 Timotheo 4:1) Seo se ka direga bjang?
8. Sathane a ka re gokeletša bjang bodumeding bja maaka ge e ba re rapela Jehofa?
8 Ka bohwirihwiri, Diabolo o ikhola ka mafokodi a rena. Na re sa dutše re ngaparetšwe ke go boifa batho? Ge e ba go bjalo, re ka ineela kgateletšong e tšwago go metswalo goba baagišani gore re be le karolo mekgweng yeo e thomilego bodumeding bja maaka. Na re a ikgogomoša? Ge e ba go le bjalo, re tla kgopišega ge re eletšwa goba ge ba bangwe ba sa dumelelane le dikgopolo tšeo re di ratago. (Diema 15:10; 29:25; 1 Timotheo 6:3, 4) Go e na le go lokiša pono ya rena gore e dumelelane le mohlala wa Kriste, re ka sekamela ka lehlakoreng la bao ba ‘kwišago ditsebe tša rena bose’ ka go bolela gore go fo bala Beibele le go phela bophelo bjo bobotse go lekane. (2 Timotheo 4:3) Sa bohlokwa go Sathane ga se ge re tlatša bodumedi bjo bongwe goba re kgomarela bodumedi bjo re lego go bjona, eupša ke go re bona re sa rapele Jehofa ka tsela yeo Modimo a e laelago ka Lentšu la gagwe le ka mokgatlo wa gagwe.
9. Sathane o diriša bjang ka boradia dikopano tša botona le botshadi bakeng sa go phetha maikemišetšo a gagwe?
9 Gape Sathane ka boradia o goketša batho go kgotsofatša dikganyogo tše di tlwaelegilego ka tsela e fošagetšego. O dirile se ka kganyogo ya kopano ya botona le botshadi. Ka go gana boitshwaro bja Beibele, ba bantši lefaseng ba lebelela ditswalano tša botona le botshadi magareng ga batho ba sa nyalanago e le boithabišo bjo bo amogelegago goba e le tsela ya go bontšha gore ke batho ba ba godilego. Eupša go thwe’ng ka bao ba nyalanego? Ba bantši ba dira bohlotlolo. Gaešita le ge go e-na le potego lenyalong la bona, batho ba bantši ba tsoma go hlala goba go arogana e le gore ba phele le motho yo mongwe. Mekgwa ya boradia ya Sathane e reretšwe go tutueletša batho go phelela boipshino mo nakong ye, e ba gokeletša go hlokomologa ditla-morago tša nako e telele e sego go bona le go ba bangwe feela, eupša kudu-kudu tswalanong ya bona le Jehofa le Morwa wa gagwe.—1 Ba-Korinthe 6:9, 10; Ba-Galatia 6:7, 8.
10. Sathane o leka ka mekgwa efe gore a senye boemo bja rena bja kgopolo mabapi le boitshwaro bjo bo gobogilego le bošoro?
10 Kganyogo e nngwe ya tlhago ke ya boitapološo. Ge e le bjo bo agago, e ka ba bjo bo lapološago mmeleng, monaganong le maikwelong. Eupša re arabela bjang ge Sathane ka mahlajana a diriša dinako tša boiketlo bakeng sa go leka go fapoša monagano wa rena dilong tša Modimo? Ka mohlala, re tseba gore Jehofa o hloile boitshwaro bjo bo gobogilego bja botona le botshadi le bošoro. Ge difilimi, mananeo a thelebišene goba dipontšho tša sethaleng di bontšha dilo tšeo, na re fo dula ka go kgosela gomme ra tšwela pele re bogetše? Le gona, dula o gopola gore Sathane o tla kgonthišetša gore dilo tše bjalo e ba tšeo di gobogilego kudu ge nako ya go fedišwa ga gagwe e dutše e batamela ka ge “batho ba babe le baaroši, bobe bya bôná bo tlo fêla bò xola bò e-ya, bà fora ba bangwê, le bôná bà forwa.” (2 Timotheo 3:13) Ka gona, re swanetše go tšwela pele re itišitše malebana le maano a Sathane.—Genesi 6:13; Psalme 11:5; Ba-Roma 1:24-32.
11. Ke ka ditsela dife tšeo ka tšona gaešita le motho yo a tsebago therešo mabapi le meoya a ka tanywago ge e ba a sa hlokomele?
11 Gape re tseba gore bao ba tsenelago sebopego le ge e le sefe sa go dirišana le meoya—bodupe, boloi goba go leka go boledišana le bahu—ke makgapa go Jehofa. (Doiteronomio 18:10-12) Ka go dula re gopola seo, re ka se ke ra nagana ka go ikopanya le dinoge, gomme le gatee re ka se ke ra di amogela ka magaeng a rena gore di dire makatika a tšona a botemona. Eupša na re tla di theetša ge di tšwelela dithelebišeneng tša rena goba go Internet? Gaešita le ge le ka mohla re ka se dumele go alafša ke ngaka ya ditaola, na re ka bofa ngwana wa rena yo a sa tšwago go belegwa ka thapo lenakailaneng ka kgopolo ya gore e tla šireletša ngwana kotsing ka tsela e itšego? Ka go tseba gore Beibele e iletša go leka ba bangwe ka boloi, na re tla dumelela moraranyi wa mogopolo a laola megopolo ya rena?—Ba-Galatia 5:19-21.
12. (a) Mmino o dirišwa bjang go re dira gore re nagane ka dilo tšeo re tsebago gore di fošagetše? (b) Ke bjang moaparo wa motho, mokgwa wa go lokiša moriri goba mokgwa wa go bolela, di bontšhago go kgahlišwa ga gagwe ke bao mokgwa wa bona wa bophelo o sa amogelwego ke Jehofa? (c) Ke’ng seo se nyakegago go rena ge e ba re tla phema go tanywa ke maano a Sathane a bohwirihwiri?
12 Beibele e bolela gore bootswa le ditšhila tša mohuta o mongwe le o mongwe (ka maikemišetšo a sa hlwekago) le go bolelwa di se ke tša bolelwa mo go rena. (Ba-Efeso 5:3-5) Eupša go thwe’ng ge e ba dipolelo tše bjalo di sepedišana le mmino wo o nago le molotšana o kgahlišago, morethetho o gogelago goba mošito wo o roropago? Na re tla thoma go bušeletša mantšu a mmino wo o tumišago kopano ya botona le botshadi ka ntle ga lenyalo, go dirišwa ga dihlare-tagi bakeng sa go ithabiša le ditiro tše dingwe tša sebe? Goba le ge re tseba gore ga se ra swanela go ekiša tsela ya bophelo ya batho bao ba nwelelago dilong tše bjalo, na re sekamela go ipapišeng le bona ka go ekiša tsela yeo ba aparago ka yona, mekgwa ya bona ya go lokiša moriri goba tsela ya bona ya go bolela? A mekgwa ya bohwirihwiri gakaakang yeo Sathane a e dirišago bakeng sa go goketša batho gore ba dumelelane le tsela ya gagwe ya go nagana e gobogilego! (2 Ba-Korinthe 4:3, 4) Gore re efoge go tanywa ke mekgwa ya gagwe ya bohwirihwiri, re swanetše go phema go gogolwa gotee le lefase. Re swanetše go dula re gopola bao “balaola-mafase ba lefsifsi” e lego bona gomme re lwantšhane le tutuetšo ya bona ka mafolofolo.—1 Petro 5:8.
Go Hlamelwa go ba Bafenyi
13. Go kgonega bjang gore re fenye lefase leo le bušwago ke Sathane re dutše re e-na le mafokodi?
13 Pele ga lehu la gagwe, Jesu o ile a botša baapostola ba gagwe gore: “Betang dipelo, xobane lefase le fentšwe ke Nna.” (Johane 16:33) Le bona e be e ka ba bafenyi. Mo e ka bago nywaga e 60 ka morago, moapostola Johane o ile a ngwala gore: “Ké mang e a fenyaxo lefase, xe e se e a dumêlaxo xore Jesu ké Yêna Morwa wa Modimo?” (1 Johane 5:5) Tumelo e bjalo e bontšhwa ka go kwa ga rena ditaelo tša Jesu le go ithekga ka Lentšu la Modimo go etša ge Jesu a dirile. Ke eng se sengwe seo se nyakegago? Ke gore re ipoloke re le kgaufsi le phuthego yeo e lego Hlogo ya yona. Ge re dira sebe, re swanetše go itshola go tšwa pelong gomme re tsome tebalelo ya Modimo motheong wa sehlabelo sa Jesu. Ka tsela ye, go sa šetšwe mafokodi a rena le diphošo, le rena re ka ba bafenyi.—Psalme 130:3, 4.
14. Bala Ba-Efeso 6:13-17 gomme o diriše dipotšišo le mangwalo ao a bontšhitšwego serapeng se e le motheo wa go ahla-ahla mohola wa karolo e nngwe le e nngwe ya ditlhamo tša moya.
14 Gore re atlege, re swanetše go itlhama ka “ditlhamo tšohle tša Modimo,” (PK) re se hlokomologe karolo le ge e le efe ya tšona. Hle bula Beibele ya gago go Ba-Efeso 6:13-17 gomme o bale tlhaloso ya yona ka ditlhamo tšeo. Ka gona, ka go araba dipotšišo tše di lego ka mo tlase, nagana kamoo o ka holwago ka gona ke tšhireletšo yeo e newago ke karolo e nngwe le e nngwe ya ditlhamo tše.
“Lè itlemile mathêka ka therešô”
Gaešita le ge re ka ba re tseba therešo, thuto ya ka mehla, go naganišiša ka therešo ya Beibele le go ba gona dibokeng di re šireletša bjang? (1 Ba-Korinthe 10:12, 13; 2 Ba-Korinthe 13:5; Ba-Filipi 4:8, 9)
“Se-phêma-sefêxa sa tokô”
Tekanyetšo ye ya toka ke ya mang? (Kutollo 15:3)
Bontšha kamoo go palelwa ke go latela ditsela tša go loka tša Jehofa go lebanyago motho le kotsi ya moya. (Doiteronomio 7:3, 4; 1 Samuele 15:22, 23)
“Dinaong Le dulê Lè itlemeletše xo phafoxela Ebangedi ya khutšô”
Go diriša maoto a rena go ya go boledišana le batho ka ditokišetšo tša Modimo tša khutšo go re šireletša bjang? (Psalme 73:2, 3; Ba-Roma 10:15; 1 Timotheo 5:13)
“Kôtsê ya tumêlô”
Ge e ba re na le tumelo yeo theilwego motheong o tiilego, re tla itshwara bjang ge re lebane le maiteko ao a reretšwego go re dira gore re belaele goba re boife? (2 Dikxoši 6:15-17; 2 Timotheo 1:12)
“Kêfa ya pholoxô”
Kholofelo ya phologo e thuša motho bjang go phema go tanywa ke go tshwenyega ka mo go feteletšego ka dilo tše di bonagalago? (1 Timotheo 6:7-10, 19)
“Thšoša ya Môya”
Re swanetše go ithekga ka eng ka mehla ge re lwantšha tlhaselo yeo e hlaselago boemo bja rena bja moya goba bja ba bangwe? (Psalme 119:98; Diema 3:5, 6; Mateo 4:3, 4)
Ke eng se sengwe seo se lego bohlokwa bakeng sa go atlega ntweng ya moya? Se swanetše go dirišwa gantši gakaaka’ng? Bakeng sa bomang? (Ba-Efeso 6:18, 19)
15. Re ka gata bjang mogato o tiilego ntweng ya moya?
15 Bjalo ka bahlabani ba Kriste, re karolo ya sekgao se segolo sa madira ao a lego ntweng ya moya. Ge e ba re dula re phafogile gomme re ikhola ka ditlhamo tšeo di tšwago go Modimo, re ka se ke ra gobatšwa ntweng ye. Go e na le moo, re tla ba thušo e matlafatšago go bahlanka-gotee le rena ba Modimo. Re tla ba ba loketšego le ba ikemišeditšego go gata mogato go phatlalatša ditaba tše dibotse tša Mmušo wa Modimo wa Mesia, e lego mmušo wa legodimong woo Sathane a o ganetšago o šoro.
Poledišano ya Tlhahlobo
• Ke ka baka la’ng barapedi ba Jehofa ba kgomarela boema-gare bjo bo feletšego mabapi le dikgohlano tša lefase?
• Mekgwa e mengwe ya bohwirihwiri yeo e dirišwago ke Sathane go senya Bakriste moyeng ke efe?
• Ditlhamo tša moya tšeo di tšwago go Modimo, di re šireletša bjang ntweng ya rena ya moya?
[Diswantšho go letlakala 76]
Ditšhaba di kgobokeletšwa Haramagedone