Kgaolo ya Lesome-tee
‘Tšwelang Pele le Tsoma Mmušo Pele’
1. (a) Ke ka baka la’ng Jesu a ile a opeletša batheetši ba gagwe go tsoma Mmušo pele? (b) Ke potšišo efe yeo re swanetšego go ipotšiša yona?
POLELONG ya gagwe kua Galilea nywageng e fetago 1 900 e fetilego, Jesu o ile a opeletša batheetši ba gagwe gore: “Tšwelang pele le tsoma mmušo pele le toko ya [Modimo].” Eupša ke ka baka la’ng go be go akgofile gakaakaa? Na nako ya gore Kriste a amogele matla a Mmušo e be e se kgole ka nywaga-kgolo e mentši? Ee, eupša Mmušo wa Mesia e be e tla ba mokgwa woo ka wona Jehofa a bego a tla lwela bogoši bja gagwe le go phethagatša morero wa gagwe o mogolo ka lefase. Yo mongwe le yo mongwe yo a kwešišitšego e le ka kgonthe bohlokwa bja dilo tšeo, o tla etiša Mmušo pele bophelong bja gagwe. Ge e ba seo e be e le sa therešo lekgolong la pele la nywaga, ke sa bohlokwa gakaakang lehono ka ge bjale Kriste a hlomilwe e le Kgoši! Ka gona, potšišo ke gore, Na tsela ya-ka ya bophelo e bontšha gore ke tsoma Mmušo wa Modimo pele?—Mateo 6:33, NW.
2. Ke dilo dife tšeo batho ka kakaretšo ba di phegelelago ka phišego?
2 Ge e le gabotse, batho ba dimilione lefaseng ka moka lehono ba tsoma Mmušo pele. Ba bontšha go thekga ga bona pušo ya Mmušo ka go thea maphelo a bona go direng thato ya Jehofa e le bao ba ineetšego go yena. Ka lehlakoreng le lengwe, palo e kgolo kudu ya batho e kgahlegela go tsoma dilo tša lefase. Batho ba phegelela tšhelete, dithoto le maipshino ao tšhelete e ka di rekago. Goba ba ntšha ka ga tšhwene go tšwetšeng pele dithuto tša bona. Tsela ya bona ya bophelo e bontšha go tshwenyega kudu ka bona ka noši, ka dilo tše di bonagalago le ka maipshino. Ba bea Modimo maemong a bobedi, ge e ba ruri ba dumela go yena.—Mateo 6:31, 32.
3. (a) Ke mahumo a mohuta ofe ao Jesu a ilego a kgothaletša barutiwa ba gagwe go a tsoma, gona ka baka la’ng? (b) Ke ka baka la’ng go se bohlokwa go tshwenyega ka mo go feteletšego ka dilo tše di bonagalago?
3 Lega go le bjalo, Jesu o ile a nea barutiwa ba gagwe keletšo ye: “Le se kê la ikxobêlêla mahumô lefaseng,” ka ge go se le se tee sa dilo tše bjalo seo se ka dulago se le gona ka mo go sa felego. O itše: “Mahumô ikxobeleng lexodimong,” ka go hlankela Jehofa. Jesu o opeleditše balatedi ba gagwe go boloka leihlo la bona le “lokile” ka go lebiša tlhokomelo ya bona le matla a bona go direng thato ya Modimo. O ba boditše gore: “Le ka se kxône xo dirêla Modimo, ’me la dirêla le Mamôna.” Eupša go thwe’ng ka dinyakwa tša dilo tše di bonagalago—e lego dijo, diaparo le bodulo? Jesu o eleditše ka gore, ‘le se ke la belaela.’ O ile a lebiša tlhokomelo ya bona dinonyaneng—Modimo o a di fepa. Jesu o ile a kgothaletša balatedi ba gagwe go ithuta matšobeng—Modimo o a a apeša. Na bahlanka ba Jehofa bao ba nago le tlhaologanyo ga se ba bohlokwa go feta selo le ge e le sefe sa tše? Jesu o itše: “Sa pele Le tsomê mmušô wa Modimo le tokô ya wôna; ké mo Le tl’o xo ekeletšwa ka tšeo [tše di nyakegago] ka moka.” (Mateo 6:19-34) Na ditiro tša gago di bontšha gore o dumela seo?
O se ke wa Dumelela Therešo ya Mmušo e Bipša
4. Ge e ba motho a lebiša tlhokomelo e kgolo kudu dilong tše di bonagalago, mafelelo e ka ba afe?
4 Ke mo go swanetšego go tshwenyega ka go ba le dilo tše di lekanego bakeng sa go kgotsofatša dinyakwa tša dilo tše di bonagalago tša gago le tša lapa la gago. Lega go le bjalo, ge e ba motho a tshwenyega ka mo go feteletšego ka dilo tše di bonagalago, mafelelo e ka ba a kotsi. Gaešita le ge a ka ipolela gore o dumela Mmušong, ge e ba ka pelong ya gagwe a etiša dilo tše dingwe pele, therešo ya Mmušo e tla bipša. (Mateo 13:18-22) Ka mohlala, ka nako e nngwe mmuši yo mongwe wa mofsa wa mohumi o ile a botšiša Jesu gore: “Ke tlo dira’ng xore ke ruê bophelô byo bo sa felexo?” O be a phela bophelo bja boitshwaro bjo bobotse gomme a swara batho ba bangwe gabotse, eupša o be a rata dilo tša gagwe tše di bonagalago ka mo go feteletšego. O be a ka se kgone go kgaogana le tšona gore e be molatedi wa Kriste. Ka gona, o ile a tlogela sebaka seo se bego se ka lebiša go beng ga gagwe le Kriste Mmušong wa legodimo. Gona moo Jesu o ile a bolela gore: “E a naxo le mahumô, xe a re ke tsêna mmušong wa Modimo, xa se ka bothata!”—Mareka 10:17-23.
5. (a) Paulo o ile a kgothaletša Timotheo go kgotsofatšwa ke dilo dife, gomme ka baka la’ng? (b) Sathane o diriša bjang ‘go rata tšhelete’ e le moreo o senyago?
5 Nywaga ka morago, moapostola Paulo o ile a ngwalela Timotheo yo ka nako yeo a bego a le Efeso, e lego motse o atlegilego kgwebong. Paulo o ile a mo gopotša gore: “Xobane mola rè e-tla lefaseng, xa ra ka ra tla le selô; le xo tloxa re ka se kxône xo tloxa le selô. Ké xôna, xe re na le dijô le diaparô, a re kxolweng ke tšôna.” Go šomela go itlhokomela goba go hlokomela lapa la gago ka “dijô le diaparô” ke mo go swanetšego. Eupša Paulo o lemošitše ka gore: “Xobane ba ba rataxo xo huma ba wêla melekong le mereong; ba ya le dikxanyoxô tše ntši tša bošilo tše di xobošaxo motho tša mo senya, tša mo tekesetša thsenyexong le tahlexong.” Sathane ke moradia. Mathomong a ka goketša motho ka ditsela tše nyenyane. Se se ka latelwa ke kgateletšo e kgolo, mohlomongwe sebaka sa go hlatlošwa mošomong goba mošomo o kaone wo o lefago kudu eupša e le o nyakago nako yeo mathomong e bego e beetšwe ka thoko bakeng sa dilo tša moya. Ge e ba re sa phafoga, ‘go rata tšhelete’ go ka bipa dikgahlego tše bohlokwa kudu tša Mmušo. Paulo o bea taba ka tsela ye: “Ba bangwê ba xo kêkêla xo tšôna ba aroxile tumêlô ba ikôbêla mehlakô e mentši.”—1 Timotheo 6:7-10.
6. (a) Re swanetše go dira’ng gore re pheme go tanywa ke go phegelela dilo tše di bonagalago? (b) Ke kholofelo efe yeo re ka bago le yona gaešita le ka gare ga maemo a tša boiphedišo a lehono?
6 Ka lerato la kgonthe la go rata ngwanabo wa Mokriste, Paulo o opeleditše Timotheo ka gore: “Thšaba dilô tšeo” gomme o ‘Hlabane tlhabano e botse ya tumelo.’ (1 Timotheo 6:11, 12) Go nyakega maiteko a kgonthe ge e ba re tla phema go gogolwa ke mokgwa wa bophelo wa go phegelela dilo tše di bonagalago wa lefase leo le re dikologilego. Eupša ge e ba re katana ka go dumelelana le tumelo ya rena, Jehofa a ka se ke a re lahla le ka mohla. O tla kgonthišetša gore re na le seo re se nyakago e le ka kgonthe go sa šetšwe go hlatloga ga ditheko le go hloka mošomo mo go apareditšego. Paulo o ngwadile gore: “Menaxanô a e se bê ya mexabaru. Le bê ba ba kxodilwexo ke tše di lexo xôna. Yêna [Modimo] ó boletše a re: Nka se kê ka Xo lahla; nka se kê ka Xo tloxêla. Bo-ka le rena re bolêlaxo rè holofetše ra re: Morêna ké Molwedi wa-ka: xa ke boife selô; batho ba ka ntira’ng?” (Ba-Hebere 13:5, 6) Kgoši Dafida o ngwadile gore: “Ke be ke le lesoxana, ka bá ka tšofala kè sešo ka bôna moloki à lahlilwe, le bana ba xaxwe bà diila.”—Psalme 37:25.
Barutiwa ba Pele ba Nea Mohlala
7. Ke ditaelo dife mabapi le boboledi tšeo Jesu a ilego a di nea barutiwa ba gagwe, gomme ke ka baka la’ng e be e le tše swanetšego?
7 Ka morago ga gore Jesu a nee baapostola ba gagwe tlwaetšo e swanetšego, o ile a ba roma Isiraeleng go ya go bolela ditaba tše dibotse le go tsebatša gore: “Mmušô wa maxodimo o batametše.” E be e le molaetša o kgahlišago gakaakang! Jesu Kriste Kgoši yeo e lego Mesia o be a le gare ga bona. Ka ge baapostola ba be ba ineetše tirelong ya Modimo, Jesu o ile a ba opeletša gore ba holofele gore Modimo o be a tla ba hlokomela. Ka gona o itše: “Le se yê Lè rwele morwalô, Le se swarê lehlôtlô le xe e le mokotla, le xe e le mefaxô, le xe e le thšêlêtê; Le se kê la ba le dikobô tse pedi. Lapa leo Le tsênaxo xo lôna Le dulê xo lôna, Le bê Le wêlê tsela.” (Mateo 10:5-10; Luka 9:1-6) Jehofa o be a tla kgonthišetša gore dinyakwa tša bona di be di tla kgotsofatšwa ke ba-Isiraele-gotee le bona, bao go bona go amogela baeng e bego e le mokgwa.
8. (a) Ke ka baka la’ng Jesu a ile a nea ditaelo tše difsa mabapi le boboledi pejana ga lehu la gagwe? (b) Ke eng seo se bego se sa dutše se swanetše go tla pele maphelong a balatedi ba Jesu?
8 Ka morago, pejana ga lehu la gagwe, Jesu o ile a phafošetša baapostola ba gagwe therešo ya gore nakong e tlago ba be ba tla ba ba šoma ka tlase ga maemo a fetogilego. Ka baka la go ganetša ga balaodi modiro wa bona, ba be ba ka se sa amogelwa ka diatla tše pedi Isiraeleng. Le gona, kgaufsinyane ba be ba tla iša molaetša wa Mmušo dinageng tša ba-Ntle. Bjale ba be ba swanetše go tloga le “sekhwama” le “mefaxô.” Lega go le bjalo, ba be ba swanetše go tšwela pele ba tsoma Mmušo wa Jehofa le go loka ga gagwe pele, ba holofetše gore Modimo o tla šegofatša maiteko a bona a go hwetša dijo le diaparo tšeo di nyakegago.—Luka 22:35-37.
9. Moapostola Paulo o ile a etiša bjang Mmušo pele bophelong bja gagwe mola a dutše a hlokometše dinyakwa tša gagwe tša nama, gomme ke keletšo efe yeo a ilego a e nea tabeng ye?
9 Moapostola Paulo e bile mohlala o mobotse wa motho yo a ilego a diriša keletšo ya Jesu. Paulo o ile a thea bophelo bja gagwe bodireding. (Ditiro 20:24, 25) Ge a be a e-ya lefelong le itšego go yo dira boboledi, o be a hlokomela dinyakwa tša gagwe tša dilo tše di bonagalago, a bile a šoma go dira ditente. O be a se a lebelela gore ba bangwe ba mo hlokomele. (Ditiro 18:1-4; 1 Ba-Thesalonika 2:9) Lega go le bjalo, o be a thaba ge a be a amogelwa e bile a newa dimpho ke ba bangwe bao ba bego ba bontšha lerato la bona ka tsela yeo. (Ditiro 16:15, 34; Ba-Filipi 4:15-17) Paulo o ile a kgothaletša Bakriste gore ba se hlokomologe boikarabelo bja bona bja lapa e le gore ba dire boboledi, go e-na le moo ba be ba swanetše go leka-lekanya boikarabelo bja bona bjo bo fapa-fapanego. O ile a ba eletša gore ba šome, ba rate malapa a bona le go abelana le ba bangwe. (Ba-Efeso 4:28; 2 Ba-Thesalonika 3:7-12) O ile a ba opeletša gore ba holofele Modimo e sego mahumo a dilo tše di bonagalago, le go diriša maphelo a bona ka tsela yeo e bontšhago gore ka kgonthe ba kwešiša seo dilo tša bohlokwa e lego sona. Ka go dumelelana le dithuto tša Jesu, seo se be se bolela go tsoma Mmušo wa Modimo le go loka ga gagwe pele.—Ba-Filipi 1:9-11.
Etiša Mmušo Pele Bophelong bja Gago
10. Ke eng seo se bolelwago ke go tsoma Mmušo pele?
10 Rena ka noši re abelana le ba bangwe ditaba tše dibotse tša Mmušo ka tekanyo e kaaka’ng? Ka boripana, seo se ithekgile ka maemo a rena le ka bogolo bja tebogo ya rena. Gopola gore Jesu ga se a re, ‘Tsomang Mmušo ge le se na seo le ka se dirago.’ Ka go tseba bohlokwa bja Mmušo, o ile a hlalosa thato ya Tatagwe ka gore: “Sa lena e bê xo tsoma mmušô wa Modimo.” (Luka 12:31) Gaešita le ge bontši bja rena re swanelwa ke go šoma gore re hlokomele dinyakwa tša rena le tša malapa a rena, ge e ba re e-na le tumelo, maphelo a rena a tla dikologa modirong wa Mmušo woo Modimo a re filego wona. Ka nako e swanago, re tla hlokomela boikarabelo bja malapa a rena.—1 Timotheo 5:8.
11. (a) Jesu o bontšhitše bjang gore ga se bohle bao ba tlago go kgona go dira ka tekanyo e swanago go phatlalatšeng molaetša wa Mmušo? (b) Ke mabaka afe ao a kgomago bogolo bja seo motho a ka se dirago?
11 Ba bangwe ba rena re kgona go gafa nako e oketšegilego go feta ba bangwe go boleleng ditaba tše dibotse tša Mmušo. Eupša seswantšhong sa gagwe sa mabapi le mehuta e fapa-fapanego ya mobu, Jesu o bontšhitše gore bohle bao dipelo tša bona di swanago le mobu o mobotse ba tla enya dienywa. Ka tekanyo e kaaka’ng? Maemo a batho a a fapana. Botšofadi, boemo bja tša maphelo le boikarabelo bja lapa, ka moka ke mabaka a mangwe a tlaleletšago go se. Eupša ge e ba go bontšhwa tebogo ya kgonthe, go ka phethwa mo gontši.—Mateo 13:23.
12. Ke pakane efe e agago ya moya yeo bafsa ba kgothaletšwago kudu go naganišiša ka yona?
12 Ke mo gobotse go ba le dipakane tšeo di tlago go re thuša go katološa go ba ga rena le karolo bodireding bja Mmušo. Bafsa ba swanetše go naganišiša kudu ka mohlala o phalago yohle wa mofsa yo a fišegago wa Mokriste e lego Timotheo. (Ba-Filipi 2:19-22) Ke eng seo e ka bago se sekaone go bona go feta go tsenela bodiredi bja nako e tletšego ge ba feditše dithutong tša bona tša sekolo? Ba ba godilego le bona ba tla holwa ke go ipeela dipakane tše agago tša moya.
13. (a) Ke mang yo a dirago phetho mabapi seo re kgonago go se dira tirelong ya Mmušo? (b) Ke eng seo re se hlatselago ge e ba re tsoma Mmušo pele e le ka kgonthe?
13 Go e na le go ntšha diphošo bao re ikwago gore ba ka dira mo go oketšegilego, re swanetše go tutuetšwa ke tumelo go šomela go kaonefatša e le gore re ka hlankela Modimo ka tekanyo e tletšego yeo ka yona maemo a rena ka noši a re dumelelago. (Ba-Roma 14:10-12; Ba-Galatia 6:4, 5) Go etša ge go bontšhitšwe tabeng ya Jobo, Sathane o phega kgang ka gore seo re se kgahlegelago kudu ke dilo tša rena tše di bonagalago, manobonobo a rena, boiketlo bja rena ka noši le gore boikemišetšo bja rena bja go hlankela Modimo ke bja boithati. Eupša ge e ba re tsoma Mmušo pele e le ka kgonthe, re tsenya letsogo tabeng ya go bontšha Diabolo e le moaketši yo šoro yo a lego yena. Re nea bohlatse bja gore seo se tlago pele maphelong a rena ke tirelo ya Modimo. Ka gona, ka mantšu le ka mediro re bontšha go rata ga rena Jehofa ka mo go tseneletšego, go thekga ga rena ka potego bogoši bja gagwe le go rata ga rena magagabo rena.—Jobo 1:9-11; 2:4, 5; Diema 27:11.
14. (a) Ke ka baka la’ng go ba le thulaganyo ya bodiredi bja tšhemo e le mo go holago? (b) Dihlatse tše dintši di ba le karolo bodireding bja tšhemo ka tekanyo e kaaka’ng?
14 Thulaganyo e ka re thuša go phetha mo go oketšegilego go feta seo re bego re ka kgona go se dira. Jehofa ka boyena o “bea lebaka” bakeng sa go phetha morero wa gagwe. (Ekisodo 9:5; Mareka 1:15) Ge e ba go kgonega, ke mo gobotse go tšea karolo bodireding bja tšhemo lebakeng letee le beilwego goba go feta moo bekeng e nngwe le e nngwe. Dihlatse tša Jehofa tše dikete tše makgolo go dikologa lefase di ingwadišitše e le babulamadibogo ba go thuša, di fetša mo e ka bago diiri tše pedi ka letšatši di bolela ditaba tše dibotse. Tše dingwe tše dikete tše makgolo di hlankela e le babulamadibogo ba ka mehla, di diriša mo e nyakilego go ba diiri tše pedi le seripa ka letšatši di bolela molaetša wa Mmušo. Babulamadibogo ba kgethegilego le baromiwa ba fetša nako e fetago yeo tirelong ya Mmušo. Re bile re ka tsoma dibaka tša go abelana kholofelo ya Mmušo ka mo go sa rulaganyetšwago le yo mongwe le yo mongwe yo a tlago go theetša. (Johane 4:7-15) Kganyogo ya rena e swanetše gore e be go ba le karolo e tletšego modirong woo kamoo maemo a rena a dumelago ka gona, ka gobane Jesu o boletše e sa le pele gore: “Ditaba tše tše dibotse tša mmušo di tla bolelwa lefaseng ka moka leo go agilwego go lona gore e be bohlatse go ditšhaba ka moka; gomme e tla ba gona bofelo bo fihlago.”—Mateo 24:14, NW; Ba-Efeso 5:15-17.
15. Mabapi le bodiredi bja rena, ke ka baka la’ng o nagana gore keletšo e lego go 1 Ba-Korinthe 15:58 ke yeo e lego nakong?
15 Dihlatse tša Jehofa di ba le karolo tokelong ye ya tirelo ka botee dikarolong ka moka tša lefase go sa šetšwe setšhaba seo di phelago go sona. Di diriša keletšo ya Beibele yeo e buduletšwego e rego: “Tiang matla, Le se kê la têkêma, Le tiêlêlê modirong wa Morêna mo xo fêla, Lè tseba xore xo itapiša xa lena xa se xa lefêla Moreneng.”—1 Ba-Korinthe 15:58.
Poledišano ya Tlhahlobo
• Ge Jesu a be a bolela gore ‘tšwelang pele le tsoma Mmušo pele,’ o be a bontšha gore ke eng seo se swanetšego go bewa maemong a bobedi?
• Ke pono efe yeo re swanetšego go ba le yona mabapi le go hlokomela dinyakwa tša rena tša nama le tša malapa a rena? Ke thušo efe yeo Modimo a tlago go re nea yona?
• Re ka ba le karolo dibopegong dife tša tirelo ya Mmušo?
[Seswantšho go letlakala 107]
Dihlatse tša Jehofa lehono di bolela ditaba tše dibotse dinageng ka moka pele bofelo bo fihla