Kgaolo ya Lesome-nne

Jehofa o Hlahla Bjang Mokgatlo wa Gagwe?

1. Ke tsebišo efe mabapi le mokgatlo wa Jehofa yeo Beibele e e utollago, gomme ke ka baka la’ng e le ya bohlokwa go rena?

NA Modimo o na le mokgatlo? Mangwalo a buduletšwego a re botša gore o na le wona. Ka Lentšung la gagwe o re nea tlhasenyana ya karolo e makatšago ya legodimong ya mokgatlo woo. (Hesekiele 1:1, 4-14; Daniele 7:9, 10, 13, 14) Gaešita le ge re ka se kgone go bona karolo ye yeo e sa bonagalego, eupša e kgoma kudu barapedi ba therešo lehono. (2 Dikxoši 6:15-17) Mokgatlo wa Jehofa o bile o na le karolo e bonagalago lefaseng. Beibele e re thuša go kwešiša gore ke ofe le kamoo Jehofa a o hlahlago ka gona.

Go Hlaola Karolo e Bonagalago

2. Ke phuthego efe e mpsha yeo Modimo a ilego a e bopa?

² Setšhaba sa Isiraele e bile phuthego ya Modimo ka nywaga e 1 545. (Ditiro 7:38) Eupša Isiraele e ile ya palelwa ke go boloka melao ya Modimo gomme ya latola Morwa wa gagwe. Ka baka leo, Jehofa o ile a lahla phuthego yeo gomme a e tlogela. Jesu o boditše ba-Juda gore: “Le tlo di bôna; ngwakô wa lena o tlo Le tloxêlêlwa è le lešope.” (Mateo 23:38) Ka gona, Modimo o ile a bopa phuthego e mpsha yeo a ilego a dira kgwerano e mpsha le yona. Phuthego ye e be e tla bopša ke batho ba 144 000 bao ba kgethilwego ke Modimo gore ba be gotee le Morwa wa gagwe legodimong.—Kutollo 14:1-4.

3. Ke eng seo se ilego sa direga ka Pentekoste ya 33 C.E. e le bohlatse bjo bo bonalago gabotse bja gore bjale Modimo o be a diriša phuthego e mpsha?

³ Ba mathomo ba phuthego yeo e mpsha ba ile ba tlotšwa ka moya wa Jehofa o mokgethwa ka Pentekoste ya 33 C.E. Mabapi le tiragalo yeo e kgethegilego re bala gore: “Xe letšatši la Pentekoste le fihlile, ba be ba le mmôxô ka moka bà le pelo-tee. Ba thšoxa xò kwala modumô o tšwaxo lexodimong, e ke ké wa ledimo le matla le le tšutlaxo, wa tlala ngwakô ka moka wo ba dutšexo xo wôna. Ba bôna xò hlahlamoloxa maleme a kaxo dikxabo tša mollô; a tla a dula xodimo xa e mongwê le e mongwê wa bôná. Ka moka ba tlala Môya-mokxêthwa.” (Ditiro 2:1-4) Ka gona, moya wa Modimo o ile wa nea bohlatse bjo bo bonalago gabotse bja gore se bjale e be e le sehlopha sa batho bao Modimo a bego a tla ba diriša go phetha morero wa gagwe ka tlase ga tlhahlo ya Jesu Kriste a le legodimong.

4. Ke bomang bao lehono ba bopago mokgatlo wa Jehofa o bonagalago?

⁴ Lehono ke feela mašaledi a ba 144 000 ao a lego lefaseng. Eupša e le go phethagatša boporofeta bja Beibele, ba dimilione ba “lešaba le lexolo” la “dinku tše dingwê” ba tlišitšwe tswalanong le mašaledi a tloditšwego. Jesu Modiši yo Bolo o kopantše dinku tše tše dingwe le mašaledi e le gore ba bope mohlape o tee feela ka tlase ga gagwe e le Modiši wa bona o tee. (Kutollo 7:9; Johane 10:11, 16) Ba ka moka ba bopa phuthego e kopanego e lego mokgatlo wa Jehofa o bonagalago.

Mokgatlo wa Pušo ya Modimo

5. Ke mang yo a hlahlago mokgatlo wa Modimo, gomme bjang?

⁵ Polelo ya Mangwalo e rego “phuthexong ya Modimo e a phelaxo” e dira gore go be molaleng gore ke mang yo a o hlahlago. Mokgatlo wo ke wa pušo ya Modimo. Jehofa o nea batho ba gagwe tlhahlo ka Jesu, e lego yo A mo kgethilego gore e be Hlogo e sa bonagalego ya phuthego le ka Lentšu la Gagwe le le buduletšwego, Beibele.— 1 Timotheo 3:14, 15; Ba-Efeso 1:22, 23; 2 Timotheo 3:16, 17.

6. (a) Tlhahlo ya legodimong ya phuthego e ile ya bonagala bjang lekgolong la pele la nywaga? (b) Ke eng seo se bontšhago gore Jesu e sa dutše e le Hlogo ya phuthego?

⁶ Tlhahlo e bjalo e ile ya bonala gabotse kudu ka Pentekoste. (Ditiro 2:14-18, 32, 33) E ile ya bonagala ge morongwa wa Jehofa a be a nea tlhahlo ya go phatlalatšwa ga ditaba tše dibotse Afrika, ge lentšu la Jesu le be le nea tlhahlo nakong ya ge Saulo wa Tareso a be a sokologa le nakong ya ge Petro a be a thoma modiro wa boboledi go ba-Ntle. (Ditiro 8:26, 27; 9:3-7; 10:9-16, 19-22) Eupša ge nako e dutše e e-ya, ga go mantšu ao a ilego a hlwa a sa kwewa go tšwa legodimong, ga go barongwa bao ba ilego ba hlwa ba sa bonwa, ga go dimpho tša mohlolo tša moya tšeo di ilego tša hlwa di sa newa. Lega go le bjalo, Jesu o be a holofeditše gore: “Tsebang, ke na le lena ka mehla xo fihla bofelong bya lefase.” (Mateo 28:20; 1 Ba-Korinthe 13:8) Lehono Dihlatse tša Jehofa di amogela tlhahlo ya Jesu. Ka ntle le yona, go tsebatša molaetša wa Mmušo re lebeletšane le bonaba bjo bošoro go be go ka se kgonege.

7. (a) Ke bomang bao ba bopago “molaki e a bôtêxaxo yo bohlale,” gomme ka baka la’ng? (b) Ke kabelo efe yeo e neilwego “molaki”?

⁷ Pejana ga lehu la gagwe, Jesu o ile a botša barutiwa ba gagwe mabapi le “molaki e a bôtêxaxo yo bohlale” yo yena e le Mong wa gagwe a bego a tla mo gafela boikarabelo bjo bo kgethegilego. “Molaki” yoo o be a tla be a le gona ge Morena a rotogela legodimong, le gona o be a tla be a sa dutše a šoma ka thata ge Kriste a boa a sa bonagale a le matleng a Mmušo. Tlhaloso e bjalo le gatee e be e ka se swanele motho o tee, eupša e swanela phuthego ya batlotšwa ya Kriste. Ka ge a e rekile ka madi a gagwe, Jesu o bolela ka yona e le “molaki” wa gagwe. O romile ditho tša gagwe go dira barutiwa le go ba fepa ka mo go tšwelago pele, gomme a ba nea “dijô [tša moya] ka lebaka la xôna.”— Mateo 24:45-47; 28:19; Jesaya 43:10; Luka 12:42; 1 Petro 4:10.

8. (a) Ke boikarabelo bofe bjoo sehlopha sa molaki se nago le bjona mo nakong ye? (b) Ke ka baka la’ng go arabela ga rena tlhahlong yeo e newago ka mokero wa Modimo go le bohlokwa?

⁸ Ka ge sehlopha sa molaki se be se dutše se dira modiro wa Mong wa sona ka go botega nakong ya go boa ga gagwe mo go sa bonalego ka 1914, go na le bohlatse bja gore se ile sa gafelwa boikarabelo bjo bo oketšegilego ka 1919. Nywageng ya ga e sa le go tloga moo e bile nako ya go nea bohlatse ka Mmušo lefaseng ka bophara, gomme lešaba le legolo la barapedi ba Jehofa le kgobokeletšwa go phološwa masetla-pelong a magolo. (Mateo 24:14, 21, 22; Kutollo 7:9, 10) Ba le bona ba nyaka dijo tša moya, gomme ba di solelwa ke sehlopha sa molaki. Ka gona, gore re thabiše Jehofa re swanetše go amogela tlhahlo yeo a e neago ka mokero wo le go dira ka go dumelelana le yona.

9, 10. (a) Lekgolong la pele la nywaga go be go e-na le thulaganyo efe ya go rarolla dikgang tša mabapi le thuto le go nea tlhahlo ka boboledi bja ditaba tše dibotse? (b) Lehono go na le thulaganyo efe bakeng sa go lomaganya mediro ya batho ba Jehofa?

⁹ Ka dinako tše dingwe go rotoga dipotšišo mabapi le dithuto tša tumelo le tsela ya go dira dilo. Go dirwa’ng? Ditiro kgaolo 15 e re botša kamoo kgang ya mabapi le basokologi ba ba-Ntle e ilego ya rarollwa ka gona. Taba e ile ya išwa go baapostola le banna ba bagolo kua Jerusalema bao ba bego ba dira e le sehlopha se bušago sa motheo. Banna ba e be e se bao ba sa fošego, eupša Modimo o ile a ba diriša. Ba ile ba ahla-ahla mangwalo ao a lego mabapi le taba gotee le bohlatse bja go šoma ga moya wa Modimo tabeng ya go bula tšhemo ya ba-Ntle. Ba ile ba dira phetho. Modimo o ile a šegofatša thulaganyo yeo. (Ditiro 15:1-29; 16:4, 5) Go tšwa sehlopheng seo sa motheo, batho ba ile ba rongwa gore ba yo tšwetša pele boboledi bja Mmušo.

¹⁰ Mehleng ya rena, Sehlopha se Bušago sa mokgatlo wa Jehofa o bonagalago se bopša ke bana babo rena bao ba tloditšwego ka moya ba ba tšwago dinageng tše di fapa-fapanego gomme se dula ntlong-kgolo ya lefase ya Dihlatse tša Jehofa. Ka tlase ga Bohlogo bja Jesu Kriste, Sehlopha se Bušago se tšwetša pele borapedi bjo bo sekilego nageng e nngwe le e nngwe, sa lomaganya mediro ya boboledi ya Dihlatse tša Jehofa tšeo di lego diphuthegong tša tšona tše masome a dikete. Ba Sehlopha se Bušago ba na le pono e swanago le ya moapostola Paulo yo a ngwaletšego Bakriste-gotee le yena gore: “Xa se xo re re babuši ba tumêlô; ké xo re re badiriši ba lethabô la lena, xobane Le eme tumelong.”— 2 Ba-Korinthe 1:24.

11. (a) Bagolo le bahlanka ba bodiredi ba kgethwa bjang? (b) Ke ka baka la’ng re swanetše go dirišana kgaufsi le bao ba kgethilwego?

¹¹ Dihlatse tša Jehofa lefaseng ka bophara di lebelela go Sehlopha se Bušago gore se kgethe bana babo rena ba ba swanelegago bao le bona ba newago matla a go kgetha bagolo le bahlanka ba bodiredi bakeng sa go hlokomela diphuthego. Ditshwanelego tša bao ba kgethwago di bolelwa ka Beibeleng, le gona di ela hloko gore banna bao ga se ba phethagala gomme ba dira diphošo. Bagolo bao ba bolelelago ba bangwe gotee le bao ba ba kgethago ba na le boikarabelo bjo boima pele ga Modimo. (1 Timotheo 3:1-10, 12, 13; Tito 1:5-9) Ka gona, ba rapelela thušo ya moya wa Modimo le go tsoma tlhahlo ka Lentšung la gagwe le le buduletšwego. (Ditiro 6:2-4, 6; 14:23) Anke re bontšheng tebogo ya go leboga “dimpho tšeo e lego banna” bao ba re thušago ka moka ga rena gore re fihlelele “botee tumelong.”— Ba-Efeso 4:8, 11-16, NW.

12. Jehofa o diriša bjang basadi thulaganyong ya pušo ya Modimo?

¹² Mangwalo a laela gore boemo bja bolebeledi ka phuthegong bo hlokomelwe ke banna. Se ga se nyenyefatše basadi ka gobane ba bangwe ba bona ke baja-bohwa ba Mmušo wa legodimo, gomme bogolo bja modiro wa boboledi o dirwa ke bona. (Psalme 68:11) Le gona, basadi ka go hlokomela boikarabelo bja malapa a bona ka potego ba tlaleletša botumong bjo bobotse bja phuthego. (Tito 2:3-5) Eupša go ruta ka phuthegong go dirwa ke banna bao ba kgethetšwego seo.—1 Timotheo 2:12, 13.

13. (a) Beibele e opeletša bagolo go ba le pono efe ka boemo bja bona? (b) Ke tokelo efe yeo ka moka ga rena re nago le yona?

¹³ Batho bao ba swerego maemo a godimo lefaseng ba lebelelwa e le ba bohlokwa, eupša mokgatlong wa Modimo molao ke wa gore: “E a lexo e monyenyane mo xo lena bohle, ké yêna a tl’o xo ba e moxolo.” (Luka 9:46-48; 22:24-26) Mangwalo a eletša bagolo gore ba itote gore ba se buše bao e lego bohwa bja Modimo, eupša go e-na le moo ba be mehlala go mohlape. (1 Petro 5:2, 3) Dihlatse tša Jehofa ka moka tša banna le tša basadi, e sego tše sego kae feela tše kgethilwego, di na le tokelo ya go emela Mmuši wa legohle di bolela ka leina la gagwe ka boikokobetšo le go botša batho kae le kae ka Mmušo wa gagwe.

14. Ahla-ahla dipotšišo tše di lokeleditšwego mafelelong a serapa se o diriša mangwalo a bontšhitšwego.

¹⁴ Re dira gabotse ge re ipotšiša gore: ‘Na ke tloga ke kwešiša e le ka kgonthe kamoo Jehofa a hlahlago mokgatlo wa gagwe o bonagalago ka gona? Na boemo bja-ka bja kgopolo, polelo le ditiro di bontšha seo?’ Go naganišiša ka dintlha tše di latelago go ka thuša yo mongwe le yo mongwe wa rena go dira boitlhahlobo bjo bo bjalo.

Ge e ba ruri ke ikokobeletša Kriste e le Hlogo ya phuthego bjalo ka ge go bontšhitšwe mangwalong a latelago, gona ke eng seo ke tla swanelago ke go ba ke se dira? (Mateo 24:14; 28:19, 20; Johane 13:34, 35)

Ge ke amogela ka tebogo ditokišetšo tša moya tšeo di tlago ka sehlopha sa molaki le Sehlopha se Bušago sa gagwe, na ke bontšha tlhompho go mang? (Luka 10:16)

Na bohle ka phuthegong, kudu-kudu bagolo ba swanetše go swarana bjang? (Ba-Roma 12:10)

15. (a) Ke eng seo re se bontšhago ka boemo bja rena bja kgopolo mabapi le mokgatlo wa Jehofa o bonagalago? (b) Ke dibaka dife tšeo re nago le tšona tša go bontšha Diabolo e le moaketši le go thabiša pelo ya Jehofa?

¹⁵ Jehofa lehono o re hlahla ka mokgatlo wa gagwe o bonagalago ka tlase ga Kriste. Boemo bja rena bja kgopolo ka thulaganyo ye bo bontšha kamoo re ikwago ka gona mabapi le kgang ya bogoši. (Ba-Hebere 13:17) Sathane o phega kgang ka gore seo re tshwenyegago kudu ka sona ke rena ka noši. Eupša ge e ba re hlankela ka tsela le ge e le efe yeo e swanetšego gomme re phema dilo tšeo di lebišago tlhokomelo e sa swanelago go rena, re bontšha Diabolo e le moaketši. Ge e ba re rata le go hlompha bao ba re etelelago pele, eupša re gana ‘go reta motho gore re hwetše tše di re holago,’ re thabiša Jehofa. (Juda 16; Ba-Hebere 13:7) Ka go botegela mokgatlo wa Jehofa, re bontšha gore Jehofa ke Modimo wa rena le gore re batee borapeding bja gagwe.— 1 Ba-Korinthe 15:58.

Poledišano ya Tlhahlobo

• Mokgatlo wa Jehofa o bonagalago ke ofe lehono? Morero wa wona ke ofe?

• Hlogo e kgethilwego ya phuthego ke mang, gomme e re nea tlhahlo e lerato ka dithulaganyo dife tše bonagalago?

• Ke boemo bofe bjo bo agago bja kgopolo bjo re swanetšego go bo hlagolela ka bao ba lego ka mokgatlong wa Jehofa?

[Diswantšho go letlakala 133]

Jehofa o re hlahla ka mokgatlo wa gagwe o bonagalago ka tlase ga Kriste