Lengwalo le le Tšwago go Modimo yo Lerato

ANKE o mpotše, ke puku efe yeo o e ratago go di feta ka moka?— Bana ba bangwe ba ka kgetha yeo e bolelago ka diphoofolo. Ba bangwe ba ka kgetha puku yeo e nago le diswantšho tše dintši ka gare ga yona. E ka ba mo go thabišago go bala dipuku tšeo.

Eupša dipuku tšeo di phalago tše dingwe ka moka lefaseng ke tšeo di re botšago therešo ka Modimo. E nngwe ya dipuku tšeo ke ya bohlokwa kudu go feta tše dingwe ka moka. Na o tseba gore ke puku efe yeo?— Ke Beibele.

Ke ka baka la’ng Beibele e le ya bohlokwa gakaakaa?— Ke ka gobane e tšwa go Modimo. E re botša ka yena le ka dilo tše dibotse tšeo a tlago go re direla tšona. Le gona e re bontšha seo re swanetšego go se dira gore re mo kgahliše. E swana le lengwalo le le tšwago go Modimo.

Go ba gona, Modimo a ka be a ile a ngwala Beibele ka moka ga yona legodimong gomme ka morago a e nea batho. Eupša ga se a ka a dira seo. Gaešita le ge dikgopolo di be di e-tšwa go Modimo, fela o ile a diriša bahlanka ba gagwe lefaseng go dira modiro ka moka wa go ngwala Beibele.

Modimo o ile a dira bjang seo?— Gore o kwešiše kamoo a dirilego se ka gona, nagana ka se. Ge re e-kwa lentšu la motho yo mongwe radiong, lentšu le ka ba le e-tšwa mothong yo a lego kgole kudu. Ge re bogetše thelebišene, re ka kgona go bona le ka diswantšho tša batho ba dinageng tše dingwe tša lefase le go kwa seo ba se bolelago.

Le gona, batho ba kgona go fihla kgole-kgole kua kgweding ka difofa-sebakeng tša bona e bile ba ka romela melaetša lefaseng ba le gona moo. Na o be o tseba seo?— Ge e ba batho ba kgona go dira seo, na Modimo a ka kgona go romela melaetša a le legodimong?— Ee, a ka kgona! Le gona o dirile bjalo kgale pele ga ge batho ba ka ba le radio goba thelebišene.

Moše ke motho yoo a ilego a kwa ka go lebanya ge Modimo a bolela. Moše o be a sa kgone go bona Modimo, eupša o be a kgona go kwa lentšu la Modimo. Batho ba dimilione ba be ba le gona moo ge se se be se direga. Ge e le gabotse ka lona letšatši leo, Modimo o ile a dira gore thaba ka moka e šišinyege, gomme go be go e-na le medumo le magadima. Batho ba be ba tseba gore Modimo o boletše, eupša ba be ba tšhogile kudu. Ka gona ba ile ba botša Moše gore: ‘A Modimo a se ke a bolela le rena gore re se hwe.’ Ka morago, Moše o ile a ngwala dilo tšeo Modimo a bego a di boletše. Gomme seo Moše a se ngwadilego se ka Beibeleng.—Ekisodo 20:18-21.

Moše o ngwadile dipuku tše hlano tša mathomo tša Beibele. Eupša e be e se yena a nnoši yo a ilego a ngwala. Modimo o ile a diriša banna ba ka bago 40 go ngwala dikarolo tša Beibele. Banna ba ba phetše kgale-kgale, gomme go tšere nywaga e mentši gore Beibele e fetšwe. Ee, go tšere lebaka la nywaga e ka bago e 1 600! Seo se makatšago ke gore gaešita le ge ba bangwe ba banna ba ba sa ka ba kopana, sohle seo ba se ngwadilego se dumelelana ka mo go feletšego.

Banna ba bangwe bao ba ilego ba dirišwa ke Modimo bakeng sa go ngwala Beibele e be e le ba tumilego. Gaešita le ge Moše e be e le modiši, o ile a ba moetapele wa setšhaba sa Isiraele. Salomo e be e le kgoši yeo e bego e le motho yo bohlale le yo a humilego kudu lefaseng. Eupša bangwadi ba bangwe e be e se ba tumilego kudu. Amose e be e le mohlokomedi wa dihlare tša mogo.

Go tlaleletša moo, yo mongwe wa bangwadi ba Beibele e be e le ngaka. Na o tseba leina la gagwe?— E be e le Luka. Mongwadi yo mongwe o be a kile a ba molekgetho. Leina la gagwe e be e le Mateo. Yo mongwe gape e be e kile ya ba ramolao, setsebi sa molao wa bodumedi wa Sejuda. O ngwadile dipuku tše dintši tša Beibele go feta motho le ge e le ofe yo mongwe. Na o tseba leina la gagwe?— E be e le Paulo. Le gona, barutiwa ba Jesu e lego Petro le Johane bao le bona e bego e le bangwadi ba Beibele, e be e kile ya ba barei ba dihlapi.

Bontši bja bangwadi ba ba Beibele ba ngwadile ka dilo tšeo Modimo a tlogo di dira nakong e tlago. Ba be ba tseba bjang dilo tšeo gaešita le pele ga ge di ka direga?— Modimo o be a neile banna bao tsebišo. O be a ba boditše seo se bego se tla direga.

Nakong ya ge Jesu, Morutiši yo Mogolo a be a le lefaseng, karolo e kgolo ya Beibele e be e šetše e ngwadilwe. Eupša gopola gore Morutiši yo Mogolo o be a kile a ba legodimong. O be a tseba seo Modimo a se dirilego. Na o be a dumela gore Beibele e tšwa go Modimo?— Ee, o be a dumela.

Ge Jesu a be a bolela le batho ka mediro ya Modimo, o be a bala go tšwa Beibeleng. Ka dinako tše dingwe o be a ba botša ka hlogo seo e se bolelago. Le gona, Jesu o re neile tsebišo e ntši e tšwago go Modimo. Jesu o itše: ‘Nna ke tsebiša lefase tše ke di kwilego go Yena.’ (Johane 8:26) Jesu o be a kwile dilo tše dintši go Modimo ka gobane o be a phetše le Modimo. Ke kae moo re ka balago ka dilo tšeo tše Jesu a di boletšego?— Ka Beibeleng. E ngwaletšwe rena gore re e bale.

Ke therešo gore ge Modimo a be a diriša batho go ngwala, ba ile ba ngwala ka leleme leo ba bego ba le diriša letšatši ka letšatši. Ka gona, karolo e kgolo ya Beibele e be e ngwadilwe ka Sehebere, e nngwe e ngwadilwe ka se-Arama gomme karolo e nngwe e kgolo e ngwadilwe ka Segerika. Ka ge batho ba bantši lehono ba sa tsebe go bala maleme ao, Beibele e ile ya fetolelwa ka maleme a mangwe. Lehono dikarolo tša Beibele di ka balwa ka maleme a fetago 2 260. Nagana feela ka seo! Beibele ke lengwalo la Modimo le le yago go batho kae le kae. Eupša go sa šetšwe gore e ile ya kopišwa ka makga a mantši gakaakang, molaetša wa yona o tšwa go Modimo.

Seo Beibele e se bolelago ke sa bohlokwa go rena. E ngwadilwe kgale-kgale. Eupša e bolela ka dilo tšeo di diregago lehono. E bile e re botša seo Modimo a tlogo se dira bokamosong bjo bo lego kgaufsi. Seo e se bolelago ke se se kgahlišago! E re nea kholofelo e kgahlišago.

Le gona Beibele e re botša kamoo Modimo a nyakago gore re phele ka gona. E re botša seo se lokilego le seo se fošagetšego. Nna le wena re swanetše go tseba se. E re botša ka batho bao ba ilego ba dira dilo tše mpe le seo se ilego sa ba diragalela, e le gore re pheme mathata ao a ilego a ba wela. E bile e re botša ka batho bao ba ilego ba dira se se lokilego le mafelelo a mabotse ao ba ilego ba a hwetša. Tsebišo ye ka moka e ngwaletšwe go hola rena.

Eupša gore re holwe ke Beibele, re swanetše go tseba karabo ya potšišo e nngwe. Potšišo ya gona e re: Ke mang yo a re neilego Beibele? O be o tla araba bjang?— Ee, Beibele ka moka ga yona e tšwa go Modimo. Bjale, re ka bontšha bjang gore ka kgonthe re ba bohlale?— Ka go theetša Modimo le ka go dira seo a se bolelago.

Ka gona re swanetše go ipha nako ya go bala Beibele re le gotee. Ge re amogela lengwalo le le tšwago go motho yo re mo ratago kudu, re le bala leboelela. Ke la bohlokwa kudu go rena. Ke ka tsela yeo Beibele e swanetšego go ba ka gona go rena ka gobane ke lengwalo le le tšwago go Yo a re ratago kudu. Ke lengwalo le le tšwago go Modimo yo lerato.