Kingdom News No. 37

Molaetša wa Lefase ka Bophara

Bodumedi Bja Maaka Bo Kgaufsi Le Go Fela!

▪ Bodumedi bja maaka ke eng?

▪ Bo tla fela bjang?

▪ O tla kgongwa bjang ke se?

Bodumedi bja Maaka ke Eng?

Na o tshwenywa ke bosenyi bjo bo dirwago leineng la bodumedi? Na dintwa, botšhošetši le kgobogo tšeo di dirwago ke bao ba ipolelago gore ba hlankela Modimo di dira gore o kgopišege ka baka la go bona go hlokega ga toka? Ke ka baka la’ng go bonagala eka bodumedi ke bjona bo bakago mathata a mantši gakaakaa?

Molato ga se wa bodumedi ka moka, eupša ke wa bodumedi bja maaka. Motho yo a hlompšhago kudu go tša bodumedi, e lego Jesu Kriste, o bontšhitše gore bodumedi bja maaka bo tšweletša mediro e mebe, go no etša ge “sehlare . . . se se bodilego se enywa dienywa tše di hlokago mohola.” (Mateo 7:15-17) Bodumedi bja maaka bo tšweletša dienywa tša mohuta mang?

Bodumedi bja Maaka . . .

◼ BO ITSENYA-TSENYA NTWENG LE DIPOLITIKING: Makasine wa Asiaweek o re: “Asia ka bophara le mafelong a mangwe, baetapele bao ba lwelago go buša, ka lenyatšo ba laola tsela yeo batho ba ikwago ka yona ka bodumedi bakeng sa go kgotsofatša dinyakwa tša bona ka noši.” Ka baka la se, makasine wo o lemoša ka gore: “Lefase go bonagala le le kgaufsi le go hlakana hlogo.” Moetapele yo a tumilego wa bodumedi wa United States o boletše gore: “E le gore polao e fele, le swanetše go bolaya batšhošetši pele.” Tharollo ya gagwe ke efe? “Ba bolayeng ka moka leineng la Morena.” Ka mo go fapanego, Beibele e re: “Ge e ba motho a re: ‘Ke rata Modimo,’ fela a hloile ngwanabo, ke moaketši.” (1 Johane 4:20) Jesu o ile a ba a re: “Tšwelang pele le rata manaba a lena.” (Mateo 5:44) Ke madumedi a makae ao o ka a gopolago ao ditho tša ona di kopanelago ntweng?

◼ BO GAŠA THUTA-TUMELO YA MAAKA: Madumedi a mantši a ruta gore go na le karolo e itšego e sa bonagalego ya motho yeo e tšwelago pele e phela ka morago ga ge mmele o hwile. Ka go diriša thuto ye, bontši bja madumedi a bo ikhola ka ditho tša ona ka go di lefiša tšhelete ya go rapelela meoya yeo e tlogilego. Lega go le bjalo, Beibele e ruta thuta-tumelo e fapanego. “Moya o senyago wona o tlo hwa.” (Hesekiele 18:4, Phetolelo ya Kgale) “Ba ba phelaxo ba tseba xore ba tlo hwa; ’me xo bahu xa xo se se tsebyaxo.” (Mmoledi 9:5) Jesu o ile a ruta gore bahu ba tla tsošwa—e lego mogato woo o bego o ka se nyakege ge nkabe batho ba e-na le moya o sa hwego. (Johane 11:11-25) Na bodumedi bja gago bo ruta gore moya ga o hwe?

◼ BO DUMELELA KOPANO YA BOTONA LE BOTSHADI E GOBOGILEGO: Dinageng tša ka Bodikela, dikereke tše dintši di kgetha basodoma ba banna le ba basadi go ba baruti e bile di hlohleletša mebušo go amogela manyalo a batho ba bong bjo bo swanago. Gaešita le dikereke tšeo di nyatšago boitshwaro bjo bo gobogilego di kgotleletše baetapele ba bodumedi bao ba ilego ba goboša bana ka kopano ya botona le botshadi. Lega go le bjalo, ke eng seo Beibele e se rutago? E bolela ka go se pepetletše gore: “Le se ke la timetšwa. Ge e le diotswa, goba barapedi ba medimo ya diswantšho, goba dihlotlolo, goba banna ba ba boloketšwego merero yeo e sego ya tlhago, goba banna ba ba robalago le banna . . . ba ka se je bohwa bja mmušo wa Modimo.” (1 Bakorinthe 6:9, 10) Na o tseba madumedi ao a dumelelago kopano ya botona le botshadi e gobogilego?

Bokamoso bja madumedi a tšweletšago dienywa tše di bodilego ke bofe? Jesu o lemošitše ka gore: “Sehlare se sengwe le se sengwe se se sa enywego dienywa tše dibotse se a rengwa sa lahlelwa mollong.” (Mateo 7:19) Ruri bodumedi bja maaka bo tla rengwa bja fedišwa! Eupša se se tla dirwa bjang le gona neng? Pono ya boporofeta yeo e ngwadilwego ka pukung ya Beibele ya Kutollo, dikgaolo 17 le 18 e nea karabo.

Bodumedi bja Maaka bo tla Fela Bjang?

Anke o bone se ka leihlo la kgopolo. Mogweba-ka-mmele o nametše sebata se se boifišago. Sebata se se na le dihlogo tše šupago le dinaka tše lesome. (Kutollo 17:1-4) Mogweba-ka-mmele yo o emela mang? O tutuetša “dikgoši tša lefase.” O apere kobo ya mmala o mophepole, o diriša diorelo, gomme o humile kudu. Go oketša moo, ‘ditšhaba ka moka di timetšwa’ ka mekgwa ya gagwe ya go dirišana le meoya. (Kutollo 17:18; 18:12, 13, 23) Beibele e re thuša go bona gore mogweba-ka-mmele yo ke mokgatlo wa lefase ka bophara wa bodumedi. Ga a emele bodumedi le ge e le bofe bjo tee, eupša o emela madumedi ka moka ao a tšweletšago dienywa tše di bodilego.

Sebata seo mogweba-ka-mmele a se nametšego se swantšhetša mebušo ya bopolitiki ya lefase.a (Kutollo 17:10-13) Bodumedi bja maaka bo nametše sebata se sa bopolitiki, gomme bo leka go tutuetša diphetho tša sona le go se laola.

Lega go le bjalo, kgaufsinyane go tla direga tiragalo e makatšago. “Dinaka tše lesome tše o di bonego le sebata, di tla hloya mogweba-ka-mmele tša mo šwalalanya le go mo hlobodiša, gomme tša ja dinama tša gagwe tša mo fiša ka mo go feletšego ka mollo.” (Kutollo 17:16) Ka lebelo le le tšhošago mebušo ya lefase ya bopolitiki e tla hlasela bodumedi bja maaka ya bo fedišetša sa ruri! Ke eng seo se tlago go tutueletša mogato wo? Puku ya Beibele ya Kutollo e araba ka gore: “Modimo o tsentšhitše dipelong tša tšona gore di phethe kgopolo ya gagwe.” (Kutollo 17:17) Ee, Modimo o tla dira gore bodumedi bja maaka bo ikarabele ka baka la ditiro ka moka tše nyatšegago tšeo bo di dirilego ka leina la gagwe. Ka go diriša toka e feletšego, o tla diriša dinyatsi tša bjona tša bopolitiki e le sedirišwa sa gagwe sa go bo fediša.

Ke eng seo o swanetšego go se dira ge e ba o sa nyake go welwa ke madimabe a bodumedi bja maaka? Morongwa wa Modimo o opeletša ka gore: “E-tšwang go yena batho ba-ka.” (Kutollo 18:4) Ruri ye ke nako ya go tšhaba bodumeding bja maaka! Eupša o ka tšhabela kae? O ka se tšhabele go boila-Modimo, ka gobane le bjona bokamoso bja bjona bo fsifetše. (2 Bathesalonika 1:6-9) Botšhabelo bo nnoši bjo bo lego gona ke bodumedi bja therešo. O ka hlaola bjang bodumedi bja therešo?

Kamoo o ka Hlaolago Bodumedi bja Therešo ka Gona

Ke dienywa dife tše dibotse tšeo bodumedi bja therešo bo swanetšego go di tšweletša?—Mateo 7:17.

Bodumedi bja therešo . . .

◼ BO NA LE LERATO: Barapedi ba therešo “ga se karolo ya lefase,” ga ba arolwe ke morafo goba setlogo, gomme ‘ba a ratana.’ (Johane 13:35; 17:16; Ditiro 10:34, 35) Go e na le gore ba bolayane, ba ikemišeditše go hwelana.—1 Johane 3:16.

◼ BO BOTA LENTŠU LA MODIMO: Go e na le go ruta “tlwaelo” le “ditaelo tša batho e le dithuta-tumelo,” bodumedi bja therešo bo thea thuta-tumelo ya bjona Lentšung la Modimo, Beibele. (Mateo 15:6-9) Ka baka la’ng? Ka gobane “Lengwalo ka moka le buduletšwe ke Modimo gomme le hola ka go ruta, go sola, go lokiša dilo.”—2 Timotheo 3:16.

◼ BO MATLAFATŠA MALAPA E BILE BO KGOTHALETŠA DITEKANYETŠO TŠE PHAGAMEGO TŠA BOITSHWARO: Bodumedi bja therešo bo ruta banna go “rata basadi ba bona bjalo ka mebele ya bona,” bo thuša basadi go ba le ‘tlhompho e tseneletšego go banna ba bona,’ e bile bo ruta bana go ‘kwa batswadi ba bona.’ (Baefeso 5:28, 33; 6:1) Go oketša moo, bao ba gafetšwego maemo a boikarabelo ba swanetše go ba le boitshwaro bjo bo beago mohlala.—1 Timotheo 3:1-10.

Na go na le bodumedi bjo bo phelago ka ditekanyetšo tše? Puku ya Holocaust Politics, yeo e gatišitšwego ka 2001, e re: “Ge nkabe batho ba bantši ba phela go ya ka seo Dihlatse tša Jehofa di se rutago le go se diriša, Polao e Sehlogo [Holocaust] e ka be e ile ya phengwa, gomme lefase le be le ka se sa aparelwa ke go bolayana molokwana-rite.”

Ka kgonthe, dinageng tše 235, Dihlatse tša Jehofa ga di no bolela feela ka ditekanyetšo tša boitshwaro tša Beibele—di phela ka tšona. Re go kgothaletša gore o kgopele Dihlatse tša Jehofa gore di go thuše go ithuta seo Modimo a se nyakago go wena e le gore o mo hlankele ka tsela e amogelegago. Ye ke nako ya gore o gate mogato. O se ke wa diega. Bodumedi bja maaka bo kgaufsi le go fela!—Tsefanya 2:2, 3.

Ge e ba o nyaka tshedimošo e oketšegilego mabapi le molaetša o theilwego Beibeleng woo Dihlatse tša Jehofa di o rutago, ikwe o lokologile go ikopanya le tšona atereseng e lego ka mo tlase.

□ Ka ntle le go itlama, ke kgopela gore le ntlišetšeng kopi ya poroutšha ya Dulang le Phakgame!

Bontšha gore ka leleme lefe.

□ Hle ikopanyeng le nna mabapi le thuto e sa lefelelwego ya legae ya Beibele.

[Mongwalo wa ka tlase]

[Ntlhakgolo go letlakala 3]

Bodumedi bja maaka bo tutuetša “dikgoši tša lefase”

[Ntlhakgolo go letlakala 3]

“E-tšwang go yena batho ba-ka”