“Eyang le Dire . . . Barutiwa”

1-3. (a) Molemi o dira’ng ge puno ya gagwe e le e ntši gomme a sa kgone go e kgobela a nnoši? (b) Jesu o ile a lebana le tlhohlo efe ka seruthwane sa 33 C.E., gomme o ile a e rarolla bjang?

MOLEMI o lebane le bothata bjo bogolo. Dikgwedi pejana, o lemile mašemo a gagwe gomme o bjetše peu. O be a lebeletše ka šedi ge ditsebjana di thoma go bonala, gomme o ile a thaba ge dibjalo di gola. Ga bjale mošomo wa gagwe o thata o a putswa, ka ge bjale e le nako ya go buna. Bothata bja gagwe še bo: Puno ke e ntši kudu gore a ka e kgobela a nnoši. Go rarolla bothata bjo, ka bohlale o dira phetho ya go thwala bašomi gomme a ba romele mašemong a gagwe. Taba ke gore, go šetše nako e nyenyane gore a kgobele puno ya gagwe e bohlokwa.

² Seruthwaneng sa 33 C.E., Jesu yo a tsošitšwego o lebana le bothata bjo bo swanago. Nakong ya bodiredi bja gagwe bja lefaseng, o ile a bjala peu ya therešo. Ga bjale go na dibjalo tšeo di swanetšego go bunwa, gomme puno yeo ke e ntši. Batho ba bantši bao ba arabelago ba swanetše go kgoboketšwa e be barutiwa. (Johane 4:35-38) Jesu o rarolla bjang bothata bjo? Thabeng ya Galilea, nakwana pele a rotogela legodimong, o ile a laela barutiwa ba gagwe gore ba tsome bašomi ba oketšegilego, a re: “Ka gona, eyang le dire batho ba ditšhaba ka moka barutiwa, le ba kolobetša . . . , le ba ruta go boloka dilo tšohle tšeo ke le laetšego tšona.”—Mateo 28:19, 20.

³ Taelo yeo ke motheo wa seo se bolelwago ke go ba molatedi wa kgonthe wa Kriste. Ka gona, a re hlahlobeng dipotšišo tše tharo tše di latelago. Ke ka baka la’ng Jesu a ile a laela gore go hwetšwe bašomi ba oketšegilego? O ile a tlwaetša bjang barutiwa ba gagwe gore ba ba hwetše? Re karolo ya taelo ye bjang?

Lebaka Leo go Bego go Nyakega Bašomi ba Bantši

4, 5. Ke ka baka la’ng Jesu a be a ka se fetše modiro woo a o thomilego, gona ke bomang bao ba bego ba tla o tšwetša pele ge yena a boetše legodimong?

⁴ Ge Jesu a be a thoma bodiredi bja gagwe ka 29 C.E., o be a tseba gore o be a thoma modiro woo a ka se o fetšego ka boyena. Ka nako e kopana yeo e bego e mo šaletše mo lefaseng, tikologo yeo a bego a ka e šoma e be e lekanyeditšwe le batho bao a bego a ka ba fihlelela ka molaetša wa Mmušo ba be ba lekanyeditšwe. Ee, o ile a dira boboledi go Bajuda le go bao ba bego ba sokologetše tumelong ya Sejuda, tšona “dinku tše di timetšego tša ntlo ya Isiraele.” (Mateo 15:24) Lega go le bjalo, “dinku [tšeo] tše di timetšego” di be di gašane gohle nageng ya Isiraele, naga yeo e bego e le ya bogolo bja khilomithara tše dikete. Ka ntle le moo, tšhemo ya lefase ka moka mafelelong e tla swanelwa ke go tsebišwa ditaba tše dibotse.—Mateo 13:38; 24:14.

⁵ Jesu o ile a lemoga gore modiro o mogolo o tla dirwa ka morago ga lehu la gagwe. O boditše baapostola ba gagwe ba botegago ba 11 gore: “Ruriruri ke re go lena: Yo a dumelago go nna, le yena o tla dira mediro ye ke e dirago; o tla dira mediro e fetago ye, gobane ke a tloga ke ya go Tate.” (Johane 14:12) Ka ge Morwa a be a boela legodimong, balatedi ba gagwe—e sego baapostola feela eupša le barutiwa ka moka ba nakong e tlago—ba be ba tla swanelwa ke go tšwetša pele modiro wa boboledi le wa go ruta. (Johane 17:20) Jesu ka boikokobetšo o ile a bontšha gore bona ba be ba tla dira “mediro e fetago” ya gagwe. Ba be ba tla dira seo bjang? Ka ditsela tše tharo.

6, 7. (a) Mediro ya balatedi ba Jesu e be e tla feta ya gagwe ka ditsela dife? (b) Re ka bontšha bjang gore go bota ga Jesu balatedi ba gagwe e be e se ga lefeela?

⁶ Tsela ya pele, balatedi ba Jesu ba be ba tla šoma tikologo e kgolo. Lehono modiro wa bona wa go nea bohlatse o fihlile magomong a lefase, kgole kudu le mellwane ya naga yeo Jesu ka boyena a ilego a dira boboledi go yona. Ya bobedi, ba be ba tla fihlelela batho ba bantši. Sehlopha se senyenyane sa barutiwa seo Jesu a se tlogetšego se ile sa gola ka bjako sa ba batho ba dikete. (Ditiro 2:41; 4:4) Ga bjale palo ya bona e fihlile go dimilione, gomme ba bangwe ba dikete tše makgolo ba a kolobetšwa ngwaga o mongwe le o mongwe. Ya boraro, ba be ba tla dira boboledi ka nako e telele—go fihla le lehono, mo e ka bago nywaga e 2 000 ka morago ga go fela ga bodiredi bja Jesu bjo bo tšerego nywaga e meraro le seripa.

⁷ Jesu o be a bontšha go bota balatedi ba gagwe ge a be a re ba tla dira “mediro e fetago ye.” O be a ba nea modiro woo o bego o le bohlokwa go yena, wa go bolela le go ruta ka “ditaba tše dibotse tša Mmušo wa Modimo.” (Luka 4:43) O be a kgodišegile gore ba be ba tla phetha kabelo yeo ka potego. Se se bolela’ng go rena lehono? Ge re dira modiro wa boboledi ka mafolofolo le ka pelo ka moka, re bontšha gore go bota ga Jesu barutiwa ba gagwe e be e se ga lefeela. Na ye ga se tokelo e kgahlišago?—Luka 13:24.

Ba Tlwaeleditšwe go Nea Bohlatse

8, 9. Jesu o beile mohlala ofe bodireding, gona re ka o ekiša bjang?

⁸ Jesu o tlwaeditše barutiwa ba gagwe ka botlalo gore ba phethe bodiredi. Go feta tšohle, o ba beetše mohlala o mobotse. (Luka 6:40) Kgaolong e fetilego, re ahlaahlile maikwelo a gagwe ka bodiredi. Anke ka nakwana o nagane ka barutiwa bao ba ilego ba sepela le Jesu maetong a bodiredi. Ba ile ba lemoga gore o be a dira boboledi moo batho ba hwetšwago gona—mabopong le mebotong, metseng le marekišetšong, gotee le magaeng a batho. (Mateo 5:1, 2; Luka 5:1-3; 8:1; 19:5, 6) Ba ile ba bona gore o be a šoma ka thata, a tsoga mesong a šoma go fihla bošego. Go yena bodiredi e be e se nako ya go itloša bodutu! (Luka 21:37, 38; Johane 5:17) Ga go pelaelo gore ba ile ba bona gore o be a šušumetšwa ke go rata batho ka mo go tseneletšego. Mohlomongwe ba ile ba bona sefahlegong sa gagwe lešoko leo le bego le le ka pelong ya gagwe. (Mareka 6:34) O nagana gore mohlala wa Jesu o tutueditše barutiwa ba gagwe bjang? Na wena o ka ba o ile wa tutuetšwa bjang?

⁹ Ka ge re le balatedi ba Kriste, re ekiša mohlala wa gagwe bodireding. Ke ka baka leo re dirago sohle seo re ka se kgonago go nea “bohlatse bjo bo feletšego.” (Ditiro 10:42) Ka go swana le Jesu, re latelela batho ka magaeng a bona. (Ditiro 5:42) Ge e ba go nyakega, re dira dithulaganyo tša gore re ba etele ka nako yeo ba ka bego ba le ka gae. Le gona ka bohlale re tsoma batho le go bolela le bona mafelong a batho bohle—mekgotheng, diphakeng, mabenkeleng le mešomong. Re tšwela pele re “šoma ka thata le go katana” bodireding, ka ge re tšeela modiro wo godimo. (1 Timotheo 4:10) Go rata batho ba bangwe ka pelo ka moka le ka mo go tseneletšego go re tutueletša go tšwela pele re tsoma dibaka tša go dira boboledi kae le kae moo batho ba hwetšwago le gona ka nako le ge e le efe.—1 Bathesalonika 2:8.

10-12. Ke thuto efe e bohlokwa yeo Jesu a e rutilego barutiwa ba gagwe pele a ba roma go yo dira boboledi?

¹⁰ Tsela e nngwe yeo Jesu a tlwaeditšego barutiwa ba gagwe e bile ka go ba nea ditaelo tše di kwagalago. Pele Jesu a ka roma baapostola ba 12 gomme ka morago barutiwa ba 70 go yo bolela ditaba tše dibotse, o ile a ba le dinako tša go ba tlwaetša. (Mateo 10:1-15; Luka 10:1-12) Tlwaetšo yeo e ile ya tšweletša dipoelo tše di kgahlišago, ka ge Luka 10:17 e bega gore: “Ba masomešupa ba boa ba thabile.” Anke re ahlaahleng tše pedi tša dithuto tše bohlokwa tšeo Jesu a di rutilego, re gopola gore mantšu a gagwe a swanetše go kwešišwa ka go dumelelana le seo Bajuda ba bego ba tlwaetše go se dira mehleng ya Beibele.

¹¹ Jesu o rutile barutiwa ba gagwe go bota Jehofa. O ba boditše gore: “Le se ke la tla le dikhwama tša go tsenya gauta goba silifera goba koporo, goba mokotlana wa dijo bakeng sa leeto goba diaparo tše pedi goba diramphašane goba lehlotlo, gobane mošomi o swanelwa ke dijo tša gagwe.” (Mateo 10:9, 10) Go be go tlwaelegile gore basepedi ba tšee sekhwama sa tšhelete, mokotlana wa dijo le diramphašane tše dingwe.a Ka go laela barutiwa ba gagwe gore ba se ke ba tshwenyega ka dilo tše bjalo, ge e le gabotse Jesu o be a re: “Botang Jehofa ka mo go feletšego, gobane o tla le hlokomela.” Jehofa o be a tla ba hlokomela ka go tutuetša bao ba bego ba amogela ditaba tše dibotse go ba hlokomela, e lego mokgwa woo o bego o tlwaelegile kua Isiraele.—Luka 22:35.

¹² Jesu o ile a ba a ruta barutiwa ba gagwe go efoga dilo tšeo di ka ba šitišago go sa hlokege. O itše: “Ge le le tseleng le se ke la ja nako ge le dumediša.” (Luka 10:4) Na Jesu o be a ba botša gore ba se be le bogwera goba ba emele kgole le batho? Le ganyenyane. Mehleng ya Beibele, ditumedišo gantši di be di akaretša go gontši go feta go fo re dumelang. Gantši madume a be a akaretša metlwae e fapafapanego gotee le poledišano e tšeago nako e telele. Seithuti se sengwe sa Beibele se bolela gore: “Madume a batho ba ka Bohlabela a be a sa akaretše go khunama ganyenyane, goba go dumediša ka letsogo, bjale ka ge rena re tlwaetše, eupša a be a akaretša go gokarelana gantši, go koba hlogo gaešita le go khunamela fase. Se se be se eja nako e ntši.” Ka go botša barutiwa ba gagwe gore ba se ke ba ja nako ka ditumedišo tšeo di tlwaetšwego, ge e le gabotse Jesu o be a re: “Le swanetše go diriša nako ya lena ka tsela e holago, ka ge molaetša woo le o sepedišago o akgofile.”b

13. Re ka bontšha ka ditsela dife gore re tšeela godimo ditaelo tšeo Jesu a di neilego barutiwa ba gagwe ba lekgolong la pele la nywaga?

¹³ Re tšeela godimo ditaelo tšeo Jesu a di neilego barutiwa ba gagwe ba lekgolong la pele la nywaga. Ge re phetha bodiredi bja rena, re bota Jehofa ka mo go feletšego. (Diema 3:5, 6) Re a tseba gore re ka se hlaelwe ke dilo tše bohlokwa bophelong ge e ba re ‘tšwela pele re tsoma Mmušo pele.’ (Mateo 6:33) Bagoeledi ba Mmušo ba nako e tletšego lefaseng ka bophara ba ka hlatsela gore gaešita le dinakong tše thata, Jehofa o a ba thuša. (Psalme 37:25) Le gona re lemoga go nyakega ga gore re efoge ditšhitišo. Ge e ba re sa šetše, tshepedišo ye ya dilo e ka re fapoša gabonolo. (Luka 21:34-36) Lega go le bjalo, ye ga se nako ya go šitišwa. Ka ge maphelo a le kotsing, molaetša wa rena o akgofile. (Baroma 10:13-15) Go dula re bolokile kgopolo ya go akgofa ka dipelong tša rena go tla re dira gore re gane go dumelela ditšhitišo tša lefase le di re jela nako le matla ao re ka bego re a diriša gabotse bodireding. Gopola, nako e šetšego ke e kopana e bile puno ke e kgolo.—Mateo 9:37, 38.

Taelo Yeo e re Akaretšago

14. Ke’ng seo se bontšhago gore taelo yeo e begilwego go Mateo 28:18-20 e šoma go balatedi ba Kriste ka moka? (Bona le mongwalo wa ka tlase.)

¹⁴ Ka mantšu a rego: “Eyang le dire . . . barutiwa,” Jesu yo a tsošitšwego o rwešitše balatedi ba gagwe boikarabelo bjo bogolo. O be a se a nagana feela ka barutiwa bao ba bego ba le moo thabeng ya Galilea letšatšing leo la seruthwane.c Modiro woo a ba laetšego wona o be o akaretša go fihlelela “batho ba ditšhaba ka moka,” gomme o tla tšwela pele go ba “go fihla bofelong bja tshepedišo ya dilo.” Go molaleng gore taelo ye e šoma go balatedi ba Kriste ka moka, go akaretša le rena lehono. Anke re hlahlobeng ka kelohloko mantšu a Jesu ao a begilwego go Mateo 28:18-20.

15. Ke ka baka la’ng re bontšha bohlale ge re latela taelo ya Jesu ya gore re dire barutiwa?

¹⁵ Pele Jesu a nea taelo yeo, o re: “Ke neilwe matla ka moka legodimong le lefaseng.” (Temana 18) Na Jesu o na le matla a magolo gakaalo? Ee, go bjalo! Ke morongwa yo mogolo, o laola barongwa ba dimiriate tša dimiriate. (1 Bathesalonika 4:16; Kutollo 12:7) Ka ge e le “hlogo ya phuthego,” o na le matla a go laola balatedi ba gagwe lefaseng. (Baefeso 5:23) Go tloga ka 1914, o bušitše e le Kgoši Mesia legodimong. (Kutollo 11:15) O buša gaešita le bahu, ka ge a na le matla a go ba tsoša. (Johane 5:26-28) Ka go tsebatša pele matla a gagwe a magolo, Jesu o bontšha gore mantšu ao a latelago ga se tšhišinyo eupša ke taelo. Re bontšha bohlale ge re a kwa, ka ge a se a ipha bolaodi eupša a bo neilwe ke Modimo.—1 Bakorinthe 15:27.

16. Ka go re botša gore “eyang,” Jesu o re botša gore re dire’ng, gona re phetha karolo ya taelo ye bjang?

¹⁶ Jesu ga bjale o ntšha taelo yeo e thomago ka lentšu letee yeo e rego: “Eyang.” (Temana 19) Ka gona o re nea taelo ya go gata mogato wa pele wa go fihlelela batho ba bangwe ka molaetša wa Mmušo. E le go phethagatša karolo ye ya taelo ya gagwe, re ka diriša mekgwa e fapafapanego. Go bolela ka ntlo le ntlo ke mokgwa o atlegago kudu wa go boledišana le batho. (Ditiro 20:20) Le gona re tsoma dibaka tša go nea bohlatse bjo bo sa rulaganyetšwago; re fagahlela go thoma dipoledišano mabapi le ditaba tše dibotse kae le kae mo go swanetšego ge re dutše re dira mediro ya rena ya letšatši le letšatši. Mekgwa ya rena ya go bolela ditaba tše dibotse e ka fapana, ka go dumelelana le dinyakwa tša tšhemo ya gabo rena le maemo a yona. Lega go le bjalo, go na le selo seo se sa fetogego: Re ‘ya’ go tsoma batho bao ba swanelegago.—Mateo 10:11.

17. Re dira bjang “barutiwa”?

¹⁷ Se se latelago, Jesu o hlalosa morero wa taelo ya gagwe, o re ke go ‘dira batho ba ditšhaba ka moka barutiwa.’ (Temana 19) Re dira bjang “barutiwa”? Gabotsebotse, morutiwa ke morutwana, motho yo a rutwago. Lega go le bjalo, go dira barutiwa ga se feela taba ya go fetišetša ba bangwe tsebo. Ge re ithuta Beibele le batho bao ba bontšhago kgahlego, pakane ya rena ke go ba thuša go ba balatedi ba Kriste. Ge go kgonega, re gatelela mohlala wa Jesu e le gore barutwana ba rena ba ka ithuta go mmona e le Morutiši wa bona le Mohlala, ba phela kamoo a phetšego ka gona le go dira modiro woo a o dirilego.—Johane 13:15.

18. Ke ka baka la’ng kolobetšo e le mogato o bohlokwa kudu bophelong bja morutiwa?

¹⁸ Karolo e bohlokwa ya taelo yeo e bontšhwa mantšung a rego: “Le ba kolobetša leineng la Tate le la Morwa le la moya o mokgethwa.” (Temana 19) Kolobetšo ke karolo e bohlokwa bophelong bja morutiwa, ka ge e le seka se se swanetšego sa go bontšha boineelo bja gagwe go Modimo. Ka gona, e bohlokwa bakeng sa go phologa. (1 Petro 3:21) Ee, ka go tšwela pele a dira seo a ka se kgonago go hlankela Jehofa, morutiwa yo a kolobeditšwego a ka lebelela pele ditšhegofatšong tšeo di sa felego lefaseng le lefsa leo le tlago. Na wena o thušitše motho yo mongwe go ba morutiwa yo a kolobeditšwego wa Kriste? Bodireding bja Bokriste, ga go na se sengwe se se thabišago go feta seo.—3 Johane 4.

19. Ke’ng seo re se rutago barutiwa ba bafsa, gona ke ka baka la’ng thuto e ka tšwetšwa pele ka morago ga ge ba kolobeditšwe?

¹⁹ Jesu o hlalosa karolo ya bobedi ya taelo ya gagwe, ka gore: “Le ba ruta go boloka dilo tšohle tšeo ke le laetšego tšona.” (Temana 20) Re ruta barutwana ba bafsa go latela ditaelo tša Jesu, go akaretša le ditaelo tša go rata Modimo, go rata baagišani le go dira barutiwa. (Mateo 22:37-39) Re ba ruta ganyenyane-ganyenyane go hlalosa ditherešo tša Beibele le go emela tumelo ya bona e golago. Ge ba swanelega go tšea karolo modirong wa go ruta phatlalatša, re šoma gotee le bona, re ba ruta ka dipolelo le ka mohlala kamoo ba ka dirago modiro wo ka tsela e atlegago. Ga se gore go rutwa ga barutiwa ba bafsa go felela nakwana pele ba kolobetšwa. Bao ba sa tšwago go kolobetšwa ba ka nyaka tlhahlo e oketšegilego go ba thuša go lebeletšana le ditlhohlo tšeo di tlišwago ke go latela Kriste.—Luka 9:23, 24.

“Ke na le Lena Matšatši ka Moka”

20, 21. (a) Ke ka baka la’ng re se na lebaka la go boifa ge re phetha taelo ya Jesu? (b) Ke ka baka la’ng ye e se nako ya go nyefiša, gomme re swanetše go ikemišetša go dira’ng?

²⁰ Mantšu a Jesu a mafelelo a taelo ya gagwe ke a homotšago, a re: “Tsebang gore ke na le lena matšatši ka moka go fihla bofelong bja tshepedišo ya dilo.” (Mateo 28:20) Jesu o lemoga gore kabelo ye ke e kgolo. Le gona o a tseba gore ka dinako tše dingwe go e phetha go galefiša baganetši. (Luka 21:12) Lega go le bjalo, ga re na lebaka la go boifa. Moetapele wa rena ga se a letela gore re phethe kabelo ye re sa thušwe goba re le noši. Na ga go homotše go tseba gore Yo a nago le “matla ka moka legodimong le lefaseng” o na le rena go re thekga ge re phetha taelo yeo a re neilego yona?

²¹ Jesu o ile a kgonthišetša barutiwa ba gagwe gore o tla ba le bona bodireding go theoša le nywagakgolo go fihla “bofelong bja tshepedišo ya dilo.” Go fihlela ge bofelo bo fihla, re swanetše go tšwela pele re phetha taelo ya Jesu. Ye ga se nako ya go nyefiša. Puno e kgolo ya moya e a phethwa! Bao ba thabelago ba kgoboketšwa ka bontši. Ka ge re le balatedi ba Kriste, a re ikemišetšeng go phetha taelo e kgolo yeo re e neilwego. A re ikemišetšeng go gafa nako ya rena, matla, le dilo tše di bonagalago e le gore re phethe taelo ya Kriste e rego: “Eyang le dire . . . barutiwa.”