“Ke Rata Tate”

1, 2. Moapostola Johane o utolla’ng mabapi le bošego bja mafelelo bjo baapostola ba bo feditšego ba na le Jesu?

MOKGALABJE yo mongwe o ina pene ya gagwe ka gare ga enke, o gopola dilo tše dintši tšeo di diregilego kgale. Leina la gagwe ke Johane, gomme ke moapostola wa mafelelo yo a phelago gare ga baapostola ba Jesu Kriste. Ga bjale Johane o na le nywaga e ka bago e 100, o gopola tiragalo ya bohlokwa kudu yeo e ilego ya direga moo e ka bago nywagasome e šupago pejana, e lego tiragalo ya mafelelo yeo yena le baapostolagotee le yena ba ilego ba e fetša ba na le Jesu pele ga lehu la Gagwe. A hlahlwa ke moya o mokgethwa wa Modimo, Johane o kgona go gopola le go ngwala ditiragalo tšeo ka botlalo.

² Bošegong bjoo, Jesu o ile a ba botša ka mo go kwagalago gore go se go ye kae o be a tla bolawa. Ke Johane feela yo a utollago lebaka leo Jesu a boletšego gore o be a tla lebeletšana le lehu leo le sehlogo, o re: “E le gore lefase le tsebe gore ke rata Tate, ke dira tšeo Tate a ntaetšego gore ke di dire. Emang, a re tlogeng mo.”—Johane 14:31.

3. Jesu o bontšhitše bjang gore o rata Tatagwe?

³ “Ke rata Tate.” Ga go na selo seo e bego e le sa bohlokwa kudu go Jesu go feta seo. Ga se gore o be a bolela mantšu ao leboelela. Ge e le gabotse, ka pegong ya Beibele ke go Johane 14:31 feela mo re hwetšago Jesu a bolela ka go lebanya gore o rata Tatagwe. Lega go bjalo, Jesu o pheletše mantšu ao. Lerato la gagwe go Jehofa le be le bonagala letšatši le letšatši. Sebete sa Jesu, go kwa ga gagwe le kgotlelelo ya gagwe, ka moka ga tšona e be e le bohlatse bja gore o rata Modimo. Bodiredi bja gagwe ka moka bo be bo tutuetšwa ke lerato leo.

4, 5. Beibele e kgothaletša lerato la mohuta mang, gona go ka thwe’ng ka lerato leo Jesu a ratago Jehofa ka lona?

⁴ Lehono, batho ba bangwe ba ka tšea gore lerato ke seka seo se fokolago. Ba ka nagana ka direto tša lerato le dikoša tša lerato, mohlomongwe gaešita le go tšewa ke matladima ao ka dinako tše dingwe a tswalanywago le lerato la baratani. Le gona Beibele e bolela ka lerato la baratani, gaešita le ge e le hlalosa ka tsela yeo e nago le seriti kutšwanyana go feta yeo le hlaloswago ka yona gona bjale. (Diema 5:15-21) Lega go le bjalo, Lentšu la Modimo le fetša nako e ntši le bolela ka mohuta o itšego wa lerato. Lerato le ga se feela la go kganyoga selo goba la go gapša ke maikwelo a nakwana; ga se leo le se nago maikwelo, ga se la tsela ya filosofi ya go lebeletšana le ditswalano tša batho. Le akaretša bobedi pelo le monagano. Lerato le bjalo le tšwa ka pelong, le hlahlwa ke melao e phagamego ya motheo e bile le dumelelana le yona, gomme le bontšhwa ka ditiro tše di nepagetšego. E tloga e se la bošilo. Lentšu la Modimo le re: “Lerato le ka mohla ga le fele.”—1 Bakorinthe 13:8.

⁵ Bathong ka moka bao ba kilego ba phela, Jesu ke yena yo a ilego a rata Jehofa ka go fetišiša. Ga go na motho yo a ilego a feta Jesu ka go phelela mantšu ao yena a boletšego gore ke a bohlokwa kudu ditaelong ka moka tša Modimo, ao a rego: “O rate Jehofa Modimo wa gago ka pelo ya gago ka moka, ka moya wa gago ka moka, ka monagano wa gago ka moka le ka matla a gago ka moka.” (Mareka 12:30) Jesu o ile a hlagolela lerato le bjalo bjang? O ile a boloka bjang lerato la gagwe ka Modimo le le matla ge a be a le mo lefaseng? Le gona re ka mo ekiša bjang?

Tlemo ya Kgale Kudu le Yeo e Tiilego ya Lerato

6, 7. Re tseba bjang gore Diema 8:22-31 e hlalosa Morwa wa Modimo, e sego feela seka sa bohlale?

⁶ Na o kile wa šoma le mogwera modirong o itšego gomme wa hwetša gore mafelelong bobedi bja lena le tlwaelane gakaone gomme le ba bagwera ba kgauswi? Phihlelo e bjalo e thabišago e ka go thuša go kwešiša lerato leo le bilego gona magareng ga Jehofa le Morwa wa gagwe yo a tswetšwego a nnoši. Ke gantši re tsopola Diema 8:30, eupša anke re hlahlobeng taba yeo e dikologilego temana ye. Temaneng ya 22 go ya go 31, re hwetša tlhaloso e buduletšwego ya bohlale bjo bo mothofaditšwego. Re tseba bjang gore mantšu a a lebišitšwe go Morwa wa Modimo?

⁷ Temaneng ya 22, bohlale bo re: “Jehofa o mpopile ke le mathomo a tsela ya gagwe, ke le wa pelepele wa mediro ya gagwe ya kgalekgale.” Go na le selo se sengwe seo se akaretšwago mo go feta bohlale, ka ge seka se se sa ka sa ‘bopša.’ Ga se sa ka sa ba le mathomo ka ge Jehofa a be a dutše a le gona gomme a le bohlale. (Psalme 90:2) Lega go le bjalo, Morwa wa Modimo e be e le “leitšibulo la tlholo yohle.” O ile a tšweletšwa, goba go bopša; e be e le wa pele dilong tšeo Jehofa a di fihleletšego. (Bakolose 1:15) Morwa o bile gona pele lefase le magodimo di ka bopša, go etša ge go hlaloswa pukung ya Diema. Le gona ka ge e le Lentšu, yena Mmoleledi wa Modimo, e be e le tlhaloso e phethagetšego ya bohlale bja Jehofa.—Johane 1:1.

8. Morwa o be a dira’ng pele a etla lefaseng, gona re ka nagana ka’ng ge re dutše re thabela go lebelela bobotse bja tlholo?

⁸ Morwa o be a dira’ng nakong ka moka pele a etla lefaseng? Temana ya 30 e re botša gore o be a le hleng ga Modimo e le “mošomi yo a nago le bokgoni.” Seo se bolela’ng? Bakolose 1:16 e hlalosa gore: “Dilo tše dingwe ka moka tše di lego magodimong le lefaseng di hlodilwe ka yena . . . Dilo tše dingwe ka moka di hlodilwe ka yena gomme di hloletšwe yena.” Ka gona Jehofa, yena Mmopi, o dirišitše Morwa wa gagwe, e lego Mošomi yo a nago le Bokgoni, go bopa tlholo ka moka—go tloga go dibopiwa tša moya tšeo di lego legodimong go ya go legohle le legolo leo le bonagalago, lefase le dimela tša lona tše di makatšago tša mehutahuta le diphoofolo, gotee le sephedi seo se di phalago ka moka lefaseng, e lego motho. Maemong a mangwe, re ka tswalanya tirišano ye yeo e lego magareng ga Tate le Morwa le yeo e lego gona gare ga mothadi wa dipolane le moagi, goba rakonteraka, yoo a nago le bokgoni bja go dira gore polane ya mothadi e be moago wa kgonthe. Ge re kgahlwa ke seka le ge e le sefe sa tlholo, ge e le gabotse re tumiša Mothadi yo Mogolo wa Dipolane. (Psalme 19:1) Lega go le bjalo, re ka gopola le tlemo ya nako e telele le e thabišago ya magareng ga Mmopi le “mošomi [wa gagwe] yo a nago le bokgoni.”

9, 10. (a) Ke’ng seo se matlafaditšego tlemo ya magareng ga Jehofa le Morwa wa gagwe? (b) Ke’ng seo se ka matlafatšago tlemo ya magareng ga gago le Tatago wa legodimong?

⁹ Ge batho ba babedi bao ba sego ba phethagala ba šoma gotee, ka dinako tše dingwe go ba thata go dirišana. Ga go bjalo ka Jehofa le Morwa wa gagwe! Morwa o šomile gotee le Tatagwe ka nywaga e sa balegego gomme o be a “dula [a] thabile pele ga gagwe ka mehla.” (Diema 8:30) Ee, o be a thabela go ba le Tatagwe, gomme Tate le yena o be a ikwa ka tsela e swanago. Go etša ge go be go letetšwe, Morwa o ile a gola gomme a swana kudu le Tatagwe, a ithuta go ekiša dika tša Tatagwe. Ka gona, ga go makatše gore tlemo ya magareng ga Tate le Morwa e ile ya matlafala ka tsela ye! E ka bitšwa ka mo go swanetšego gore ke tlemo ya kgale kudu le e matla kudu ya lerato legohleng ka moka.

¹⁰ Ka gona, seo se ka bolela’ng go rena? O ka ikwa e ka o ka se tsoge o bile le tlemo e bjalo le Jehofa. Go ba gona, ga go le o tee wa rena yo a lego boemong bjo bo phagamego go swana le Morwa. Lega go le bjalo, go na le sebaka se sebotse kudu seo se re bulegetšego. Gopola, Jesu o ile a batamela kgauswi le Tatagwe ka go šoma le Yena. Jehofa ka lerato o re nea sebaka sa go ba “bašomigotee” le yena. (1 Bakorinthe 3:9) Ge re dutše re latela mohlala wa Jesu bodireding, re swanetše go dula re gopola gore re bašomigotee le Modimo. Ka go re’alo, tlemo ya lerato yeo e re kopanyago le Jehofa e tla matlafala kudu. Na go ka ba le tokelo yeo e fetago yeo?

Kamoo Jesu a Ilego a Boloka Lerato la Gagwe la go Rata Jehofa le le Matla

11-13. (a) Ke ka baka la’ng go thuša go nagana ka lerato e le selo se se phelago, gona Jesu yo monyenyane o ile a boloka bjang lerato la gagwe ka Jehofa le le matla? (b) Morwa wa Modimo o ile a bontšha bjang gore o kgahlegela go ithuta ka Jehofa, bobedi pele a etla lefaseng le ka morago ge e be e le motho?

¹¹ Ka ditsela tše dintši, go a thuša go nagana ka lerato leo le lego ka dipelong tša rena e le selo seo se phelago. Ka go swana le letšoba la ka ntlong, lerato le nyaka go fepša le go hlokomelwa e le gore le ka gola gabotse le go atlega. Ge e ba le hlokomologwa gomme le sa fepše gabotse, le a fokola le go hwa. Jesu ga se a ka a tšeela fase lerato leo a ratago Jehofa ka lona. O ile a le boloka le le matla bophelong bja gagwe ka moka mo lefaseng. Anke re boneng kamoo a dirilego seo.

¹² Nagana gape ka tiragalo ya ge Jesu yo monyenyane a be a bolela ka tswalano ya gagwe le Jehofa ka tempeleng kua Jerusalema. Gopola mantšu ao a a boditšego batswadi ba gagwe bao ba bego ba tshwenyegile, ge a re: “Ke ka baka la’ng le be le nnyaka? Na le be le sa tsebe gore ke swanetše go ba ntlong ya Tate?” (Luka 2:49) Ge e be e sa le mošemanyana, go molaleng gore Jesu o be a sešo a gopola selo le ge e le sefe ka bophelo bja gagwe bja pele e eba motho. Lega go le bjalo, lerato la gagwe ka Tatagwe, e lego Jehofa, le be le le matla kudu. O be a tseba gore ka tlhago lerato le bjalo le be le bontšhwa ka borapedi. Ka gona go be go se na lefelo leo le bego le thabiša Jesu go swana le ntlo ya Tatagwe ya borapedi bjo bo sekilego. O be a fagahlela go ba moo gomme a sa nyake go tloga. Go feta moo, o be a sa no fihla tempeleng gomme a dula. O be a fagahlela go ithuta ka Jehofa le go bolela ka seo a bego a se tseba. Maikwelo a bjalo ga se a thoma ge a be a na le nywaga e 12, goba a fela ge a be a na le nywaga yeo.

¹³ Ge a be a sa le legodimong pele a etla lefaseng, Morwa o ile a fišegela go ithuta go Tatagwe. Boporofeta bjoo bo ngwadilwego go Jesaya 50:4-6 bo utolla gore Jehofa o rutile Morwa wa gagwe thuto e kgethegilego mabapi le karolo ya gagwe e le Mesia. Gaešita le ge thuto e bjalo e be e akaretša go tseba ka a mangwe a mathata ao a bego a tla wela Motlotšwa wa Jehofa, Morwa o ile a ithuta ka go fagahla. Ka morago ga ge Jesu a tlile lefaseng gomme a gotše, o ile a dula a fagahlela go ya ntlong ya Tatagwe le go tšea karolo borapeding le dithutong tšeo Jehofa a bego a nyaka gore di be gona ka ntlong ya gagwe. Ka go re’alo Beibele e bolela ka go ba gona ga Jesu tempeleng le sinagogeng ka mehla. (Luka 4:16; 19:47) Ge e ba re nyaka go boloka lerato la rena ka Jehofa le phela e bile le le matla, re swanetše go fagahlela go ba gona dibokeng tša Bokriste, moo re rapelago Jehofa le go matlafatša tsebo ya rena le go mo tšeela ga rena godimo.

14, 15. (a) Ke ka baka la’ng Jesu a be a nyaka go ba noši? (b) Dithapelo tša Jesu go Tatagwe di be di utolla bjang gore o a mo hlompha e bile o na le tswalano ya kgauswi le yena?

¹⁴ Le gona Jesu o ile a boloka lerato la gagwe ka Jehofa le le matla ka go rapela ka mehla. Gaešita le ge a be a na le bogwera e bile a rata go ba gare ga batho, go a kgahliša go tseba gore o be a tšeela godimo nako ya go ba noši. Ka mohlala, Luka 5:16 e re: “O be a fela a eya mafelong a lego lekatana gomme a rapela.” Ka mo go swanago, Mateo 14:23 e re: “Mafelelong, ge a phatlaladitše mašaba, a rotogela thabeng a nnoši gore a yo rapela. Gaešita le ge e be e šetše e le bošego kudu, o be a le moo a nnoši.” Jesu o be a kgethile go ba noši mabakeng a le a mangwe, e se ka gobane e le tšhikanoši goba a sa rate go ba gare ga batho, eupša e le ka gobane o be a nyaka go ba noši le Jehofa, a bolele ka bolokologi le Tatagwe ka thapelo.

¹⁵ Ge Jesu a be a rapela, ka dinako tše dingwe o be a diriša polelwana “Aba, Tate.” (Mareka 14:36) Mehleng ya Jesu, lentšu “Aba,” leo le bego le dirišwa ka lapeng, le be le bolela gore “tate” gomme le bontšha tswalano ya kgauswi yeo ngwana a bego a na le yona le tatagwe. Gantši le be le le gare ga mantšu a pele ao ngwana a bego a ithuta ona. Lega go le bjalo, le be le bontšha tlhompho. Gaešita le ge lentšu le le be le utolla tswalano ya kgauswi ya Morwa ge a boledišana le Tatagwe yo a rategago, le be le bontšha gape go hlompha ga gagwe bolaodi bja Jehofa e le Tate. Re hwetša tswalano e bjalo ya kgauswi le tlhompho dithapelong ka moka tša Jesu tšeo di begilwego. Ka mohlala, go Johane kgaolo 17, moapostola Johane o begile thapelo e telele le yeo e tšwago pelong yeo Jesu a e rapetšego bošegong bja Gagwe bja mafelelo. Ruri go tloga go re kgoma kudu go ithuta thapelo yeo e bile go bohlokwa gore re e ekiše—e sego ka go boeletša mantšu a Jesu, eupša ka go hwetša ditsela tša go bolela ka go tšwa pelong le Tatago rena wa legodimong ka makga a mantši kamoo re ka kgonago. Go dira bjalo go tla boloka lerato la rena ka yena le phela e bile le le matla.

16, 17. (a) Jesu o ile a bontšha bjang ka dipolelo tša gagwe gore o rata Tatagwe? (b) Jesu o ile a hlalosa bjang go nea kudu ga Tatagwe?

¹⁶ Go etša ge re bone pejana, Jesu ga se a ka a boaboeletša mantšu a rego: “Ke rata Tate.” Lega go le bjalo, ka dinako tše dintši dipolelo tša gagwe di be di bontšha gore o rata Tatagwe. Bjang? Jesu ka boyena o boletše gore: “Ke go tumiša phatlalatša wena Tate, Morena wa legodimo le lefase.” (Mateo 11:25) Ge re be re ithuta Karolo 2 ya puku ye, re bone gore Jesu o be a rata go tumiša Tatagwe ka go thuša batho go Mo tseba. Ka mohlala, o be a swantšha Jehofa le tate yo a bego a fagahlela kudu go swarela morwa wa gagwe yo a fapogilego, moo a ilego a letela go goroga ga lesogana la gagwe leo le bego le itshotše, a le bona le sa tla kgole ke moka a kitimela go le gahlanetša le go le gokarela. (Luka 15:20) Ke mang yo a ka balago mantšu ao ka ntle le go ikwa a kgongwa kudu ke tsela yeo Jesu a hlalosago lerato la Jehofa le go swarela ga gagwe?

¹⁷ Gantši Jesu o be a tumiša Tatagwe ka baka la go nea kudu ga Gagwe. O ile a diriša mohlala wa batswadi bao ba sego ba phethagala go bontšha kamoo ka moka ga rena re ka kgonthišegago ka gona gore Tatago rena o tla re nea moya o mokgethwa wo re o hlokago. (Luka 11:13) Le gona Jesu o boletše ka kholofelo yeo Tate yo a neago kudu a e holofetšago. Ka phišego Jesu o ile a hlalosa kholofelo ya gagwe ya go bušetšwa ka lehlakoreng la Tatagwe kua legodimong. (Johane 14:28; 17:5) O ile a botša balatedi ba gagwe ka kholofelo yeo Jehofa a e neilego “mohlatswana” wa Kriste—ya go ya legodimong le go buša le Kgoši Mesia. (Luka 12:32; Johane 14:2) Le gona o ile a homotša modiradibe yo a bego a ehwa ka go mo holofetša bophelo Paradeiseng. (Luka 23:43) Go bolela ka go nea kudu ga Tatagwe ka ditsela tše ruri go thušitše Jesu go boloka lerato la gagwe ka Jehofa le le matla. Balatedi ba bantši ba Kriste ba hweditše gore ga go na selo seo se matlafatšago lerato la bona ka Jehofa goba tumelo ya bona ka yena go feta go bolela ka yena le kholofelo yeo a e neago bao ba mo ratago.

Na o tla Ekiša Lerato la Jesu la go Rata Jehofa?

18. Ke tsela efe ya bohlokwa kudu yeo e nyakegago bakeng sa go latela Jesu, gona ka baka la’ng?

¹⁸ Ditseleng ka moka tšeo di nyakegago e le gore re latele Jesu, ga go na tsela ya bohlokwa kudu go feta ye: Re swanetše go rata Jehofa ka dipelo tša rena ka moka, ka meoya ya rena ka moka, ka menagano ya rena ka moka le ka matla a rena ka moka. (Luka 10:27) Bogolo bja lerato leo ga bo bonagale feela ka maikwelo a rena a tseneletšego, eupša bo bonagala le ka mediro ya rena. Jesu o be a sa kgotsofatšwe ke go fo ikwa a rata Tatagwe goba ke go fo bolela gore: “Ke rata Tate.” O itše: “E le gore lefase le tsebe gore ke rata Tate, ke dira tšeo Tate a ntaetšego gore ke di dire.” (Johane 14:31) Sathane o be a boletše gore ga go na motho yo a bego a tla hlankela Jehofa ka lerato leo le se nago boithati. (Jobo 2:4, 5) E le go nea karabo e kaonekaone polelong e šoro ya Sathane ya go thomeletša, Jesu ka sebete o ile a tšea kgato le go bontšha lefase kamoo a bego a rata Tatagwe. O ile a kwa gaešita le go fihla lehung. Na o tla latela Jesu? Na o tla bontšha lefase gore ruri o rata Jehofa Modimo?

19, 20. (a) Ke mabaka afe a bohlokwa ao a dirago gore re nyake go ba gona ka mehla dibokeng tša Bokriste? (b) Re ka lebelela bjang thuto ya rena ya motho ka noši, go naganišiša le thapelo?

¹⁹ Re na le senyakwa se segolo sa moya sa go bontšha lerato le bjalo. Ka gona Jehofa o lokišeditše gore re mo rapele ka tsela yeo lerato la rena ka Tatago rena le fepšago gabotse le go matlafatšwa. Ge o le dibokeng tša Bokriste, leka go gopola gore o tletše go rapela Modimo wa gago. Dikarolo tša borapedi bjoo di akaretša go ba gona ge go rapelwa ka go tšwa pelong, go opela dikoša tša tumišo, go theetša ka kelohloko le go tšea karolo ge e ba go kgonega. Diboka tše bjalo di go nea le sebaka sa go kgothatša Bakristegotee le wena. (Baheberu 10:24, 25) Go rapela Jehofa ka mehla dibokeng tša Bokriste go tla go thuša go matlafatša le go feta lerato la gago ka Jehofa.

²⁰ Go ka bolelwa selo se se swanago ka go ba le thuto ya motho ka noši, go naganišiša le go rapela. Nagana ka dilo tšeo e le ditsela tša go ba noši le Jehofa. Ge o dutše o ithuta Lentšu la Modimo leo le ngwadilwego gomme o naganišiša ka lona, Jehofa o go utollela dikgopolo tša gagwe. Ge o dutše o rapela, o mo tšhollela pelo ya gago. Gopola gore thapelo e akaretša mo gontši go feta go fo kgopela Modimo dilo. Thapelo e go nea le sebaka sa go leboga Jehofa ka baka la ditšhegofatšo tšeo a go neilego tšona le go mo reta ka baka la mediro ya gagwe e makatšago. (Psalme 146:1) Go oketša moo, go reta Jehofa phatlalatša ka lethabo le phišego ke tsela e kaone ya go leboga Jehofa le go bontšha gore o a mo rata.

21. Go rata Jehofa go bohlokwa gakaaka’ng, gona go tla ahlaahlwa’ng dikgaolong tše di latelago?

²¹ Go rata Modimo ke senotlelo sa bohlokwa sa gore o hwetše lethabo la ka mo go sa felego. Ke sona seo se bego se nyakega e le gore Adama le Efa ba ka atlega—e bile ke sona seo ba paletšwego ke go ba le sona. Ke selo sa bohlokwa kudu seo o se nyakago e le gore o ka kgona go fenya teko le ge e le efe ya tumelo, go ganetša moleko le ge e le ofe le go kgotlelela teko le ge e le efe. Ke karolo ya bohlokwa kudu ya go ba molatedi wa Jesu. Therešo ke gore go rata Modimo go tswalana le go rata moagišani. (1 Johane 4:20) Dikgaolong tše di latelago, re tla ahlaahla kamoo Jesu a ilego a bontšha gore o rata batho. Kgaolong e latelago, re tla ahlaahla lebaka leo batho ba bantši ba bego ba hwetša Jesu a batamelega.