“Jesu . . . o ba Ratile go Fihla Bofelong”

1, 2. Jesu o diriša bjang bošego bja gagwe bja mafelelo le baapostola ba gagwe, gona ke ka baka la’ng metsotso ye ya mafelelo e le ya bohlokwa kudu go yena?

GE A kgobokanya baapostola ba gagwe ka phapošing ya ka godimo ya ntlo e nngwe kua Jerusalema, Jesu o a tseba gore bjo ke bošego bja gagwe bja mafelelo a na le bona. Nako ya gore a boele go Tatagwe e batametše. Moo e ka bago ka diiri tše mmalwa feela, Jesu o tla golegwa gomme tumelo ya gagwe e tla lekwa go feta le ge e le neng pele. Lega go le bjalo, gaešita le lehu la gagwe leo le batamelago ka lebelo ga le mo šitiše gore a hlokomele dinyakwa tša baapostola ba gagwe.

² Jesu o be a šetše a boditše baapostola ba gagwe gore o tlo ba tlogela, eupša o sa dutše a na le mo gontši moo a ka go bolelago go ba matlafaletša seo se letšego ka pele. Ka gona, o diriša metsotso ye ya bohlokwa ya mafelelo go ba ruta dithuto tša bohlokwa kudu tšeo di tla ba thušago go dula ba botega. Mantšu ao a gagwe a balwa gare ga dipolelo tše borutho kudu le tše di kgomago pelo tšeo a kilego a ba botša tšona. Eupša ke ka baka la’ng Jesu a tshwenyegile kudu ka barutiwa ba gagwe go feta yena? Ke ka baka la’ng diiri tše tša mafelelo a na le bona e le tša bohlokwa gakaakaa go yena? Karabo e ka bolelwa ka lentšu letee feela, lerato. O be a ba rata kudu.

3. Re tseba bjang gore Jesu ga se a leta go fihla bošegong bja gagwe bja mafelelo go bontšha gore o rata balatedi ba gagwe?

³ Nywagakgolo ka morago ge a be a thoma go ngwala pego ya gagwe e buduletšwego ya ditiragalo tša bošegong bjoo, moapostola Johane o ngwadile gore: “Gobane Jesu a tsebile pele ga monyanya wa paseka gore nako ya gagwe ya gore a tloge lefaseng le ya gore a ye go Tate e be e tlile, ka ge a ratile ba gagwe bao ba bego ba le lefaseng, o ba ratile go fihla bofelong.” (Johane 13:1) Jesu ga se a leta go ba go fihla bošegong bjoo go bontšha gore o rata “ba gagwe.” Bodireding bja gagwe ka moka, o ile a hlatsela ka ditsela tše di fapafapanego gore o rata barutiwa ba gagwe. Re dira gabotse go hlahloba tše dingwe tša ditsela tšeo a bontšhitšego lerato, ka gobane ka go mo ekiša tabeng ye, re tla itlhatsela re le barutiwa ba gagwe ba kgonthe.

Go Bontšha go se Fele Pelo

4, 5. (a) Ke ka baka la’ng go be go nyakega gore Jesu a bontšhe go se fele pelo ge a dirišana le barutiwa ba gagwe? (b) Jesu o ile a arabela bjang ge baapostola ba gagwe ba bararo ba be ba sa phakgama serapeng sa Getsemane?

⁴ Lerato le sepedišana le go se fele pelo. Bakorinthe ba pele 13:4 e re: “Lerato ga le fele pelo,” gomme go se fele pelo go akaretša go dirišana le ba bangwe ka go ba kgotlelela. Na go be go nyakega gore Jesu a se fele pelo ge a be a dirišana le barutiwa ba gagwe? Ee, go be go nyakega! Go etša ge re bone go Kgaolo 3, baapostola ba be ba tšea nako go hlagolela boikokobetšo. Ka makga a fetago letee, ba ile ba ngangišana ka gore ke mang yo mogolo go bona. Jesu o ile a arabela bjang? Na o ile a galefa gomme a araba ka go tenega goba ka pefelo? Aowa, ka go se fele pelo o ile a fana mabaka le bona, gaešita le ge “ngangišano e šoro” ka taba yeo e ile ya rotoga bošegong bja mafelelo a na le bona!—Luka 22:24-30; Mateo 20:20-28; Mareka 9:33-37.

⁵ Moragonyana bjona bošegong bjoo, ge Jesu a be a le serapeng sa Getsemane le baapostola ba gagwe ba 11 bao ba botegago, go se fele pelo ga gagwe go ile gwa lekwa gape. Jesu o ile a tlogela baapostola ba seswai gomme a tšea Petro, Jakobo le Johane ke moka a ya le bona ka garegare ga serapa. Jesu o ile a ba botša gore: “Moya wa ka o kwele bohloko o šoro, gaešita le go iša lehung. Dulang mo gomme le dule le phakgame.” O ile a ba katoga go se nene gomme a thoma go rapela ka mo go tseneletšego. Ka morago ga go rapela sebaka se setelele, o ile a boela go baapostola ba gagwe ba bararo. O ile a hwetša’ng? Nakong ye, e lego iring ya gagwe ya teko e šoro, ba be ba ile ka boroko! Na o ile a ba galefela ka ge ba se ba ka ba dula ba phakgame? Aowa, o ile a ba kgothatša ka go se fele pelo. Mantšu a gagwe a botho a ile a bontšha gore o kwešiša kgateletšo yeo ba lebeletšanego le yona gotee le mafokodi a bona.a O itše: “Moya o mafolofolo eupša nama e a fokola.” Jesu o ile a se fele pelo bošegong bjoo, gaešita le ge ka makga a fetago le tee a ile a re ge a boa a ba hwetša ba robetše!—Mateo 26:36-46.

6. Re ka ekiša Jesu bjang ge re dirišana le ba bangwe?

⁶ Go a kgothatša go tseba gore Jesu ga se a ka a hlapela baapostola ba gagwe diatla. Mafelelong go se fele pelo ga gagwe go ile gwa ba le mafelelo a mabotse, ka ge banna ba bao ba botegago ba ile ba ithuta bohlokwa bja boikokobetšo le bja go dula ba phakgame. (1 Petro 3:8; 4:7) Re ka ekiša Jesu bjang ge re dirišana le ba bangwe? Bagolo ka mo go kgethegilego ba swanetše go se fele pelo. Badumedigotee le bona ba ka ba batamela ka mathata a bona mola ba lapile goba ba šitišwa ke mathata a bona ka noši. Ka dinako tše dingwe, bao ba swanetšego go thušwa ba ka tšea nako pele ba diriša keletšo yeo ba e newago. Lega go le bjalo, bagolo bao ba sa felego pelo ba tla ruta “ka boleta” le go “[swara] mohlape ka bonolo.” (2 Timotheo 2:24, 25; Ditiro 20:28, 29) Batswadi le bona ba dira gabotse go ekiša Jesu ka go se fele pelo, ka ge ka dinako tše dingwe bana ba ka tšea nako pele ba diriša keletšo goba phošollo yeo ba e neilwego. Lerato le go se fele pelo di tla thuša batswadi gore ba se kgaotše maiteko a bona a go tlwaetša bana ba bona. Meputso ya go se fele pelo mo go bjalo e ka ba e megolo kudu.—Psalme 127:3.

Go Hlokomela Dinyakwa tša Bona

7. Jesu o ile a hlokomela bjang dinyakwa tša nama tša barutiwa ba gagwe?

⁷ Lerato le bonagala ka ditiro tša go hloka boithati. (1 Johane 3:17, 18) “Ga le nyake tša go ikhola.” (1 Bakorinthe 13:5) Lerato le tutueleditše Jesu go hlokomela dinyakwa tša nama tša baapostola ba gagwe. Gantši o be a ba direla dilo le pele ba ka bolela dinyakwa tša bona. Ge a be a bona gore ba lapile o ile a šišinya gore ba ye le yena “ka thopeng lefelong le le lego lekatana [ba khutše] go se nene.” (Mareka 6:31) Ge a lemoga gore ba be ba swerwe ke tlala, o ile a gata mogato wa pele wa go ba fepa—gotee le ba bangwe ba diketekete bao ba bego ba tlile go mo theetša ge a ruta.—Mateo 14:19, 20; 15:35-37.

8, 9. (a) Ke’ng seo se bontšhago gore Jesu o be a lemoga dinyakwa tša barutiwa ba gagwe le go di kgotsofatša? (b) Ge Jesu a be a kokotetšwe koteng, o ile a bontšha bjang gore o be a tshwenyegile kudu ka go phela gabotse ga mmagwe?

⁸ Jesu o ile a lemoga dinyakwa tša moya tša barutiwa ba gagwe ke moka a di kgotsofatša. (Mateo 4:4; 5:3) Ge a be a ruta o be a ba šetša ka mo go kgethegilego. Thuto ya Thabeng e ile ya newa go hola barutiwa ba gagwe ka mo go kgethegilego. (Mateo 5:1, 2, 13-16) Ge a be a ruta ka diswantšho, “o be a ba hlalosetša dilo ka moka thopeng.” (Mareka 4:34) Jesu o ile a kgetha “mohlanka yo a botegago le wa temogo” go kgonthišetša gore balatedi ba Gagwe ba fepša gabotse moyeng ka morago ga gore A boele legodimong. Sehlopha se sa mohlanka, seo se bopšago ke bana babo Jesu bao ba tloditšwego ka moya lefaseng, se be se dutše se nea “dijo tša [moya] ka nako e swanetšego” ga e sale go tloga lekgolong la pele la nywaga C.E.—Mateo 24:45.

⁹ Letšatšing la go hwa ga gagwe, Jesu o ile a bontšha ka tsela yeo e kgomago pelo gore o tshwenyega ka bomoya bja batho bao a ba ratago. Akanya ka tiragalo e latelago. Jesu o be a le koteng ya tlhokofatšo, a kgotleletše bohloko bjo bo tseneletšego kudu. E le gore a goge moya, go molaleng gore o be a swanetše go kukela mmele wa gagwe godimo ka maoto a gagwe. Ga go pelaelo gore seo se mmaketše bohloko bjo bo tseneletšego wa go šiiša ge boima bja mmele wa gagwe bo be bo dira gore a gagolwe ke dipikiri tšeo di lego dinaong mola mokokotlo wa gagwe wo o nago le dintho tše di bulegilego o be o gohlwa ke kota. Go bolela go swanetše go ba go be go le thata kudu e bile go le bohloko, ka ge go akaretša go goga moya. Lega go le bjalo, pele a ehwa, Jesu o boletše mantšu ao a bego a bontšha gore o rata Maria mmagwe ka mo go tseneletšego. Ge a bona Maria le moapostola Johane ba eme kgauswi le yena, Jesu o ile a bolela ka lentšu le le phagamego ka mo go lekanego moo batho bao ba emego kgauswi ba ka mo kwago, a re go mmagwe: “Wena mosadi, bona morwa wa gago!” Ka morago ga moo a re go Johane: “Bona mmago!” (Johane 19:26, 27) Jesu o be a tseba gore moapostola yo yo a botegago o be a ka se hlokomele feela dinyakwa tša Maria tša nama eupša o be a tla hlokomela le tša moya.b

10. Batswadi ba ka ekiša Jesu bjang ge ba dutše ba hlokomela dinyakwa tša bana ba bona?

¹⁰ Batswadi bao ba nago le lerato ba hwetša e le gabohlokwa go naganišiša ka mohlala wa Jesu. Tate yo a tlogago a rata lapa la gagwe o tla le fepa gabotse ka dilo tša nama. (1 Timotheo 5:8) Ka dinako tše dingwe dihlogo tša malapa tšeo di nago le tekatekano di dira gore go be le nako ya go khutša le go itapološa. Sa bohlokwa le go feta, batswadi ba Bakriste ba kgotsofatša dinyakwa tša moya tša bana ba bona. Bjang? Batswadi ba bjalo ba lokišetša gore go be le borapedi bja lapa, gomme ba katanela go dira gore thuto e bjalo e be yeo e agago le yeo bana ba bona ba e thabelago. (Doiteronomio 6:6, 7) Ka mantšu le ka ditiro, batswadi ba ruta bana ba bona gore bodiredi ke bja bohlokwa le gore go lokišetša diboka tša Bokriste le go ba go tšona ke karolo ya bohlokwa kudu ya borapedi bja bona bja ka mehla.—Baheberu 10:24, 25.

Go Ikemišetša go Lebalela

11. Jesu o ile a ruta balatedi ba gagwe eng mabapi le tebalelo?

¹¹ Tebalelo ke sebopego sa lerato. (Bakolose 3:13, 14) Bakorinthe ba pele 13:5 e re lerato “ga le boloke pego ya bobe.” Mabakeng a mmalwa, Jesu o rutile balatedi ba gagwe bohlokwa bja go lebalela. O ba kgothaleditše gore ba lebalele ba bangwe “e sego go fihla gašupa, eupša go fihla ga masomešupa-šupa”—seo se bolelago gore ba lebalele ka makga a sa balegego. (Mateo 18:21, 22) O ba rutile gore modiradibe o swanetše go lebalelwa ge e ba ka morago ga gore a kgalemelwe a bontšha go itshola. (Luka 17:3, 4) Lega go le bjalo, Jesu o be a sa swane le Bafarisei ba baikaketši, bao ba bego ba ruta ka mantšu feela; o be a ruta le ka mohlala. (Mateo 23:2-4) Anke re boneng kamoo Jesu a ilego a bontšha gore o ikemišeditše go lebalela gaešita le ge mogwera wa gagwe yo a botegago a ile a mo nyamiša.

12, 13. (a) Petro o ile a nyamiša Jesu bjang bošegong bja go golegwa ga Gagwe? (b) Ditiro tša Jesu tša ka morago ga tsogo ya gagwe di bontšhitše bjang gore o dirile seo se fetago feela go fo bolela ka tebalelo?

¹² Jesu o be a na le tswalano ya kgauswi le moapostola Petro, e lego monna wa pelo e botse yoo ka dinako tše dingwe a bego a dira dilo pele a nagana. Jesu o ile a lemoga dika tše dibotse tšeo Petro a bego a na le tšona ke moka a mo nea ditokelo tše di kgethegilego. Petro gotee le Jakobo le Johane, ba ile ba bona ka nama mehlolo e mengwe yeo e sa kago ya bonwa ke ba bangwe ba barutiwa ba 12. (Mateo 17:1, 2; Luka 8:49-55) Go etša ge re bone pejana, Petro e be e le yo mongwe wa baapostola bao ba ilego ba ya le Jesu ka garegare ga serapa sa Getsemane bošegong bja go golegwa ga Gagwe. Lega go le bjalo, bjona bošegong bjoo ge Jesu a be a ekwa gomme a swarwa, Petro le baapostola ba bangwe ba ile ba tlogela Jesu ke moka ba tšhaba. Ka moragonyana, Petro o ile a ba le sebete se se lekanego sa go ema ka ntle ge Jesu a be a sekišwa ka tsela e sego molaong. Lega go le bjalo, Petro ka morago o ile a boifa ke moka a dira phošo e kgolo—o ile a latola ka makga a mararo gore o tseba Jesu! (Mateo 26:69-75) Jesu o ile a arabela bjang? Wena o be o tla arabela bjang ge e ba mogwera wa gago wa kgonthe a ile a go nyamiša ka tsela ye?

¹³ Jesu o be a ikemišeditše go lebalela Petro. O be a tseba gore Petro o be a nyamišitšwe kudu ke sebe seo a se dirilego. Ge e le gabotse, moapostola yo yo a itshotšego o ile a “hlabega a napa a lla.” (Mareka 14:72) Letšatšing la tsogo ya gagwe, Jesu o ile a iponagatša go Petro, gomme go ka direga gore o be a tletše go mo homotša le go mo kgothatša. (Luka 24:34; 1 Bakorinthe 15:5) Ka tlase ga dikgwedi tše pedi ka morago, Jesu o ile a hlompha Petro ka go mo dumelela gore a etelele pele go neeng bohlatse pele ga mašaba ka letšatši la Pentekoste. (Ditiro 2:14-40) Anke re gopoleng gape gore Jesu ga se a ka a bolokela baapostola ba gagwe ka moka sekgopi ka ge ba ile ba mo hlanogela. Ka go fapana le moo, ka morago ga tsogo ya gagwe, o be a dutše a ba bitša “bana bešo.” (Mateo 28:10) Na ga go molaleng gore Jesu o dirile mo gontši kudu go feta go fo bolela ka tebalelo?

14. Ke ka baka la’ng re swanetše go ithuta go lebalela ba bangwe, gona re ka bontšha bjang gore re ikemišeditše go lebalela?

¹⁴ Ka ge re le barutiwa ba Kriste, re swanetše go ithuta go lebalela ba bangwe. Ka baka la’ng? Ka go fapana le Jesu, ga se ra phethagala—go etša batho bao ba re direlago diphošo. Ka dinako tše dingwe, ka moka re kgopša ka lentšu goba ka ditiro. (Baroma 3:23; Jakobo 3:2) Ka go lebalela ba bangwe ge e ba go dira bjalo go swanela, re bula tsela ya gore Modimo a re lebalele dibe tša rena. (Mareka 11:25) Ka gona, re ka bontšha bjang gore re ikemišeditše go lebalela bao ba re direlago diphošo? Mabakeng a mantši, lerato le re thuša go hlokomologa dibe tše dinyenyane le mafokodi a ba bangwe. (1 Petro 4:8) Ge e ba bao ba re diretšego diphošo ba tloga ba itshola go etša Petro, ruri re nyaka go ekiša Jesu ka go ikemišetša go ba lebalela. Go e na le go boloka sekgopi, ka bohlale re kgetha go ba lebalela ka bolokologi. (Baefeso 4:32) Ka go dira bjalo, re tlaleletša tabeng ya gore go be le khutšo ka phuthegong gotee le gore re be le khutšo ya monagano le ya pelo.—1 Petro 3:11.

Go Bontšha Potego ya Gagwe

15. Ke ka baka la’ng Jesu a ile a bota baapostola ba gagwe go sa šetšwe mafokodi a bona?

¹⁵ Lerato le tswalana kudu le potego. Lerato “le dumela tšohle.”c (1 Bakorinthe 13:7) A tutuetšwa ke lerato, Jesu o ile a bontšha gore o ikemišeditše go bota barutiwa ba gagwe go sa šetšwe go se phethagale ga bona. O be a ba bota gomme a dumela gore ka dipelong tša bona ba be ba tloga ba rata Jehofa e bile ba nyaka go dira thato ya Gagwe. Gaešita le ge ba be ba dira diphošo, Jesu ga se a ka a belaela maikemišetšo a bona. Ka mohlala, nakong ya ge go be go le molaleng gore moapostola Jakobo le Johane ba dirile gore mmago bona a ba kgopelele go dula kgauswi le Jesu Mmušong wa gagwe, Jesu ga se a ka a belaela potego ya bona goba a ba botša gore ga e sa le baapostola.—Mateo 20:20-28.

16, 17. Jesu o neile barutiwa ba gagwe boikarabelo bofe?

¹⁶ Go bontšha gore Jesu o bota barutiwa ba gagwe, o ile a ba nea boikarabelo bjo bo fapafapanego. Mabakeng a mabedi ge a be a oketša dijo ka mohlolo gomme a fepa mašaba, o ile a nea barutiwa ba gagwe boikarabelo bja go di aba. (Mateo 14:19; 15:36) Ge a be a lokišetša Paseka ya gagwe ya mafelelo, o ile a abela Petro le Johane boikarabelo bja gore ba ye Jerusalema gomme ba lokiše dilo. Ba ile ba ikarabela ka go hwetša kwana, beine, senkgwa seo se sa omelwago, merogo ya go galaka gotee le dilo le ge e le dife tšeo di bego di nyakega. Ye e be e se kabelo e nyenyane, ka ge go keteka Paseka ka tsela ya maleba e be e le selo seo se bego se nyakwa ke Molao wa Moshe, gomme Jesu o be a swanetše go latela Molao woo. Ka ntle le moo, ka morago bošegong bjoo Jesu o ile a diriša beine le senkgwa seo se sa omelwago e le dika tša bohlokwa ge a be a thoma Segopotšo sa lehu la gagwe.—Mateo 26:17-19; Luka 22:8, 13.

¹⁷ Jesu o bone e le mo go swanetšego go nea barutiwa ba gagwe boikarabelo bjo bohlokwa kudu. Go etša ge re bone pejana, o neile balatedi ba gagwe bao ba tloditšwego mo lefaseng boikarabelo bjo bohlokwa bja go aba dijo tša moya. (Luka 12:42-44) Gopola gape gore o neile barutiwa ba gagwe taelo ya bohlokwa ya go bolela ditaba tše dibotse le go dira barutiwa. (Mateo 28:18-20) Gaešita le ge gona bjale a sa bonagale gomme a buša a le legodimong, Jesu o neile “dimpho [tšeo di swanelegago tša moya] tšeo e lego banna” boikarabelo bja go hlokomela phuthego ya gagwe ya lefaseng.—Baefeso 4:8, 11, 12.

18-20. (a) Re ka bontšha bjang gore re bota badumedigotee le rena le go ba holofela? (b) Re ka ekiša bjang tsela ya Jesu ya go aba boikarabelo ka go rata? (c) Go tla ahlaahlwa’ng kgaolong e latelago?

¹⁸ Re ka latela bjang mohlala wa Jesu ge re dirišana le ba bangwe? Go bota badumedigotee le rena gotee le go ba holofela ke pontšho ya gore re a ba rata. Anke re gopoleng gore lerato le lebelela se sebotse go ba bangwe e sego se sebe. Ge ba bangwe ba re nyamiša, e lego selo seo se tla diregago nako le nako, lerato le tla re thuša go phema go nagana ka lepotlapotla gore maikemišetšo a bona ke a mabe. (Mateo 7:1, 2) Ge e ba re lebelela tše dibotse go badumedigotee le rena, re tla ba swara ka ditsela tšeo di agago go e na le tšeo di phušolago.—1 Bathesalonika 5:11.

¹⁹ Na re ka ekiša tsela ya Jesu ya go aba boikarabelo ka go rata? Bao ba nago le maemo a boikarabelo ka phuthegong ba a holega ge ba abela ba bangwe dikabelo tšeo di swanetšego le tšeo di phethago morero o itšego, gomme ba bota gore ba tla dira sohle seo ba ka se kgonago. Ka go re’alo, bagolo bao ba nago le phihlelo ba ka nea banna ba bafsa bao ba ‘katanelago’ go thuša ka phuthegong tlwaetšo e nyakegago le ya bohlokwa. (1 Timotheo 3:1; 2 Timotheo 2:2) Tlwaetšo yeo ke ya bohlokwa kudu. Ge Jehofa a tšwela pele go akgofiša kgolo ya modiro woo re o dirago bakeng sa Mmušo wa gagwe, go tla nyakega gore banna bao ba swanelegago ba tlwaetšwe go hlokomela kgolo yeo.—Jesaya 60:22.

²⁰ Jesu o re beetše mohlala o mobotse kudu wa go rata ba bangwe. Ditseleng ka moka tšeo re ka mo latelago ka tšona, go ekiša lerato la gagwe ke tsela ya bohlokwa kudu. Kgaolong e latelago, re tla ahlaahla pontšho e kgolo kudu ya gore o a re rata—boikemišetšo bja gagwe bja go re hwela.