KAROLO 2

Paradeise e a Lahlega

Morongwa wa lerabele o tutuetša monna wa pele le mosadi, Adama le Efa, gore ba gane pušo ya Modimo. Ka baka leo, sebe le lehu di tsena lefaseng

NAKO e telele pele a bopa batho, Modimo o ile a bopa dibopiwa tše dintši tše sa bonagalego tša moya—barongwa. Kua Edene, morongwa wa lerabele yoo ka morago a ilego a tsebja e le Sathane Diabolo, ka boradia o ile a leka Efa gore a je seenywa sa sehlare seo Modimo a itšego ba se ke ba ja dienywa tša sona.

A diriša noga e le mmoleledi wa gagwe, Sathane o ile a re Modimo o be a tima mosadi yoo le monna wa gagwe selo se itšego seo se kgahlišago. Morongwa yoo o ile a botša Efa gore yena le monna wa gagwe ba ka se hwe ge ba ka ja seenywa seo se ileditšwego. Ka go rialo, Sathane o ile a latofatša Modimo ka gore o boditše bana ba Gagwe ba batho maaka. Ramaaka yo o ile a dira gore go se kwe Modimo go bonale e le tsela e kgahlišago yeo e bego e tla ba nea tsebo e kgethegilego le tokologo. Eupša tšeo ka moka e be e le maaka—ge e le gabotse, e be e le maaka a mathomo a kilego a bolelwa lefaseng. Taba yeo ge e le gabotse e bego e belaelwa mo e be e le bobuši goba pušo ya Modimo e phagamego—gore na Modimo o na le tshwanelo ya go buša le gore na o buša ka tsela e lokilego le yeo e holago balata ba gagwe.

Efa o ile a dumela maaka a Sathane. O ile a thoma go kganyoga seenywa seo gomme a se ja. Ka morago o ile a se nea monna wa gagwe gomme le yena a se ja. Ka go rialo, ba ile ba fetoga badiradibe. Ge e le gabotse, tiro yeo e bonolo e be e le pontšho ya borabele. Ka go kgetha ka boomo go se kwe taelo ya Modimo, Adama le Efa ba ile ba gana go bušwa ke Mmopi yo a bego a ba neile dilo tšohle, go akaretša le bophelo bjo bo phethagetšego.

Modimo o ile a ahlola marabele ao ka baka la ditiro tša ona. O ile a bolela e sa le pele ka go tla ga Peu e holofeditšwego goba Mohlakodiši yo a bego a tla fediša Sathane yo a bego a emelwa ke noga. Modimo o ile a diegiša go phethagatšwa ga kahlolo ya lehu go Adama le Efa ka nako e itšego gomme ka go rialo a bontšha bana ba bona bao ba sešogo ba belegwa kgaugelo. Bana bao ba be ba tla ba le motheo wa kholofelo ka gobane Yoo Modimo a bego a tla mo romela lefaseng o be a tla fediša ditla-morago tše kotsi tšeo di thomilwego ke borabele bja Edene. Gore morero wa Modimo mabapi le Mophološi yo wa nakong e tlago o be o tla phethagatšwa bjang—le gore Yoo a tlago go rongwa e tla ba mang—go ile gwa utollwa ganyenyane-ganyenyane ge Beibele e be e dutše e ngwalwa.

Modimo o ile a leleka Adama le Efa Paradeiseng. Ba be ba tla swanelwa ke go šoma ka thata e le gore ba hwetše dijo mmung o lego ka ntle ga tšhemo ya Edene. Ke moka Efa o ile a ima gomme a belega Kaine, e lego leitšibulo la gagwe le Adama. Banyalani ba ba ile ba ba le barwa ba bangwe le barwedi, go akaretša Abele le Sethe, e lego rakgolokhukhu wa Noa.

—E theilwe go Genesi dikgaolo 3 go ya go 5; Kutollo 12:9.

◼ Maaka a mathomo e bile afe, gona a boletšwe ke mang?

◼ Adama le Efa ba lahlegetšwe ke Paradeise bjang?

◼ Ge Modimo a be a ahlola marabele ka baka la ditiro tša ona, o ile a nea lebaka lefe la go ba le kholofelo?

[Seswantšho go letlakala 5]

Peu “e tlo Xo phšatla hlôxô; ’me wêna O tlo e loma serêthê.” —Genesi 3:15

[Lepokisi go letlakala 5]

Go Se Phethagale Le Lehu

Modimo o bopile Adama le Efa ba phethagetše, ba e-na le tebelelo ya go phela ka mo go sa felego Paradeiseng. Ba ile ba dira sebe ge ba be ba rabela kgahlanong le Modimo. Ka go rialo, Adama le Efa ba ile ba lahlegelwa ke boemo bja go phethagala gomme ba senya tswalano ya bona le Mothopo wa bophelo, Jehofa. Go tloga ka nako yeo go ya pele, bona gotee le ditlogolwana tša bona tše sa phethagalago ba be ba ka se pheme go dira sebe le gore mafelelong ba hwe.—Baroma 5:12.

[Seswantšho go letlakala 5]

Genesi ●

Ekisodo

Lefitiko

Numeri

Doiteronomio

Jošua

Baahlodi

Ruthe

1 Samuele

2 Samuele

1 Dikxoši

2 Dikxoši

1 Koronika

2 Koronika

Esera

Nehemia

Esitere

Jobo

Dipsalme

Diema

Mmoledi

Sefela sa Difela

Jesaya

Jeremia

Dillo tša Jeremia

Hesekiele

Daniele

Hosea

Maleaki

Mateo

Mareka

Luka

Johane

Ditiro

Baroma

1 Bakorinthe

2 Bakorinthe

Bagalatia

Baefeso

Bafilipi

Bakolose

1 Bathesalonika

2 Bathesalonika

1 Timotheo

2 Timotheo

Tito

Filemone

Baheberu

Jakobo

1 Petro

2 Petro

1 Johane

2 Johane

3 Johane

Juda

Kutollo