Sehlopha se Bušago se Šoma Bjang Lehono?

Lekgolong la pele la nywaga, sehlopha se senyenyane, “baapostola le bagolo Jerusalema,” se be se hlankela e le sehlopha se bušago bakeng sa go dira diphetho tše bohlokwa legatong la phuthego ka moka ya Bakriste ba tloditšwego. (Ditiro 15:2) Ge se be se dira phetho yeo se dumelelanago ka yona, e be e le ge se boledišane ka seo Mangwalo a se bolelago le go latela tlhahlo ya moya wa Modimo. (Ditiro 15:25) Go latelwa mokgwa woo lehono.

Se dirišwa ke Modimo go dira thato ya gagwe. Bana babo rena ba tloditšwego bao ba hlankelago Sehlopheng se Bušago ba bontšha kgahlego e tseneletšego Lentšung la Modimo gomme ba na le phihlelo e kgolo tabeng ya go swaragana le ditaba tša mabapi le mediro e mengwe le tša moya. Ba kopana bekeng e nngwe le e nngwe bakeng sa go ahlaahla dinyakwa tša borwarre bja lefase ka bophara. Go swana le lekgolong la pele la nywaga, ditaelo tšeo di theilwego Beibeleng di newa ka mangwalo goba ka go diriša balebeledi ba basepedi le ba bangwe. Se se kgothaletša batho ba Modimo go nagana le go dira dilo ka botee. (Ditiro 16:4, 5) Sehlopha se Bušago se okamela modiro wa go lokišetša dijo tša moya, se kgothaletša bohle go etiša modiro wa go bolela ka Mmušo pele le go okamela go kgethelwa ga bana babo rena maemong a boikarabelo.

Se dira dilo ka go dumelelana le tlhahlo ya moya wa Modimo. Sehlopha se Bušago se hlahlwa ke Mmuši wa Legohle, Jehofa, le Hlogo ya phuthego, Jesu. (1 Bakorinthe 11:3; Baefeso 5:23) Ditho tša sona ga di itšee e le baetapele ba batho ba Modimo. Tšona gotee le Bakriste ka moka ba tloditšwego, “ba [latela] Kwana [Jesu] kae le kae mo e yago gona.” (Kutollo 14:4) Sehlopha se Bušago se leboga kudu ge re se rapelela.

• Ke bomang bao ba bego ba le sehlopheng se bušago lekgolong la pele la nywaga?

• Sehlopha se Bušago se tsoma tlhahlo ya Modimo bjang?