Kamoo Phuthego e Rulagantšwego le go Okamelwa ka Gona

LENGWALONG la pele leo moapostola Paulo a le ngwaletšego Bakorinthe, o boletše therešo e itšego e bohlokwa mabapi le Modimo. Paulo o ngwadile gore: “Modimo ga se Modimo wa tlhakatlhakano eupša ke wa khutšo.” Ke moka o ile a bolela ka diboka tša phuthego gore: “Dilo ka moka di dirwe ka bothakga le ka thulaganyo.”—1 Bakor. 14:33, 40.

² Mathomong a lona lengwalo leo, moapostola yo o ile a nea keletšo mabapi le dikarogano tšeo di bego di le gona ka phuthegong ya Korinthe. Paulo o ile a kgothaletša bana babo rena ba phuthegong yeo gore ba “bolele ka go dumelelana,” le gore e “be batee ka mo go feletšego monaganong o swanago le tseleng e swanago ya go nagana.” (1 Bakor. 1:10, 11) Ke moka o ile a ba nea keletšo ditabeng tše di fapafapanego tšeo di bego di kgoma botee bja phuthego. O ile a bapiša phuthego le mmele wa motho go bontšha gore botee le tirišano di a nyakega. O ile a kgothaletša bohle ka phuthegong ya Bokriste gore ba hlokomelane ka lerato go sa šetšwe gore ba na le maikarabelo afe. (1 Bakor. 12:12-26) Ge ditho tša phuthego di be di ka dirišana ka botee, go be go tla ba le thulaganyo ka phuthegong.

³ Eupša phuthego ya Bokriste e be e swanetše go rulaganywa bjang? Ke mang yoo a bego a tla e rulaganya? E be e tla rulaganywa ka tsela efe? Ke bomang bao ba bego ba tla hlankela maemong a boikarabelo? Ka go dumelela Beibele gore e re hlahle, re hwetša dikarabo tše di kwagalago tša dipotšišo tše.—1 Bakor. 4:6.

PHUTHEGO YA BOKRISTE E RULAGANTŠWE KA TSELA YEO MODIMO A E AMOGELAGO

⁴ Phuthego ya Bokriste e hlomilwe ka letšatši la Pentekoste ya ngwaga wa 33 C.E. Ke’ng seo re ka ithutago sona ka phuthego ya lekgolong la pele la mengwaga? E be e rulagantšwe le go okamelwa ka tsela ya pušo ya Modimo, ke gore, e bušwa (Segerika, kraʹtos) ke Modimo (the·osʹ). Mantšu a a mabedi a Segerika a tšwelela go Petro wa Pele 5:10, 11. Pego e buduletšwego ya mabapi le seo se diragetšego Jerusalema mengwageng e ka bago e 2000 e fetilego e bontšha gabotse gore phuthego ya Bakriste ba tloditšwego e ile ya hlongwa ke Modimo. (Dit. 2:1-47) E be e le moago wa gagwe, ntlo ya gagwe. (1 Bakor. 3:9; Baef. 2:19) Phuthego ya lehono ya Bokriste e latela mokgwa woo phuthego ya lekgolong la pele la mengwaga e bego e rulagantšwe ka yona le go okamelwa.

⁵ Phuthego ya lekgolong la pele la mengwaga e thomile e na le barutiwa ba e ka bago ba 120. Barutiwa bao ke bona ba ilego ba tšhollelwa moya o mokgethwa pele, e le go phethagala ga Joele 2:28, 29. (Dit. 2:16-18) Eupša lona letšatšing leo, batho ba bangwe ba e ka bago ba 3000 ba ile ba kolobetšwa ka meetseng gomme ya ba ditho tša phuthego ya bao ba tloditšwego ka moya. Ba ile ba amogela lentšu la mabapi le Kriste gomme “ba tšwela pele ba ikgafela thutong ya baapostola.” Ka morago ga moo, “Jehofa [o ile] a tšwela pele a ba oketša letšatši le letšatši ka bao ba bego ba phološwa.”—Dit. 2:41, 42, 47.

⁶ Phuthego ya kua Jerusalema e be e gola kudu moo moperisita yo a phagamego wa Bajuda a ilego a lla ka gore barutiwa ba be ba tladitše Jerusalema ka thuto ya bona. Barutiwa bao ba bafsa ba be ba akaretša le baperisita ba bantši ba Bajuda bao ba ilego ba ba karolo ya phuthego.—Dit. 5:27, 28; 6:7.

⁷ Jesu o itše: “Le tla ba dihlatse tša ka Jerusalema, Judea ka moka le Samaria le go fihla karolong ya kgole ya lefase.” (Dit. 1:8) Seo se ile sa direga ka gobane ge go be go tsoga tlaišo e kgolo kua Jerusalema ka morago ga lehu la Stefano, barutiwa bao ba bego ba dula moo ba ile ba tšhabela ditikologong tša Judea le Samaria. Eupša kae le kae moo ba bego ba eya gona, ba be ba tšwela pele ba bolela ditaba tše dibotse le go dira barutiwa ba oketšegilego. Ba ile ba botša le Basamaria ditaba tšeo tše dibotse. (Dit. 8:1-13) Ka morago ga moo, ditaba tše dibotse di ile tša bolelwa le go bao ba sa bollago, e lego batho bao e bego e se Bajuda. (Dit. 10:1-48) Modiro wo ka moka wa boboledi o ile wa feleletša ka go dirwa ga barutiwa ba bantši gomme wa dira gore go hlongwe diphuthego tše difsa ka ntle ga Jerusalema.—Dit. 11:19-21; 14:21-23.

⁸ Go ile gwa dirwa dithulaganyo dife go kgonthišetša gore phuthego e nngwe le e nngwe e mpsha e rulagantšwe le go okamelwa ka tsela ya Modimo, ke gore ka tsela ya pušo ya Modimo? Modimo o ile a diriša moya wa gagwe o mokgethwa go kgetha badiši gore ba hlokomele mohlape wa gagwe. Diphuthegong tšeo Paulo le Baranaba ba ilego ba di etela leetong la bona la pele la boromiwa, ba ile ba kgetha bagolo. (Dit. 14:23) Mongwadi wa Beibele e lego Luka o ile a laodiša seo se ilego sa direga ge Paulo a be a swere seboka le bagolo ba phuthego ya Efeso. Paulo o itše go bona: “Itlhokomeleng gomme le hlokomeleng le mohlape ka moka woo moya o mokgethwa o le beilego balebeledi gare ga ona, gore le diše phuthego ya Modimo yeo a e rekilego ka madi a Morwa wa gagwe.” (Dit. 20:17, 28) Ba ile ba swanelega gore e be bagolo ka gobane ba be ba fihleletše dinyakwa tša Mangwalo. (1 Tim. 3:1-7) Tito yo a bego a šoma gotee le Paulo o ile a newa matla a go kgetha bagolo diphuthegong tša Kereta.—Tito 1:5.

⁹ Ge diphuthego tše di oketšegilego di dutše di hlongwa, baapostola le bagolo kua Jerusalema ba ile ba tšwela pele ba hlankela e le balebeledi bao ba okamelago phuthego ya Bokriste yeo e bego e akaretša batho ba ditšhaba ka moka ya lekgolong la pele la mengwaga. Ba be ba hlankela e le sehlopha sa yona se bušago.

¹⁰ Ge moapostola Paulo a be a ngwalela phuthego ya Efeso, o ile a hlalosa gore ge phuthego ya Bokriste e ka dirišana le moya wa Modimo, e ka dula e le boteeng ka go latela bohlogo bja Jesu Kriste. Moapostola yo o ile a kgothaletša Bakriste ba moo gore ba ithute go ba le boikokobetšo le go boloka “botee bja moya” ge ba kopana ka khutšo le ditho ka moka tša phuthego. (Baef. 4:1-6) Ke moka o ile a tsopola Psalme 68:18 gomme a bontšha gore e bolela ka banna bao ba swanelegago moyeng bao Jehofa a ba kgethilego gore ba hlokomele phuthego e le baapostola, baporofeta, baebangedi, badiši le barutiši. Ka ge banna ba bjalo e le dimpho tše di tšwago go Jehofa, ba be ba tla aga phuthego ka moka gore e gole moyeng ka tsela yeo e bego e tla kgahliša Modimo.—Baef. 4:7-16.

DIPHUTHEGO LEHONO DI LATELA MOKGWA WA BAAPOSTOLA

¹¹ Lehono, diphuthego ka moka tša Dihlatse tša Jehofa di latela thulaganyo e swanago. Ka moka ga tšona di bopa phuthego ya lefase ka bophara yeo e nago le botee yeo dikokwane tša yona e lego batlotšwa. (Sak. 8:23) Jesu Kriste ke yena a dirago gore se se kgonege. Go etša ge a holofeditše, ka potego o bile le barutiwa ba gagwe ba tloditšwego “matšatši ka moka go fihla bofelong bja tshepedišo ya dilo.” Batho bao ba thušwago go tla ka phuthegong ye yeo e golago ba amogela ditaba tše dibotse tša Modimo, ba neela maphelo a bona go Jehofa gomme ba kolobetšwa gore e be barutiwa ba Jesu. (Mat. 28:19, 20; Mar. 1:14; Dit. 2:41) Ba a kwešiša gore Jesu Kriste, yena “modiši yo boleta,” ke Hlogo ya mohlape ka moka woo o bopšago ke Bakriste ba tloditšwego gotee le “dinku tše dingwe.” (Joh. 10:14, 16; Baef. 1:22, 23) ‘Mohlape woo o tee’ o dula o na le botee ka go amogela ka potego bohlogo bja Kriste le ka go ikokobeletša bao ba etelelago pele, e lego “mohlanka yo a botegago le wa temogo,” yoo Kriste a mo kgethilego. Eka re ka tšwela pele re bontšha gore re bota mohlanka yo ka mo go feletšego.—Mat. 24:45.

TEMA YEO E KGATHWAGO KE MEKGATLO YA SEMMUŠO YA BODUMEDI BJA RENA

¹² Mokgatlo o na le mekgatlo e itšego ya semmušo e le gore o kgone go aba dijo tša moya ka nako e swanetšego le go re thuša go bolela ditaba tše dibotse tša Mmušo wa Modimo pele bofelo bo fihla. Mekgatlo ye ya semmušo e ngwadišitšwe semolao dinageng tše di fapafapanego e bile e a dirišana. E thuša gore re kgone go bolela ditaba tše dibotse lefaseng ka bophara.

KAMOO OFISI YA LEKALA E RULAGANTŠWEGO KA GONA

¹³ Ka mehla ge ofisi ya lekala e hlongwa, go kgethwa Komiti ya Lekala yeo e bopšago ke bagolo ba bararo goba go feta moo gore ba okamele modiro wa nageng goba dinageng tšeo ba di hlokometšego. Yo mongwe wa ditho tša komiti yeo o hlankela e le molomaganyi wa Komiti ya Lekala.

¹⁴ Diphuthego tšeo di welago ka tlase ga lekala le lengwe le le lengwe di rulaganywa ka ditikologo. Ditikologo tšeo ga di lekane, go ithekgile ka bogolo bja naga, leleme le palo ya diphuthego tšeo di welago ka tlase ga lekala leo. Mokgatlo o kgetha molebeledi wa tikologo gore a hlokomele diphuthego tše di lego tikologong e nngwe le e nngwe gotee le go mo nea ditaelo tša gore a šome bjang.

¹⁵ Diphuthego di latela dithulaganyo tše tša mokgatlo tšeo di diretšwego go hola batho ka moka. Di amogela go kgethwa ga bagolo bao ba okametšego modiro makaleng, ditikologong le diphuthegong. Di ithekgile ka mohlanka yo a botegago le wa temogo gore a di nee dijo tša moya ka nako e swanetšego. Ka lehlakoreng le lengwe, mohlanka yo a botegago lehono o latela tlwaa bohlogo bja Kriste, o kgomarela melao ya motheo ya Beibele gomme o ikokobeletša tlhahlo ya moya o mokgethwa. Ge ka moka ga rena re dutše re šoma ka botee, re thabela seo Bakriste ba lekgolong la pele la mengwaga ba ilego ba se thabela, e lego gore “diphuthego di ile tša tšwela pele di matlafatšwa tumelong le go oketšega ka palo letšatši le letšatši.”—Dit. 16:5.