Batho ba Seswai ba a Phologa

Noa le lapa la gagwe gotee le diphoofolo ba ile ba tsena ka arekeng. Jehofa o ile a tswalela mojako wa areka, ke moka pula ya thoma go na. E ile ya na kudu moo areka e ilego ya thoma go phaphamala. Mafelelong, lefase ka moka le ile la tlala meetse. Batho ka moka ba babe bao ba bego ba se ka arekeng, ba ile ba hwa. Eupša Noa le lapa la gagwe ba be ba phela ka arekeng. Ba swanetše go ba ba ile ba thaba gore ba kwele Jehofa, na ga go bjalo?

Pula e ile ya na ka matšatši a 40 le mašego a 40 ke moka ya khula. Ka morago ga moo, meetse a pula yeo a ile a thoma go fokotšega. Mafelelong, areka e ile ya dula godimo ga thaba. Eupša go be go sa na le meetse a mantši mo lefaseng, ka gona Noa le lapa la gagwe ba be ba sa kgone go tšwa ka arekeng.

Ge nako e dutše e eya, meetse ao a ile a oma. Noa le lapa la gagwe ba dutše ka arekeng nako ya ka godimo ga ngwaga. Ke moka Jehofa o ile a ba botša gore ba tšwe ka arekeng gomme ba thome go phela lefaseng leo le hlwekilego. Ba ile ba leboga Jehofa gore o ba phološitše, gomme ba mo direla sehlabelo.

Jehofa o ile a thabela sehlabelo seo. O ile a tshepiša gore a ka se sa bolaya diphedi ka moka mo lefaseng ka meetse. O ile a dira molalatladi wa mathomo go bontšha gore a ka se sa dira seo. Na o kile wa bona molalatladi?

Ke moka Jehofa o ile a botša Noa le lapa la gagwe gore ba be le bana gomme ba tlale lefase.